Published:Updated:

ராஜீவ் காந்தி படுகொலை: விடுதலைப்புலிகளின் தலைவர் பிரபாகரன் சொன்னது என்ன..?

பிரபாகரன், ஆன்டன் பாலசிங்கம் - பத்திரிகையாளர் சந்திப்பு
News
பிரபாகரன், ஆன்டன் பாலசிங்கம் - பத்திரிகையாளர் சந்திப்பு

``நாங்கள் ஆரம்பத்திலேயே எங்களுடைய கருத்தைத் தெரிவித்திருக்கிறோம். எங்களைப் பொறுத்தவரைக்கும், இந்தக் கொலையை எங்கள்மீது சுமத்தப்பட்ட ஓர் அபாண்டமான குற்றச்சாட்டாகவே கருதுகிறோம்!" - பிரபாகரன்.

மறைந்த முன்னாள் இந்திய பிரதமர் ராஜீவ் காந்தியின் படுகொலைக்கு விடுதலைப்புலிகள்தான் காரணம் என ஒரு தரப்பினரும், இல்லை என மறுத்து இன்னொரு தரப்பினரும் பல ஆண்டுகளாகக் கருத்து தெரிவித்துவருகின்றனர். இந்திய அரசின் தரப்பில் விடுதலைப்புலிகள் மீதுதான் குற்றம்சாட்டப்பட்டிருக்கிறது. இதில், கொலைக் குற்றவாளிகளை விசாரித்த சி.பி.ஐ அதிகாரிகள் பலரும் ராஜீவ் படுகொலை தொடர்பாக, முழுமையான விசாரணை நடத்தப்படவில்லை, அனைத்துகோணங்களிலிருந்தும் விசாரணை கொண்டுசெல்லப்படவில்லை என பகிரங்கமாகக் குற்றம்சாட்டிவருகின்றனர். குறிப்பாக, கொலைச் சம்பவம் குறித்து விசாரித்த வர்மா கமிஷன், ஜெயின் கமிஷன் போன்ற விசாரணைக்குழுக்களும் விடுதலைப்புலிகளைத் தாண்டி பின்புலத்தில் உலகளாவிய புள்ளிகள் இருப்பதற்கான முகாந்திரமும், இந்திய அரசியல் புள்ளிகள் சம்பந்தப்பட்டிருப்பதற்கான சந்தேகங்களையும் எழுப்பி விசாரணை முடிவுகளை முன்வைத்தன.

ராஜீவ் காந்தி
ராஜீவ் காந்தி

ஆனால், அந்த சந்தேக நோக்கில் எந்த விசாரணையும் நடத்தப்படாமல் இறுதிவரை கிடப்பில் போடப்பட்டிருப்பதாகவும் கூறப்படுகிறது. இருப்பினும், மர்மங்கள் நிறைந்த ராஜீவ் காந்தியின் படுகொலை சம்பவத்துக்குக் காரணம் விடுதலைப்புலிகள் அமைப்புதான் என்ற கருத்துகளே தற்போதுவரை பொதுவெளியில் நீடிக்கிறது. இந்தச் சூழலில், ராஜீவ் காந்தி கொலைக்குக் காரணமாகச் சொல்லப்படும் விடுதலைப்புலிகள் அமைப்பின் விளக்கம் குறித்தும், முக்கியமாக விடுதலைப்புலிகளின் தலைவர் என்ன கூறினார் என்பதைப் பற்றியும் விவரிக்கிறது இந்தக் கட்டுரை.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

பத்திரிகையாளர் சந்திப்பு, கிளிநொச்சி, ஏப்ரல் 10, 2002:-

2002, ஏப்ரல் 10-ம் நாள் விடுதலைப்புலிகளின் அதிகாரபூர்வ அறிவிப்பை ஏற்று உலகின் பல நாடுகளிலிருந்து சுமார் 400-க்கும் மேற்பட்ட பத்திரிகையாளர்கள் புலிகள் கட்டுப்பாட்டிலிருந்த கிளிநொச்சியில் கூடியிருந்தார்கள். இதற்கு முன்பாக சின்னச் சின்ன பேட்டிகள் கொடுத்திருந்தாலும் இதுதான் புலிகளின், முதல் அதிகாரபூர்வமான மிகப்பெரிய ஊடகச் சந்திப்பாக இருந்தது. அதில் விடுதலைப்புலிகளின் தலைவர் பிரபாகரன், அரசியல் ஆலோசகர் ஆன்டன் பாலசிங்கம், அரசியல் பிரிவுப் பொறுப்பாளர் சுப.தமிழ்ச்செல்வன் உள்ளிட்ட தளபதிகள் கலந்துகொண்டனர். அதுவரை துப்பாக்கித் தோட்டாக்களையும், ஏவுகணை குண்டுகளையும் எதிர்கொண்டுவந்த புலிகள், முதன்முறையாகப் பத்திரிகையாளர்களின் கேள்விகளை எதிர்கொண்டனர்.

பிரபாகரன்
பிரபாகரன்

அந்த ஊடகச் சந்திப்பில், ராஜீவ் காந்தி படுகொலை குறித்து பத்திரிகையாளர்கள் கேட்ட கேள்விகளும் அதற்கு பிரபாகரன், ஆன்டன் பாலசிங்கம் அளித்த பதில்களும் உள்ளது உள்ளபடி உண்மை மாறாமல் அப்படியே இங்கு கொடுக்கப்பட்டிருக்கின்றன.

(குறிப்பு: சில கேள்வி, பதில்கள் ஆங்கிலம், தமிழ் எனக் கலந்து இருந்ததால், ஆங்கிலத்தில் உள்ளவை மட்டும் இங்கு தமிழாக்கம் செய்யப்பட்டிருக்கின்றன.)

பிரபாகரன், ஆன்டன் பாலசிங்கம் - பத்திரிகையாளர் சந்திப்பு
பிரபாகரன், ஆன்டன் பாலசிங்கம் - பத்திரிகையாளர் சந்திப்பு

பத்திரிகையாளர்களின் கேள்வி Vs விடுதலைப்புலிகளின் பதில்:

1). ராஜீவ் காந்தி படுகொலையில் நீங்கள் குற்றம்சாட்டப்பட்டிருப்பது பற்றி..?

பிரபாகரன்: இந்த கேஸ் வழக்கிலிருக்கும் வரைக்கும், நாம் இதைப் பற்றி ஒரு கருத்தைக் கூற முடியாதவர்களாக இருக்கிறோம்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

2). ராஜீவ் காந்தி படுகொலையில் நீங்கள் சம்பந்தப்படுத்தப்படுவதை மறுக்கிறீர்களா?

பிரபாகரன்: இது பத்து வருடங்களுக்கு முன்பு நடந்த ஒரு துன்பியலான சம்பவம். மேலும், இதைப் பற்றி நாங்கள் கருத்துகளைத் தெரிவிக்க விரும்பவில்லை. நாம் இப்போது ஒரு சமாதான முயற்சியில், வெளிநாட்டு அனுசரணையுடன் ஈடுபட்டிருப்பதால், மேற்கொண்டு இது போன்ற தற்கொலைத் தாக்குதல்கள் பற்றிப் பேச விரும்பவில்லை.

ஆன்டன் பாலசிங்கம், பிரபாகரன்
ஆன்டன் பாலசிங்கம், பிரபாகரன்

3). குற்றச்சாட்டுகள் குறித்து நீங்கள் சொல்லவரும் கருத்து?

ஆன்டன் பாலசிங்கம்: இது மிகவும் `உணர்வுப்பூர்வமான, முக்கிய பிரச்னை’ (sensitive issue) என்பது எனக்குத் தெரியும். உங்களுக்கு மட்டுமல்ல, எங்களுக்கும் அப்படித்தான். நாங்கள் இந்தியாவுடன் நட்புறவை மேற்கொள்ள விரும்புகிறோம். நீங்கள் 10 ஆண்டுகளுக்கு முன்பு நடந்த ஒரு சிக்கலை எழுப்புகிறீர்கள். அதைத்தான் திரு.பிரபாகரன் சொல்கிறார். தயவுகூர்ந்து கவனியுங்கள், இது ஒரு துன்பியல் சம்பவம். எனவே, இந்தக் கட்டத்தில் இது குறித்து எந்தக் கருத்தையும் கூறும் நிலையில் நாங்கள் இல்லை.

ஆன்டன் பாலசிங்கம்
ஆன்டன் பாலசிங்கம்

4) ராஜீவ் காந்தி படுகொலையில் சம்பந்தப்படுத்தபட்டதால்தான், போதிய ஆதரவு தமிழகத்திலும் இந்தியாவிலும் இன்றைக்கு குறைந்திருப்பதாக நீங்கள் நினைக்கிறீர்களா?

ஆன்டன் பாலசிங்கம்: சமாதான முன்னெடுப்புகள் நடந்துகொண்டிருக்கும் ஒரு சூழலில் நீங்கள் இங்கு வந்திருக்கிறீர்கள். இப்போது ஒரு சமாதான சூழல் இங்கு நிலவுகிறது. எதிர்காலத்தில் ஓர் ஒளிமயமான எதிர்காலம் எங்கள் மக்களுக்கு வர வேண்டும். நீங்கள் இந்தப் பழைய, இறந்தகால பிரச்னைகளைத் தோண்டிக்கொண்டு இருக்கிறீர்கள். நாங்களே சொல்லிவிட்டோம், இது ஒரு துன்பியல் சம்பவம். இது ஒரு துன்பகரமான சம்பவம். இது ஓர் அவலமான சம்பவம்! எனவே, இறந்தகாலத்தைத் தோண்டாதீர்கள்.

இவ்வாறாக, ராஜீவ் காந்தி படுகொலை தொடர்பாக கேட்கப்பட்ட கேள்விகளுக்கு தமிழீழ விடுதலைப்புலிகளின் தலைவர் பிரபாகரனும், அரசியல் ஆலோசகர் ஆன்டன் பாலசிங்கமும் பதிலளித்தனர்.

சுப. தமிழ்ச்செல்வன், பிரபாகரன், ஆன்டன் பாலசிங்கம்
சுப. தமிழ்ச்செல்வன், பிரபாகரன், ஆன்டன் பாலசிங்கம்

அதேபோல இந்தப் பத்திரிகையாளர் சந்திப்பு நடப்பதற்கு சில ஆண்டுகளுக்கு முன்னதாக, ஓர் ஆங்கில ஊடகவியலாளர் பிரபாகரனிடம் கண்ட தனிப்பட்ட பேட்டியில், Q) It does in my question for circumstantial evidence, the tiger was responsible for assassination of Rajiv Gandhi ? extremely strong! என ராஜீவ் காந்தி படுகொலை குறித்துக் கேட்கிறார். அதற்கு

பிரபாகரன் தமிழில் அளித்த பதில்: நாங்கள் ஆரம்பத்திலேயே எங்களுடைய கருத்தைத் தெரிவித்திருக்கிறோம். எங்களைப் பொறுத்தவரைக்கும், இந்தக் கொலையை எங்கள்மீது சுமத்தப்பட்ட ஓர் அபாண்டமான குற்றச்சாட்டாகவே கருதுகிறோம்!

அடுத்ததாக 2018-ம் ஆண்டு தமிழீழ விடுதலைப்புலிகள் அமைப்பானது, `ராஜீவ் காந்தியின் கொலைக்கும் எங்களுக்கும் எந்தச் சம்பந்தமும் இல்லை’ என மீண்டும் ஓர் அறிக்கையை வெளியிட்டு விளக்கமளித்தது.

தமிழீழ விடுதலைப் புலிகள் இயக்கம்
தமிழீழ விடுதலைப் புலிகள் இயக்கம்

விடுதலைப்புலிகள் வெளியிட்ட அறிக்கை - 2018:

`நாங்கள் பலமுறை தன்னிலை விளக்கம் அளித்தும், ஆதாரங்கள் பலவற்றை எடுத்துரைத்தும், மீண்டும் மீண்டும் புலிகள்தான் ராஜீவ் காந்தியைக் கொன்றார்கள் என்ற ஆதாரமில்லாத தவறான கருத்து தொடர்ந்து திணிக்கப்பட்டுவருகிறது. தொடர்கின்ற இது போன்ற தவறான பிரசாரத்தால், எங்கள் மக்கள் கையறுநிலைக்குத் தள்ளப்பட்டிருக்கிறார்கள்.

விடுதலைப் புலிகள்
விடுதலைப் புலிகள்

மேலும், இந்தியத் தலைமையைச் சீர்குலைக்கும் திட்டமோ, இந்தியாவைத் தாக்கும் திட்டமோ ஒருபோதும் புலிகளிடம் இருந்ததில்லை. இலங்கையைச் சாராத எந்தவொரு நபருக்கோ, தலைவருக்கோ எதிராக நாங்கள் ஒருபோதும் ஆயுதம் ஏந்தவில்லை. குறிப்பாக எந்தவோர் இந்திய தேசியத் தலைவருக்கும் எதிராகச் செயல்பட எப்பொழுதும் நினைத்ததில்லை. தொடர்ந்து அழிந்துகொண்டிருக்கும் எம் மக்கள்மீது, இது போன்ற அபாண்டமான குற்றச்சாட்டுகளை இனியும் பதிய வேண்டாம் என்று நாங்கள் கேட்டுக்கொள்கிறோம்.

பிரபாகரன்
பிரபாகரன்

'ராஜீவ் காந்தி படுகொலைக்கும் எங்களுக்கும் எந்தவித தொடர்பும் இல்லை' என முன்பே பலமுறை விடுதலைப்புலிகள் இயக்கம் கூறி இருக்கிறது. அதேபோல, ‘ராஜீவ் காந்தி படுகொலையில் எங்கள் இயக்கத்துக்கு எந்தத் தொடர்பும் இல்லை’ எனத் தெளிவாகக் கூறினார் பிரபாகரன். விடுதலைப்புலிகள் ஏற்பாடுசெய்திருந்த உலக இதழியலாளர் சந்திப்பின்போதுகூட, ‘ராஜீவ் காந்தி படுகொலை பற்றி என்ன நினைக்கிறீர்கள்' எனக் கேட்கப்பட்ட கேள்வி ஒன்றுக்கு, ‘அது ஒரு துன்பியல் சம்பவம்' என்று பிரபாகரன் பதிலளித்திருந்தார்.

முன்னாள் பிரதமர் ராஜீவ் காந்தி, விடுதலைப்புலிகளோடு ரகசிய உறவைப் பேணிவந்திருக்கிறார். இந்திய அரசுக்கும், விடுதலைப்புலிகளுக்கும் இடையே இருக்கும் உறவைத் தகர்த்தெறியும் உள்நோக்கோடு ஸ்ரீலங்கா அரசும், அந்நிய சக்திகளும் இணைந்து மேற்கொண்ட சூழ்ச்சியின் விளைவே, ராஜீவ் காந்தியின் படுகொலையென உறுதியாகக் கருதுகிறோம்’ என விடுதலைப்புலிகள் அமைப்பு வெளியிட்ட அறிக்கையில் தெரிவிக்கப்பட்டிருந்தது.

பிரபாகரன் - பாலசிங்கம்
பிரபாகரன் - பாலசிங்கம்
eelam view

ராஜீவ் காந்தி கொலை வழக்கின் பின்னணி:

1991, மே 21-ம் தேதி தேர்தல் பிரசாரத்துக்காக சென்னை ஶ்ரீபெரும்புதூர் பொதுக்கூட்டத்துக்கு வந்த ராஜீவ் காந்தி, மனித வெடிகுண்டால் படுகொலை செய்யப்படுகிறார். பின்னர், இந்தப் படுகொலையை நிகழ்த்தியது, தமிழீழ விடுதலைப்புலிகள் அமைப்பு என்று குற்றம்சாட்டப்பட்டு, அதன் தலைவர் பிரபாகரன், உளவுப் பிரிவு தளபதி பொட்டு அம்மான் உள்ளிட்டோரை தேடப்படும் குற்றவாளிகளாக இந்திய அரசாங்கம் அறிவித்தது. மேலும், இந்தியாவில் விடுதலைப்புலிகள் அமைப்பு செயல்படவும் தடைவிதித்தது. ஆரம்பத்தில், ராஜீவ் காந்தி கொலை தொடர்பாக 26 பேர் கைதுசெய்யப்பட்டனர். பின்னர் அவர்களில் 19 பேர் விடுதலை செய்யப்பட்டனர். மீதமுள்ள ஏழு பேருக்கு தூக்குத் தண்டனை விதிக்கப்பட்டு, பின்னர் அது ஆயுள்தண்டனையாக குறைக்கப்பட்டது.

ராஜீவ் காந்தி கொலை வழக்கில் சிறையில் இருக்கும் ஏழு தமிழர்கள்
ராஜீவ் காந்தி கொலை வழக்கில் சிறையில் இருக்கும் ஏழு தமிழர்கள்

கடந்த 30 ஆண்டுகளாக பேரறிவாளன், சாந்தன், முருகன், நளினி, ராபர்ட் பயஸ், ஜெயக்குமார், ரவிச்சந்திரன் உள்ளிட்ட ஏழு பேர் ராஜீவ் காந்தி கொலை வழக்கு தொடர்பாக சிறைவாசம் அனுபவித்துவருகின்றனர். இவர்களின் விடுதலைக்காக தமிழக அரசு சட்டப் போராட்டங்களையும், தமிழ் அரசியல் அமைப்புகள் களப் போராட்டங்களையும் நடத்திவருகின்றன. தமிழக முதல்வர் மு.க.ஸ்டாலின், ஏழு பேர் விடுதலை தொடர்பாக குடியரசுத்த லைவருக்கும், ஆளுநருக்கும் கடிதம் மூலம் கோரிக்கை வைத்துவருகிறார்.