Published:Updated:

ஆற்றலை அதிகரிக்கும் பயிற்சிகள்!

ஆற்றலை அதிகரிக்கும் பயிற்சிகள்!

ஆற்றலை அதிகரிக்கும் பயிற்சிகள்!
##~##

வ்வொரு நாளையும் நாம் எப்படித் தொடங்குகிறோம் என்பதில்தான் நம் ஆரோக்கியம் அடங்கியிருக்கிறது. அதனால்தான் பெரியவர்கள், ''உறங்கும்போதே, மனசு அமைதியா நிம்மதியா உறங்கணும்... அதிகாலையில் மலர்ச்சியா ஆரோக்கியமா எழணும்'' என்பார்கள்.  

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

 யோகா பயிற்சிகளுடன் ஒரு தினத்தைத் தொடங்கும்போது உடலும் மனதும் உற்சாகமாக இருப்பதை உணரமுடியும். மனதில் தோன்றும் வேண்டாத எண்ணங்களும், உணர்ச்சிகளும் விடுபடும். பயிற்சிகள் செய்வதன் மூலம் அன்றைய தினம் சிறப்பானதாக இருக்கும். ஆரோக்கியமாக வாழவும், அந்த ஆரோக்கியம் வாழ்நாள் முழுவதும் நீடிக்கவும் தினசரி செய்யக்கூடிய, உடலுக்கு ஆற்றலை அளிக்கக்கூடிய யோகா பயிற்சிகள் பற்றி, பயிற்சியாளர் சி.அண்ணாமலை விவரிக்கிறார்.

'யோகாவில் பல மரபுகள், ஆசிரியர்கள் உள்ளனர். கிருஷ்ணமாச்சாரி யோகா மரபு வித்தியாசமான நல்ல பலன்களை உடனடியாகத் தரக்கூடியது. பொதுவாக அலுவலகங்களில், குறைந்த உடல் உழைப்புகொண்ட வேலைகளைச் செய்பவர்கள் எப்படித் தங்கள் உடலை ஆரோக்கியமாக வைத்துக்கொள்ளலாம் என்பதையும் எளிதாகச் சொல்கிறது. எளிதானது என்றாலும் வலிமையானது இத்தகைய யோகா...'' என்றவர், ஆசனங்கள் செய்யும் முறைகளைப் பற்றி விளக்கினார்.

தாடாசனத்தின் தழுவல்

ஆற்றலை அதிகரிக்கும் பயிற்சிகள்!

முதலில், நேராக நிற்க வேண்டும். மூச்சை உள்ளிழுத்தவாறே கைகளை ஒன்றுசேர்க்காத நிலையில், முன் பக்கமாக உயர்த்தித் தலைக்கு மேல் கொண்டுசெல்ல வேண்டும். கைகளைத் தலைக்கு மேல் கொண்டுசெல்லும்போது, முதுகைச் சற்றுப் பின்புறமாக வளைக்க வேண்டும். ஒரு விநாடிக்குப் பின் மூச்சை வெளியே விட்டபடி பழைய நிலைக்கு வர வேண்டும். இப்படி 6 முறைகள் செய்ய வேண்டும்.

பலன்கள்: இந்தப் பயிற்சி செய்வதால், தசைகள் நன்கு நீட்சி அடைகின்றன. நுரையீரலுக்கு அதிக அளவில் கிடைக்கும் ஆக்சிஜன், ரத்த ஓட்டம் மூலம் உடல் முழுவதும் பரவுகிறது. உடலில் தேங்கும் நச்சுப் பொருட்கள் வெளியேற்றப்படுகின்றன. உடலுக்குப் புத்துணர்ச்சியும் கிடைக்கிறது.

வீரபத்ராசனத்தின் தழுவல்

ஆற்றலை அதிகரிக்கும் பயிற்சிகள்!

நேராக நின்ற நிலையில் இருந்து முதலில் இடது காலை முன் பக்கமாக வைக்க வேண்டும். வலது காலின் பாதத்தைச் சற்று வெளிப்புறமாகத் திருப்பி, நிலையாக நிற்க வேண்டும். மூச்சை உள்ளிழுத்தபடியே இடதுகால் முட்டியை மடக்கி கைகளை முன்பக்கமாக நீட்டி, மேல்புறமாகக் கொண்டுசெல்லும்போது, மார்பை விரிந்த நிலைக்குக் கொண்டுவர வேண்டும். ஒருசில விநாடிகள் இடைவெளி விட்டு, மூச்சை வெளியே விட்டபடி பழைய நிலைக்கு வர வேண்டும். இப்படிச் செய்யும்போது பின் கால் மடியக் கூடாது. இரு கால்களுக்கும் முறையே 6 முறைகள் செய்ய வேண்டும். ஒவ்வொரு முறை செய்த பிறகும், தேவைக்கு ஏற்ப சில விநாடிகள் ஓய்வெடுக்கலாம்.

பலன்கள்: முதுகெலும்பு வளைந்து, மார்புப் பகுதி விரியும்போது, சக்தி அதிகரிக்கிறது. உடலின் மேல் பகுதி - குறிப்பாகக் கீழ் முதுகு - நன்கு வேலை செய்கிறது. கால், கணுக்கால், கெண்டைக்கால் வலுவடைகிறது. அடிவயிறு இழுக்கப்படுகிறது. கவனம் கூடுகிறது.

உத்தானாசனத்தின் தழுவல்

ஆற்றலை அதிகரிக்கும் பயிற்சிகள்!

முதலில் நேராக நிற்க வேண்டும். பின்னர் இரண்டு கால்களுக்கும் இடையில் சிறிது இடைவெளிவிட்டு, அகட்டி நிற்க வேண்டும். இந்த நிலையில், மூச்சை இழுத்தவாறே இரு கைகளையும் முன்புறமாக உயர்த்தித் தலைக்கு மேல் கொண்டுசெல்ல வேண்டும். பார்வை நேராக இருக்க வேண்டும். சில விநாடிகளுக்குப் பிறகு மூச்சை வெளியேவிட்டபடி, முன் பக்கமாகக் குனிய வேண்டும். இந்த நிலையில் குனிய முடியவில்லை என்றால், கால்களைச் சற்று மடித்துக்கொள்ளலாம். குனிந்து, கைகளை இரு பாதங்களின் பக்கவாட்டிலும் வைக்க வேண்டும். மூச்சை உள்ளே இழுத்தபடி, உடலை நிமிர்த்திக் கைகளைத் தலைக்கு மேல் கொண்டுசெல்ல வேண்டும். அதன் பிறகு மூச்சை வெளியேவிட்டபடியே, கைகளைப் பழைய நிலைக்குக் கொண்டுசெல்ல வேண்டும்.

பலன்கள்: இந்த நிலை முன்பு செய்த ஆசன நிலையின் எதிர்விளைவுகளை, வலிகளைப் போக்கி உடலை நடுநிலைப்படுத்துகிறது. முதுகுப் பகுதி மற்றும் தொடைப் பகுதியை நன்கு நீட்சியடையச்செய்து, இந்தப் பகுதிகளுக்கு நல்ல ரத்த ஓட்டம் கிடைக்கச் செய்கிறது.

குறிப்பு : யோகாசனம் தொடங்குவதற்கு முன்பு சில நிமிடங்கள் உட்கார்ந்தோ, நின்ற நிலையிலோ உடலையும் மனதையும் அமைதிப்படுத்திக்கொள்ள வேண்டும். அதாவது சாதாரணமாக மூச்சை உள்ளிழுத்து ஒரு வினாடிக்குப் பிறகு வெளிவிட வேண்டும். ஒவ்வொருவர் உடல் அமைப்புக்கும் ஏற்றபடி யோகா ஆசனங்களில் சில மாற்றங்கள் தேவைப்படும். எனவே, யோகா பயிற்சியாளரை அணுகி உங்கள் உடலுக்கு ஏற்ற யோகா பயிற்சிகளைக் கற்று, அதன்படி செய்வதே சரியானது.

படங்கள்: எம்.உசேன்

மாடல்: அபிரஞ்சனா குமாரி சிங்

இடம்: வினியோகா ஹீலிங் ஃபவுன்டேஷன், சென்னை.