Published:Updated:

எங்கும் எப்போதும் ஈஸி எக்சர்சைஸ்

ஒட்டுமொத்த விகடனுக்கும் ஒரே ஷார்ட்கட்

Use App
எங்கும் எப்போதும் ஈஸி எக்சர்சைஸ்
எங்கும் எப்போதும் ஈஸி எக்சர்சைஸ்

சக்திவேல், பிசியோதெரபிஸ்ட் (ஸ்போர்ட்ஸ் ஸ்பெஷலிஸ்ட்)

பிரீமியம் ஸ்டோரி

காலை முதல் மாலை வரை ஒரே இடத்தில் அமர்ந்து வேலை செய்வதால் உடல் எடை அதிகரிக்கும். இதற்குக் காரணம் உடற்பயிற்சி செய்யாமல் இருப்பது; உடல் உழைப்பு இல்லாதது. இதற்காகக் கவலைப்படுகிறீர்களா? இனி அமர்ந்த இடத்தில் இருந்தே ஆரோக்கியம் பெறலாம். உடலை ஃபிட்டாக வைத்திருக்க உதவும் டெஸ்க் பயிற்சிகள் இங்கே... 

எங்கும் எப்போதும் ஈஸி எக்சர்சைஸ்

ஹீல் ரைஸ் (Heel Raise)

நாற்காலிக்குப் பின்புறமாக நிற்க வேண்டும். கால்களைச் சற்று அகட்டி வைத்துக்கொள்ள வேண்டும். நிற்கும்போது முதுகுத்தண்டு, கணுக்கால், தோள்பட்டை, தலை மற்றும் கழுத்து ஒரே நேர்கோட்டில் இருக்கும்படி நேராக நிற்க வேண்டும். இப்போது, முன்பாதத்தில் முழு உடலின் எடையையும் நிறுத்தி, குதிகால்களை உயர்த்த வேண்டும். தடுமாறாமல் இருக்க, நாற்காலியின் மேற்புறத்தைப் பிடித்துக்கொள்ளலாம். இந்த நிலையில் சில விநாடிகள் அப்படியே நிற்க வேண்டும். மீண்டும் பழையநிலைக்கு வர வேண்டும். இந்தப் பயிற்சியை 10 முறை செய்யலாம்.

எங்கும் எப்போதும் ஈஸி எக்சர்சைஸ்

பலன்கள்: கால் தசைப்பிடிப்புகள் நீங்கும். முழங்கால் மூட்டுவலியைக் குறைக்கும். கால்கள் மரத்துப்போகாமல் இருக்க உதவும்.

சின் டக் (Chin Tuck)

நாற்காலியில் நிமிர்ந்து அமர வேண்டும். முதுகுத்தண்டு நேராகவும் தலை கம்ப்யூட்டர் திரைக்கு நேராக அதைப் பார்ப்பதுபோலவும் இருக்கட்டும். முதுகுத்தண்டு, இடுப்பு, தலை மற்றும் கழுத்து அனைத்தும் நிமிர்ந்தநிலையில் இருக்க வேண்டும். இப்போது, நாடியை முடிந்தவரை கழுத்துப் பகுதியை நோக்கி அழுத்த வேண்டும். இந்தப் பயிற்சியை 10 முறை செய்யலாம்.

எங்கும் எப்போதும் ஈஸி எக்சர்சைஸ்

பலன்கள்: தலை, கழுத்து, தோள்பட்டை மற்றும் முதுகுத்தண்டு இணையும் பகுதியான குருத்தெலும்புப் பகுதியில் ஏற்படும் வலி நீங்கும். முதுகுத்தண்டு மற்றும் தோள்பட்டைப் பிடிப்புகள் நீங்கும். நாடிக்குக் கீழ் உள்ள கொழுப்பு குறையும்.

ஆர்ம் ஸ்ட்ரெச் (Arm Stretch)

நாற்காலியில் நேராக அமரவும். முதுகுத்தண்டு மற்றும் தலை நிமிர்ந்தநிலையில் நேராக இருக்க வேண்டும். இடது கையை மடக்கி, தலைக்குமேல் தூக்க வேண்டும். இந்த நிலையில் வலதுகையைத் தலைக்குமேல் தூக்கி இடதுகையின் முழங்கை மூட்டைப் பற்றிப் பிடிக்க வேண்டும். இப்போது சிறு அழுத்தம் கொடுத்து, ஸ்ட்ரெச் செய்ய வேண்டும். மீண்டும் பழையநிலைக்கு வர வேண்டும். இதேபோல் வலது பக்கமும் செய்ய வேண்டும். இது ஒரு செட். இந்தப் பயிற்சியை 10 முறை செய்யலாம்.

எங்கும் எப்போதும் ஈஸி எக்சர்சைஸ்

பலன்கள்: கைகளில் உள்ள தசைப் பிடிப்புகள் நீங்கும். உடலின் நெகிழ்வுத்தன்மையை மேம்படுத்தும். மனஅழுத்தம் மற்றும் உடல் சோர்வைக் குறைக்கும்.

பேக் ட்விஸ்டிங் (Back Twisting)

நாற்காலியில் நிமிர்ந்து அமர வேண்டும். முதுகுத்தண்டு மற்றும் தலை நிமிர்ந்தநிலையில் இருக்க வேண்டும். வலது கையை நாற்காலிக்குப் பக்கவாட்டில் கொண்டு சென்று நாற்காலியின் பின்புறத்தைப் பிடித்துக்கொள்ள வேண்டும். இப்போது, நாற்காலியில் சிறு அழுத்தம் கொடுத்து, மேல் உடலை மட்டும் முடிந்தவரை திருப்ப வேண்டும். தலை, தோள்பட்டை, மார்புப் பகுதி, வயிற்றுப் பகுதியை மட்டும் திருப்ப வேண்டும். கீழ் உடலின் நிலையை மாற்றக் கூடாது. மீண்டும் பழையநிலைக்கு வர வேண்டும். இதேபோல் இடது பக்கமும் செய்ய வேண்டும். இது ஒரு செட். இந்தப் பயிற்சியை 10 முறை செய்யலாம்.

எங்கும் எப்போதும் ஈஸி எக்சர்சைஸ்

பலன்கள்: இடுப்பு, வயிற்றுப் பகுதியில் உள்ள தசைப்பிடிப்புகள் நீங்கும். வயிற்றுப்பகுதியில் உள்ள தேவையற்ற சதையைக் குறைக்கும். தோள்பட்டைப் பிடிப்புகள், முதுகுத்தண்டுப் பிடிப்புகள் நீங்கும்.

சேர் ஸ்குவாட் (Chair Squat)

நேராக நிற்க வேண்டும். கைகளைத் தோள்பட்டைக்கு நேராக நீட்ட வேண்டும். கால்களைச் சற்று அகட்டி நிற்க வேண்டும். வலது கையை இடது தோள்பட்டையிலும் இடது கையை வலது தோள்பட்டையிலும் பற்றுமாறு இரண்டு கைகளையும் மடக்க வேண்டும். இப்போது, முதுகுத்தண்டு மற்றும் கழுத்து ஒரே நேர்கோட்டில் இருக்கும்படி நிற்க வேண்டும். மெதுவாகக் கால்களை மடக்கி, பாதி அமர்ந்த நிலையில் சில நொடிகள் இருக்க வேண்டும். மீண்டும் பழையநிலைக்கு வர வேண்டும். இந்தப் பயிற்சியை 10 முறை செய்யலாம்.

எங்கும் எப்போதும் ஈஸி எக்சர்சைஸ்

பலன்கள்: உடலின் சமநிலைத் தன்மையை மேம்படுத்தும். கால் பகுதியில் உள்ள தசைப்பிடிப்புகளை நீக்கும். கால் தசைகள் உறுதியாகும். இடுப்புவலியைக் குறைக்கும்.

 ஃபோர் ஆர்ம் ஸ்ட்ரெச்

பயிற்சி 1: நாற்காலியில் நேராக நிமிர்ந்து அமர வேண்டும். முதுகுத்தண்டு மற்றும் தலை நிமிர்ந்தநிலையில் நேராக இருக்க வேண்டும். வலது கையை முன்னோக்கி நீட்ட வேண்டும். உள்ளங்கை வெளிப்புறத்தைப் பார்த்தபடியும் விரல்களின் நுனி தரையைப் பார்த்தபடியும் இருக்க வேண்டும். வலது கையை இடது கையைக் கொண்டு உள்புறமாக அழுத்த வேண்டும். பிறகு மீண்டும் பழையநிலைக்கு வர வேண்டும். இதேபோல் இடது கைக்கும் செய்ய வேண்டும். இது ஒரு செட். இந்தப் பயிற்சியை 10 முறை செய்யலாம்.

பயிற்சி 2
: நாற்காலியில் நேராக நிமிர்ந்து அமர வேண்டும். முதுகுத்தண்டு மற்றும் தலை நிமிர்ந்தநிலையில் இருக்க வேண்டும். வலது கையை முன்னோக்கி நீட்ட வேண்டும். விரல்களை மடக்கி, இடது கையால் வலது கையைப் பிடிக்க வேண்டும். வலது கையை, இடது கையைக் கொண்டு உள்புறமாக அழுத்த வேண்டும். பிறகு மீண்டும் பழையநிலைக்கு வர வேண்டும். இதேபோல் இடது கைக்கும் செய்ய வேண்டும். இது ஒரு செட். இந்தப் பயிற்சியை 10 முறை செய்யலாம்.

எங்கும் எப்போதும் ஈஸி எக்சர்சைஸ்

பலன்கள்: கைவிரல்களில் உள்ள பிடிப்புகள் நீங்கும். கைவிரல்களுக்கு ரத்தம் சீராகப் பாய உதவும்.  கைகளின் களைப்புக்கு இது சிறந்த பயிற்சி.

 ஹேண்டோ பேக் ஸ்ட்ரெச்சிங் (Hando Back Streching)

நாற்காலியின் நுனியில் சாதாரணமாக அமர வேண்டும். இரண்டு கைகளையும் பின்புறமாகக்கொண்டுசென்று நாற்காலியைப் பிடித்துக்கொள்ள வேண்டும். பின்னர், இரண்டு கைகளிலும் ஓர் அழுத்தம் கொடுத்து முதுகுத்தண்டு, கழுத்து, தலை மற்றும் தோள்பட்டையை ஒரே நேர்கோட்டில் இருக்குமாறு நிமிர வேண்டும். மீண்டும் பழையநிலைக்கு வர வேண்டும். இந்தப் பயிற்சியை 10 முறை செய்யலாம்.

எங்கும் எப்போதும் ஈஸி எக்சர்சைஸ்

பலன்கள்: கைகளின் தசைகள் இறுகும். முதுகுத்தண்டு, தோள்பட்டை மற்றும் கழுத்துப் பிடிப்புகள் நீங்கும். கழுத்துவலி, முதுகுவலி மற்றும் இடுப்புவலி போன்றவை குறையும்.

- ச.மோகனப்பிரியா, படங்கள்: க.பாலாஜி, மாடல்: ஜெயா

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு