ஃபிட்னெஸ் பேண்ட்... வேண்டுமா, வேண்டாமா?!

`ஸ்மார்ட் போன்களுக்கு ஓய்வளித்துவிட்டு, கை கால்களுக்கு அசைவு கொடுங்கள்', `உடலிலிருந்து வியர்வை வெளியேறட்டும்', `8 மணி நேரத் தூக்கம் அவசியம்' என ஆரோக்கியமான உடல் நலத்துக்குத் தேவையான பழக்க வழக்கங்களை நினைவூட்டும் டிஜிட்டல் நண்பன் இந்த ஃபிட்னெஸ் பேண்ட்.

`இரண்டு மணி நேரத் தூக்கம் போதாது, உறக்க நேரத்தை அதிகப்படுத்துங்கள்' - இதுபோன்ற எச்சரிக்கைகள் தினந்தோறும் வந்துகொண்டிருக்கும். வெறும் மெசேஜ் பரிந்துரைகளாக இல்லாமல், உங்களது உடல் நலத்தைப் பற்றிய real-time டேட்டா ட்ராக்கராகச் செயல்படும். நம்பர்களால் அதிரவைக்கும் இந்த டேட்டா மானிட்டர், உங்களை ஹெல்த் கான்ஷியஸாக மாற்றும்.

தகவல் பரிமாறவும், மெசேஜ் அனுப்பவும் தயாரிக்கப்பட்ட மொபைல் போன்கள், இன்று நினைத்துப் பார்க்க முடியாத வேலைகளை நொடிப் பொழுதில் செய்துமுடிக்கின்றன. அதேபோல, ஃபிட்னெஸ் பேண்ட்களின் பயன்பாடுகளும் வெகுவாக அதிகரிக்கும். பல அட்வான்ஸ்டு டெக்னாலஜிகள் புகுத்தப்படும். வெறும் டேட்டா ட்ராக்கராக இல்லாமல், பெர்சனல் ஹெல்த் மானிட்டராக வேலைசெய்யும்.

ஒரு முறை சார்ஜ் செய்தால், ஃபிட்னெஸ் பேண்டின் பேட்டரி காலம் 20 - 25 நாள்கள் வரை நீடிக்கும். அடிக்கடி சார்ஜ் செய்ய வேண்டிய தொல்லை இருக்காது.

ஃபிட்டான உடலுக்குத் தேவையான பயிற்சிகளைப் பரிந்துரைப்பது ஒரு பக்கமும், ஒருவேளை அவற்றை ஃபாலோ செய்யவில்லை என்றால், பரிந்துரைக்கப்பட்ட பயிற்சிகள் பின்பற்றப்படவில்லை என்ற அலர்ட் இன்னொரு பக்கமும் தொடர்ந்து வந்துகொண்டே இருக்கும். இது, ஹெல்த் கோல் செட் செய்து, அதற்குத் தேவையான பயிற்சிகளை நோக்கி உங்களை நகர்த்தும். அப்படி உங்களது ஃபிட்னெஸ் கோல்ஸ் ஒவ்வொன்றாக நிறைவேறும்போது புத்துணர்ச்சி கிடைக்கும். எதையோ சாதித்துவிட்ட உணர்வு, மேலும் உங்களை ஃபிட்டாக இருக்கத் தூண்டும். தன்னை கவனித்துக்கொள்ள நேரமில்லாமல் ஓடிக்கொண்டிருக்கும் ஒவ்வொருவருக்கும், ஆரோக்கியமே பிரதானம் என்பதை நினைவூட்டிக்கொண்டே இருப்பதுதான் இந்த ஃபிட்னெஸ் பேண்ட்களின் வேலை.

ஃபிட்னெஸ் பேண்ட்களின் கணக்கு தோராயமாக இருக்குமே தவிர, அது துல்லியமானது இல்லை. உதாரணமாக, தரையில் நடப்பதற்கும், படி ஏறுவதற்கும் வெவ்வேறு அளவிலான கலோரிகள் உடலிலிருந்து வெளியேறும். ஆனால், ஃபிட்னெஸ் பேண்ட்கள் இந்த இரு வேலைகளுக்கும் ஒரே கணக்கீட்டைத்தான் எடுத்துக்கொள்ளும். படி ஏறும்போதும், அது ஓர் அடியாகத்தான் கணக்கிடப்படும். மற்றொரு உதாரணம் சொல்ல வேண்டும் என்றால், நீங்கள் 10 மணிக்கு உறங்கச் சென்றிருக்கலாம். ஆனால், டீப் ஸ்லீப் ஆரம்பமான நேரத்தைத்தான் ஃபிட்னெஸ் பேண்ட்கள் கணக்கில் கொள்ளும்.

ஃபிட்னெஸ் பேண்ட்கள், ஆரோக்கியமான உடல் நலத்தை வலியுறுத்தும் ஒரு ரிமைண்டர் மட்டுமே. பரிந்துரைக்கப்படும் பயிற்சிகளை செயல்படுத்துவது அவரவரின் முயற்சியால்தான் சாத்தியமாகும்.

`நீங்கள் ஃபிட்டாக இல்லை', `உடல் எடை அதிகமாக உள்ளது' போன்ற நினைவூட்டல்கள், உங்களை மனச்சோர்வடைய வைக்கலாம். கோல் செட் செய்து அதை நிறைவேற்றாமல் போனால், ஏமாற்றம் அடையலாம். இதுபோன்ற நேரங்களில் மனம் தளராது, அதை நேர்மறையாக அணுகி பயிற்சிகளைச் செய்து நல்ல ரிசல்ட்டைப் பெற வேண்டும்.