Published:Updated:

கெத்து காட்டிய திருமா!

 திருமாவளவன்
பிரீமியம் ஸ்டோரி
திருமாவளவன்

தன் கட்சியின் சுயத்தை நிரூபிப்பதற்காக, தனிச் சின்னத்தில் போட்டியிடும் துணிச்சலான முடிவை எடுத்து அதில் வெற்றியும் கண்டிருக்கிறார் அவர்.

கெத்து காட்டிய திருமா!

தன் கட்சியின் சுயத்தை நிரூபிப்பதற்காக, தனிச் சின்னத்தில் போட்டியிடும் துணிச்சலான முடிவை எடுத்து அதில் வெற்றியும் கண்டிருக்கிறார் அவர்.

Published:Updated:
 திருமாவளவன்
பிரீமியம் ஸ்டோரி
திருமாவளவன்

விடுதலைச் சிறுத்தைகள் கட்சியின் அரசியல் பயணத்தில் முக்கியமானதொரு நாளாக மாறியிருக்கிறது மே 2. ம.தி.மு.க போன்ற கட்சிகளே உதயசூரியன் சின்னத்தில் போட்டியிட முடிவெடுத்த பிறகு, தனிச் சின்னத்தில் போட்டியிடுவதில் உறுதியாக இருந்தார் திருமா. இதன்படி, தனிச் சின்னத்தில் போட்டியிட்ட ஆறு வி.சி.க வேட்பாளர்களில் நான்கு பேர் சட்டமன்றத்துக்குள் நுழைகிறார்கள். இவர்களில் இரண்டு பேர் பொதுத்தொகுதியில் வெற்றிபெற்றவர்கள் என்பது கூடுதல் சிறப்பு.

2001 சட்டமன்றத் தேர்தலில், மங்களூர் தொகுதியில் போட்டியிட்ட திருமாவளவன் உதயசூரியன் சின்னத்தில் வெற்றிபெற்று சட்டமன்றம் சென்றார். ஆனால், தி.மு.க கூட்டணியில் ஏற்பட்ட மனக்கசப்பு காரணமாக, 2004-ல் பதவியை ராஜினாமா செய்தார். அதற்கடுத்து போட்டியிட்ட தேர்தல்களிலெல்லாம், தனிச் சின்னத்தில் போட்டியிட்டபோதும் அவர் கட்சியால் கணிசமான வெற்றியைப் பெற முடியவில்லை. 2006 தேர்தலில், அ.தி.மு.க கூட்டணியில் விடுதலைச் சிறுத்தைகளுக்கு ஒன்பது தொகுதிகள் ஒதுக்கப்பட்டன. ஆனால், இரண்டு இடங்களில் மட்டுமே வெற்றிபெற்றது. 2011 தேர்தலில் தி.மு.க கூட்டணியில், பத்து தொகுதியில் போட்டியிட்டு ஓர் இடத்தில்கூட வி.சி.க-வால் வெற்றிபெற முடியவில்லை. தொடர்ந்து, 2016 தேர்தலில், மக்கள் நலக் கூட்டணியில் 25 தொகுதிகளில் போட்டியிட்டும் வெற்றிபெற முடியவில்லை. காட்டுமன்னார் கோவிலில் போட்டியிட்ட கட்சியின் தலைவர் திருமாவளவன் வெறும் 87 ஓட்டுகள் வித்தியாசத்தில் வெற்றிவாய்ப்பை இழந்தார்.

இந்தநிலையில், 2021 தேர்தலில் தி.மு.க கூட்டணியில் விடுதலைச் சிறுத்தைகள் கட்சிக்கு ஆறு தொகுதிகள் ஒதுக்கப்பட்டன. கடந்த காலங்களில் இரட்டை இலக்கங்களில் போட்டியிட்டுவிட்டு தற்போது ஆறு தொகுதிகளுக்கு திருமாவளவன் ஒப்புக்கொண்டபோது, அவரின் ஆதரவாளர்களே அதிர்ச்சிக்குள்ளாயினர். ‘‘ஆறு சீட்டுகளுக்கு கட்சியை தி.மு.க-விடம் திருமாவளவன் அடமானம் வைத்துவிட்டார்’’ என்று விமர்சனங்கள் எழுந்தன. அப்படிக் கடுமையாக உதிர்த்த வார்த்தைகளையெல்லாம் நிதானமாகவும் பொறுமையாகவும் கையாண்டார்.

தி.மு.க கூட்டணியில் விடுதலைச் சிறுத்தைகளுக்கு செய்யூர், வானூர், திருப்போரூர், அரக்கோணம், காட்டுமன்னார்கோவில், நாகப்பட்டினம் ஆகிய தொகுதிகள் ஒதுக்கப்பட்டன. ஆறு தொகுதிகளிலும் உதயசூரியன் சின்னத்திலேயே போட்டியிடுமாறு தி.மு.க தரப்பிலிருந்து ஆலோசனை வழங்கப்பட்டது. அது நல்ல யோசனையாக இருந்தாலும், தன் கட்சியின் நலனையும் யோசிக்க வேண்டிய நெருக்கடிக்குத் தள்ளப்பட்டார் திருமாவளவன். தன் கட்சியின் சுயத்தை நிரூபிப்பதற்காக, தனிச் சின்னத்தில் போட்டியிடும் துணிச்சலான முடிவை எடுத்து அதில் வெற்றியும் கண்டிருக்கிறார் அவர்.

திருமாவளவன்
திருமாவளவன்

நம்மிடம் பேசிய வி.சி.க-வின் மூத்த நிர்வாகி ஒருவர், ‘‘மார்ச் 22-ம் தேதிதான் எங்கள் கட்சிக்கு பானைச் சின்னம் கிடைத்தது. வெறும் 14 நாள்களில் பிரசாரம் முடிந்துவிடும் நிலையில், வாக்காளர்களிடம் சின்னத்தைக் கொண்டுசேர்ப்பது சவாலாக இருந்தது. அந்தச் சவாலைத் திறம்பட கையாண்டு, நான்கு தொகுதிகளில் வெற்றிபெற்றிருக்கிறோம். அவற்றில், திருப்போரூர், நாகப்பட்டினம் இரண்டும் பொதுத் தொகுதிகள். இந்த வெற்றியின் மூலம், ‘ஒரு குறிப்பிட்ட சமூகத்துக்கான கட்சி விடுதலைச் சிறுத்தைகள்’ என்ற பிம்பம் சுக்குநூறாக உடைந்திருக்கிறது. பொது நீரோட்டத்தில் கலந்து, அனைத்துத் தரப்பு மக்களாலும் ஏற்றுக் கொள்ளப்பட்ட தலைவராக திருமாவளவன் திகழ்ந்தாலும், அனைத்துத் தரப்பு மக்களாலும் வி.சி.க ஏற்றுக்கொள்ளப்பட்டிருக்கிறதா என்பதற்குப் பின்னால் ஆயிரம் சந்தேகங்களும், கடுமையான விவாதங்களும் இருந்தன. அந்த விமர்சனங்களுக்கும் விவாதங்களுக்கும் முற்றுப்புள்ளி வைத்துவிட்டன இந்தத் தேர்தல் முடிவுகள்.

அ.தி.மு.க கூட்டணியில் அங்கம்வகித்த பா.ம.க 23 தொகுதிகளில் போட்டியிட்டு ஐந்திலும், 20 தொகுதிகளில் போட்டியிட்ட பா.ஜ.க நான்கிலும் வெற்றிபெற்றிருக்கின்றன. அவர்களின் வெற்றி விகிதாசாரத்தோடு ஒப்பிடும்போது, வி.சி.க மகத்தான வெற்றியைப் பெற்றிருக்கிறது. ஆறு தொகுதிகளில் தனிச் சின்னத்தில் களமிறங்கிய வி.சி.க., நான்கு தொகுதிகளில் வெற்றிபெற்றிருக்கிறது. மூன்றில் இரண்டு பங்கு வெற்றியை அடைந்து ‘கெத்து’ காட்டியிருக்கிறார் திருமா. இந்த வெற்றிக்குப் பின்னால், வி.சி.க-வின் கலை இலக்கிய அமைப்பான விடுதலைக் கலை இலக்கிய அமைப்பைச் சேர்ந்த இளைஞர்கள் இருக்கிறார்கள். தேர்தலுக்குப் பல நாள்களுக்கு முன்பாகவே, குறிப்பிட்ட பத்து தொகுதிகளைத் தேர்வுசெய்து யார், எங்கு சென்று வேலை செய்ய வேண்டும் என்ற திட்டமிடலுடன் தயாராக இருந்தார்கள். தொகுதிகள் அறிவிக்கப்பட்ட அடுத்த நாளே, களத்துக்குச் சென்று வேலையைத் தொடங்கி விட்டனர். பிரசாரப் பாடல்கள், நாடகங்கள் வாயிலாகத் தொகுதி முழுவதும் சின்னத்தையும் வேட்பாளரையும் கொண்டு சென்றார்கள்.

கட்சி நிர்வாகிகளின் உழைப்பு, கூட்டணிக் கட்சியினரின் ஒத்துழைப்பு என எல்லாவற்றையும் தாண்டி, திருமாவளவன் என்ற ஒற்றை மனிதனின் மீது, தமிழகத்தின் படித்த சமூகம், இளைய சமுதாயம்கொண்ட நம்பிக்கையும் இந்த வெற்றிக்குப் பின்னணியில் இருக்கிறது. உதாரணமாக, மருத்துவர்கள், வழக்கறிஞர்கள், பொறியாளர்கள் எனப் பலர் அங்கம்வகிக்கும் ‘பே பேக் டு சொசைட்டி’ அமைப்பு, காஞ்சி மக்கள் மன்றம் உள்ளிட்ட இயக்கங்களும் விடுதலைச் சிறுத்தைகள் கட்சியின் வேட்பாளர்களுக்காகக் களத்தில் தீவிரமாகப் பணியாற்றின’’ என்றார்.

‘அமைப்பாய்த் திரள்வோம்’ என முப்பதாண்டுகளுக்கு முன்பாகவே திருமாவளவன் தமிழ்ச் சமூகத்துக்கு அழைப்பு விடுத்தார். தன்னுடைய போராட்டங்களால், அணுகுமுறையால் சாதி, மதம் கடந்து அனைத்துத் தரப்பு மக்களும் வி.சி.க-வை நோக்கி வரவேண்டும் என்பது அவரது எதிர்பார்ப்பு. இந்தத் தேர்தல் முடிவுகள் அவரது எதிர்பார்ப்புக்கு ஒரு தொடக்கத்தை ஏற்படுத்தியிருக்கிறது!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism