Published:Updated:

“ரஜினி எங்களோடு சேர்ந்தாக வேண்டும் என்று சொன்னதில்லை!”

பொன்.ராதாகிருஷ்ணன்
பிரீமியம் ஸ்டோரி
News
பொன்.ராதாகிருஷ்ணன்

- ‘பொறுப்பாக’ பதில் சொல்கிறார் பொன்.ராதாகிருஷ்ணன்...

‘மாத்துவோம் எல்லாத்தையும் மாத்துவோம்!’ என்று டாப் கியரில் தமிழக அரசியலைத் தெறிக்கவிட்ட ரஜினிகாந்த், திடீரென ‘அரசியல் கட்சி தொடங்கவில்லை... மன்னித்துவிடுங்கள்’ என்று ‘யூ டர்ன்’ எடுத்ததில் அதிர்ந்து போயிருப்பது ரசிகர்கள் மட்டுமல்ல... சிலபல தலைவர்களும்தான்! இந்தச் சூழலில், தமிழக பா.ஜ.க-வின் மூத்த தலைவரும், முன்னாள் மத்திய அமைச்சருமான பொன்.ராதாகிருஷ்ணனிடம் பேசினேன்...

“ரஜினியின் ‘அரசியல் கட்சி ஆரம்பிக்கவில்லை’ என்கிற அறிவிப்பு, தமிழக பா.ஜ.க-வுக்குப் பின்னடைவுதானே?’’

“நிச்சயமாகக் கிடையாது. ‘நல்லவர்கள் யாராக இருந்தாலும், அவர்கள் அரசியலுக்கு வருவது நல்லது’ என்று மட்டும்தான் பா.ஜ.க நினைக்கிறது. மற்றபடி, ‘ரஜினிகாந்த் அரசியலில் இறங்கி எங்களோடுதான் சேர்ந்தாக வேண்டும் என்றோ, எங்களோடு கூட்டணி அமைக்க வேண்டும்’ என்றோ நாங்கள் ஓரிடத்திலும் சொன்னது கிடையாது.’’

“ஆனாலும் ஆடிட்டர் குருமூர்த்தி, அர்ஜுனமூர்த்தி என ரஜினியின் தொடர்புகள் பா.ஜ.க-வின் முகங்களாகத்தானே இருந்தன?’’

“பா.ஜ.க-வின் அறிவுசார் பிரிவிலிருந்த அர்ஜுனமூர்த்தி, தனிப்பட்ட விருப்பத்தின் பேரில் ரஜினியிடம் சென்றார். அதனால்தான், ‘நான் கேட்டுக்கொண்டதற்கிணங்க, ஒரு பெரிய கட்சியிலிருந்து விலகி வந்தவர் அர்ஜுனமூர்த்தி’ என்று ரஜினியே கூறியிருக்கிறார். ‘ரஜினி அரசியலுக்கு வர வேண்டும்’ என்பது ‘துக்ளக்’ பத்திரிகையின் ஆசிரியராக இருந்த மறைந்த சோ மற்றும் அவரது இதழின் நிலைப்பாடாக இருந்தது. சோ மறைவுக்குப் பிறகு ஆசிரியர் பொறுப்பேற்றிருக்கும் ஆடிட்டர் குருமூர்த்தியும் தங்களது இதழின் நிலைப்பாட்டைத்தான் சொல்லிவருகிறார். மற்றபடி ரஜினிகாந்தை பா.ஜ.க-வுக்கு வரும்படி குருமூர்த்தி அழைத்ததாக எந்தச் செய்தியும் கிடையாது. அப்படியிருக்கும்போது, ரஜினியையும் பா.ஜ.க-வையும் இணைத்து நாமாக ஏன் கற்பனை செய்துகொள்ள வேண்டும்?’’

“அப்படியென்றால், ‘அ.தி.மு.க கூட்டணியின் முதல்வர் வேட்பாளராக எடப்பாடி பழனிசாமியை ஏற்றுக்கொள்ள மாட்டோம்’ என்ற தமிழக பா.ஜ.க-வின் பிடிவாதப் பின்னணி என்ன?’’

“அ.தி.மு.க - பா.ஜ.க இடையே நல்ல உறவு இருக்கிறது... கூட்டணியும் தொடர்கிறது. இதில், பா.ஜ.க அகில இந்தியக் கட்சியாக இருப்பதால், கட்சி சார்ந்த முடிவுகளை தேசியத் தலைமைதான் முடிவெடுக்கும். இதில் பொன்.ராதாகிருஷ்ணனோ அல்லது வேறு யாரோ கருத்து சொல்வதற்கு அதிகாரம் கிடையாது. எங்களது இந்த நிலைப்பாட்டைத்தான் தொடர்ந்து சொல்லி வருகிறோம். மற்றபடி ‘எங்களுக்கு வேறொரு முதலமைச்சர் வேட்பாளர் இருக்கிறார்’ என்று எங்கள் கட்சியைச் சேர்ந்த எந்தத் தலைவராவது சொல்லியிருக்கிறார்களா?’’

பொன்.ராதாகிருஷ்ணன்
பொன்.ராதாகிருஷ்ணன்

“அ.தி.மு.க துணை ஒருங்கிணைப்பாளர் கே.பி.முனுசாமி, முதல்வர் வேட்பாளர் மற்றும் கூட்டணி ஆட்சி குறித்து பா.ஜ.க-வுக்குக் கடுமையான பதிலடி கொடுத்திருக்கிறாரே..?’’

“அரசியல் கட்சித் தலைவர்கள் தங்கள் கட்சியின் வளர்ச்சிக்காகவும், தேர்தல் களத்தில் தொண்டர்களை உற்சாகப்படுத்தவும் பேசிக்கொண்டிருக்கிறார்கள். அதில் எந்தத் தவறும் இல்லை. பா.ஜ.க - அ.தி.மு.க கூட்டணியில், சட்டமன்றத் தேர்தல் குறித்தோ தொகுதி உடன்பாடு குறித்தோ இதுவரை எந்தப் பேச்சுவார்த்தையும் நடைபெறவில்லை. அப்படியிருக்கும்போது கூட்டணி ஆட்சிக் கோரிக்கையை பா.ஜ.க முன்வைத்தது என்று சொல்ல இயலாது.”

“ஆனால், தமிழக பா.ஜ.க துணைத் தலைவர் அண்ணாமலை, ‘ஹெச்.ராஜாவை சட்டமன்ற உறுப்பினராக்கி, அமைச்சராக்குவோம்’ என்று சொல்லியிருக்கிறாரே..?’’

“அண்ணாமலை பொதுக்கூட்டத்தில் அப்படிப் பேசினாரா அல்லது எங்கள் கட்சித் தொண்டர்களை உற்சாகப்படுத்த அப்படிப் பேசினாரா என்று எனக்குத் தெரியவில்லை. ஹெச்.ராஜா திறமையாக வேலை செய்யக் கூடியவர். எனவே, அவரை அமைச்சராக்குவதற்கு உண்டான சூழல்கள் அமைந்தால், அமைச்சராக்குவார்கள். மற்றபடி ‘இந்தக் கூட்டணியில் போட்டியிட்டு வெற்றிபெற்று ஹெச்.ராஜாவை அமைச்சராக்குவோம்’ என்று அண்ணாமலை பேசவில்லை. அதேபோல், ‘கூட்டணி ஆட்சி கிடையாது’ என்று அவர் சார்ந்திருக்கும் கட்சியின் நிலைப்பாட்டைத்தான் கே.பி.முனுசாமியும் கூறியிருக்கிறார். இருவரின் பேச்சிலும் தவறு இல்லை!’’

“ரஜினி அரசியலுக்கு வரவில்லை என்பது உறுதியாகிவிட்டதால்தான் தமிழக பா.ஜ.க., அ.தி.மு.க கூட்டணியுடன் சமரசம் செய்துகொள்ளும் முடிவுக்கு வந்துவிட்டதா?’’

“ரஜினி, ‘நான் அரசியலுக்கு வரவில்லை’ என்று அறிவிப்பதற்கு முந்தைய நாள்கூட எங்கள் மாநிலத் தலைவர், ‘அ.தி.மு.க-வுடன் கூட்டணி தொடர்கிறது’ என்றுதான் செய்தியாளர்களிடம் அறிவித்திருக்கிறார். ரஜினியை முன்வைத்து அ.தி.மு.க-விடம் நாங்கள் எந்தப் பேரமும் பேசவில்லை. ரஜினிகாந்த் நல்ல நண்பர்; மனிதர்! அவரை மதிக்கக்கூடிய எல்லோரும் எப்போதும் மதிப்பார்கள். ரஜினிகாந்தை இதுவரை தி.மு.க-வும் விமர்சனம் செய்ததில்லை. அதற்காக, தி.மு.க-வும் தங்கள் கூட்டணிக்கு ரஜினிகாந்தை வரவேற்றுக் காத்திருந்தார்கள் என்று சொல்வீர்களா? ‘எங்கள் கட்சியிலும் 90 சதவிகிதம் பேர் இந்துக்கள்தான். நாங்கள் ஆன்மிகத்துக்கு எதிரானவர்கள் இல்லை’ என்று தி.மு.க-வினர் சொல்லிவருகிறார்களே... அப்படியென்றால், ‘தி.மு.க-வுக்கும் ரஜினிக்கும் இடையே பேச்சுவார்த்தை நடந்திருக்கிறது’ என்று நான்தான் சொல்ல முடியுமா!’’