சின்ன அக்காள் ஆகிய நான்...

“பகவத் கீதையை மட்டும் அண்ணா பல்கலைக் கழகத்தில், தத்துவப் பாடமாக அறிமுகப்படுத்தியது இந்துத்துவத்தைப் பரப்பும் நோக்கம்தானே?’’

. “பகவத்கீதை என்பது, இந்த நாட்டில் முகிழ்த்த, இந்த நாட்டுக்குச் சொந்தமான ஒரு நூல்! எனவே அது அந்நியம் கிடையாது. அடுத்ததாக, சகலவிதமான சிந்தனைகளையும் உள்ளடக்கியதுதான் இந்துத்துவம். எனவே, மற்ற மதங்களுக்கு முரணாக இந்துத்துவத்தைப் பார்ப்பதே தவறானது. உலகிலுள்ள எத்தனையோ பல்கலைக்கழகங்களில், பகவத் கீதையைக் கட்டாயப் பாடமாகவே வைத்திருக்கிறார்கள். ஆனால், இங்கே விருப்பப் பாடமாகத்தான் வைத்திருக்கிறார்கள். எனவே விருப்பம் இல்லாதவர்கள் ஒதுக்கித்தள்ளிவிடலாம். இங்கேயேகூட, மற்ற மத நூல்களைச் சமச்சீர்க் கல்வியில் ஆரம்பித்து சி.பி.எஸ்.இ பாடத்திட்டங்கள் வரை பள்ளிக்கூடங்களில் கட்டாயப் பாடமாக வைத்திருக்கிறோமே...!’’

. “இடைத்தேர்தலில், பி.ஜே.பி கூட்டணியை உறுதி செய்வதில், அ.தி.மு.க-விடம் ஒருவிதத் தயக்கம் நிலவியது ஏன்?’’

. “தேசிய ஜனநாயகக் கூட்டணியில் எந்தவிதக் குழப்பமும் கிடையாது. பா.ஜ.க-வுக்கு மாநிலத் தலைவர் இல்லாத சூழலில், யாரை அணுகுவது என்ற தயக்கம் அ.தி.மு.க-வினருக்கு ஒருவேளை இருந்திருக்கலாம். மற்றபடி எங்கள் கூட்டணி இப்போதும் சிறப்பாகத் தொடர்கிறது.’’

. “தமிழ் சிறந்த மொழி, மூத்த மொழி என்றெல்லாம் ஐ.நா-விலேயே பேசுகிற பிரதமர் மோடி, கடந்த ஐந்தாண்டுகளில் தமிழ் மொழி வளர்ச்சிக்காக என்ன செய்திருக்கிறார்?’’

. “தமிழ் மக்கள் மத்தியிலோ அல்லது தமிழக அரசியலுக்காகவோ, ‘தமிழ் மொழி உயர்ந்தது’ என்று பிரதமர் மோடி பேசவில்லை. இந்த மண்ணுக்கே தொடர்பில்லாத, வட இந்தியாவில் மாணவர்களுடனான ஓர் உரையாடலின்போதுதான் ‘சிறப்பான தமிழ் மொழியை நீங்கள் கற்றுக்கொள்ள வேண்டும்’ என்கிறார். உலக அரங்கில் அத்தனை நாட்டுத் தலைவர்களின் மத்தியில், தமிழில் பேசுகிறார். ‘தமிழைக் காப்பாற்றவில்லை...’ என்று மோடியைப் பார்த்துக் கேள்வி எழுப்புகிற இங்குள்ள அரசியல் கட்சியினர், தமிழுக்காக என்ன செய்திருக்கிறார்கள்?

. நான் படித்துவந்த தமிழ்வழிக் கல்வி பள்ளிக்கூடம்கூட இன்றைக்கு மூடிவிடக்கூடிய சூழல் ஏற்பட்டிருக்கிறது. ஆங்கிலவழிக் கல்வியில் மாணவர்கள் சேர விரும்புகிறார்கள் என்ற சூழலை ஏன் உருவாக்கியிருக்கிறோம்? தமிழ் மொழியை எடுத்துப் பட்டப் படிப்பு படித்தால், அது வாழ்க்கைக்கு உதவாது என்று சொல்லக்கூடிய நிலை சமுதாயத்தில் ஏற்பட்டிருப்பதற்கு யார் காரணம்? எனவே, மோடியைக் கேள்வி எழுப்புபவர்கள் அதற்கு முன்பாக தங்களைத் தாங்களே கேள்வி கேட்டுக்கொள்ள வேண்டும்.’’

. ‘`செம்மொழித் தமிழாய்வு நிறுவனத்துக்கான மத்திய அரசு நிதி ஒதுக்கப்படவில்லை, கீழடித் தொல்லியல் ஆய்வுப் பணிகளை மேற்கொள்ளவில்லை என மத்திய பா.ஜ.க அரசு மீதான குற்றச்சாட்டுகள் தொடர்கின்றனவே?’’

. ‘`இரண்டுமே தவறான தகவல்கள். செம்மொழித் தமிழாய்வு நிறுவனத்துக்கு எந்தெந்த வகையிலெல்லாம் உதவி செய்யவேண்டும், எந்தெந்த நிகழ்ச்சிகளுக்கு நிதியுதவி அளிக்க வேண்டும் என்பதுபோன்ற பல்வேறு வரையறைகள் இருக்கின்றன. இவற்றையெல்லாம் மத்திய அரசின் கவனத்துக்கு எடுத்துச் செல்லவேண்டும். ஆனால், பொத்தாம்பொதுவாக மத்திய அரசு, தமிழ்மொழிக்கு நிதியுதவி அளிக்கவில்லை என்று குற்றம் சாட்டிவிடுகிறோம். தமிழ்மொழி வளரவேண்டியது நம் வீட்டில், நம் உணர்வில். அதை விட்டுவிட்டு மத்திய அரசு கொடுக்கிற கோடிகளில் வளரக்கூடாது.’’

. “அஞ்சலகம், ரயில்வே என மத்திய அரசுத் துறை சார்ந்த பணித் தேர்வுகளில் எல்லாம் திட்டமிட்டுத் தமிழ் புறக்கணிக்கப்பட்டு வருகிற இந்தச் சூழலில், தமிழ்மொழி மீதான ஆர்வம் மக்களுக்கு எப்படி ஏற்படும்?’’

. ‘`அரசுத்துறைத் தேர்வுகளுக்காக மட்டும்தான் நம் மாணவர்கள் தயாராகிறார்களா? அரசுத் துறைப் பணிகள் என்பது ஒரு சதவிகிதத்துக்கும் குறைவானதொரு எண்ணிக்கை. தபால் துறையில் நடத்தப்படுகிற இந்தி மொழித் தேர்வுதான், இங்கேயுள்ள மக்கள் தங்கள் குழந்தைகளைத் தமிழ்வழியில் படிக்கவைக்கத் தடையாக இருக்கிறதா? ‘அரசுத்தேர்வில் இந்திமொழிதான் இருக்கிறது, தமிழ்மொழி இல்லை. அதனாலேயே நான் என் குழந்தையைத் தமிழ்வழியில் படிக்கவைக்கவில்லை’ என்று நாளை சொல்வீர்களா? நம் மொழியை நாமே காப்பாற்றவில்லை என்கிறபோது, ‘மத்திய அரசு கொடுக்கிற பத்துக் கோடி ரூபாய் என் மொழியைக் காப்பாற்றிவிடும்’ என்று நினைப்பது முட்டாள்தனம். எந்த இடத்தில், தமிழ்மொழி வளர்ச்சிக்கு உதவி செய்யவேண்டுமோ அதை மத்திய அரசு செய்துவருகிறது. திருவள்ளுவரையும் பாரதியாரையும் நாடு முழுக்க எடுத்துச் செல்வதற்கு பிரதமர் தயாராக இருக்கிறார். இதை நான்கு வருடங்களுக்கு முன்பே அறிவிப்பும் செய்துவிட்டார்.’’

. “தமிழர் வாழ்வின் தொன்மையைச் சொல்லுகிற, கீழடி ஆய்வுப் பணியில் மத்திய அரசு ஆர்வம் காட்டாதது ஏன்?’’

. “கீழடியைப் பொறுத்தவரை, மத்தியக் கலாசாரத் துறை அமைச்சரே நேரடியாக வந்து இடத்தைப் பார்வையிட்டு, ஒவ்வொரு கட்டமாக எப்படியெல்லாம் நிதி ஒதுக்கவேண்டுமோ அப்படியெல்லாம் நிதி ஒதுக்கீடு செய்தார். ஆனால், இடையில் அதிகாரிகள் பணி மாறுதல்கள் வந்தன. அடுத்ததாக, கீழடியில் கிடைக்கக்கூடிய சிறுசிறு கற்கள்கூட முக்கியத்துவம் வாய்ந்தவை. அப்படியிருக்கும்போது அகழ்வாய்வுப் பணியின் இடையே பருவ மழைக் காலம் வருகிறது. தோண்டப்பட்ட குழிகளுக்குள் மழைத்தண்ணீர் இறங்கினால், பாதிப்பு யாருக்கு... நமக்குத்தானே! அதனால்தான் பணிகளை அப்படியே நிறுத்திவிட்டுப் பாதுகாப்பாக மூடி வைக்கிறார்கள். கீழடி ஆராய்ச்சி என்பது ‘டூ மினிட்ஸ் நூடுல்ஸ் அல்ல.’

. சமீபத்தில்கூட, ‘மத்தியச் சுற்றுலாத்துறை அமைச்சரைச் சந்தித்துப் பேசிய ஒரு வாரத்தில், கீழடி ஆய்வு மற்றும் அருங்காட்சியகப் பணிகளுக்கான நிதி உதவி வந்து சேர்ந்துவிட்டதாக...’ தமிழ் வளர்ச்சித்துறை அமைச்சர் மாஃபா பாண்டியராஜன் தெரிவித்துள்ளார்.’’

. “ `பொதுமொழியாக இந்தி இருக்க வேண்டும்’ என்று பேசிய அமித்ஷாதானே, தி.மு.க-வின் போராட்ட அறிவிப்புக்குப் பிறகு, ‘நான் சொன்னது தவறாகப் புரிந்துகொள்ளப்பட்டுவிட்டது’ என்று பல்டியடித்தார்?’’

. ‘`பல்டியடித்தார் என்ற வார்த்தை தவறானது. ‘நான் மன்னிப்பு கேட்கிறேன்’, ‘நான் சொன்னதைத் திரும்பப் பெற்றுக்கொள்கிறேன்’, ‘நான் தவறாகச் சொல்லிவிட்டேன்’ என்றெல்லாம் அமித்ஷா பேசியிருந்தால்தான், பல்டியடித்தார் என்று சொல்ல வேண்டும். ஆனால், ‘நான் பேசியது தவறாகப் புரிந்துகொள்ளப்பட்டுவிட்டது’ என்ற விளக்கத்தைத்தான் கொடுக்கிறார்.’’

. “370-ஐ நீக்கினால், காஷ்மீரில் நிலம் வாங்கலாம் என்றீர்கள். ஆனால், 370 நீக்கப்பட்டபிறகு இப்போது அங்கே ஊடகத்தினர் செல்லக்கூட அனுமதி இல்லையே, என்னதான் நடக்கிறது?’’

. “யாருக்கு அனுமதி இல்லை? பத்திரிகையாளர்கள் என்ற பெயரில், அங்கே போய் அரசியல் செய்வோருக்குத்தான் அனுமதி இல்லை. இத்தனை ஆண்டுகளாக அங்கே நம் ராணுவ வீரர்கள் தீவிரவாதத்தால் கொல்லப்பட்டார்களே... அப்போதெல்லாம் இல்லாத மனித உரிமையைப் பற்றி இப்போது ஏன் கவலைப்படுகிறீர்கள்? நீண்ட நாள்களுக்குப் பிறகு கல்லெறி சம்பவம், துப்பாக்கிச் சூடு இல்லாத மாநிலமாக ஜம்மு காஷ்மீர் மாறி வருகிறது. எனவே, சற்றுப் பொறுங்கள். அந்த மக்கள் நமது தேசிய நீரோட்டத்தோடு கலந்து உறவாட வேண்டும். அதன்பிறகு, ‘நானும் நீயும் இந்தியன்’ என்ற மனநிலையோடு அங்கு செல்லுங்கள்.’’

. “தமிழகத்தின் அக்காள் தமிழிசை, தெலங்கானா ஆளுநராகிவிட்டார். தமிழக பா.ஜ.க-வின் அடுத்த அக்காள் வானதி சீனிவாசன்தான் என்கிறார்களே..?’’

. “கட்சிக்காரர்கள் எல்லோருக்குமே நான் அக்காள்தான். இதற்கு முன்பாக, தமிழிசையை, பெரிய அக்காள் என்பார்கள்; என்னைச் சின்ன அக்காள் என்பார்கள். மற்றபடி தமிழக பா.ஜ.க தலைவர் பொறுப்பு என்பதெல்லாம் கட்சித் தலைமை முடிவு செய்கிற விஷயம். யாருக்கு, எப்போது, என்ன பொறுப்பு கொடுக்க வேண்டும் என்பதெல்லாம் அவர்களுக்குத்தான் தெரியும். என் பணி என்பது தமிழகத்தில் கட்சியை வளர்ப்பது மட்டும்தான். வேறு எந்த விஷயத்திலும் என் கவனம் இல்லை.’’

சின்ன அக்காள் ஆகிய நான்...

த.கதிரவன்

க.பாலாஜி