Published:Updated:

50-க்குப் பிறகு செய்யவேண்டிய, செய்யக்கூடாத உடற்பயிற்சிகள் என்னென்ன தெரியுமா? #ExpertOpinion

50 வயதைக் கடந்தவர்களும்கூட உடலை ஃபிட்டாக வைத்துக்கொள்வதில் ஆர்வம் காட்டிவருகின்றனர். அதில் தவறில்லை. ஆனால், அவர்கள் சில உடற்பயிற்சிகள் செய்வதைத் தவிர்ப்பது நல்லது.

Exercise
Exercise ( pixabay )

பெருநகரங்களில் மட்டுமல்ல... சிறு சிறு நகரங்களிலும் கூட ஃபிட்னெஸ் சென்டர்கள் இப்போது அதிகரித்திருக்கின்றன. முன்பு எப்போதும் இல்லாத அளவுக்குப் பலரிடமும் உடல்நலம் குறித்த விழிப்புணர்வு ஏற்பட்டிருக்கிறது. முன்பெல்லாம் உடற்பயிற்சிக் கூடங்களுக்கு இளைஞர்களின் கூட்டம்தான் படையெடுக்கும். ஆனால், இப்போது நிலைமை மாறி வருகிறது.

Exercise
Exercise
pixabay

50 வயதைக் கடந்தவர்களும்கூட உடலை ஃபிட்டாக வைத்துக்கொள்வதில் ஆர்வம் காட்டிவருகின்றனர். அதில் தவறில்லை. ஆனால், அவர்கள் சில உடற்பயிற்சிகள் செய்வதைத் தவிர்ப்பது நல்லது. காரணம், இந்த வயதைக் கடக்கும்போது இயல்பாகவே உடலில் சில மாற்றங்கள் குறிப்பாக தடுமாற்றம் போன்றவை நிகழத்தொடங்கும். ஆனால், ``50 என்பது ஒரு நம்பர் தான் என்பதை முதலில் புரிந்துகொள்ள வேண்டும். நம்முடைய உடலும் மனமும் ஆரோக்கியமாக இருக்க வேண்டும் என்பதையே முக்கியமானதாகக் கருத வேண்டும்” என்கின்றனர் உடற்பயிற்சி ஆலோசகர்கள்.

எளிய உடற்பயிற்சிகளாக இருந்தாலும் அவற்றை உரிய நிபுணரின் ஆலோசனையின்றிச் செய்யக்கூடாது. அப்படியாக, 50 வயதைக் கடந்தோர் செய்யக்கூடாத அதே சமயத்தில் செய்ய வேண்டிய உடற்பயிற்சிகள் குறித்து விளக்குகிறார் உடற்பயிற்சி நிபுணர் சுசீலா

உடற்பயிற்சி நிபுணர் சுசீலா
உடற்பயிற்சி நிபுணர் சுசீலா

``ஒருவர் 40 வயதிலிருந்து உடற்பயிற்சிகளைச் செய்துகொண்டிருந்தால் அவர் 50 வயதைத் தாண்டினாலும் அவர் தொடர்ந்து பயிற்சியில் ஈடுபடும்போது எந்தப் பிரச்னையும் ஏற்படாது. ஆனால், ஒருவர் 49 வயதில் ஏதேனும் உடல்நலக் கோளாறு காரணமாக மருத்துவரை அணுகி, அதன்பின்னர் உடற்பயிற்சியில் ஈடுபடுகிறார் என்றால் கவனம் தேவை. அவர் ஓர் உடற்பயிற்சி ஆலோசகரின் துணையோடு அவருக்கு என்ன வகையான பயிற்சி தேவையோ அதை மேற்கொள்ளலாம்.

செய்யக்கூடாத உடற்பயிற்சிகள்

கழுத்துக்குப் பின்னால் இழுக்கக்கூடிய உடற்பயிற்சிகளைத் தவிர்க்கலாம். டெட் லிஃப்ட் (Deadlift) வொர்க் அவுட் செய்யக்கூடாது.

முழங்கால், தோளுக்கு பாதிப்பை ஏற்படுத்தும் உடற்பயிற்சிகளைச் செய்ய வேண்டாம். `புல் அப்ஸ்’ (Pullups), `புஷ் அப்ஸ்’ (Pushups) போன்றவற்றைத் தவிர்ப்பது நல்லது.

Exercise
Exercise
pixabay

அதிக எடையைப் போட்டுச் செய்யும் `செஸ்ட் பிரஸ்’ (Chest press) வொர்க் அவுட்டைத் தவிர்க்க வேண்டும்.`வெயிட் லிப்டிங்’ (Weight lifting) போன்ற உடற்பயிற்சிகளைச் செய்யக் கூடாது.

`ஸ்குவாட்டிங்’ (Squatting) உடற்பயிற்சிகளைத் தவிர்க்க வேண்டும். டிரெட்மில்லில் (Treadmill) நடப்பதைத் தவிர்ப்பது அவசியம்.

50 வயதைத் தாண்டும்போது இன்பேலன்ஸ் ஏற்படும். இதனால் டிரெட்மில்லில் நடக்கும்போது பேலன்ஸ் தவற வாய்ப்புண்டு என்பதால் அதைத் தவிர்ப்பது நலம்.

ஜிம் ஆக்டிவிட்டிஸை அறவே தவிர்க்க வேண்டும். அதேபோல தரையில் அமர்ந்து செய்யக்கூடிய உடற்பயிற்சிகளைக் கைவிட வேண்டும்.

வேக ஓட்டத்தைத் தவிர்க்க வேண்டும்.

Exercise
Exercise
pixabay

செய்யவேண்டிய உடற்பயிற்சிகள்!

மெதுவாகவும், நிதானமாகவும், அதிக எடையில்லாத அனைத்து உடற்பயிற்சிகளையும் மேற்கொள்ளலாம்.

உடலிலுள்ள அனைத்து மூட்டுகளுக்கான எளிய உடற்பயிற்சிகள் உண்டு. அவற்றை உரிய உடற்பயிற்சி நிபுணரின் துணையோடு செய்ய வேண்டும்.

நடைப்பயிற்சி அவசியம். சுமார் 30 நிமிட நடையே போதுமானது. ஒரு மணி நேரம் நடைப்பயிற்சியெல்லாம் கூடாது.

50 வயதைத் தாண்டினால் பெரும்பாலும் தடுமாற்றம்தான் ஏற்படும் என்பதால் அதற்கான உடற்பயிற்சிகளை மேற்கொள்ளலாம். ஆனால், நீண்ட வருடங்களாகத் தினசரி பயிற்சியில் ஈடுபட்டிருப்பவர்களுக்குத் தடுமாற்றம் ஏற்படாது என்பதையும் அறிந்துகொள்ள வேண்டும்.

அதிக எடையில்லாத (குறைந்தது 5 கிலோ) டம்பெல் (Dumbell) கழுத்துக்கு முன்னால் செய்யக்கூடிய உடற்பயிற்சிகளை மேற்கொள்ளலாம்.

மூட்டுகளை வலுவாக்க `ஸ்ட்ரெச்சிங்’ (Stretching) உடற்பயிற்சிகளை மேற்கொள்ளலாம்.

Exercise
Exercise
pixabay

சூரிய நமஸ்காரம் செய்யலாம்.

நடைப்பயிற்சி அல்லது உடற்பயிற்சியில் ஈடுபடும்போது உடன் ஒரு சிறிய பாட்டிலில் தண்ணீர் வைத்துக்கொள்வது அவசியம்.

மேற்கண்டவை பொதுவானவர்களுக்கே. விளையாட்டு வீரர்களுக்கும், தொடர்ச்சியாகப் பல வருடங்கள் உடற்பயிற்சியில் ஈடுபட்டு வருபவர்களுக்கும் பொருந்தாது என்பதை நினைவில் கொள்ளவும்” என்கிறார் சுசீலா.