Published:Updated:

`தமிழ்நாடு என்ன அடிமை தேசமா?' - - அஞ்சல்துறை தேர்வில் தமிழ் ரத்துக்கு வலுக்கும் எதிர்ப்பு!

மலையரசு

தேர்தல் முடிந்து நாளை அஞ்சல்துறை தேர்வு நடைபெற இருக்கும் நிலையில் இரண்டு நாள் முன்பாக இந்த அறிவிப்பு வெளியிடப்பட்டுள்ளது தமிழகத்தில் கடும் அதிர்ச்சியை ஏற்படுத்தியுள்ளது

அஞ்சல்துறை
அஞ்சல்துறை

இந்திய அஞ்சல்துறை தொடர்பாக போஸ்ட்மேன் உள்ளிட்ட பணியிடங்களுக்கு நடைபெறும் தேர்வு தமிழ் உள்ளிட்ட மாநில மொழிகளில் எழுத முடியாது என்று நேற்று முன்தினம் மத்திய அரசு தபால்துறைக்கு சுற்றறிக்கை அனுப்பியுள்ளது. அதில், அஞ்சல்துறையில் உள்ள பல்வேறு பணியிடங்களுக்கான முதல்தாளுக்கான தேர்வு இனிமேல் இந்தி மற்றும் ஆங்கிலத்திலேயே நடத்த வேண்டும். இரண்டாம் தாளுக்கான தேர்வை அந்தந்த மாநில மொழிகளில் நடத்திக்கொள்ளலாம் என அறிவிக்கப்பட்டிருந்தது.

அஞ்சல்துறை
அஞ்சல்துறை

முன்னதாக மக்களவை தேர்தலுக்கு முன்பு கடந்த மே மாதம் இதே பணியிடங்கள் தொடர்பாக அறிவிக்கப்பட்டபோது, தமிழ் மொழியில் தேர்வை எழுதலாம் என அறிவிக்கப்பட்டது. ஆனால், தற்போது தேர்தல் முடிந்துள்ளநிலையில், நாளை அஞ்சல்துறை தேர்வு நடைபெற இருக்கும் நிலையில் இரண்டு நாள் முன்பாக இந்த அறிவிப்பு வெளியிடப்பட்டுள்ளது தமிழகத்தில் கடும் அதிர்ச்சியை ஏற்படுத்தியுள்ளது. இந்த அறிவிப்பால் மத்திய அரசுக்கு எதிராக கண்டனங்கள் எழுந்துள்ளன. இந்த அறிவிப்புக்கு தமிழக அரசியல் கட்சித் தலைவர்கள் கடும் கண்டனங்களைத் தெரிவித்துள்ளனர்.

ஓரவஞ்சகத்தின் வெளிப்பாடு - ஸ்டாலின்!

தி.மு.க தலைவர் ஸ்டாலின் விடுத்துள்ள கண்டனத்தில், ``மத்திய அரசின் சுற்றறிக்கைக்கு திமுக சார்பில் கடும் கண்டனங்களை தெரிவித்துக்கொள்கிறேன். தபால்துறை தேர்வுகள் இதுவரை மாநில மொழிகளில் நடந்துவந்த நிலையில், இனி இந்தி, ஆங்கிலத்தில் மட்டுமே தேர்வு நடைபெறும் என திடீரென அறிவித்துள்ளது. மத்திய அரசுப் பணிகளில் தமிழகம் உள்ளிட்ட தென் மாநிலங்களில் உள்ளவர்கள் யாரும் நுழைந்து விடக்கூடாது என்று சதி எண்ணத்துடன் திட்டமிட்டு இதைச் செயல்படுத்தியுள்ளது. மாநில மொழிகளை அலட்சியம் செய்யும் வகையில் மத்திய பா.ஜ.க. அரசு செயல்படுவது மிகுந்த வேதனையளிக்கிறது.

ஸ்டாலின்
ஸ்டாலின்

தமிழக மின்வாரியத்தில் வட மாநிலத்தவருக்கு வேலை கொடுக்க வேண்டும் என்று அதிமுக அரசைக் கட்டாயப்படுத்தி விதிகளை மாற்ற வைத்த பா.ஜ.க இப்போது மத்திய அரசுத் துறைகளில் தமிழக இளைஞர்களுக்கு மொழி உரிமையின் அடிப்படையில் கிடைக்க வேண்டிய வேலைவாய்ப்பையும் தட்டிப்பறிப்பது ஓரவஞ்சகத்தின் ஒட்டு மொத்த வெளிப்பாடு" எனக் குறிப்பிட்டுள்ளார்.

தமிழக மாணவர்களுக்கு எதிரானது - ராமதாஸ்!

பா.ம.க நிறுவனர் ராமதாஸ், ``அஞ்சல்துறை தேர்வுகளை தமிழில் எழுத முடியாது என அஞ்சல்துறை அறிவித்திருப்பது கண்டிக்கத்தக்கது. தேர்வு நாளை நடைபெறவுள்ள நிலையில் திடீரென வெளியிடப்பட்டுள்ள இந்த அறிவிப்பு தமிழக மாணவர்களுக்கு எதிரானது; கடுமையாக கண்டிக்கத்தக்கது. அறிவிப்பை ரத்து செய்யவேண்டும். தேசிய அளவிலான பல்வேறு போட்டித் தேர்வுகள் தமிழில் நடத்தப்படும் நிலையில், அஞ்சல்துறை தேர்வுகளில் மட்டும் அந்தத் தேர்வுகளை கடைசி நேரத்தில் ரத்து செய்தது தமிழக மாணவர்களுக்கு இழைக்கப்படும் அநீதி ஆகும்.

ராமதாஸ்
ராமதாஸ்

இந்த முடிவை எதிர்த்து பாதிக்கப்பட்ட மாணவர்கள் மூலம் வழக்கு தொடரப்படும். இந்தி, ஆங்கிலத்தில் மட்டுமே தேர்வுகளை நடத்துவதால், அஞ்சல்துறையில் வட இந்தியர்கள் அதிக அளவில் ஊடுருவ வாய்ப்பு ஏற்படும். தமிழே தெரியாத அவர்களை தமிழகத்தில் பணியமர்த்தினால் எவ்வாறு பணி செய்வார்கள்? தமிழ் முகவரிகளை எவ்வாறு படித்து கடிதங்களை வழங்குவர்?" எனக் கண்டனங்களைத் தெரிவித்துள்ளார்.

மிகப்பெரிய போராட்டக்களமாக மாறும் - திருமாவளவன்!

திருமாவளவன்,``இரண்டு நாட்களுக்கு முன்னர்தான் நாடாளுமன்றத்தில் ரயில்வே துறை மானியக் கோரிக்கைமீது பேசும்போது ரயில்வே துறை வேலைகளில் வெளிமாநிலத்தவர் தமிழ்நாட்டில் திணிக்கப்படுவதைத் தடுக்கவேண்டும் என விசிக சார்பில் வலியுறுத்தினோம். இப்போது அஞ்சல்துறையில் இந்த அநீதி இழைக்கப்படுகிறது. மத்திய அரசு இந்த அறிவிப்பை உடனடியாகத் திரும்பப் பெறவேண்டும். தமிழிலும் எழுத அனுமதிக்கவேண்டும். இல்லாவிடில் தமிழகம் மிகப்பெரிய போராட்டக்களமாக மாறும் என எச்சரிக்கிறோம்" எனக் கூறியுள்ளார்.

திருமாவளவன்
திருமாவளவன்

தமிழ்நாடு அடிமை தேசமா? - வேல்முருகன்!

தமிழக வாழ்வுரிமை கட்சித் தலைவர் வேல்முருகன், ``மோடி அரசு திணிக்கும் சட்டங்கள், திட்டங்கள், நடைமுறைகள் எல்லாம் தமிழகத்தின் இருப்பையே கேள்விக்குள்ளாக்குபவை. அதனால் தொடர்ந்து நாம் எதிர்த்துவருகிறோம். ஆனால் அந்த எதிர்ப்பைப் பொருட்படுத்தாமல், வேண்டுமென்றே வலிந்து மேலும் தன் சதிச்செயலைத் தொடர்கிறார் மோடி. தமிழ்-தமிழர்-தமிழ்நாடு என்ற அடையாளத்தையே இல்லாமல் செய்வதுதான் மோடியின் நோக்கம் என்பது தெரிந்துதான் அவரிடம் கேள்வி எழுப்புகிறோம். தமிழ்நாடு என்ன பாஜக மோடி படையெடுத்து வென்று கைப்பற்றிக் கொண்ட அடிமை தேசமா? அஞ்சல் துறைப் பணித் தேர்விலிருந்து தமிழை நீக்குவதென்பது இந்திய ஒன்றியத்திலிருந்து தமிழகத்தை நீக்குவதற்கே சமம்" எனக் கண்டனம் தெரிவித்துள்ளார்.