Published:Updated:

குமரியில் பறக்கப்போவது யார் கொடி?

விஜய் வசந்த்
பிரீமியம் ஸ்டோரி
விஜய் வசந்த்

துறைமுகத் திட்டம் வந்தால், தங்கள் கிராமங்களை காலி செய்துவிடுவார்கள் என்று கன்னியாகுமரி கடலோர கிராம மக்கள் அச்சத்தில் இருக்கிறார்கள்

குமரியில் பறக்கப்போவது யார் கொடி?

துறைமுகத் திட்டம் வந்தால், தங்கள் கிராமங்களை காலி செய்துவிடுவார்கள் என்று கன்னியாகுமரி கடலோர கிராம மக்கள் அச்சத்தில் இருக்கிறார்கள்

Published:Updated:
விஜய் வசந்த்
பிரீமியம் ஸ்டோரி
விஜய் வசந்த்

கன்னியாகுமரி நாடாளுமன்ற இடைத்தேர்தலில் மக்கள் நீதி மய்யம், நாம் தமிழர் கட்சி உள்ளிட்டவை களத்தில் இருந்தாலும், பா.ஜ.க - காங்கிரஸ் இடையேதான் நேரடி மோதல். பா.ஜ.க சார்பில் தொடர்ந்து ஒன்பதாவது முறையாகக் களமிறங்குகிறார் பொன்.ராதாகிருஷ்ணன். காங்கிரஸ் வேட்பாளரான விஜயகுமார் என்கிற விஜய் வசந்துக்கு இதுதான் முதல் தேர்தல்.

கன்னியாகுமரி எம்.பி-யாக இருந்த வசந்த குமார் 2020, ஆகஸ்ட் மாதம் உடல்நலக்குறைவால் மறைந்ததைத் தொடர்ந்து, காலியாக அறிவி க்கப்பட்ட கன்னியாகுமரி நாடாளுமன்றத் தொகுதிக்கு தமிழக சட்டமன்றத் தேர்தல் நடக்கும் ஏப்ரல் 6-ம் தேதியன்று இடைத்தேர்தல் நடக்கிறது. இதனால் கன்னியாகுமரி மாவட்ட மக்கள் இரண்டு ஓட்டுகள் பதிவு செய்ய வேண்டிய நிலை ஏற்பட்டுள்ளது.

‘‘மத்தியில் நடப்பது பா.ஜ.க ஆட்சி. பொன்.ராதாகிருஷ்ணன் வெற்றிபெற்றால் கன்னியாகுமரி மாவட்டத்துக்கு மீண்டும் ஒரு மத்திய அமைச்சர் கிடைப்பார். மீதமிருக்கும் மூன்று ஆண்டுகளில் வளர்ச்சித் திட்டங்கள் கன்னியாகுமரியில் வந்து குவியும்’’ எனப் பிரசாரம் செய்கிறது பா.ஜ.க. ‘‘பெட்ரோல், டீசல், காஸ் விலையை மத்திய அரசு ஏற்றிவிட்டது. பொன்.ராதாகிருஷ்ணன் வந்தால் துறைமுகம் போன்ற திட்டங்களைக் கொண்டுவந்து மீனவர்களின் வாழ்வாதாரத்தை அழித்துவிடுவார்’’ எனப் பிரசாரம் செய்கிறது காங்கிரஸ்.

பொன்.ராதாகிருஷ்ணன்
பொன்.ராதாகிருஷ்ணன்

துறைமுகத் திட்டம் வந்தால், தங்கள் கிராமங்களை காலி செய்துவிடுவார்கள் என்று கன்னியாகுமரி கடலோர கிராம மக்கள் அச்சத்தில் இருக்கிறார்கள். அதனால்தான் கடந்த நாடாளுமன்றத் தேர்தல் பிரசாரத்தின்போது, ‘‘யார் தடுத்தாலும் துறைமுகம் வந்தே தீரும்’’ என்று முழங்கிய பொன்.ராதாகிருஷ்ணன் இப்போது, ‘‘மக்கள் விரும்பும் திட்டங்களைக் கொண்டுவருவேன். 3,000 கோடி ரூபாய் செலவில் துறைமுகம் தூத்துக்குடிக்குப் போய்விட்டது’’ என்று பிரசாரம் செய்கிறார். விஜய் வசந்தோ, ‘‘துறைமுகம் வராது என பொன்.ராதாகிருஷ்ணன் பொய் சொல்கிறார். மக்கள் விரும்பாத திட்டங்களைக் கொண்டுவர மாட்டேன். என் தந்தை விட்டுச் சென்ற பணிகளைத் தொடர்ந்து செய்வேன்’’ என்று பிரசாரம் செய்கிறார்.

தி.மு.க - காங்கிரஸ் கூட்டணி பலம், சிறுபான்மையினரின் வாக்குகள் ஆகியவற்றைவைத்து வெற்றிக்கனியைப் பறித்துவிடலாம் என்ற நம்பிக்கையில் இருக்கிறார் விஜய் வசந்த். தனது முன்னாள் அமைச்சர் செல்வாக்கு, அமைச்சராக இருந்தபோது நிறைவேற்றிய திட்டங்கள் மற்றும் மத்தியில் பா.ஜ.க ஆட்சியில் இருப்பது ஆகியவை தன்னைக் கரை சேர்க்கும் என்று நம்புகிறார் பொன்.ராதாகிருஷ்ணன்.

‘‘கடந்த எட்டு பொதுத்தேர்தல்களில் போட்டியிட்ட பொன்.ராதாகிருஷ்ணன் 1999, 2014 ஆகிய இரண்டு முறை மட்டுமே வெற்றிபெற்றுள்ளார். 1999 தேர்தலில் தி.மு.க-வுடன் கூட்டணி அமைத்து பா.ஜ.க வென்றது. 2014 தேர்தலில் காங்கிரஸ், தி.மு.க., அ.தி.மு.க., சி.பி.எம் கட்சிகள் தனித்தனியாக நின்றதால் எதிரணி வாக்குகள் பிரிந்து, பொன்.ராதாகிருஷ்ணன் வெற்றிபெற்றார். கடந்த 2019 தேர்தலில் அ.தி.மு.க கூட்டணியில் பா.ஜ.க சார்பில் பொன்.ராதாகிருஷ்ணனும், தி.மு.க கூட்டணியில் காங்கிரஸ் சார்பில் வசந்தகுமாரும் போட்டியிட்டார்கள். இதில் வசந்தகுமார் 6,27,235 வாக்குகளையும், பொன்.ராதாகிருஷ்ணன் 3,67,302 வாக்குகளையும் பெற்றனர். 2,59,933 வாக்குகள் வித்தியாசத்தில் மிகப்பெரிய வெற்றியைப் பெற்றார் வசந்தகுமார். 2019-2021 இடைப்பட்ட இரண்டு ஆண்டுகளில் மக்கள் மனவோட்டத்தில் எந்த மாற்றமும் இல்லை. எனவே, இம்முறையும் காங்கிரஸ் பக்கமே காற்றுவீசும்’’ என்கிறார்கள் அரசியல் பார்வையாளர்கள்.

குமரியில் பறக்கப்போவது யார் கொடி?

விஜய் வசந்திடம் பேசினோம். ‘‘மக்கள் விரும்பும் திட்டங்களைக் கொண்டுவருவேன்னு சொல்றவங்க, மக்கள் விரும்பாத சரக்குப் பெட்டகத் துறைமுகத்தை ஏன் கொண்டுவர்றாங்க? ஜெயிச்சா மத்திய அமைச்சர்னு அவங்க பிரசாரம் செய்யறதெல்லாம் எடுபடாது. ஏன்னா... ஏற்கெனவே, ரெண்டு முறை மத்திய அமைச்சரா இருந்தவரைத்தானே மக்கள் புறக்கணிச்சாங்க. அப்பாவைப் போல நானும் குமரி மாவட்ட மக்களின் குரலா நாடாளுமன்றத்துல ஒலிக்கணும்னு நினைக்கிறேன். அப்பா மேல அளவுக்கு அதிகமான மதிப்பும் மரியாதையும் மக்கள்வெச்சிருக்காங்க. அப்பா விட்டுட்டுப்போன பணிகளை மக்களுக்குச் செய்ய ஒரு வாய்ப்பு கிடைச்சிருக்கு’’ என்றார்.

பொன்.ராதாகிருஷ்ணனோ, ‘‘கன்னியாகுமரி மாவட்ட மக்களுக்கு எழுச்சி வேண்டுமா, வீழ்ச்சி வேண்டுமா என்பதுதான் எனது கேள்வி. மக்கள் விரும்பும் திட்டங்களைக் கொண்டு வருவேன்னு சொல்லும் நீங்க, இதுவரை என்ன கொண்டுவந்திருக்கீங்க? வசந்த குமார்கிட்ட ஏன் திட்டம் கொண்டு வரலைன்னு கேட்டா, பொன்.ராதாகி ருஷ்ணன்கிட்ட கேளுங்கன்னு சொன்னார். அதாவது, ‘எங்களால எதுவும் முடியலை’னு ஒப்புக்கிட்டார் விஜய் வசந்தின் டாடி. மக்கள் மத்தியில குழப்பத்தை ஏற்படுத்தவே, துறைமுகம் திட்டத்தை காங்கிரஸ் கையில் எடுத்திருக்குது. நகைக்கடனை ரத்து பண்ணுறேன்னு கடந்த முறை மக்களை ஏமாத்தினாங்க. இந்தமுறை மக்கள் ஏமாற மாட்டாங்க’’ என்றார்.

இப்போதைய சூழலில் களத்தில் காங்கிரஸ் - பா.ஜ.க சமபலத்தோடு மோதுகின்றன. ஆனால், சிறுபான்மை வாக்குகள் சிதறாமல் காங்கிரஸுக்குச் செல்லும் என்பது விஜய் வசந்துக்கு பலம்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism