நாம் தமிழர் கட்சியின் வேட்பாளர் அறிமுகக் கூட்டம் ஈரோடு மரப்பாலத்தில் நடைபெற்றது. இந்தக் கூட்டத்தில் கலந்துகொண்ட கட்சியின் ஒருங்கிணைப்பாளர் சீமான், கட்சியின் வேட்பாளர் மேனகா நவநீதனை பொதுமக்கள் மத்தியில் அறிமுகம் செய்துவைத்துப் பேசினார். அப்போது அவர், ``ஆளுங்கட்சியாக இருக்கும்போது ஒரு நிலைப்பாடு, எதிர்க்கட்சியாக இருக்கும்போது ஒரு நிலைப்பாட்டையும்தான் இன்றைய ஆளுங்கட்சியினர் எடுக்கின்றனர். இந்த நிலையை மாற்றுவதற்கு ஒரு லட்சிய வேட்கை வேண்டும். ஜனநாயகத்தை நிலைநாட்ட கேடு கெட்ட பணநாயகத்தை ஒழிக்க வேண்டும்.
ஆட்சியாளர்கள் ஆட்சிக்கு வந்துவிட்டால் மக்களைச் சந்திப்பதில்லை. மாநிலத்திலும் சரி, மத்தியில் ஆளும் பிரதமர் மோடியும் சரி இதே நிலைப்பாடுடன்தான் இருக்கின்றனர்.
ஓர் ஆலமரம் விதையிலிருந்துதான் தொடங்குகிறது. சமுத்திரம் கூட ஒரு துளியில்தான் தொடங்குகிறது. அதுபோல மக்களின் மனமாற்றம் ஈரோடு கிழக்கிலிருந்து தொடங்கட்டும்.

உங்களுக்குத் தெரியாத ஒரு விஷயத்தை இந்தக் கூட்டத்தின் மூலமாகக் கூறுகிறேன். இந்தத் தொகுதியின் எம்.எல்.ஏ திருமகன் ஈவெராவை எனக்கு ரொம்பப் பிடிக்கும். அவர் முதலில் நம்ம கட்சியில் சேருவதற்காகத்தான் வந்தார். அப்புறம் அவருடைய ஐயா (ஈ.வி.கே.எஸ்.இளங்கோவன்) என்ன சொன்னாரோ தெரியவில்லை. சரி நீ அங்கேயே இருப்பா என்று கூறிவிட்டேன். அவர் இறந்ததில் எனக்கு மிகுந்த மனத்துயரம்தான். அவருடைய தந்தையிடம் அவர் காலமானதற்காக துக்கம் விசாரித்தேன்.
கடந்த ஒன்றரை ஆண்டுகளாக இந்தத் தொகுதியில் சட்டப்பேரவை உறுப்பினராக திருமகன் ஈவெரா பணியாற்றியிருக்கிறார். இந்தக் காலகட்டத்தில் அவர் சட்டப்பேரவையில் ஏதாவது மக்கள் பிரச்னை பற்றி பேசியதாகக் கேள்விப்பட்டீர்களா... இப்போது அவரது ஐயா (இளங்கோவன்) வெற்றிபெற்று சட்டப்பேரவைக்குப் போனால் அவரும் பேசப் போவதில்லை. அப்படியானால் நீங்கள் செய்யவேண்டியது சட்டப்பேரவையில் பேசக்கூடிய ஒருவரைத்தான் தேர்ந்தெடுத்து அனுப்ப வேண்டும். எங்கள் கட்சியின் வேட்பாளர் சட்டப்பேரவையில் உங்களுக்காகப் பேசுவார்.

எடப்பாடி பழனிசாமி உண்மையான எதிர்க்கட்சித் தலைவராகப் போராடவில்லை. உண்மையான எதிர்க்கட்சித் தலைவராக நாம் தமிழர் கட்சிதான் போராடி வருகிறது. காங்கிரஸ், பா.ஜ.க. ஆகியவை இந்த நிலத்துக்காகவும், மொழிக்காகவும் போராடியிருக்கிறதா?

ஈழப்பிரச்னை, அணுஉலை பிரச்னை, காவிரி நதிநீர் பிரச்னை என எதற்காகவும் போராடியதில்லை. காவிரியிலோ, முல்லைப் பெரியார் நதிநீர் பிரச்னைகளுக்காக மற்ற மாநிலங்களுக்காகத்தான் இந்த இருபெரும் தேசியக் கட்சிகளும் துணைபோகின்றன.

ஈழத்தில் நடந்ததெல்லாம் இங்கும் நடக்கும். ஈழத்தில் நம் மக்களை அடித்து விரட்டினான். அதேபோல இங்கும் வட இந்தியர்களால் நம் இனத்துக்கும் அந்த நிலை ஏற்படும். நான் சொன்னதெல்லாம் நடந்துவருகிறது. அதற்கு ஒரே தீர்வு எனக்கு ஓட்டு போடுங்கள். ஒகி புயலில் கன்னியாகுமரியில் எத்தனையோ மீனவர்கள் உயிரிழந்தார்கள். அங்கிருக்கும் அனைவரும் பா.ஜ.க-வுக்கு எதிராக வாக்களிப்பார்கள் என்று கூறி, ஒரேநாளில் 40,000 வாக்காளர்களின் பெயர்களையும் பட்டியலிலிருந்து நீக்கிவிட்டார்கள். அதேபோல நான் ஆட்சிக்கு வந்தால் வட இந்தியர்களுக்கு இங்கு வாக்குரிமை அளிக்க அனுமதிக்க மாட்டேன்.

நம் இனத்தைக் கொன்றுகுவித்தவர்கள் காங்கிரஸார். அவர்களுக்கு துணை நின்றது தி.மு.க-வினர். அவர்களுக்கு வாக்கு செலுத்தினால் என்னவாகும் என்பதை எண்ணிப் பாருங்கள்.
பிரதமர் மோடிக்கு திடீரென தமிழ்ப்பாசம் வந்துவிட்டது. தமிழின் தொன்மையால் நான் பெருமையடைகிறேன் என்று மோடி கூறுகிறார். அதைப் பார்த்து ஏமாந்துவிடக் கூடாது. நாம் வேளாண்மையைவிட்டு வெளியேறிவிட்டோம். இதனால், உணவுப்பஞ்சம் ஏற்படும் வாய்ப்பிருக்கிறது என்பதை தமிழினம் புரிந்துகொள்ள வேண்டும்” என்றார்.