Published:Updated:

உடலினை உறுதி செய் - 5

உடலினை உறுதி செய் - 5

உடலினை உறுதி செய் - 5

உடலினை உறுதி செய் - 5

Published:Updated:

யோகா பற்றிய விழிப்புஉணர்வு அதிகமாகிவிட்ட காலம் இது. ஆனாலும் சிலர் முயற்சி செய்து பார்க்காமலேயே ‘எனக்கு யோகா வராது’ என்ற மனத்தடையுடன் இருக்கின்றனர். உடலை வளைத்து, நெளித்துத்தான் யோகா செய்ய வேண்டும் என்று இல்லை.

உட்கார்ந்துகொண்டும், படுத்துக்கொண்டும் செய்யும் சின்னச்சின்ன அசைவுகளையும் யோகாவாக மாற்றி ஆரோக்கியத்தைப் பெறலாம். எனவே, யோகா பயிற்சியாளரின் முன்னிலையில், தங்களால் இயன்ற யோகா ஆசனங்களை செய்ய தொடங்குங்கள். இதோ, உங்களுக்கான எளிய பயிற்சிகள்...

உடலினை உறுதி செய் - 5

புஜங்காசனம் (Bhujangasana)

தரையில் யோகா மேட் விரித்து, அதன் மீது குப்புறப் படுக்க வேண்டும். கைகளை முன்பக்கமாகக் கட்டி, தலைக்குத் தலையணை போல வைத்து, 10 விநாடிகள் கைகளின் மீது தலையைவைத்து ஓய்வுஎடுக்க வேண்டும்.

இப்போது, கைகளை மடித்து மார்புக்கு அருகே பக்கவாட்டில் பதிக்க வேண்டும். பாதங்கள் நேராக இருக்கட்டும். மூச்சை இழுத்துக்கொண்டே மேல் உடலை மட்டும் உயர்த்தி, 10 விநாடிகள் அப்படியே இருந்துவிட்டு, மூச்சை வெளியே விட்டபடி, பழைய நிலைக்குத் திரும்ப வேண்டும். இப்படி மூன்று முறை செய்ய வேண்டும்.

குறிப்பு: கர்ப்பிணிகள் மற்றும் அல்சர், அசிடிட்டி, குடலிறக்கம், உயர் ரத்த அழுத்தம், வலிப்பு நோய் இருப்பவர்கள் இதைத் தவிர்க்க வேண்டும்.

உடலினை உறுதி செய் - 5

பலன்கள்

• தோள்பட்டை, வயிறு, மார்புப்பகுதியில் உள்ள தசைகள் வலுப்பெறும்.

• முதுகு வலி, டிஸ்க் பிரச்னைகள் சரியாகும். முதுகெலும்பின் வளைவுத்தன்மை அதிகரிக்கும். முதுகெலும்பு வலிமை பெறும்.

• புஜம், தோள்பட்டை ஆகியவற்றின் வலிமை அதிகரிக்கும்.

• வயிறு, சிறுநீரகம் ஆகியவை தூண்டப்படுவதால், இவற்றின் செயல்பாடு சீராகும்.

• சோர்வு, கவலை, பசியின்மை, மன அழுத்தம் குறையும்.

• முதுகெலும்பு மற்றும் பெல்விக் பகுதிக்கு ரத்த ஓட்டமும் பிராண சக்தியும் சீராகச் செல்லும்.

மர்ஜரியாசனம் (Marjariasana)

உடலினை உறுதி செய் - 5

வஜ்ராசன நிலையில் உடலை வளைத்து உட்கார வேண்டும். பின்னர், கைகளைத் தரையில் ஊன்றி, முட்டிபோட்டு,  நிற்க வேண்டும். முட்டி போடும்போது, இரு கால் முட்டிகளுக்கு இடையே ஒரு ஜாண் அளவு இடைவெளி இருக்கட்டும். தோள்பட்டைக்கு நேராகக் கைகள் இருக்க வேண்டும்.

இப்போது, மூச்சை இழுத்துக்கொண்டே தலை, கழுத்தை மட்டும் உயர்த்த வேண்டும்.  அதே நேரத்தில், முதுகைக் கீழே இறக்க வேண்டும். பின்னர், மூச்சை வெளியேவிட்டபடி, தலை, கழுத்தை தரையைப் பார்த்து வளைக்க வேண்டும். இரண்டு கைகளுக்கு இடையில் தலை செல்ல வேண்டும். முதுகை மேல்நோக்கி உயர்த்த வேண்டும்.

இதை 10 நிமிடங்கள் வரை செய்ய வேண்டும். பிறகு, வஜ்ராசன நிலையில் உட்கார்ந்து ரிலாக்ஸ் செய்ய வேண்டும்.

உடலினை உறுதி செய் - 5

குறிப்பு: எலும்பு மெலிதல், வெரிகோஸ்வெயின் பிரச்னை, உயர் ரத்த அழுத்தம், நரம்புப் பிரச்னை, வலிப்பு நோய், ஒற்றைத் தலைவலி பிரச்னை இருப்பவர்கள் கர்ப்பிணிகள் தவிர்க்கலாம்.

பலன்கள்

• அடி முதுகுவலி, முதுகுவலி, முதுகெலும்புப் பிரச்னை, டிஸ்க் பிரச்னை ஆகியவற்றுக்குச் சிறந்த தீர்வு.

• கழுத்து வலி, கழுத்து மற்றும் தோள்பட்டையின் இடையே வரக்கூடிய சர்விகல் பிரச்னை ஆகியவை சரியாகும்.

• கொஞ்ச நேரம்கூட நிமிர்ந்து உட்காராமல் அவதிப்படுவோர் இதைச் செய்யலாம். முதுகெலும்பின் வளைவுத்தன்மை அதிகரிக்கும்.

• இனப்பெருக்க உறுப்புகள் ஆரோக்கியமாகும். தசைகள் வலுவடையும்.

• நீண்ட நேரம் உட்கார்ந்தே வேலை செய்வோர் அவசியம் செய்ய வேண்டும். முதுகு, கழுத்து, தோள்பட்டை வலிகள் நீங்கும்.
 
குறிப்பு: யோகாவுக்குத் தயாராகும் முன் கண்களை மூடி, கைகளில் சின்முத்திரை வைத்து, 10 முறை மூச்சைக் கவனிக்க வேண்டும்.

உடலினை உறுதி செய் - 5

யோகா முடிந்ததும், சப்பளங்கால் போட்டு அமர்ந்து, கைகள் கூப்பியபடி, மூன்று முறை ‘ஆம்’ சப்தம் சொல்லி, ‘சாந்தி... சாந்தி... சாந்தி’ என்று மூன்று முறை உச்சரித்து முடிக்க வேண்டும்.

- ஆரோக்கியக் கலை அறிவோம்

- ப்ரீத்தி, படங்கள்: ச.ஹர்ஷினி

மாடல்: நிவிஷா

உதவி: ட்ரைமெட் மருத்துவமனை