பதில் சொல்கிறார், சென்னையைச் சேர்ந்த, சருமம் மற்றும் கூந்தல் சிகிச்சை சிறப்பு மருத்துவர் தலத் சலீம்.

அலர்ஜிக்கு ஆயிரம் காரணங்கள் இருக்கலாம். உண்ணும் உணவு, உடுத்தும் உடை, உறைவிடம் என எது வேண்டுமானாலும் ஒருவருக்கு அலர்ஜியை ஏற்படுத்தலாம். அந்த வகையில் நீங்கள் கேட்டிருப்பது போல கவரிங் நகைகளும் அலர்ஜிக்கு காரணமாகலாம். சருமத்துக்கு ஒவ்வாத ஏதோ ஓர் அந்நியப் பொருள் சருமத்தின்மீது படுவதன் விளைவாக, அரிப்பும் தடிப்பும் ஏற்படும்.

சருமத்தின் மேல் லேயரான எபிடெர்மிஸ் மற்றும் அதற்கடுத்த லேயரான டெர்மிஸில் உள்ள திசுக்களில் இந்த பாதிப்பு தென்படும். இந்த வகை அலர்ஜியை `கான்டாக்ட் டெர்மடைட்டிஸ்' என்கிறோம். சருமத்தில் ஏற்படுகிற அலர்ஜி நகைகளின் காரணமாகத்தான் ஏற்படுகிறதா என்பதைத் தொடர்ந்து கண்காணியுங்கள்.

சருமத்தில் அரிப்பு, வலி, எரிச்சல், சிவந்து போதல், தடிப்பு, போன்றவை அலர்ஜியின் அறிகுறிகளாக இருக்கலாம். கவரிங் நகைகள் மட்டுமல்ல சிலருக்கு வாட்ச், நிக்கல், தங்கம், குரோமியம் உள்ளிட்ட உலோகங்கள்கூட ஒவ்வாமையை ஏற்படுத்தக்கூடும்.