வரிக் கணக்கு தாக்கலில் இனி கவனம் அவசியம்! - முகமறியா மதிப்பீடு..!

ந ம்மில் சிலர் நினைப்பதுபோல, முகமறியா வருமான வரி மதிப்பீடு என்பது ‘புதிய பானையில் பழைய சோறு’ அல்ல... வரி செலுத்துவதிலிருந்து ஒருவர்கூட இனி தப்பித்துவிடக் கூடாது என்பதற்காக இந்தப் புதிய முறை கொண்டுவரப்பட்டுள்ளது. விளைவு, இனி வரிக் கணக்கு தாக்கல் செய்வதில் நாம் கவனமாக இல்லாவிட்டால், வரி ஏய்ப்பு என்ற குற்றச்சாட்டுக்கு ஆளாக வேண்டியிருக்கும். . முகமறியா மதிப்பீடு என்ற இந்தப் புதியமுறையை மத்திய அரசாங்கம் இப்போது ஏன் கொண்டுவந்துள்ளது என்ற காரணத்தை நாம் புரிந்துகொண்டால், இதன் முக்கியத்துவத்தை நாம் நன்கு உணர முடியும்.

. கடந்துவந்த பாதை!

‘நியாயமாகச் செலுத்த வேண்டிய வரியைச் செலுத்துங்கள்’ என வருமான வரித்துறை தொடர்ச்சியாக வேண்டுகோள் விடுத்துப் பார்த்தது. ஆனால், யாரும் அதைக் கேட்கிற மாதிரி இல்லை. விளைவு, கடந்த ஆகஸ்ட் 14, 2020 முதல் முகமறியா மதிப்பீட்டை நடைமுறைக்குக் கொண்டுவந்திருக்கிறது. இதற்காக நாடு முழுவதும் உள்ள 25 நகரங்களில் 35 மண்டல மின்மதிப்பீடு மையங்கள் (Regional e-Assessment Centre) செயல்படத் தொடங்குகின்றன. இவற்றுள் தமிழ்நாட்டில் சென்னை, கோவை மற்றும் திருச்சியில் மண்டல மதிப்பீடு மையங்கள் உள்ளன. புதுடெல்லியில் உள்ள தேசிய இ-மதிப்பீட்டு மையம் மேற்கண்ட 35 மண்டல மையங்களுக்கும் தலைமையகமாகச் செயல்படும்.

முகமறியா நடைமுறை..!

இதுவரை இருந்ததுபோல் அந்தந்த மண்டல வரித் தாக்கலுக்கு அந்தந்த மண்டலத்திலேயே மதிப்பீடு என்ற நடைமுறை இனி கிடையாது. நாடு முழுவதும் உள்ள மாநிலங்கள் மற்றும் யூனியன் பிரதேசங்கள் ஆகியவற்றின் எந்த ஒரு மண்டலத்தின் வரிக் கணக்குத் தாக்கலையும் 35 மண்டலங்களில் எது வேண்டுமானாலும் மதிப்பீடு செய்யலாம் என்பதே முகமறியா மதிப்பீட்டு முறையின் அடிப்படை அம்சம்.

எந்தெந்த மண்டலத்துக்கு எந்தெந்த வரிக் கணக்கு தாக்கலுக்கான மதிப்பீடு என்பதை தேசிய மதிப்பீட்டு மையம் தானியங்கி முறையில் (Automated System) கணினி மூலம் ஒதுக்கீடு செய்யும். அவ்வாறு தனக்கு ஒதுக்கீடு செய்யப்பட்ட இனங்களில் கூடுதல் விவரமோ, ஆவணமோ, ஆதாரமோ அவர்களிடமிருந்து பெற வேண்டும் என்றால், மண்டல மையம் நேரடியாக வரிதாரரைத் தொடர்புகொள்ளாது.

மாறாக, தனக்குத் தேவையான தகவல் அல்லது ஆவணம் பற்றிய விவரங்களை மண்டல மையம் தேசிய மையத்துக்குத் தெரிவிக்கும். தேசிய மையம் வரிதாரருக்கு நோட்டீஸ் அனுப்பி, ஆவணங்களைப் பெற்று மண்டல மையத்துக்கு அனுப்பும். அதன் அடிப்படையில் மண்டல மையம் அடுத்த நடவடிக்கையைத் தொடரும். மேற்கண்டவாறு ஆவணங்கள் முதலானவற்றை சரிபார்த்த மண்டல யூனிட் (Verification unit) விசாரணை நடத்த வேண்டும் என்றால் தேசிய மையத்துக்குத் தெரிவிக்கும். எந்த மண்டலம் விசாரணை நடத்த வேண்டும் என்பதைத் தானியங்கி முறையிலேயே தேசிய மையம்தான் ஒதுக்கீடு செய்யும். இதேபோல் தொழில்நுட்ப உதவி தேவை என்றாலும் சம்பந்தப்பட்ட மண்டலம் தேசிய மையத்துக்குத் தெரிவிக்கும். தேசிய மையம் ஏதேனும் ஒரு தொழில்நுட்ப யூனிட்டுக்கு தானியங்கி முறையில் ஒதுக்கீடு செய்யும். அதாவது, ஒவ்வொருகட்ட நடவடிக்கையையும் வெவ்வேறு மண்டலங்கள் மேற்கொள்ளும்.

. அபராதம் / தண்டனை

தரப்பட்ட தகவல் மற்றும் ஆவணங்களைச் சரிபார்த்ததில் வரித் தாக்கல் தவறு என்று மண்டல அலுவலர் கண்டுபிடித்தால் அதற்கான வரைவு அறிக்கையைத் தேசிய மையத்துக்குச் சமர்ப்பிப்பார். தேசிய மையம் நேரடி வரிகள் வாரியத்தின் வழிகாட்டு நெறிமுறைப்படி அபராத நடவடிக்கைக்கு நோட்டீஸ் அனுப்பும்.

. ஒருவேளை, வரிதாரர் உபரியாக வரி செலுத்தியிருந்தாலும் தொகையைத் திருப்பித் தருவதற்கான அறிவிப்பையும் தேசிய மையம்தான் சம்பந்தப்பட்ட வரி செலுத்திய வருக்கு அனுப்பும்.

இவைதாம் முகமறியா மதிப்பீட்டு முறையின் சில குறிப்பிடத்தக்க அம்சங்கள். இந்தப் புதிய நடைமுறை செயல்பாட்டுக்கு வந்துவிட்டது. அதன்படி, முன்னதாக நிலுவையில் உள்ள 58,300 மதிப்பீட்டு இனங்களுக்கான நோட்டீஸ் செப்டம்பர் 15 வாக்கிலேயே வரத் தொடங்கி விடும் என்கிறது அறிவிப்பு.

கவனிக்க வேண்டிய விஷயங்கள்!

புதிய நடைமுறையில் எங்கோ வசிக்கிற வரிதாரருக்கு, எங்கேயோ செயல்படும்

மண்டல மையம்தான் மதிப்பீடு செய்கிறது. மேற்கண்ட தவறுகள் ஏதும் இருந்தால், தேசிய மையத் திலிருந்து நேரடியாக நோட்டீஸ் வந்துவிடும். எனவே, வரிக் கணக்குத் தாக்கலுக்கு முன் வரிக் கணக்கைச் சரிபார்ப்பதும், ஆவண ஆதாரங்களைக் கையகப்படுத்தி வைத்துக் கொள்வதும் அவசியம். அவை என்னென்ன?

. படிவம்-26

பல்வேறு முனைகளிலிருந்தும் கிடைக்கப் பெற்ற தகவல் அடிப்படையில் நமது வருமான விவரங்களை வருமான வரித்துறையே படிவம் 26-ல் பதிவு செய்து வைத்துவிடுகிறது. அதில் உள்ள தகவல்களில் ஏதேனும் பிழை இருந்தால் முறையீடு செய்யலாம். அதுவும் முகமறியாம முறையீடுதான். அதே நேரம், வருமான விடுபாடு இருக்கவும் செய்யலாம்.

எப்படியெனில், படிவம் 26-ல் இதர வருமானங்கள் விடுபாடு இருந்தால் அதையும் நாமே கணக்கில் கொண்டுவந்து வரிக் கணக்கைச் சரிசெய்துவிடுவது நல்லது. பின்னர், வருமானவரித் துறைக்குத் தகவல் தெரிந்து நோட்டீஸ் வரப்பெற்றால் சங்கடம். ஏனென்றால், அரசின் வரி வருவாய்க்குத் தடையாக இருப்பவை வருமானத்தைக் குறைத்துக் காண்பிப்பதும் வரிச் சலுகையை அதிகப்படுத்திக் கணக்கிடுவதுதான் என்பது வருமானவரித் துறையின் கவலை.

. அரசின் வரி வருவாய்க்குத் தடையாக இருப்பவை வருமானத்தைக் குறைத்துக் காண்பிப்பதும் வரிச் சலுகையை அதிகப்படுத்திக் கணக்கிடுவதுதான் என்பது வரித் துறையின் கவலை! . ஆவணங்கள்!

வரிச் சலுகைக்கான ஆவணங்கள் இரண்டு வகையாக உள்ளன. சம்பளத்திலேயே பிடித்தம் செய்யப்படும் தொழில் வரி, ஆயுள் காப்பீடு மற்றும் மருத்துவக் காப்பீட்டு பிரீமியம். ஜி.பி.எஃப், சி.பி.எஃப், இ.பி.எஃப் மற்றும் சி.பி.எஸ், என்.பி.எஸ் மாதச் சந்தா, அரசு மூலம் பெற்ற வீட்டுக் கடன் திரும்பச் செலுத்தும் அசல் மற்றும் வட்டி, பிரதமர் நிவாரண நிதி போன்றவற்றுக்கான நன்கொடை ஒருவகை.

. ஊழியர் சுயமாகச் செய்யும் கல்விச் செலவு, மருத்துவச் செலவு, மருத்துவக் காப்பீடு, மாற்றுத் திறனாளிக்குச் செய்யப்பட்ட செலவு, கல்விக் கடன் வட்டி, கல்விக் கட்டணம், வீட்டு வாடகை, நன்கொடை, வீட்டுக் கடன் அசல் மற்றும் வட்டி என்.பி.எஸ், பி.பி.எஃப், சுகன்யா சம்ருதி சந்தா, ஃபிக்ஸட் டெபாசிட், வரிச் சலுகைக்கான மியூச்சுவல் ஃபண்ட் போன்றவை மற்றொரு வகை.

பொறுப்பாளி!

சம்பளத்திலேயே பிடித்தம் செய்யப்பட்ட வரிச் சலுகை இனங்களுக்கும், சம்பளப் பிடித்தம் மூலம் அல்லாமல் சம்பளதாரரே சுயமாகச் செலுத்தி அதற்கான ஆவண ஆதாரத்தைச் சம்பளம் தரும் அதிகாரியிடம் சமர்ப்பித்து வரிச்சலுகை பெற்ற இனங்களுக்கும் சம்பளதாரர் மற்றும் சம்பளம் தரும் அதிகாரி இருவருக்கும் கூட்டுப்பொறுப்பு. அது மட்டுமல்ல, அந்த நிதியாண்டுக்கான வரிக்கணக்கு முடிக்கப்பட்ட பிறகு சம்பளதாரர் செலுத்திய வரிச் சலுகை இனங்களுக்கு சம்பளதாரரே முழுப்பொறுப்பு.

தகுதி இழப்பு!

நமது கவனக்குறைவு காரணமாக சில வரிச் சலுகைகள் தகுதியிழப்புக்கு உட்படலாம்; நமக்கு அபராதம்கூட விதிக்கப்படலாம். அவற்றுள் சிலவற்றைப் பார்க்கலாம்.

பி.பி.எஃப் மனைவி மற்றும் பிள்ளைகள் பெயரிலும் செலுத்தலாம். ஆனால், மனைவி சம்பாதிப்பவராக இருக்கக் கூடாது.

மாற்றுத் திறனாளிக்கான சலுகை பெற நடப்பு நிதியாண்டுக்கு உரிய மருத்துவச் சான்று பெற்றிருக்க வேண்டும்.

பிரிவு 80DDB-யின்படி, தரப்படும் தீவிர சிகிச்சைக்கான வரிச் சலுகை பெற குறிப்பிட்ட நோய் நிபுணரின் மருத்துவச் சீட்டின்படி மட்டும்தான் சலுகை பெற முடியும் என்பது ஒரு நிபந்தனை. மேலும், இந்த வியாதிகளுக்கு மருத்துவக் காப்பீட்டின்படி க்ளெய்ம் தொகை பெற்றிருந்தால், அந்தத் தொகை போக நிகர தொகை மட்டுமே வரிச்சலுகை பெறத்தக்கது.

2019-20-ம் நிதியாண்டுக்குத் தாக்கல் செய்யப்பட உள்ளதுதான் முகமறியா மதிப்பீடு முறையின் கீழான முதல் வரித்தாக்கல். எனவே, மேற்கண்ட இனங்களை ஒருமுறைக்கு இருமுறை சரிபார்த்துவிடுவது நல்லது.

01.04.2020 முதல் 31.07.2020 வரை செய்யப்பட்ட செலவு மற்றும் சேமிப்புகளும் 2019-20-க்கு வரிச் சலுகை பெறத்தக்கவை. இவை சம்பளதாரர்கள் சொந்தப் பொறுப்பில் செய்யப்பட்டிருக்கும். எனவே, வரிக் கணக்குத் தாக்கலுக்கு முன் ஆவணம் கையிருப்பில் இருப்பதை உறுதி செய்துகொள்ள வேண்டும். வருமான வரிப் படிவத்தில்கூட (ITR-1-ல்) மேற்கண்ட சிறப்புச் சலுகை பற்றி தனி குறிப்பு உள்ளது.

சுருக்கமாகச் சொன்னால், வரி ஏய்ப்பு செய்பவர்களை விடப்போவதில்லை என்பதில் வருமான வரித் துறை மிகவும் உறுதியாக இருக்கிறது. கவனக் குறைவு காரணமாக அந்த வரிசையில் நாம் சேர்ந்துவிடாமல் இருக்க வேண்டும்.

வரிக் கணக்கு தாக்கலில் இனி கவனம் அவசியம்! - முகமறியா மதிப்பீடு..!

முகைதீன் சேக் தாவூது . ப