Published:Updated:

தி.மு.க-வுக்கு சென்றிருந்தால் அமைச்சராகியிருப்பேன்!

பீட்டர் அல்போன்ஸ்
பிரீமியம் ஸ்டோரி
பீட்டர் அல்போன்ஸ்

- ‘பளிச்’ பீட்டர் அல்போன்ஸ்

தி.மு.க-வுக்கு சென்றிருந்தால் அமைச்சராகியிருப்பேன்!

- ‘பளிச்’ பீட்டர் அல்போன்ஸ்

Published:Updated:
பீட்டர் அல்போன்ஸ்
பிரீமியம் ஸ்டோரி
பீட்டர் அல்போன்ஸ்
“பா.ஜ.க விரித்த மதவாத வலையில் காங்கிரஸ் மாட்டிக்கொண்டிருக்கிறது. அடுத்து ஆட்சியைப் பிடிக்க வேண்டுமானால், தமிழ்நாடு சட்டப்பேரவைத் தேர்தலில் ஸ்டாலின் பயன்படுத்திய யுக்தியை காங்கிரஸ் பின்பற்ற வேண்டும்” என காங்கிரஸ் கட்சியின் மூத்த தலைவர் பீட்டர் அல்போன்ஸ் பேசியிருக்கிறார். காங்கிரஸ் கட்சி மீதான விமர்சனங்கள் குறித்து அவரிடம் உரையாடினோம்...

“ ‘தளபதி தலைமையில் இந்தியாவை வென்றெடுப்போம்’ என நீங்கள் எழுதிய கட்டுரை, காங்கிரஸ் கட்சிக்குள்ளேயே முணுமுணுப்பை ஏற்படுத்தியிருக்கிறதே..?”

“ `ஸ்டாலின் தலைமையில் இந்தியாவில் ஆட்சி அமைப்போம்’ என்று சொல்லவில்லையே... `இந்தியாவை மீட்டெடுப்போம்’ என்றுதானே சொல்லியிருக்கிறேன்... இந்திய அரசியலின் விழுமியங்களுக்கு, தத்துவங்களுக்கு இன்னும் சொல்லப்போனால் காங்கிரஸின் அடிப்படைக் கொள்கைகளுக்கு நேரவிருக்கும் ஆபத்தை உணர்ந்தவர்கள், என் கட்டுரையில் இருக்கும் நியாயத்தைப் புரிந்துகொள்வார்கள்.”

“பா.ஜ.க-வுக்கு எதிராக காங்கிரஸை நிறுத்தாமல் தி.மு.க-வை முன்னிலைப்படுத்துவது சரியா?”

“மதவாத அரசியலை, தத்துவங்களை பா.ஜ.க-வால் கொண்டு சேர்க்க முடியாத ஒரே மாநிலம் தமிழ்நாடு மட்டும்தான். கேரளத்தில், மேற்கு வங்கத்தில் ஆட்சி அமைப்பதில் பா.ஜ.க தோற்றிருக்கலாம். ஆனால், அங்கெல்லாம் தங்களுக்கான வாக்கு விகிதத்தை உயர்த்திக்கொண்டிருக்கிறார்கள். ஆனால், தமிழ்நாட்டில் மட்டும்தான் எந்தத் தாக்கத்தையும் அவர்களால் ஏற்படுத்த முடியவில்லை. அதற்குக் காரணம், திராவிட அரசியலின் வலிமையும் தி.மு.க தலைவர் மு.க.ஸ்டாலினின் செயல்முறையும்தான்.”

தி.மு.க-வுக்கு சென்றிருந்தால் அமைச்சராகியிருப்பேன்!

“காங்கிரஸ் எங்கே சறுக்கியது?”

“பல்வேறு சூழலில் காங்கிரஸ் செய்துகொண்ட பல சமரசங்களால்தான் 58 விழுக்காடாக இருந்த வாக்குவங்கி சுருங்கி, இந்த நிலைமைக்கு வந்திருக்கிறது. பட்டியலின மக்கள் ஏன் நமக்கு வாக்களிக்கவில்லை... சிறுபான்மையின மக்கள் ஏன் நம்மை நம்பவில்லை... மதச்சார்பற்ற அரசியலில் நம்பிக்கை உடைய மக்கள் நம்முடன் ஏன் தொடர்ந்து நிற்கவில்லை ஆகிய கேள்விகளை காங்கிரஸ் கேட்டுக்கொள்ள வேண்டும். இவையெல்லாம் சரியாகக் கேட்கப்பட்ட இடம் தமிழ்நாடு மட்டும்தான். பா.ஜ.க-வுக்கு எதிரான அரசியல் சக்திகளைச் சேதாரமில்லாமல் ஒன்று சேர்க்கவேண்டிய கடமை காங்கிரஸுக்கு இருக்கிறது!”

“காங்கிரஸ் கட்சிக்குள் இருக்கும் உட்கட்சிப்பூசலுக்கு எப்போதுதான் முடிவு?”

“உட்கட்சிப்பூசல்கள் குறித்து ஊடகங்களில் பேச நான் விரும்பவில்லை. ஆனால், வாய்ப்பு கிடைக்கும்போதெல்லாம் கட்சியினரிடையே பேசியிருக்கிறேன். தற்போது, கருத்துகளைக் கட்சி நிர்வாகிகளுக்குள் பகிர்ந்துகொள்ளும் வாய்ப்பும் தமிழ்நாடு காங்கிரஸில் இல்லை. அது, எனக்குப் பெரிய ஆதங்கமாகவே இருக்கிறது.”

“தமிழ்நாடு காங்கிரஸ் கமிட்டி தலைவர்களிடம் நீங்கள் எதிர்பார்ப்பது, சொல்ல நினைப்பது என்ன?”

“தேசிய அளவிலும், தமிழ்நாட்டு அளவிலும் காங்கிரஸின் கொள்கைகளுக்கு ஆபத்து இருப்பதாக நினைக்கிறேன். எனக்குச் செயல்படுவதற்குச் செயல்திட்டம், பேச மேடை, எழுதுவதற்குப் பத்திரிகை கொடுங்கள். பா.ஜ.க-வை எதிர்க்க தி.மு.க-வால், தமிழ்நாடு முதல்வர் மு.க.ஸ்டாலினால் மட்டுமே முடியும் என்பதால், அவரது தலைமைக்கு தமிழ்நாடு காங்கிரஸ் வலு சேர்க்கவாவது செய்ய வேண்டும்.”

“தி.மு.க-வுக்கு வலுசேர்க்க காங்கிரஸ் தரப்பில் எந்த முன்னெடுப்பும் செய்வதில்லை எனக் குற்றம்சாட்டுகிறீர்களா?”

“பா.ஜ.க-வுக்கு எதிராக மக்களை ஒன்று திரட்டுவதற்கு இதுதான் சரியான நேரம். அதை உணர்ந்து தி.மு.க செயலாற்றிக்கொண்டிருக்கிறது. ஆனால், தமிழ்நாடு காங்கிரஸில் அதைச் செய்ய மாட்டேன் என்கிறார்கள் என்பதுதான் என்னுடைய ஆதங்கம். குறை சொல்லல் அல்ல!”

“தி.மு.கபோலச் செயல்பட வேண்டும் என்பதைத் தலைமையிடம் சொல்லியிருக்கிறீர்களா?”

“ராகுல் காந்திக்கு நிறைய கடிதம் எழுதியிருக்கிறேன். நேரில் சந்திக்கும்போதும் இதை நிச்சயம் எடுத்துச் சொல்வேன்.”

தி.மு.க-வுக்கு சென்றிருந்தால் அமைச்சராகியிருப்பேன்!

“ ‘கொடுத்த பதவிக்காகப் பேசுகிறார். தி.மு.க-வுக்கு அடிமையாகவே மாறிவிட்டார்’ என்று பா.ஜ.க செய்தித் தொடர்பாளர்களும் ‘மதவாத நண்டு’ என ஹெச்.ராஜாவும் உங்கள்மீது விமர்சனக் கணைகளை வீசுகிறார்களே?”

“தி.மு.க-வுக்குச் சென்றிருந்தால் நான் எம்.பி-யாகவோ, அமைச்சராகவோ நிச்சயம் ஆகியிருப்பேன். ஆனால், என்னுடைய நோக்கம் அதுவல்ல. எனக்குக் கொள்கை முக்கியம். அதிலிருந்து நான் இதுவரை தடம்புரண்டதில்லை. தமிழகத்தை உத்தரப்பிரதேசமாகவும், கோவையை குஜராத்தாகவும் மாற்ற பா.ஜ.க முயல்கிறது. அதற்கு நானும், என்னுடைய செயல்பாடுகளும் மிகப்பெரிய தடையாக இருக்கிறோம். அந்தக் கோபத்தில் விமர்சிக்கிறார்கள். நண்பர் ராஜாபோல நான் தரம் தாழ்ந்து யாரையும் பேசியதில்லை, விமர்சித்ததுமில்லை. அவர் பேசியது அவருக்கு... நான் பேசுவது எனக்கு!”

“ஏழு ஆண்டுக்கால பா.ஜ.க ஆட்சி, 10 ஆண்டுக்கால அ.தி.மு.க ஆட்சி, நான்கு ஆண்டுக்கால எடப்பாடி ஆட்சி, கடந்த 100 நாள்கள் தி.மு.க ஆட்சி குறித்து உங்கள் பார்வை என்ன?”

“70 ஆண்டுகளாக உருவாக்கிவைக்கப்பட்டிருந்த அனைத்தையும் சீரழித்து, மதவாத அரசாக முழுதாக மாறி நிற்கிறது பா.ஜ.க அரசு. பெங்களூருக்கும் ஹைதராபாத்துக்கும் சென்றால்தான் கடந்த 10 ஆண்டுக்கால அ.தி.மு.க-வில் நாம் என்ன இழந்திருக்கிறோம் என்று தெரியும். எடப்பாடியின் நான்கு ஆண்டுகளில் தமிழ்நாட்டை வேட்டைக்காடாகப் பயன்படுத்தி, மக்களின் வரிப்பணத்தில் மட்டுமல்லாமல், கடன் வாங்கிக் கொள்ளையடித்திருக்கிறார்கள். பொருளாதாரம் சார்ந்த தெளிவு தொடங்கி, எதிர்க்கட்சிகளுக்கு உரிய மரியாதை கொடுக்கப்படும் சூழல் வரை கடந்த நூறு நாள்களில் நேர்மறை அரசியல் நாகரிகம் உருவாகியிருக்கிறது. கேரள முதல்வரைப் பாராட்டிப் பழகியவர்கள், தற்போது தமிழ்நாடு முதல்வர் மு.க.ஸ்டாலினைப் பாராட்டத் தொடங்கியிருக்கிறார்கள். இது இன்னும் பல ஆண்டுகள் தொடரும்!”

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism