Published:Updated:

`சுரங்கம் தோண்டினால் இடுக்கி நொறுங்கும்; முல்லைப் பெரியாறு உடையும்’- மாநிலங்களவையில் வைகோ எச்சரிக்கை

கலிலுல்லா.ச

``இங்கே சுரங்கம் தோண்டும்போது, 30 கிலோமீட்டர் தொலைவில் உள்ள கேரளா மாநிலத்தின் மிகப்பெரிய இடுக்கி அணை உடைந்து நொறுங்கும். அதேபோல, பென்னி குயிக் கட்டிய, தமிழகத்திற்குத் தண்ணீர் வழங்குகின்ற முல்லைப் பெரியாறு அணையும் உடைந்து நொறுங்கும்.''

வைகோ
வைகோ

மாநிலங்களவையில், பூஜ்ய நேரத்தின்போது ம.தி.மு.க எம்.பி வைகோ உரையாற்றினார். அப்போது, ``தமிழ்நாட்டில் தேனி மாவட்டம் பொட்டிபுரம் கிராமத்தில், அம்பரப்பர் மலை என்ற கடினப் பாறைகளை உடைத்து நொறுக்கி, நியூட்ரினோ துகள்கள் ஆய்வு மையத்தை அமைக்க இந்திய அரசு திட்டம் வகுத்து இருக்கின்றது. அதற்காக, 1200 டன் டைனமைட் வெடி பொருள்களைப் பயன்படுத்தி, 12 லட்சம் டன் கடினப் பாறைகளையும் ஒட்டுமொத்தமாக 20 லட்சம் டன் பாறைகளையும் உடைத்து நொறுக்கப்போகின்றார்கள்.

ராஜ்யசபாவில் வைகோ
ராஜ்யசபாவில் வைகோ

இந்தச் சுரங்கம் ஒரு கிலோ மீட்டர் நீளம் 25 மீட்டர் அகலம் 15 மீட்டர் சுற்றளவில் அமைகிறது. உள்ளே, பக்கவாட்டில் மேலும் இரண்டு சுரங்கங்கள் ஒரு கிலோ மீட்டர் நீளத்திற்குத் தோண்டப் போகிறார்கள். இந்த மூன்று சுரங்கங்களும் இணைகின்ற மையப் புள்ளியில் மட்டும் 11 லட்சம் டன் பாறை வெட்டி எடுக்கப்பட இருக்கிறது. இந்த நியூட்ரினோ திட்டத்தால், உலகின் தொன்மையான கடினப் பாறைகள் நிறைந்த மேற்குத் தொடர்ச்சி மலையில் மிகக் கடுமையான சுற்றுப்புறச் சூழல் சீர்கேடு ஏற்பட இருக்கிறது.

`பிரதமர் மோடி மேசையைத் தட்டி வரவேற்றது நெகிழ்ச்சியைத் தந்தது!' - வைகோ

இந்த மேற்குத் தொடர்ச்சி மலையை, ஐ.நா மன்றத்தின் யுனெஸ்கோ பண்பாட்டு மையம் உலக பண்பாட்டுச் சின்னங்களில் ஒன்றாக அறிவித்து இருக்கிறது. இங்கே சுரங்கம் தோண்டும்போது, 30 கிலோமீட்டர் தொலைவில் உள்ள கேரளா மாநிலத்தின் மிகப்பெரிய இடுக்கி அணை உடைந்து நொறுங்கும். அதேபோல, பென்னி குயிக் கட்டிய, தமிழகத்திற்குத் தண்ணீர் வழங்குகின்ற, முல்லைப் பெரியாறு அணையும் உடைந்து நொறுங்கும். நியூட்ரான் மற்றும் நியூட்ரினோ இரண்டுக்கும் உள்ள வேறுபாட்டை நான் அறிவேன்.

மாநிலங்களவையில்பேசும் வைகோ
மாநிலங்களவையில்பேசும் வைகோ

நியூட்ரினோ திட்டம் அமைய இருக்கின்ற இடத்தில் இருந்து 2.5 கிலோமீட்டர் தொலைவில் கேரள எல்லை தொடங்குகிறது. அங்கே மதிகெட்டான் சோலைக் காடுகள் உள்ளன. இவை பாதுகாக்கப்பட்ட காடுகளாக அறிவிக்கப்பட்டு இருக்கின்றன. மனிதர்களால் ஏற்படுத்தப்படும் நிலநடுக்கங்கள் குறித்து புவியியல் அறிஞர்கள் எச்சரிக்கை செய்துள்ளனர்.

இந்தத் திட்டத்தை எதிர்த்து சென்னை உயர் நீதிமன்றத்தின் மதுரைக் கிளையில் நான் வழக்குத் தொடுத்து வாதாடினேன். அப்போது, இதற்கு முன்பு வழங்கப்பட்டுள்ள உச்ச நீதிமன்ற, மாநில உயர் நீதிமன்றங்களின் தீர்ப்புகளை மேற்கோள் காட்டினேன். எனவே, 2015-ம் ஆண்டு மார்ச் மாதம் 22-ம் நாள், மதுரை உயர் நீதிமன்றம் நியூட்ரினோ திட்டத்திற்குத் தடை விதித்து இருக்கிறது. அதேபோல, 'பூவுலகின் நண்பர்கள்' என்ற தொண்டு நிறுவனம், தேசிய பசுமைத் தீர்ப்பாயத்தில் தடை ஆணை பெற்றிருக்கிறது. நியூட்ரினோ திட்டத்தை எதிர்த்து, 2018-ம் ஆண்டு மே மாதம் நான் மதுரையில் இருந்து கம்பத்திற்கு 200 கிலோமீட்டர் தொலைவுக்கு பிரசார நடைப்பயணம் மேற்கொண்டேன். அதன் தொடக்க நாளில், மறுமலர்ச்சி தி.மு.கழகத்தின் விருதுநகர் மாவட்ட இளைஞர் அணி துணை அமைப்பாளர் சிவகாசி ரவி தன் மேனிக்குத் தீ வைத்துக்கொண்டு, நியூட்ரினோ திட்டத்திற்கு எதிராக முழக்கங்களை எழுப்பி, தன் உயிரை ஈந்தார்.

அம்பரப்பர் மலை
அம்பரப்பர் மலை

இந்த நியூட்ரினோ திட்டத்தின் முக்கிய நோக்கங்களுள் ஒன்று, உலகின் எந்த இடத்திலும் உள்ள அணுகுண்டுகளைச் செயல் இழக்கச் செய்வதாகும். எனவே, நாகசாகி ஹிரோஷிமா போல எதிரி நாடுகளின் முதன்மையான தாக்குதல் மையமாகத் தமிழ்நாடு ஆகிவிடும் ஆபத்து ஏற்பட்டிருக்கிறது. கேரள மாநில முன்னாள் முதல்வர்கள் அச்சுதானந்தன், உம்மன்சாண்டி ஆகியோர் இந்தத் திட்டத்தை எதிர்த்து குரல்கொடுத்துள்ளனர். எனவே, இந்தத் திட்டத்தைக் கைவிடுமாறு இந்திய அரசை வலியுறுத்துகின்றேன்” என்று பேசினார். கேரள நாடாளுமன்ற உறுப்பினர்கள் மேஜையைத் தட்டி வரவேற்றனர். வைகோவின் கருத்தை நாங்களும் ஆதரிக்கின்றோம் என்றனர்.