Published:Updated:

5 டிரில்லியன் டாலர் பொருளாதாரம்... ஐந்து ஆண்டுகளில் சாத்தியமா?

பட்ஜெட் ஃபாலோஅப்

பிரீமியம் ஸ்டோரி

ந்த ஆண்டுக்கான பட்ஜெட்மூலம் முக்கியமான ஓர் இலக்கினை நிர்ணயித்திருக்கிறார் மத்திய நிதி அமைச்சர் நிர்மலா சீதாராமன். வருகிற 2024-25-ம் ஆண்டுக்குள் நமது பொருளாதாரம் ஐந்து டிரில்லியன் டாலர் மதிப்புக் கொண்ட பொருளாதாரமாக உயர வேண்டும் என்பதே அந்த இலக்கு.

பட்ஜெட் தாக்கல் செய்யப்படுவதற்குச் சில வாரங்களுக்குமுன்பே இந்த இலக்கினை நிர்ணயித்துத் தந்தார் குடியரசுத் தலைவர் ராம்நாத் கோவிந்த். பிரதமர் நரேந்திர மோடியும் தனது அடுத்த லட்சியம் இதுதான் என்றார். ஐந்து ஆண்டுகளுக்குள் இந்த இலக்கினை அடைவது சாத்தியம்தானா என்கிற கேள்விக்கான பதிலை இனி பார்ப்போம்.

5 டிரில்லியன் டாலர் பொருளாதாரம்...  ஐந்து ஆண்டுகளில் சாத்தியமா?

ரூ.210 லட்சம் கோடி டு ரூ.350 லட்சம் கோடி...

இந்தியப் பொருளாதாரம் சமீபத்தில் 2.61 டிரில்லியன் டாலர் மதிப்புக் கொண்ட பொருளாதாரமாக உயர்ந்ததன்மூலம், பிரான்ஸ் நாட்டினைப் பின்னுக்குத் தள்ளிவிட்டு, உலகின் ஆறாவது பெரிய பொருளாதார நாடாக விளங்குகிறது இந்தியா. இந்த ஆண்டின் இறுதிக்குள் நமது நாடு மூன்று டிரில்லியன் டாலர் (இந்திய ரூபாய் மதிப்பில் சுமாராக ரூ.210 லட்சம் கோடி) மதிப்புக் கொண்ட பொருளாதாரமாக உயரும் என்று எதிர்பார்க்கப் படுகிறது. தற்போது 2.7 டிரில்லியன் டாலர் மதிப்புக் கொண்டதாக இருக்கிறது நமது பொருளாதாரம், இந்த ஆண்டுக்குள்ளேயே மூன்று டிரில்லியன் டாலர் மதிப்புக் கொண்ட பொருளாதாரமாக உயர்வதன்மூலம், இங்கிலாந்தையும் தாண்டிச் சென்று உலக அளவில் ஐந்தாவது பெரிய பொருளாதார நாடாக மாறிவிடும்.

ஆனால், அடுத்த ஐந்து ஆண்டுகளில் இதனை ஐந்து டிரில்லியன் டாலர் மதிப்புக்கொண்ட பொருளாதாரமாக (இந்திய ரூபாய் மதிப்பில் ரூ.350 லட்சம் கோடி) உயர்த்தவேண்டும் என்பது மத்திய அரசின் இலக்கு.

அமெரிக்காவும் சீனாவும்

உலக நாடுகளில் சில, 2.60 டிரில்லியன் டாலர் நிலையிலிருந்து ஐந்து டிரில்லியன் டாலர் மதிப்புக் கொண்ட பொருளாதாரமாக மாறுவதற்கு எடுத்துக்கொண்ட காலகட்டம் வேறுவேறாக இருக்கிறது. உதாரணமாக, அமெரிக்கா ஒன்பது ஆண்டு காலத்தை எடுத்துக்கொண்டது. 1988-ம் ஆண்டிலேயே ஐந்து டிரில்லியன் டாலர் என்கிற நிலையை அந்த நாடு அடைந்துவிட்டது. ஜப்பானைப் பொறுத்தவரை, ஏழு ஆண்டு காலத்தில் 5 டிரில்லியன் டாலர் என்கிற நிலையை அடைந்தது. 1994-ம் ஆண்டிலேயே அந்த நிலையை அடைந்துவிட்டது ஜப்பான். ஆனால், சீனாவோ நான்கே ஆண்டுகளில் 2.75 டிரில்லியன் டாலரிலிருந்து 5.11 டிரில்லியன் டாலராக மாறியிருக்கிறது. 2008-ம் ஆண்டிலேயே இந்த நிலையை சீனா அடைந்துவிட்டது. எனவே, அடுத்த ஐந்து ஆண்டு காலத்தில் நமது இந்தியா ஐந்து டிரில்லியன் டாலர் நிலையை எட்டிவிடும் என்கிறார்கள் சிலர்.

இப்படிச் சொல்கிறவர்கள் இன்னொரு புள்ளி விவரத்தையும் எடுத்துச் சொல்கிறார்கள். அதாவது, நம் நாடு சுதந்திரம் பெற்று ஒரு டிரில்லியன் டாலர் மதிப்புக் கொண்ட பொரு ளாதாரமாக உயர்வதற்கு சுமார் 55 ஆண்டுகள் ஆனது. ஆனால், கடந்த ஐந்து ஆண்டு காலத்தில் மட்டும் நமது பொருளாதாரம் ஒரு டிரில்லியன் அதிகரித்திருக் கிறது. எனவே, அடுத்த ஐந்து ஆண்டுகளில் 5 டிரில்லியன் டாலர் பொருளாதாரமாக மாறுவது பெரிய பிரச்னையாக இருக்காது என்பது இவர்களின் வாதம். ஆனால், அரசின் இந்தக் கனவு உண்மையாகாமல் தடுக்கும் தடைகள் பலப்பல.

உலகப் பிரச்னையும் உள்நாட்டுப் பிரச்னையும்

நமது நாடு ஒவ்வோர் ஆண்டும் தொடர்ச்சியாக பொருளாதார வளர்ச்சி கண்டுவருகிறது எனில், மத்திய அரசாங்கம் நிர்ணயித்துள்ள ஐந்து ஆண்டு காலத்தில் ஐந்து டிரில்லியன் டாலர் மதிப்புக்கொண்ட பொருளாதார நாடாக மாறுவது பெரிய விஷயமாக இருக்காது. ஆனால், இன்றைக்கு உலக அளவிலும் இந்திய அளவிலும் பல்வேறு பொருளாதாரப் பிரச்னைகள் உள்ளன.

அமெரிக்க - சீன வர்த்தகப் போர், உலக அளவில் பொருள்களை வாங்குவதற்கான தேவையும் பொருளாதார வசதியும் குறைந்து வருவது, சர்வதேசச் சந்தையில் கச்சா எண்ணெய் விலை தொடர்ந்து உயர்ந்துகொண்டிருப்பது, உலக உற்பத்திக் கேந்திரமான சீனாவின் வளர்ச்சியில் தேக்கம் ஏற்பட்டிருப்பது, அமெரிக்கா உள்பட பல்வேறு பெரிய பொருளாதாரம் கொண்ட நாடுகளில் வளர்ச்சியானது செயற்கையானதாக இருப்பது போன்ற உலகப் பிரச்னைகள் நமது இந்தக் கனவு நிஜமாகப் பெரும் தடைகளாக இருக்கின்றன.

இந்த உலகப் பிரச்னைகளுக்கான தீர்வு எதையும் நம்மால் தந்துவிட முடியாது. அந்தப் பிரச்னைகள் சரியாகும் வரை நாம் பொறுமையாக இருப்பதைத் தவிர, நம்மால் செய்துவிடக்கூடியது ஒன்றுமில்லை.

ஏற்றுமதி குறைந்துவருவது, வேலைவாய்ப்பின்மை அதிகமாக இருப்பது, மக்களின் வாங்கும் சக்தி குறைவாக இருப்பது, பொருளாதார வளர்ச்சி குறைந்துவருவது போன்ற உள்நாட்டுப் பிரச்னை களும் ஐந்து டிரில்லியன் டாலர் கனவிற்குத் தடைக்கற்களாக உள்ளன. உள்நாட்டுப் பிரச்னைகளுக்கான தீர்வினைக் கண்டுபிடித்து அவற்றைச் செயல்படுத்துவது நம்முடைய கைகளில்தான் இருக்கிறது என்றாலும், அவற்றைக்கூட எளிதாகச் செய்துவிட முடியாது என்பதே இன்றைக்கு உள்ள யதார்த்தம். என்ன காரணம்?

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

குறையும் ஜி.டி.பி வளர்ச்சி

கடந்த 2016-17-ம் ஆண்டில் நமது ஜி.டி.பி வளர்ச்சி 8.2 சதவிகிதமாக இருந்தது. பிற்பாடு குறையத் தொடங்கிய இது, 2019-20-ம் ஆண்டில் 7% அளவுக்கு மட்டுமே உயர வாய்ப்புள்ளதாகப் பொருளாதார நிபுணர்கள் கணிக்கிறார்கள். என்றாலும், இந்த ஆண்டில் நமது பொருளாதார வளர்ச்சி 8 சதவிகிதமாக இருக்கும் என்று சொல்லியிருக்கிறார் நிதி அமைச்சர் நிர்மலா சீதாராமன்.

5 டிரில்லியன் டாலர் பொருளாதாரம்...  ஐந்து ஆண்டுகளில் சாத்தியமா?

ஆனால், ஐந்து டிரில்லியன் டாலர் பொருளாதாரம் என்கிற நிலையினை அடைய இந்த வளர்ச்சி வேகம் நிச்சயம் போதாது. அடுத்த ஐந்து ஆண்டுகளில் ஆண்டுதோறும் சராசரியாக 12% ஜி.டி.பி வளர்ச்சியடைந்தால் மட்டுமே ஐந்து டிரில்லியன் டாலர் பொருளாதாரம் என்கிற கனவு நனவாகும்.

இந்தியாவின் ஜி.டி.பி-யானது கடந்த பத்தாண்டுகளில் ஒரே ஒருமுறை மட்டுமே இரட்டை இலக்கத்தில் அதாவது, கடந்த 2010-ல் 11 சதவிகிதத்துக்கு சற்று அதிகமாக வளர்ச்சி கண்டிருக்கிறது. அதன்பிறகு 2011-ல் 10% என்கிற இலக்கினைத் தொட்டது. அதன்பிறகு இரட்டை இலக்கத்தைத் தொடவே இல்லை என்கிறபோது அடுத்த ஐந்து ஆண்டுகளில் ஆண்டுதோறும் 12% வளர்ச்சியை நமது பொருளாதாரம் காணும் என்று எதிர்பார்க்க முடியுமா என்கிற கேள்வி யினைப் பலரும் எழுப்புகிறார்கள்.

நம்பிக்கை இழக்கத் தேவையில்லை...

மிகுந்த கஷ்டப்பட்டு சாத்தியமாக்குவதற்கான ஓர் இலக்கினைத்தான் மத்திய அரசாங்கம் தற்போது நியமித்திருக்கிறது. நமது பொருளாதாரத்தில் உள்ள நல்ல பல விஷயங்களை நம்பியும், கடந்த ஐந்தாண்டு காலத்தில் எடுக்கப் பட்டிருக்கும் சில முக்கியமான நடவடிக்கைகளை வைத்துமே இந்த இலக்கினை மத்திய அரசாங்கம் நிர்ணயித்திருக்கிறது.

இனி வளர்ச்சி என்பது இந்தியாவில்தான்...

வெளிநாட்டு மூலதனத்தை நம் நாட்டுக்கு அதிகம் கொண்டுவருவதில் முக்கியமான பங்கு ஜி.எஸ்.டி-க்கு உண்டு. இரண்டு ஆண்டுகளை முடித்துவிட்டு, மூன்றாம் ஆண்டில் நுழைந்திருக்கும் ஜி.எஸ்.டி வரியானது இனி இந்தியாவில் நிலைத் திருக்கும் என்பதால், வெளிநாட்டு முதலீட்டினை அதிக அளவில் கவர்ந்திழுக்க இது மிகவும் உதவியாக இருக்கும். தவிர, சீனாவின் வளர்ச்சி யானது குறையத் தொடங்கியிருப்பதால், உற்பத்தித் துறை நோக்கிவரும் வெளிநாட்டு முதலீடு இனி இந்தியாவை நோக்கியே வர வாய்ப்பிருக்கிறது.

உலக அளவில் இளம்வயதினர் அதிக அளவில் இருப்பது, பள்ளி, கல்லூரிப் படிப்பு அனைவருக்கும் கிடைக்கும் நிலையை அடைந்திருப்பது, மருத்துவ வசதி அனைவருக்கும் கிடைத்துவருவதால் மக்களின் சராசரி ஆயுள் காலம் அதிகரிப்பது, பெண்கள் வேலைக்குச் செல்லத் தொடங்கி யிருப்பது, ஏற்றுமதியில் இன்னும் அதிக வளர்ச்சி காண வாய்ப்பிருப்பது, வேளாண்மை பொருள்கள் விற்பனை தொடர்பாக பல சீர்திருத்தங்கள் செய்யப்பட்டிருப்பது, திவால் நிலைக்குச் செல்லும் தொழில் நிறுவனங்கள் எளிமையான நடவடிக்கைமூலம் அதிலிருந்து வெளியேறுவது எனப் பல பாசிட்டிவ் விஷயங்கள் இருப்பதால், இனி உலக அளவில் வளர்ச்சி என்பது இந்தியாவில் தான் இருக்கும். எனவே, அடுத்த ஐந்து ஆண்டுகளில் ஐந்து டிரில்லியன் டாலர் கனவினை நம்மால் உறுதியாக அடைய முடியும் என்பதால் நாம் நம்பிக்கையினை இழக்கத் தேவையில்லை.

இப்போது வந்திருக்கும் பட்ஜெட்டினை மட்டும் வைத்து இந்த இலக்கினை நம்மால் அடைய முடியாது என்று கருதத் தேவையில்லை. இந்தக் கனவு நிறைவேற அடுத்தடுத்த ஆண்டுகளில் எப்படிப்பட்ட பட்ஜெட் போடப்படும் என்பதைப் பொறுத்திருந்து பார்ப்போம்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு