நோய் எதிர்ப்புத் திறன் தரும் பிரியாணி இலை
அம்பிகா சேகர், ஊட்டச்சத்து நிபுணர்ஹெல்த்
சமையலில் பிரியாணி இலையை வெறும் நறுமணத்துக்காகச் சேர்க்கிறார்கள் என்று நினைக்கிறோம். ஆனால் அதில் ஏராளமான மருத்துவக் குணங்கள் நிறைந்துள்ளன.
* பிரியாணி இலையில் உள்ள காஃபிக் அமிலம் (Caffeic Acid), க்யூயர்சிடின் (Quercetin) மற்றும் யூஜினால் (Eugenol) போன்றவை புற்றுநோய் செல்களின் வளர்ச்சியைத் தடைசெய்துப் புற்றுநோய் அபாயத்தில் இருந்து பாதுகாக்கும்.
* பிரியாணி இலை டைப் 2 சர்க்கரை நோய்க்கு நல்லது. இது ரத்தச் சர்க்கரையின் அளவைச் சீராக வைக்கும். சிறுநீரகப் பிரச்னைகள் மற்றும் சிறுநீரகக் கற்களைப் போக்கும்.
* பிரியாணி இலையில் ஆன்டி - ஆக்ஸிடன்ட்டுகள், ஃபிளேவனாய்டுகள், கால்சியம், பொட்டாசியம், தாமிரம், மாங்கனீசு, செலினியம் மற்றும் இரும்புச்சத்து போன்றவை நிறைந்துள்ளன. ஆன்டி - பாக்டீரியல், பூஞ்சை எதிர்ப்பு மற்றும் நோய் எதிர்ப்புத் தன்மைகளும் நிறைந்துள்ளன.
* டீயுடன் பிரியாணி இலையைச் சேர்த்துக் கொதிக்க வைத்துக் குடித்தால், மலச்சிக்கல் மற்றும் குடலியக்கப் பிரச்னைகள் குணமாகும். செரிமானப் பிரச்னைகள் வராமல் தடுக்கும்.
* பிரியாணி இலையை நீரில் போட்டுக் காய்ச்சி வடிகட்டி, அந்நீரை தினமும் ஒரு டம்ளர் குடித்து வந்தால் மாரடைப்பு மற்றும் பக்கவாத அபாயங்கள் குறையும். நிம்மதியான தூக்கம் வரும்.
* பிரியாணி இலையில் இருந்து தயாரிக்கும் எண்ணெய் பல்வேறுவிதமான மூட்டு வலிகளுக்கு மருந்து.