'யார் முதல்வர் வேட்பாளர்?' - அ.தி.மு.க-வில் தகிக்கும் பஞ்சாயத்து

‘அ.தி.மு.க-வின் முதல்வர் வேட்பாளர் யார்?’ என்கிற விவாதம் வெடித்து, தமிழக அரசியலை தகிக்கவைத்திருக்கிறது. சட்டமன்றத் தேர்தலுக்கு இன்னும் எட்டு மாதங்கள் இருக்கும் நிலையில், முதல்வர் எடப்பாடி பழனிசாமிக்கு எதிராகவும் ஆதரவாகவும் அமைச்சர்கள் கம்பு சுற்ற ஆரம்பித்துவிட்டனர். அமைச்சர் களின் இந்த ‘திடீர்’ உருட்டலின் பின்னணியில், அவரவர் சொந்த மாவட்ட அரசியல் இருப்பதாகக் கூறப்படுகிறது. . அ.தி.மு.க-வின் மூத்த தலைவர் ஒருவரிடம் பேசினோம். ‘‘மதுரை மாநகர், மாவட்டச் செயலாளரான செல்லூர் ராஜூவின் கட்டுப்பாட்டில் மதுரை மேற்கு, மதுரை வடக்கு, மதுரை தெற்கு, மத்திய மதுரை ஆகிய சட்டமன்றத் தொகுதிகள் வருகின்றன. அதேபோல, மதுரை புறநகர் கிழக்கு மாவட்டச் செயலாளர் ராஜன் செல்லப்பாவின் கட்டுப்பாட்டில் மதுரை கிழக்கு, திருப்பரங்குன்றம், மேலூர் ஆகிய சட்டமன்றத் தொகுதிகள் வருகின்றன. இவற்றில், செல்லூர் ராஜூவின் கட்டுப்பாட்டிலிருந்து மதுரை தெற்கு, ராஜன் செல்லப்பாவிடமிருந்து திருப்பரங்குன்றம் ஆகிய தொகுதிகளைப் பிரித்தெடுத்து, மதுரை தெற்கு தொகுதி எம்.எல்.ஏ-வான எஸ்.எஸ்.சரவணனை மாவட்டச் செயலாளர் ஆக்குவதற்கு அமைச்சர் ஆர்.பி.உதயகுமார் முயல்கிறார். இதில்தான் பஞ்சாயத்து ஆரம்பித்தது.

மதுரை மாவட்டத்தை, அமைப்பு ரீதியாக மூன்றாகப் பிரித்ததையே செல்லூர் ராஜூவால் தாங்கிக்கொள்ள முடியவில்லை. தன்னிடம் உள்ள ஒரு தொகுதியை எப்படி விட்டுத் தருவார்? தன்னுடைய பலத்தை தலைமைக்குக் காட்டுவதற்காகத்தான் கொரோனாவிலிருந்து மீண்டதற்காக ஜூலை 31-ம் தேதி வரவேற்பு விழாவை நடத்திக்கொண்டார். ஊரடங்கு காலத்திலும் செல்லூராருக்குத் திரண்ட கூட்டத்தை முதல்வர் அறிந்துகொள்ள வேண்டும் என்பதுதான் அவரின் எண்ணம். அப்படியிருந்தும் தலைமை கண்டுகொள் ளவில்லை என்கிற ஆதங்கத்தில்தான், ‘எம்.எல்.ஏ-க்கள் கூடி முதல்வரைத் தேர்ந்தெடுப்போம்’ என எடப்பாடிக்கு செக் வைத்துள்ளார்.

. அமைச்சர் ராஜேந்திர பாலாஜியிடம் இருந்த விருதுநகர் மாவட்டச் செயலாளர் பதவி சில மாதங்களுக்கு முன்னர் பறிக்கப்பட்டது. சிறிது இடைவெளிக்குப் பிறகு, இப்போது மாவட்ட பொறுப்பாளராக அவர் நியமிக்கப்பட்டுள்ளார். தலைமை நினைத்தால் எந்நேரம் வேண்டுமானாலும் அவரைத் தூக்கிவிட்டு புதியவரை நியமிக்கலாம். மாவட்டச் செயலாளர் பதவியைத் தக்கவைத்துக் கொள்ளத்தான் எடப்பாடியை உயர்த்திப் பிடித்து ‘நிரந்தர முதல்வர் எடப்பாடி’ என்கிற கோஷத்தை ராஜேந்திர பாலாஜி முன்வைக்கிறார்.

. சில வாரங்களுக்கு முன்னர், விருதுநகர் மாவட்டத்திலிருந்து சில நிர்வாகிகள் முதல்வர் எடப்பாடி பழனிசாமி, அமைச்சர் வேலுமணி, துணை முதல்வர் ஓ.பி.எஸ் ஆகியோரைச் சந்தித்து ராஜேந்திர பாலாஜி குறித்து நீண்ட புகாரை வாசித்தனர். அதிர்ந்து போன ஓ.பி.எஸ், ‘இவ்வளவு பிரச்னைகள் இருக் கின்றனவா... நான் பேசிக் கொள்கிறேன்’ என அவர்களை வழியனுப்பி வைத்துள்ளார். இந்தத் தகவல் ராஜேந்திர பாலாஜிக்குக் கிடைத்ததால், பதவியைக் காப்பாற்றிக்கொள்ள எடப்பாடியை உயர்த்திப்பிடிக்கிறார்.

. அமைச்சர் ஆர்.பி.உதயகுமார் கட்டுப்பாட்டிலுள்ள உசிலம்பட்டி, சோழவந்தான் சட்டமன்றத் தொகுதிகள், தேனி நாடாளுமன்றத் தொகுதிக்குள் வருகின்றன. ‘ஓ.பி.எஸ் வந்து அழைத்தாலும், என்னைக் கேட்காமல் யாரும் எந்த நிகழ்ச்சியிலும் கலந்துகொள்ளக் கூடாது’ என்று நிர்வாகிகளுக்கு உதயகுமார் தடை போட்டுவிட்டார். ‘கட்சியின் ஒருங்கிணைப்பாளர் அழைச்சு போகலைன்னா தப்பா போயிடும்ணே...’ என்று சில நிர்வாகிகள் சொன்னதற்கு, ‘இருக்கட்டும்யா. எனக்குத் தலைவர் எடப்பாடிதான்’ என்று ஒரே போடாகப் போட்டுவிட்டாராம். இதைக் கேள்விப்பட்டு ஓ.பி.எஸ் கடும் அப்செட். எடப்பாடியை அமைச்சர் ஆர்.பி.உதயகுமார் ஆதரிப்பதற்கு இந்தப் பின்னணிதான் காரணம். ஆக, அமைச்சர்கள் கருத்து கூற அவரவர் மாவட்ட அரசியல்தான் காரணம்’’ என்றவரிடம், ‘‘ஓ.பி.எஸ் என்ன நினைக்கிறார்?’’ என்று கேட்டோம். ‘‘அவரைப் பொறுத்தவரையில், மகன் ஓ.பி.ரவீந்திரநாத் குமாருக்கு மத்திய அமைச்சர் பொறுப்பு வாங்கிவிட வேண்டும் என்பதில் தீவிரமாக இருக்கிறார். `ஏற்கெனவே அந்த வாய்ப்பு கிடைத்தபோது, வைத்திலிங்கத்தைத் தூண்டிவிட்டு வாய்ப்பைத் தட்டிவிட்டதே எடப்பாடி தரப்புதான்’ என்கிற கோபம் ஓ.பி.எஸ்-க்கு உண்டு. மகனுக்கு மத்திய அமைச்சரவையில் இடம் கிடைத்து விட்டால், அடுத்ததாக அ.தி.மு.க ஆட்சி அமையாவிட்டாலும் பவராக இருக்கலாம் எனக் கருதுகிறார். முதல்வர் வேட்பாளராக எடப்பாடி இருப்பதில் அவருக்கு எந்தப் பிரச்னையும் இல்லை. பா.ஜ.க கூட்டணியை எந்தவிதத்திலும் இழந்துவிடக் கூடாது என்பதில் ஓ.பி.எஸ் தெளிவாக இருக்கிறார்’’ என்றார்.

ஆட்சி முடியும் தறுவாயில், சசிகலாவின் விடுதலை ஒருபக்கம் கொரோனா மறுபக்கம் என அச்சுறுத்தல்கள் சூழ்ந்திட, வருட இறுதிக்குள் பொதுக்குழுவை வெற்றிகரமாக நடத்தி முடிப்பதுதான் அ.தி.மு.க எதிர்கொள்ளும் மிகப்பெரிய சவால். ‘முதல்வர் வேட்பாளர் யார் என்கிற சர்ச்சையை விடுத்து, பொதுக்குழுவில் கவனம் செலுத்தினால் போதும்’ என்பதே கட்சியின் மூத்த தலைவர்களின் கருத்தாக இருக்கிறது.

'யார் முதல்வர் வேட்பாளர்?' - அ.தி.மு.க-வில் தகிக்கும் பஞ்சாயத்து

ந.பொன்குமரகுருபரன்

அரஸ்