அறப்பணி தொடர்வோம்!

கொரோனா பேரிடரில் தவிக்கும் மக்களுக்குக் கரம் கொடுத்து உதவும் நோக்கில் ஆனந்த விகடன் சார்பில், வாசன் சாரிடபிள் டிரஸ்ட் வழியாக 10 லட்ச ரூபாய் ஒதுக்கப்பட்டது. தவித்து நிற்கும் மக்களுக்கு எப்போதும் முன்வந்து உதவும் விகடன் வாசகர்களும் தங்கள் பங்களிப்பை வழங்கிவர, வாசகர்கள் கரம்பற்றி மக்களுக்கு உதவக் களத்தில் இறங்கிய விகடனின் களப்பணி நான்காவது கட்ட ஊரடங்கிலும் தொடர்கிறது.

நம்முடைய முதல் முன்னெடுப்பாகத் திருவள்ளூர் மாவட்டம், திருமுல்லைவாயில் பகுதியில் வாழ்வாதாரம் இழந்து தவித்து வந்த 65 நாடோடிக் குடும்பங்களுக்கு ரூ. 1.2 லட்சம் செலவில் 2 மாதத்துக்குக் தேவையான மளிகைப் பொருள்கள் வழங்கப்பட்டன. அடுத்த கட்டமாக, சென்னை ஆவடியை அடுத்த பாலவேடு மற்றும் கரிமேடு பகுதியில் உணவுக்குக்கூட வழியில்லாமல் பரிதவித்து வந்த 110 ஆந்திர மாநில கூலித்தொழிலாளர் குடும்பங்களுக்கு அரசி, பருப்பு, எண்ணெய், கோதுமைமாவு, சர்க்கரை உட்பட 1,77,210 ரூபாய் மதிப்பில் இரண்டு மாதத்துக்குத் தேவையான மளிகைப்பொருள்களை வழங்கினோம். சென்னையை அடுத்த குன்றத்தூர்ப் பகுதியில் ஊரடங்கால் வருமானமின்றித் தவித்து வந்த 10 நாடோடிக் குடும்பங்களுக்கு 15,000 ரூபாய் செலவில் அவர்களுக்கு இரண்டு மாதத்துக்குத் தேவையான அரிசி மற்றும் மளிகைப் பொருள்களை வழங்கினோம். சென்னை அம்பத்தூரில் அமைந்துள்ள இரண்டு காப்பகங்களுக்கு பொருளுதவி புரிய திருவள்ளூர் மாவட்ட ஆட்சியர் அலுவலகத்தில் இருந்து வேண்டுகோள் வர, அந்த இரண்டு காப்பகங்களுக்கும் 12,137 ரூபாய் மதிப்பிலான மளிகைப் பொருள்களை வாங்கி அவற்றைத் திருவள்ளூர் மாவட்ட ஆட்சியரிடம் வழங்கினோம்.

அடுத்ததாக, சென்னை அம்பத்தூரை அடுத்த முகப்பேர், ரெட்டிபாளையம் பகுதியில் நேபாளத்தைச் சேர்ந்த கூலித்தொழிலாளர்கள் வறுமையின் பிடியில் சிக்கிப் பரிதவிப்பது தெரியவந்தது. ரெட்டிபாளையம் பகுதியில் கடந்த 30 வருடங்களாக வசித்துவரும் இந்த நேபாள மக்கள் சென்னையின் பல்வேறு பகுதிகளில் கூலிவேலைகளுக்குச் சென்று தங்கள் வாழ்க்கையை நகர்த்திவருகின்றனர். சென்னையின் தெருக்களில் இரவு நேரங்களில் கூர்க்கா பணியிலும், தொழில்நிறுவனங்களில் காவலாளிகளாகவும் பணிபுரியும் இந்த நேபாள மக்களின் வாழ்க்கைநிலை மிகவும் பின்தங்கிய நிலையிலேயே இருக்கிறது. ஊரடங்கு இவர்களின் நிலையை இன்னும் மோசமாக்கியிருக்கிறது.

இப்படி மிகுந்த நெருக்கடியில் இருந்த 24 நேபாளிகள் குடும்பங்களுக்கு 38,664 ரூபாய் செலவில் இரண்டு மாதத்துக்குத் தேவையான அரிசி, பருப்பு, எண்ணெய், சர்க்கரை உள்ளிட்ட மளிகைப்பொருள்களை விகடன் குழுவினர் முறையாகச் சமூக விலகலைக் கடைப்பிடித்து வழங்கினோம். நம்முடைய உதவியில் நெகிழ்ந்து போன மக்கள் மகிழ்ச்சியோடு நன்றிகளைத் தெரிவித்துக்கொண்டனர். ஊரடங்கால் வாழ்வாதாரம் இழந்து தவித்து வரும் இவர்களைப் போன்றவர்களைக் கண்டறிந்து உதவும் விகடனின் இந்த அறப்பணி தொடரும்.