Published:Updated:

``ஆளுநர் எல்லா தவறுகளையும் கண்டறிந்துவிடுகிறார் என திமுக-வுக்கு வருத்தம்” - வானதி சீனிவாசன்

வானதி சீனிவாசன்

``திமுக அரசுக்கு தனது விருப்பம்போலச் செயல்பட முடியவில்லை. எல்லா உண்மைகளையும், தவறுகளையும் ஆளுநர் கண்டுபிடித்து, பிரதமருக்கு உடனுக்குடன் சொல்லிவிடுகிறார்.” - வானதி சீனிவாசன்

``ஆளுநர் எல்லா தவறுகளையும் கண்டறிந்துவிடுகிறார் என திமுக-வுக்கு வருத்தம்” - வானதி சீனிவாசன்

``திமுக அரசுக்கு தனது விருப்பம்போலச் செயல்பட முடியவில்லை. எல்லா உண்மைகளையும், தவறுகளையும் ஆளுநர் கண்டுபிடித்து, பிரதமருக்கு உடனுக்குடன் சொல்லிவிடுகிறார்.” - வானதி சீனிவாசன்

Published:Updated:
வானதி சீனிவாசன்

பாஜக தேசிய மகளிரணித் தலைவரும், எம்எல்ஏ-வுமான வானதி சீனிவாசன் வெளியிட்டிருக்கும் அறிக்கையில், “தமிழக ஆளுநர் ஆர்.என்.ரவியைத் திரும்பப் பெற வேண்டும் என, திமுக கூட்டணிக் கட்சிகள், குடியரசுத் தலைவர் அலுவலகத்தில் மனு அளித்துள்ளனர். அதில், ‘மக்களால் தேர்ந்தெடுக்கப்படாத ஆளுநர், மக்களால் தேர்ந்தெடுக்கப்பட்ட மாநில அரசை கொள்கை அளவிலும், செயல்பாட்டு அளவிலும் எதிர்ப்பது மக்களாட்சிக்கு சாவுமணி அடிக்கும் செயல்’ எனக் கூறப்பட்டுள்ளது.

வானதி சீனிவாசன்
வானதி சீனிவாசன்

திமுக-வுக்கு ஆளுங்கட்சியாக இருக்கும்போதுதான், ஆளுநர் மக்களால் தேர்ந்தெடுக்கப்படாதவர் என்பதெல்லாம் நினைவுக்கு வரும். திமுக எதிர்க்கட்சியாக இருந்தபோது, சென்னாரெட்டி, சுர்ஜித்சிங் பர்னாலா ஆகியோர் மூலம், அன்றைய அதிமுக அரசுக்குக் கொடுத்த நெருக்கடிகளை மக்கள் மறந்திருப்பார்கள் என திமுக நினைக்க வேண்டாம்.

ஆளுநர் மக்களால் நேரடியாகத் தேர்ந்தெடுக்கப்படாதவராக இருக்கலாம். ஆனால் அவர், மக்களால் தேர்ந்தெடுக்கப்பட்ட மத்திய அரசின் பரிந்துரையின் பேரில் நியமிக்கப்பட்டவர். எனவே, ஆளுநரும் மக்களால் தேர்ந்தெடுக்கப்பட்ட அரசின் பிரதிநிதிதான். இந்திய அரசியலமைப்புச் சட்டத்தில் ஆளுநருக்கென வகுக்கப்பட்டிருக்கும் அதிகாரங்களின்படியே ஆளுநர் ரவி செயல்படுகிறார்.’சமுதாயத்தைப் பிளவுபடுத்தும் நோக்கிலான, மதரீதியான கருத்துகளை பொதுவெளியில் ஆளுநர் பேசிவருகிறார்.

ஆளுநர் ரவி
ஆளுநர் ரவி

`மக்கள் மனங்களில் வெறுப்பைத் தூண்டி, சமூகப் பதற்றத்தை உண்டுபண்ணும் நோக்கத்துடன் திட்டமிட்டு அவரது பேச்சுகள் அமைந்துள்ளன. திருக்குறளுக்கு மதச்சாயம் பூசுவது, திராவிட மரபையும், தமிழ்ப் பெருமையையும் விமர்ச்சித்துவருகிறார்’ என்றும் திமுக கூட்டணிக் கட்சிகளின் மனுவில் கூறப்பட்டிருக்கிறது.

கிறிஸ்தவ மதத்தைப் பரப்புவதற்காக தமிழகத்துக்கு வந்த ஜி.யு.போப் மொழிபெயர்த்த திருக்குறளில் உள்ள குறைகளை, விமர்சனக் கண்ணோட்டத்தோடு விமர்சிப்பது எப்படி மதச்சாயம் பூசுவதாகும்... திருக்குறளில் இந்து மதம் வலியுறுத்தும் அறம், பொருள், இன்பம் பற்றிக் கூறப்பட்டுள்ளது. இந்துக் கடவுள்கள் பற்றிய குறிப்புகளும் உள்ளன.

திருக்குறள்
திருக்குறள்
Feswa

திருக்குறளை ஆங்கிலத்தில் மொழிபெயர்த்த கிறிஸ்தவப் பாதிரியார் ஜி.யு.போப், அதிலுள்ள 'ஆன்மிகம்' என்ற 'ஆன்மா'வை தவிர்த்துவிட்டார் என ஆளுநர் கூறியிருக்கிறார். இந்த விமர்சனத்துக்காகக் கொந்தளிக்கும் திமுக-வினர், திருக்குறள் பற்றி, பெரியார் ஈ.வெ.ரா கூறியதை ஒரு முறை படித்துப் பார்க்க வேண்டும்.

ஆளுநர் ரவிக்குத் தனது கருத்துகளைச் சுதந்திரமாகத் தெரிவிக்கும் உரிமை உள்ளது. அதில், திமுக-வுக்கு உடன்பாடு இல்லையெனில், 'கருத்துக்குக் கருத்து' என்று, ஜனநாயகரீதியில் பதில் அளிக்கலாம். அதைவிடுத்து அவரைப் பதவியிலிருந்து நீக்குமாறு கோருவதன் மூலம், திமுக-வுக்கு ஜனநாயக வழியிலான கருத்து பரிமாற்றத்தில் நம்பிக்கை இல்லை என்பதையே காட்டுகிறது.

கோவை கார் வெடிப்பு
கோவை கார் வெடிப்பு

திமுக அரசு தனது அரசியல் ஆதாயத்துக்காகச் சட்டத்தை மீறும்போது, சட்டம் - ஒழுங்கை பாதிக்கும் பயங்கரவாதத் தாக்குதலுக்குத் திட்டமிடப்பட்டதைக்கூட, வாக்குவங்கி அரசியலுக்காக மறைக்க முயலும்போதும் மாநில அரசை தட்டிக்கேட்கும் கடமை பொறுப்பில் ஆளுநர் இருக்கிறார். கடமையைச் செய்தவரை எதற்காகப் பதவியிலிருந்து நீக்க வேண்டும்?

திமுக அரசுக்கு தனது விருப்பம்போலச் செயல்பட முடியவில்லை. எல்லா உண்மைகளையும் தவறுகளையும் ஆளுநர் கண்டுபிடித்துவிடுகிறார். அதை மத்திய உள்துறை அமைச்சர், பிரதமருக்கு உடனுக்குடன் சொல்லிவிடுகிறார் என வருத்தம் இருக்கலாம். அதனால், திமுக-வினருக்கு இழப்பும் ஏற்பட்டிருக்கலாம்.

திமுக அண்ணா அறிவாலயம்
திமுக அண்ணா அறிவாலயம்

தமிழகத்தின் நலன், தமிழக மக்களின் நலனைக் கருத்தில்கொண்டே ஆளுநர் செயல்பட்டுவருகிறார். எனவே, ஆளுநர்மீது வெறுப்பைக் கக்காமல், மோதல் போக்கைக் கடைப்பிடிக்காமல் தமிழகத்தின் நலனுக்காக அவருடன் திமுக அரசு இணைந்து செயல்பட வேண்டும்” என்று குறிப்பிட்டிருக்கிறார்.