Published:Updated:

கலோரியோ குறைவு... தெம்போ நிறைவு! - 30 வகை வெஜ் ஸ்பெஷல் ரெசிப்பிகள்

முத்துலட்சுமி மாதவகிருஷ்ணன்

பிரீமியம் ஸ்டோரி
கலோரியோ குறைவு... தெம்போ நிறைவு!  - 30 வகை வெஜ் ஸ்பெஷல் ரெசிப்பிகள்

முள்ளங்கி முளைப்பயறு சப்ஜி

தேவை: முள்ளங்கி - ஒன்று, முளைப்பயறு - கால் கப், தக்காளி - இரண்டு, பச்சை மிளகாய் - ஒன்று, சீரகம் - கால் டீஸ்பூன், இஞ்சி - பூண்டு விழுது - அரை டீஸ்பூன், மஞ்சள்தூள் - அரை டீஸ்பூன், மிளகாய்த்தூள் - அரை டீஸ்பூன், கொத்த மல்லித்தழை - சிறிதளவு, எண்ணெய் - மூன்று டீஸ்பூன், உப்பு - தேவையான அளவு.

கலோரியோ குறைவு... தெம்போ நிறைவு!  - 30 வகை வெஜ் ஸ்பெஷல் ரெசிப்பிகள்

செய்முறை: முள்ளங்கியைத் தோல் சீவி, வட்டமாக நறுக்கிக் கொள்ளவும். தக்காளியை அரைத்துக் கொள்ளவும். அகலமான சிறிய கடாயில் எண்ணெய்விட்டு சூடானதும் சீரகம் மற்றும் கீறிய பச்சை மிளகாய் சேர்த்து வதக்கவும். இதோடு இஞ்சி - பூண்டு விழுதைச் சேர்த்து லேசாக வதங்கியதும் தக்காளி விழுதைச் சேர்த்து வதக்கவும். தக்காளி விழுது வதங்கியதும் அதில் மஞ்சள்தூள், மிளகாய்த்தூள் சேர்த்துக்கொள்ளவும். பின்னர் முளைப்பயறு, முள்ளங்கியைச் சேர்த்து வதக்கவும். சிறிது நேரம் கைவிடாமல் வதக்கி, தேவையான அளவு உப்பு சேர்த்து அரை கப் தண்ணீர் ஊற்றி மூடி வைத்து, 10 நிமிடங்கள் அடுப்பை சிம்மில் வைத்து வேகவைக்கவும். அவை வெந்ததும் பொடியாக நறுக்கிய கொத்தமல்லித்தழை தூவி இறக்கவும்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

கறுப்புக் கொண்டைக்கடலை மசாலா!

தேவை: கறுப்புக் கொண்டைக்கடலை - முக்கால் கப், வெங்காயம் – ஒன்று (பொடியாக நறுக்கவும்), தக்காளி - இரண்டு, இஞ்சி - ஓர் அங்குலத்துண்டு, பூண்டுப் பற்கள் - ஏழு, சோம்பு - ஒரு டீஸ்பூன், மஞ்சள்தூள் - அரை டீஸ்பூன், மிளகாய்த்தூள் - ஒரு டீஸ்பூன், தனியாத்தூள் (மல்லித்தூள்) - அரை டீஸ்பூன், கரம் மசாலாத்தூள் - கால் டீஸ்பூன், கடலை மாவு - ஒரு டீஸ்பூன், கொத்தமல்லித்தழை - சிறிதளவு, எண்ணெய் - இரண்டு டீஸ்பூன், உப்பு - தேவையான அளவு.

கலோரியோ குறைவு... தெம்போ நிறைவு!  - 30 வகை வெஜ் ஸ்பெஷல் ரெசிப்பிகள்

செய்முறை: கறுப்புக் கொண்டைக்கடலையை நன்கு கழுவி, தேவையான அளவு தண்ணீர் ஊற்றி எட்டு மணி நேரம் ஊறவைக்கவும். தக்காளி, இஞ்சி மற்றும் பூண்டு ஆகிய மூன்றையும் ஒன்றாகச் சேர்த்து அரைக்கவும். குக்கரில் எண்ணெய்விட்டு சூடானதும் அதில் சோம்பு சேர்த்துப் பொரிந்ததும், வெங்காயம் சேர்த்து வதக்கவும். வெங்காயம் வதங்கியதும், அதில் அரைத்த விழுதைச் சேர்த்து வதக்கவும். பின்பு மஞ்சள்தூள், மிளகாய்த்தூள் சேர்த்து லேசாக வதங்கியதும் அதில் ஊறவைத்த கொண்டைக்கடலை மற்றும் தேவையான அளவு உப்பு சேர்த்து கலந்து, ஒரு கப் தண்ணீர் ஊற்றி மூடிவைத்து எட்டு முதல் பத்து விசில் வரும் வரை வேகவைக்கவும். ஒரு சிறிய கிண்ணத்தில் கடலை மாவுடன் கால் கப் சூடான தண்ணீர் சேர்த்து கரைத்துக்கொள்ளவும். குக்கரைத் திறந்து அதில் தனியாத்தூள் மற்றும் கரம் மசாலாத்தூள் சேர்த்துக் கலந்து கரைத்துவைத்துள்ள கடலை மாவு கரைசலையும் சேர்த்து லேசாக கொதித்ததும், கொத்தமல்லித்தழை தூவி இறக்கவும்.

சீனிக்கிழங்கு சப்ஜி

தேவை: சீனிக்கிழங்கு - நான்கு, வெங்காயம் - ஒன்று, பச்சை மிளகாய் - இரண்டு, மஞ்சள் தூள் - அரை டீஸ்பூன், மிளகாய்த்தூள் - ஒரு டீஸ்பூன், பூண்டு பற்கள் - ஆறு, சீரகம் - ஒரு டீஸ்பூன், கடுகு - அரை டீஸ்பூன், உளுந்து - அரை டீஸ்பூன், எலுமிச்சைப்பழம் - பாதியளவு, கறி வேப்பிலை - சிறிதளவு, கொத்தமல்லித்தழை - சிறிதளவு, எண்ணெய் - இரண்டு டீஸ்பூன், உப்பு - தேவையான அளவு.

கலோரியோ குறைவு... தெம்போ நிறைவு!  - 30 வகை வெஜ் ஸ்பெஷல் ரெசிப்பிகள்

செய்முறை: சீனிக்கிழங்கைத் தோல் சீவி, கனசதுரங்களாக நறுக்கிக்கொள்ளவும். பின்பு உப்பு, மஞ்சள்தூள் சேர்த்து வேக வைக்கவும். பூண்டு பற்கள் மற்றும் சீரகத்தைத் தண்ணீர் ஊற்றாமல் அரைத்துக்கொள்ளவும். வாணலியில் எண்ணெய்விட்டு சூடானதும் அதில் கடுகு, உளுத்தம்பருப்பு சேர்த்துத் தாளிக்கவும். பின்பு கீறிய பச்சை மிளகாய் மற்றும் பொடியாக நறுக்கிய வெங்காயம் சேர்த்து வதக்கவும். வெங்காயம் வதங்கியதும், அதில் அரைத்த பூண்டு விழுதைச் சேர்த்து சிறிது நேரம் வதக்கவும். பின்பு சிறிது உப்பு, மிளகாய்த்தூள் மற்றும் கறிவேப்பிலை சேர்த்துக் கிளறி, வேகவைத்த சீனிக்கிழங்குத்துண்டுகளையும் சேர்த்து சிறிது நேரம் குறைந்த சூட்டில் வைத்து வதக்கவும். சீனிக்கிழங்குடன் மசாலா நன்கு சேர்ந்து வதங்கியதும், பொடியாக நறுக்கிய கொத்தமல்லித்தழை, எலுமிச்சைச்சாறு கலந்து இறக்கவும்.

மஷ்ரூம் தயிர் கிரேவி

தேவை: காளான் - 200 கிராம், கெட்டித் தயிர் - ஒன்றரை கப், பிரிஞ்சி இலை - ஒன்று, சீரகம் - அரை டீஸ்பூன், கஸூரி மேத்தி - ஒரு டேபிள்ஸ்பூன், பாலாடை - ஒரு டேபிள்ஸ்பூன், எண்ணெய் - இரண்டு டீஸ்பூன், உப்பு - தேவையான அளவு.

அரைக்க: வெங்காயம் - ஒன்று, பச்சை மிளகாய் - நான்கு, இஞ்சி - சிறிதளவு, பூண்டு - ஐந்து, மிளகு - நான்கு, சோம்பு - ஒரு டீஸ்பூன், கிராம்பு - மூன்று, ஏலக்காய் - இரண்டு, பட்டை - சிறிய துண்டு, கசகசா - இரண்டு டீஸ்பூன்.

செய்முறை: காளானைச் சுத்தம் செய்து ஒரு பாத்திரத்தில் இரண்டு கப் தண்ணீர், சிறிது உப்பு சேர்த்து வேகவைத்து கொள்ளவும். பின்பு சிறு துண்டுகளாக நறுக்கிக் கொள்ளவும். அரைக்கக் குறிப்பிட்டுள்ள பொருள்களைச் சிறிது தண்ணீர் சேர்த்து நன்கு அரைத்துக்கொள்ளவும்.

கலோரியோ குறைவு... தெம்போ நிறைவு!  - 30 வகை வெஜ் ஸ்பெஷல் ரெசிப்பிகள்

கடாயில் எண்ணெய் விட்டு சூடானதும், அதில் பிரிஞ்சி இலை, சீரகம் சேர்த்து வதக்கவும். பின்பு அரைத்த விழுதைச் சேர்த்து ஐந்து நிமிடங்கள் வதக்கவும். அதில் உப்பு மற்றும் வேகவைத்து நறுக்கிய காளான் துண்டுகளைச் சேர்த்து வதக்கவும். காளான் துண்டுகளுடன் விழுது நன்றாகச் சேர்ந்த பின்பு ஒரு கப் தண்ணீர் ஊற்றி, கலந்து மூடிவைத்துக் கொதிக்க விடவும். மசாலா நன்கு கொதித்ததும் அடுப்பை சிறு தீயில் வைத்து கெட்டியான தயிர் சேர்த்து கலந்து கஸூரி மேத்தி சேர்த்து இரண்டு நிமிடங்கள் லேசாக கொதிக்கவிட்டு, கொதிவந்ததும் பாலாடை சேர்த்துக்கலந்து இறக்கவும்.

கஸூரி மேத்தி பிந்தி சப்ஜி

தேவை: வெண்டைக்காய் - 20, பெரிய வெங்காயம் - ஒன்று (பொடியாக நறுக்கவும்), தக்காளி - ஒன்று (பொடியாக நறுக்கவும்), பூண்டு பற்கள் - ஐந்து (தட்டியது), மஞ்சள்தூள் - அரை டீஸ்பூன், மிளகாய்த்தூள் - அரை டீஸ்பூன், கரம் மசாலாத்தூள் - கால் டீஸ்பூன், கஸூரி மேத்தி - இரண்டு டேபிள்ஸ்பூன், சீரகம் - ஒரு டீஸ்பூன், காய்ந்த மிளகாய் - இரண்டு, எண்ணெய் - நான்கு டீஸ்பூன், உப்பு - தேவையான அளவு.

கலோரியோ குறைவு... தெம்போ நிறைவு!  - 30 வகை வெஜ் ஸ்பெஷல் ரெசிப்பிகள்

செய்முறை: வெண்டைக் காயை நன்கு கழுவி, ஒரு துணியில் 20 நிமிடங்கள் பரப்பி உலரவைக்கவும். பின் கால் அங்குலம் கொண்ட துண்டுகளாக நறுக்கவும். ஒரு வாணலியில் இரண்டு டீஸ்பூன் எண்ணெய்விட்டு சூடானதும் அதில் நறுக்கிய வெண்டைக்காயைச் சேர்த்து வதக்கவும். வெண்டைக்காய் வதங்க ஆரம்பித்ததும், சிறிது உப்பு சேர்த்து வதக்கவும். மூடிவைத்துக் குறைந்த சூட்டில் வதக்கவும். வெண்டைக்காய் நன்கு வதங்கியதும் ஒரு தட்டில் மாற்றிக்கொள்ளவும். அதே வாணலியில் மேலும் இரண்டு டீஸ்பூன் எண்ணெய்விட்டு சூடானதும் சீரகம், காய்ந்த மிளகாய் சேர்த்துத் தாளிக்கவும். பின்பு பொடியாக நறுக்கிய வெங்காயம் சேர்த்து வதக்கவும். வெங்காயம் வதங்கியதும் தட்டிய பூண்டு பற்கள் சேர்த்து வதக்கவும். பின்பு தக்காளி சேர்த்து வதக்கவும். தக்காளி வதங்கியதும் அதில் மஞ்சள்தூள், மிளகாய்த்தூள், உப்பு சேர்த்து கலந்து சிறிது தண்ணீர் தெளித்து கலவை கெட்டியானதும் வதக்கிய வெண்டைக்காய் மற்றும் கஸூரி மேத்தி சேர்த்து கலந்து வதக்கவும். கடைசியாக கரம் மசாலாத்தூள் தூவி நன்கு புரட்டி இறக்கவும்.

கோவைக்காய் சப்ஜி

தேவை: கோவைக்காய் - 200 கிராம், பொடியாக நறுக்கிய வெங்காயம் - ஒரு கப், பொடியாக நறுக்கிய தக்காளி - ஒரு கப், மஞ்சள்தூள் - அரை டீஸ்பூன், மிளகாய்த்தூள் - ஒரு டீஸ்பூன், மல்லித்தூள் (தனியாத்தூள்) - ஒரு டீஸ்பூன், கறிவேப்பிலை - சிறிதளவு, கொத்தமல்லித்தழை - சிறிதளவு, கடுகு, உளுத்தம்பருப்பு - ஒரு டீஸ்பூன், எண்ணெய் - மூன்று டீஸ்பூன், உப்பு - தேவையான அளவு.

கலோரியோ குறைவு... தெம்போ நிறைவு!  - 30 வகை வெஜ் ஸ்பெஷல் ரெசிப்பிகள்

செய்முறை: கோவைக்காயை மிகவும் பொடியாக நறுக்கிக்கொள்ளவும். அகலமான பாத்திரத்தில் மூன்று கப் தண்ணீர் ஊற்றி, சிறிது உப்பு சேர்த்து நறுக்கிய கோவைக்காயைச் சேர்த்துக் கலந்து ஒரு மணி நேரம் மூடி வைக்கவும். பின்பு நன்கு பிழிந்து ஒரு தட்டில் மாற்றிக்கொள்ளவும். கனமான கடாயில் எண்ணெய்விட்டு சூடானதும் கடுகு, உளுத்தம்பருப்பு சேர்த்து தாளித்து, பொடியாக நறுக்கிய வெங்காயம் சேர்த்து வதக்கவும். வெங்காயம் வதங்கியதும் பொடியாக நறுக்கிய தக்காளி, கறிவேப்பிலை சேர்த்து வதக்கவும். தக்காளி வதங்கியதும் மஞ்சள்தூள், மிளகாய்த்தூள், மல்லித்தூள் (தனியாத்தூள்) சேர்த்து வதக்கவும். இதில் பொடியாக நறுக்கிய கோவைக்காய் மற்றும் உப்பு சேர்த்து நன்கு வதக்கவும். பின்பு மூடிவைத்து, சிறு தீயில் வேகவிடவும். அவை வதங்கும்போது, இடையிடையே திறந்து கிளறி விடவும். கோவைக்காய் நன்கு வதங்கியதும் வெங்காயம், தக்காளியோடு சேர்ந்து தொக்கு போல் ஆனதும், பொடியாக நறுக்கிய கொத்தமல்லித்தழை சேர்த்து இறக்கவும்.

உளுத்தம்பருப்பு சப்ஜி

தேவை: உடைத்த உளுத்தம்பருப்பு - கால் கப், துருவிய இஞ்சி - அரை டீஸ்பூன், பொடியாக நறுக்கிய பச்சை மிளகாய் - இரண்டு, மஞ்சள்தூள் - அரை டீஸ்பூன், பெருங்காயத்தூள் - ஒரு டீஸ்பூன், மிளகாய்த்தூள் - ஒரு டீஸ்பூன், கரம் மசாலாத்தூள் - கால் டீஸ்பூன், சீரகம் - ஒரு டீஸ்பூன், காய்ந்த மிளகாய் - ஒன்று, எலுமிச்சைப்பழம் - ஒன்று, கொத்தமல்லித்தழை - சிறிதளவு, நெய் - இரண்டு டீஸ்பூன், உப்பு - தேவையான அளவு.

கலோரியோ குறைவு... தெம்போ நிறைவு!  - 30 வகை வெஜ் ஸ்பெஷல் ரெசிப்பிகள்

செய்முறை: ஒரு சிறிய குக்கரில் உளுத்தம்பருப்பு, மஞ்சள்தூள், துருவிய இஞ்சி, பொடியாக நறுக்கிய பச்சை மிளகாய் மற்றும் ஒரு கப் தண்ணீர் ஊற்றி கலந்து மூடிவைத்து ஐந்து விசில் வரும் வரை வேகவைக்கவும். பின்பு குக்கரைத் திறந்து அதில் தேவையான அளவு உப்பு, பெருங்காயத்தூள், கரம் மசாலாத்தூள் சேர்த்துக் கலந்து கொள்ளவும். பின்பு சிறிது தண்ணீர் ஊற்றிக் கலந்து சிறு தீயில் வைத்து ஐந்து நிமிடங்கள் கொதிக்கவிடவும். பருப்பு கொதிக்கும்போதே மற்றொரு சிறிய வாணலியில் நெய்விட்டு சூடானதும் சீரகம், காய்ந்த மிளகாய் சேர்த்துத் தாளித்து மிளகாய்த்தூள் சேர்த்து அடுப்பை அணைத்து, கொதிக்கும் பருப்பில் கலந்து இறக்கவும். பின்பு பொடியாக நறுக்கிய கொத்தமல்லித்தழை மற்றும் எலுமிச்சைச்சாறு கலந்து பரிமாறவும்.

முட்டைகோஸ் பட்டாணி சப்ஜி

தேவை: துருவிய முட்டைகோஸ் - இரண்டு கப், பச்சைப்பட்டாணி - கால் கப், சீரகம் - அரை டீஸ்பூன், மஞ்சள்தூள் - அரை டீஸ்பூன், எலுமிச்சைச்சாறு - ஒரு டீஸ்பூன், கொத்தமல்லித்தழை - சிறிதளவு, எண்ணெய் - இரண்டு டீஸ்பூன், உப்பு - தேவையான அளவு.

அரைக்க: வெங்காயம் - ஒன்று, துருவிய இஞ்சி - அரை டீஸ்பூன், பூண்டு பற்கள் - மூன்று, காய்ந்த மிளகாய் - இரண்டு, தக்காளி - ஒன்று, மிளகு - நான்கு, கிராம்பு - இரண்டு, பட்டை - சிறிய துண்டு, சோம்பு - கால் டீஸ்பூன், தனியா (மல்லி) - கால் டீஸ்பூன்.

கலோரியோ குறைவு... தெம்போ நிறைவு!  - 30 வகை வெஜ் ஸ்பெஷல் ரெசிப்பிகள்

செய்முறை: ஒரு வாணலியில் அரை டீஸ்பூன் எண்ணெய்விட்டு சூடானதும் அதில் கிராம்பு, பட்டை, சோம்பு, மிளகு, தனியா (மல்லி) சேர்த்து லேசாக வறுக்கவும். அவற்றுடன் துருவிய இஞ்சி, பூண்டு, காய்ந்த மிளகாய், நறுக்கிய வெங்காயம், தக்காளி சேர்த்து வறுத்துக்கொள்ளவும். பின்பு இவற்றில் சிறிது தண்ணீர் சேர்த்து அரைத்துக் கொள்ளவும். அதே வாணலியில் ஒன்றரை டீஸ்பூன் எண்ணெய் விட்டு சூடானதும் சீரகம் சேர்த்து பொரிந்ததும் அரைத்த விழுதைச் சேர்த்து வதக்கவும். இதில் பச்சைப்பட்டாணி மற்றும் துருவிய கோஸ் சேர்த்து நன்கு புரட்டிக் கொள்ளவும். அதில் மஞ்சள்தூள் மற்றும் தேவையான அளவு உப்பு சேர்த்துக் கலந்து ஒரு கப் தண்ணீர் ஊற்றி மூடி வைத்து, 10 நிமிடங்கள் மிதமான சூட்டில் வேகவிடவும். முட்டைகோஸ், பட்டாணி நன்கு வெந்ததும் பொடியாக நறுக்கிய கொத்தமல்லித்தழை சேர்த்து எலுமிச்சைச்சாறு கலந்து இறக்கவும்.

பைனாப்பிள் கொஜ்ஜு

தேவை: பைனாப்பிள் துண்டுகள் - இரண்டு கப், மஞ்சள்தூள் - ஒரு டீஸ்பூன், வெல்லம் - ஒரு டேபிள்ஸ்பூன், கடுகு - அரை டீஸ்பூன், உளுத்தம்பருப்பு - அரை டீஸ்பூன், கறிவேப்பிலை - 10 இலைகள், பெருங்காயத்தூள் - ஒரு டீஸ்பூன், எண்ணெய் - இரண்டு டீஸ்பூன், உப்பு - தேவையான அளவு.

அரைக்க: கடலைப்பருப்பு - ஒரு டீஸ்பூன், உளுத்தம்பருப்பு - அரை டீஸ்பூன், மல்லி (தனியா) - ஒரு டேபிள்ஸ்பூன், வெள்ளை எள் - ஒரு டீஸ்பூன், காய்ந்த மிளகாய் - ஐந்து, தேங்காய்த்துருவல் - அரை கப், புளி - சிறிய துண்டு (ஊறவைக்கவும்).

கலோரியோ குறைவு... தெம்போ நிறைவு!  - 30 வகை வெஜ் ஸ்பெஷல் ரெசிப்பிகள்

செய்முறை: கனமான கடாயில் பைனாப்பிள் துண்டுகள், வெல்லம் மற்றும் ஒரு கப் தண்ணீர் ஊற்றி வேகவிடவும். வாணலியைச் சூடாக்கி வெள்ளை எள்ளை லேசாக வறுத்து, தனியே எடுத்துவைக்கவும். பின்பு அதே வாணலியில் சிறிது எண்ணெய்விட்டு சூடானதும் கடலைப்பருப்பு, உளுத்தம்பருப்பு சேர்த்து லேசாக நிறம் மாறியதும் தனியா (மல்லி), காய்ந்த மிளகாய் சேர்த்து வறுக்கவும். பின்பு தேங்காய்த்துருவல் சேர்த்து வறுக்கவும். சட்னி அரைக்கும் ஜாரில், வறுத்த வெள்ளை எள், வறுத்த பொருட்கள், ஊறவைத்த புளி சேர்த்து, சிறிது தண்ணீர் ஊற்றி அரைத்து வைத்துக்கொள்ளவும். பைனாப்பிள் துண்டுகள் வெந்ததும் உப்பு , மஞ்சள்தூள் சேர்த்துக் கலந்துகொள்ளவும். பின்பு அரைத்த விழுதைச் சேர்த்து அரை கப் தண்ணீர் ஊற்றி 10 நிமிடங்கள் கொதிக்க விடவும். வாணலியில் எண்ணெய்விட்டு, கடுகு, உளுத்தம்பருப்பு கறிவேப்பிலை, பெருங்காயத்தூள் தாளித்து, கொஜ்ஜுவில் சேர்த்து நன்கு கலந்து இறக்கவும்.

ஸ்பைசி சோயா புர்ஜி

தேவை: சோயா உருண்டைகள் - ஒரு கப், பொடியாக நறுக்கிய வெங்காயம் - ஒரு கப், பொடியாக நறுக்கிய தக்காளி - அரை கப், துருவிய இஞ்சி - ஒரு டீஸ்பூன், பொடியாக நறுக்கிய பூண்டு - ஒரு டேபிள்ஸ்பூன், பொடியாக நறுக்கிய பச்சை மிளகாய் - இரண்டு, மஞ்சள்தூள் - அரை டீஸ்பூன், மிளகாய்த்தூள் - அரை டீஸ்பூன், கரம் மசாலாத்தூள் - ஒரு டீஸ்பூன், சீரகம் - அரை டீஸ்பூன், கொத்தமல்லித்தழை - சிறிதளவு, எண்ணெய் - இரண்டு டீஸ்பூன், உப்பு - தேவையான அளவு.

கலோரியோ குறைவு... தெம்போ நிறைவு!  - 30 வகை வெஜ் ஸ்பெஷல் ரெசிப்பிகள்

செய்முறை: ஒரு பாத்திரத்தில் இரண்டு கப் தண்ணீர் ஊற்றி சிறிது உப்பு கலந்து கொதிக்க விடவும். அதில் சோயா உருண்டைகளைப் போட்டு 20 நிமிடங்கள் ஊறவைக்கவும். பின்பு, இரண்டு முறை தண்ணீரில் கழுவி நன்கு பிழிந்துகொள்ளவும். மிக்ஸி ஜாரில் சேர்த்து தண்ணீர் விடாமல் உதிரி உதிரியாகத் திரித்துக்கொள்ளவும். வாணலியில் எண்ணெய்விட்டு சூடானதும் அதில் சீரகம் சேர்த்துப் பொரிந்ததும், பொடியாக நறுக்கிய வெங்காயம் சேர்த்து வதக்கவும். வெங்காயம் வதங்கியதும் அதில் பச்சை மிளகாய், தட்டிய பூண்டு, துருவிய இஞ்சி, பின்பு பொடியாக நறுக்கிய தக்காளி என ஒன்றன் பிறகு ஒன்றாகச் சேர்த்து வதக்கவும். தக்காளி வதங்கியதும் மஞ்சள்தூள், மிளகாய்த்தூள், உப்பு சேர்த்துக்கொள்ளவும். இதில் திரித்துவைத்திருக்கும் சோயாவைச் சேர்த்து நன்கு புரட்டி சிறிது தண்ணீர் தெளித்து மூடிவைக்கவும். தண்ணீர் வற்றியதும் கரம் மசாலாத் தூள் சேர்த்து நறுக்கிய கொத்தமல்லித்தழை தூவி இறக்கவும்.

செள செள சப்ஜி

தேவை: செள செள - ஒன்று, வெங்காயம் - ஒன்று, தக்காளி - ஒன்று, மஞ்சள்தூள் - அரை டீஸ்பூன், சாம்பார்தூள் - இரண்டு டீஸ்பூன், கடலை மாவு - இரண்டு டேபிள்ஸ்பூன், கடுகு, உளுத்தம்பருப்பு - ஒரு டீஸ்பூன், கறிவேப்பிலை - சிறிதளவு, கொத்தமல்லித்தழை - சிறிதளவு, எண்ணெய் - இரண்டு டீஸ்பூன், உப்பு - தேவையான அளவு.

கலோரியோ குறைவு... தெம்போ நிறைவு!  - 30 வகை வெஜ் ஸ்பெஷல் ரெசிப்பிகள்

செய்முறை: செள செளவைத் தோல் சீவி பொடியாக நறுக்கவும். வெங்காயம், தக்காளியையும் பொடியாக நறுக்கவும். வாணலியியை லேசாகச் சூடாக்கி அதில் கடலை மாவு சேர்த்து லேசாக வறுத்துக்கொள்ளவும். பின்பு ஒரு தட்டில் மாற்றிக்கொள்ளவும். அதே வாணலியில் எண்ணெய்விட்டு சூடானதும் கடுகு, உளுத்தம்பருப்பு சேர்த்துத் தாளிக்கவும். பின்பு பொடியாக நறுக்கிய வெங்காயம் சேர்த்து வதக்கவும். வெங்காயம் வதங்கியதும் தக்காளி சேர்த்து வதக்கவும். பின்பு பொடியாக நறுக்கிய செள செளவைச் சேர்த்து வதக்கவும். செள செள லேசாக வதங்கியதும் அதில் மஞ்சள்தூள், உப்பு சேர்த்து கலந்து இரண்டு முறை தண்ணீர் தெளித்து மூடிவைத்து வேகவிடவும். செள செள நன்கு வெந்ததும் அதில் சாம்பார்தூள் மற்றும் கறிவேப்பிலை சேர்த்துக் கிளறி விடவும். பின்பு வறுத்த கடலை மாவு சேர்த்து நன்கு புரட்டி, பொடியாக நறுக்கிய கொத்தமல்லித்தழை தூவி இறக்கவும்.

வெள்ளைப் பட்டாணி மசாலா

தேவை: வெள்ளைப் பட்டாணி - முக்கால் கப், பொடியாக நறுக்கிய வெங்காயம் - கால் கப், புளிக்கரைசல் - இரண்டு டேபிள்ஸ்பூன், மஞ்சள்தூள் - அரை டீஸ்பூன், கரம் மசாலாத்தூள் - ஒரு டீஸ்பூன், சோம்பு - அரை டீஸ்பூன், கொத்தமல்லித்தழை - சிறிதளவு, எண்ணெய் - இரண்டு டீஸ்பூன், உப்பு - தேவையான அளவு.

அரைக்க: வெங்காயம் - ஒன்று, தக்காளி - மூன்று, காய்ந்த மிளகாய் - நான்கு, தனியா (மல்லி) - இரண்டு டீஸ்பூன், இஞ்சி - கால் அங்குலத் துண்டு, பூண்டு - ஐந்து பற்கள்.

கலோரியோ குறைவு... தெம்போ நிறைவு!  - 30 வகை வெஜ் ஸ்பெஷல் ரெசிப்பிகள்

செய்முறை: பட்டாணியை எட்டு மணி நேரம் ஊறவைத்து, குக்கரில் நான்கு விசில் வரும் வரை வேகவைத்து எடுக்கவும். அரைப்பதற்குக் கொடுக்கப்பட்டுள்ள பொருள்களைச் சிறிது தண்ணீர்விட்டு நன்றாக அரைத்துக் கொள்ளவும். குக்கரில் எண்ணெய்விட்டு சூடானதும் அதில் சோம்பு சேர்த்து பொரிந்ததும் பொடியாக நறுக்கிய வெங்காயம் சேர்த்து வதக்கவும். பின்பு மஞ்சள்தூள், அரைத்த விழுது சேர்த்து வதக்கவும். அவை வதங்கியதும் புளிக்கரைசலைச் சேர்க்கவும். இதில் தேவையான அளவு உப்பு, வேகவைத்த பட்டாணி ஆகியவற்றைச் சேர்த்து, ஒரு கப் தண்ணீர் ஊற்றி மூடிவைத்து எட்டு விசில் வரும்வரை வேகவைக்கவும். இறக்கும்போது கரம் மசாலாத்தூள் சேர்த்து, லேசாக கொதிவந்ததும் கொத்தமல்லித்தழை தூவி இறக்கவும்.

பீட்ரூட் கொண்டைக்கடலை சப்ஜி

தேவை: நீளமாக நறுக்கிய பீட்ரூட் - ஒரு கப், ஊறவைத்த கொண்டைக்கடலை - கால் கப், பொடியாக நறுக்கிய வெங்காயம் - அரை கப், தக்காளி - இரண்டு, கீறிய பச்சை மிளகாய் - இரண்டு, மிளகாய்த்தூள் - ஒரு டீஸ்பூன், மல்லித்தூள் (தனியாத்தூள்) - கால் டீஸ்பூன், கரம் மசாலாத்தூள் - கால் டீஸ்பூன், சோம்பு - அரை டீஸ்பூன், பட்டை - இரண்டு சிறிய துண்டு, கொத்தமல்லித் தழை - சிறிதளவு, எண்ணெய் - இரண்டு டீஸ்பூன், உப்பு - தேவையான அளவு.

கலோரியோ குறைவு... தெம்போ நிறைவு!  - 30 வகை வெஜ் ஸ்பெஷல் ரெசிப்பிகள்

செய்முறை: ஒரு குக்கரில் பீட்ரூட் மற்றும் கொண்டைக்கடலையுடன் சிறிதளவு தண்ணீர் சேர்த்து வேகவைத்துக் கொள்ளவும். தக்காளியை அரைத்துக்கொள்ளவும். வாணலியில் எண்ணெய்விட்டு சூடானதும் அதில் சோம்பு, பட்டை சேர்த்துத் தாளிக்கவும். பின்பு பொடியாக நறுக்கிய வெங்காயம், கீறிய பச்சை மிளகாய் சேர்த்து வதக்கவும். வெங்காயம் வதங்கியதும் அதில் தக்காளி விழுதைச் சேர்த்து வதக்கவும். அதில் மிளகாய்த்தூள், மல்லித்தூள் (தனியாத்தூள்) சேர்த்து வதக்கவும். இதில் வேகவைத்த பீட்ரூட், கொண்டைக்கடலையைச் சேர்த்து தேவையான அளவு உப்பு சேர்த்துக் கலந்து சிறிது நேரம் மசாலா நன்றாகச் சேரும் வரை மூடி வைக்கவும். பின்பு கரம் மசாலாத்தூள் சேர்த்து பொடியாக நறுக்கிய கொத்தமல்லித்தழை தூவி இறக்கவும்.

சேனைக்கிழங்கு தயிர் சப்ஜி

தேவை: பொடியாக நறுக்கிய சேனைக்கிழங்கு - ஒரு கப், தயிர் - அரை கப், மஞ்சள்தூள் - அரை டீஸ்பூன், மிளகாய்த்தூள் - கால் டீஸ்பூன், கரம் மசாலாத்தூள் - கால் டீஸ்பூன், இஞ்சி - சிறிய துண்டு, பூண்டுப் பற்கள் - ஐந்து, சோம்பு - அரை டீஸ்பூன், கசகசா - அரை டீஸ்பூன், சின்ன வெங்காயம் - நான்கு, கொத்தமல்லித்தழை - சிறிதளவு, எண்ணெய் - இரண்டு டீஸ்பூன், உப்பு - தேவையான அளவு.

கலோரியோ குறைவு... தெம்போ நிறைவு!  - 30 வகை வெஜ் ஸ்பெஷல் ரெசிப்பிகள்

செய்முறை: ஒரு குக்கரில் பொடியாக நறுக்கிய சேனைக்கிழங்கைச் சேர்த்து அரை கப் தண்ணீர் ஊற்றி, நான்கு விசில் வரும் வரை வேகவைத்து எடுக்கவும். ஒரு சிறிய மிக்ஸி ஜாரில் இஞ்சி, பூண்டு, சின்ன வெங்காயம், சோம்பு மற்றும் கசகசா சேர்த்து சிறிதளவு தண்ணீர் விட்டு அரைத்துக்கொள்ளவும். வாணலியில் எண்ணெய்விட்டு சூடானதும், அதில் அரைத்த விழுதைச் சேர்த்து வதக்கவும். பின்பு வேகவைத்த சேனைக்கிழங்கைச் சேர்த்து வதக்கவும். இதில் தேவையான அளவு உப்பு, மஞ்சள்தூள், மிளகாய்த்தூள் சேர்த்து நன்கு கலந்துகொள்ளவும். மசாலா நன்றாக சேனைக்கிழங்குடன் சேர்ந்ததும், அடுப்பில் சிறு தீயில் வைத்து தயிர் சேர்த்து கலந்து கரம் மசாலாத்தூள் தூவி நன்றாகப் புரட்டவும். தயிர் நன்றாக சேனைக்கிழங்குடன் சேர்ந்ததும் கொத்தமல்லித்தழை தூவி இறக்கவும்.

ராஜ்மா மசாலா

தேவை: ராஜ்மா - 200 கிராம், பெரிய வெங்காயம் - ஒன்று, தக்காளி - மூன்று, புளி - சிறிய உருண்டை, பூண்டு - ஏழு பற்கள், பட்டை - இரண்டு சிறிய துண்டு, ஏலக்காய், கிராம்பு - மூன்று, அன்னாசிப்பூ, பிரிஞ்சி இலை - தலா ஒன்று, சோம்பு - அரை டீஸ்பூன், கசகசா - ஒரு டீஸ்பூன், காய்ந்த மிளகாய் - ஐந்து, வெல்லம் - சிறிய துண்டு, கொத்தமல்லித்தழை - சிறிதளவு, எண்ணெய் - மூன்று டீஸ்பூன், உப்பு - தேவையான அளவு.

கலோரியோ குறைவு... தெம்போ நிறைவு!  - 30 வகை வெஜ் ஸ்பெஷல் ரெசிப்பிகள்

செய்முறை: ராஜ்மாவை 10 மணி நேரம் ஊறவைத்து, பின்பு குக்கரில் சிறிதளவு உப்பு சேர்த்து வேகவைத்துக் கொள்ளவும். தக்காளியை வேகவைத்து, தோலுரித்து அரைத்துக்கொள்ளவும். புளியை கால் கப் தண்ணீர் ஊற்றி கரைத்துவைத்துக் கொள்ளவும். வாணலியைச் சூடாக்கி அதில் சோம்பு, பிரிஞ்சி இலை, ஏலக்காய், அன்னாசிப்பூ, கிராம்பு, பட்டை, கசகசா, காய்ந்த மிளகாய் சேர்த்து லேசாக வறுக்கவும். பின்பு மிக்ஸி ஜாரில் வறுத்த மசாலா, பூண்டுப் பற்கள் மற்றும் வெங்காயம் சேர்த்து சிறிது தண்ணீர்விட்டு அரைக்கவும். வாணலியில் எண்ணெய்விட்டு சூடானதும் அதில் அரைத்த மசாலா விழுதைச் சேர்த்து வதக்கவும். இவை நன்றாக வதங்கியதும் அரைத்த தக்காளி விழுது சேர்த்து வதக்கவும். பின்பு புளிக்கரைசல், உப்பு சேர்த்துக் கலந்து ஐந்து நிமிடங்கள் மூடி வைக்கவும். இதில் வேகவைத்த ராஜ்மா, சிறிதளவு வெல்லத்துண்டு சேர்த்து மிதமான சூட்டில் 10 நிமிடங்கள் கொதிக்கவிடவும். கடைசியாக, கொத்தமல்லித்தழை தூவி இறக்கவும்.

கேரட் குடமிளகாய் வதக்கல்

தேவை: கேரட் - ஒன்று, குடமிளகாய் - ஒன்று, மஞ்சள்தூள் - கால் டீஸ்பூன், கொரகொரப்பாகப் பொடித்த மிளகுத்தூள் - ஒரு டீஸ்பூன், சாட் மசாலாத்தூள் - அரை டீஸ்பூன், கடுகு - கால் டீஸ்பூன், உளுந்து - கால் டீஸ்பூன், எண்ணெய் - இரண்டு டீஸ்பூன், உப்பு - தேவையான அளவு.

கலோரியோ குறைவு... தெம்போ நிறைவு!  - 30 வகை வெஜ் ஸ்பெஷல் ரெசிப்பிகள்

செய்முறை: கேரட்டை தோல் சீவி வட்டவட்டமாக நறுக்கிக்கொள்ளவும். குடமிளகாயின் நடுவில் இருக்கும் விதைகளை நீக்கி, சின்னச்சின்ன சதுரங்களாக நறுக்கிக்கொள்ளவும். வாணலியில் எண்ணெய்விட்டு சூடானதும் அதில் கடுகு, உளுந்து சேர்த்துத் தாளிக்கவும். பின்பு வட்டமாக நறுக்கிய கேரட்டைச் சேர்த்து, சிறு தீயில்வைத்து வதக்கவும். சிறிது வதங்கியதும் மெதுவாகத் திருப்பி விடவும். கேரட் நன்கு வதங்கியதும், நறுக்கிய குடமிளகாய்த் துண்டுகள், மஞ்சள்தூள், தேவையான அளவு உப்பு சேர்த்து வதக்கவும். குடமிளகாய் லேசாக நிறம் மாறியதும் கொரகொரப்பாகப் பொடித்த மிளகுத்தூள் சேர்த்து வேகமாகப் புரட்டி சாட் மசாலாத்தூள் தூவிப் பரிமாறவும்.

காலிஃப்ளவர் சுக்கா

தேவை: காலிஃப்ளவர் - ஒன்று, பொடியாக நறுக்கிய வெங்காயம் - ஒன்று, பொடியாக நறுக்கிய தக்காளி - இரண்டு, கறிவேப்பிலை - சிறிது, மஞ்சள்தூள் - அரை டீஸ்பூன், காய்ந்த மிளகாய் - நான்கு, சீரகம் - ஒரு டீஸ்பூன், தனியா (மல்லி) - ஒன்றரை டீஸ்பூன், பூண்டு பற்கள் - 8, தயிர் - இரண்டு டேபிள்ஸ்பூன், எண்ணெய் - மூன்று டீஸ்பூன், உப்பு - தேவையான அளவு.

கலோரியோ குறைவு... தெம்போ நிறைவு!  - 30 வகை வெஜ் ஸ்பெஷல் ரெசிப்பிகள்

செய்முறை: காலிஃப்ளவரில் உள்ள பூக்களைத் தனித்தனியாகப் பிரித்து சுத்தம் செய்து ஒரு பாத்திரத்தில் தேவையான அளவு தண்ணீர், உப்பு மற்றும் மஞ்சள்தூள் சேர்த்து வேகவைத்துக் கொள்ளவும். ஒரு சிறிய மிக்ஸி ஜாரில் பூண்டு பற்கள், சீரகம், தனியா (மல்லி), காய்ந்த மிளகாய் சேர்த்து அரைத்துக்கொள்ளவும். வாணலியில் எண்ணெய்விட்டு சூடானதும், அதில் வெங்காயம் சேர்த்து சிவக்க வதக்கி, தக்காளி சேர்த்து சிறிது நேரம் வதக்கவும். இதில் அரைத்த விழுது, உப்பு சேர்த்து நன்றாக வதக்கவும். இவற்றுடன் வேகவைத்த காலிஃப்ளவர் சேர்த்து மசாலா பூக்களின் மேல் நன்றாக ஒட்டும் வரை கிளறவும். கடைசியாக கெட்டியான தயிர் சேர்த்துக் கலந்து நன்கு புரட்டி, கிள்ளிய கறிவேப்பிலை சேர்த்து இறக்கவும்.

பனீர் லபாப்தார்

தேவை: பனீர் - 200 கிராம், பெரிய வெங்காயம் - ஒன்று, தக்காளி - இரண்டு, இஞ்சி - பூண்டு விழுது - ஒரு டீஸ்பூன், சீரகம் - அரை டீஸ்பூன், சில்லி ஃபிளேக்ஸ் - மூன்று டீஸ்பூன், தனியா (மல்லி) - இரண்டு டீஸ்பூன், கஸூரி மேத்தி - இரண்டு டீஸ்பூன், மஞ்சள்தூள் - அரை டீஸ்பூன், கரம் மசாலாத்தூள் - அரை டீஸ்பூன், சோள மாவு - ஒரு டேபிள்ஸ்பூன், காய்ச்சிய பால் - அரை கப், எண்ணெய் - இரண்டு டீஸ்பூன், உப்பு - தேவையான அளவு.

கலோரியோ குறைவு... தெம்போ நிறைவு!  - 30 வகை வெஜ் ஸ்பெஷல் ரெசிப்பிகள்

செய்முறை: வாணலியில் ஒரு டீஸ்பூன் எண்ணெய்விட்டு சூடானதும், அதில் சீரகம் சேர்த்துத் தாளிக்கவும். பின்பு பொடியாக நறுக்கிய வெங்காயம் சேர்த்து வதக்கவும். வெங்காயம் வதங்கியதும், அதில் சில்லி ஃபிளேக்ஸ், தனியா (மல்லி) சேர்த்து லேசாக வதக்கவும். பின்பு, இஞ்சி - பூண்டு விழுது, கஸூரி மேத்தி சேர்த்து லேசாக வதக்கிப் பொடியாக நறுக்கிய தக்காளி சேர்த்துக் கலந்து மஞ்சள்தூள் மற்றும் ஒரு கப் தண்ணீர் ஊற்றி, மூடிவைத்து வேக வைக்கவும். தக்காளி நன்கு வெந்ததும் அடுப்பை அணைத்து ஆறவிடவும். பின்பு மிக்ஸியில் அரைத்துக்கொள்ளவும். வாணலியில் ஒரு டீஸ்பூன் எண்ணெய்விட்டு கலவையை லேசாக வதக்கி, சதுரமாக நறுக்கிய பனீரை சேர்த்துக் கலந்து தேவையான அளவு உப்பு சேர்த்துக்கொள்ளவும். சோள மாவைப் பாலில் கலந்து பனீர் கிரேவியுடன் கலந்துகொள்ளவும். பின்பு கரம் மசாலாத்தூள் சேர்த்து லேசாகக் கொதித்ததும் இறக்கவும்.

மிக்ஸ்டு வெஜிடபிள் தால்

தேவை: பாசிப்பருப்பு - 1/8 கப், துவரம்பருப்பு - 1/8 கப், மஞ்சள்தூள் - அரை டீஸ்பூன், துருவிய இஞ்சி - ஒரு டீஸ்பூன், பொடியாக நறுக்கிய பூண்டு - நான்கு, பொடியாக நறுக்கிய வெங்காயம் - ஒன்று, பொடியாக நறுக்கிய பச்சை மிளகாய் - இரண்டு, மிளகாய்த்தூள் - ஒரு டீஸ்பூன், பெருங்காயத்தூள் - அரை டீஸ்பூன், கஸூரி மேத்தி - ஒரு டேபிள்ஸ்பூன், சீரகம் - ஒரு டீஸ்பூன், காய்ந்த மிளகாய் - இரண்டு, கேரட் - ஒன்று, பீன்ஸ் - ஐந்து, செள செள - சிறிய துண்டு, பச்சைப்பட்டாணி - கால் கப், காலிஃப்ளவர் - ஏழு பூக்கள், பால் - கால் கப், எலுமிச்சைப் பழம் - ஒன்று, எண்ணெய் - இரண்டு டீஸ்பூன், உப்பு - தேவையான அளவு.

கலோரியோ குறைவு... தெம்போ நிறைவு!  - 30 வகை வெஜ் ஸ்பெஷல் ரெசிப்பிகள்

செய்முறை: குக்கரில் பாசிப்பருப்பு, துவரம்பருப்பு மற்றும் மஞ்சள்தூள் சேர்த்து தண்ணீர் ஊற்றி நான்கு விசில் வரும் வரை வேகவைக்கவும். காய்கறிகளைப் பெரிய துண்டுகளாக நறுக்கி, தனியாக வேகவைத்துக் கொள்ளவும். வாணலியில் எண்ணெய்விட்டு சூடானதும் சீரகம் சேர்த்து பொரிந்ததும் காய்ந்த மிளகாய் சேர்த்துக்கொள்ளவும். இதில் பொடியாக நறுக்கிய வெங்காயம், பச்சை மிளகாய் சேர்த்து வதக்கி, வேகவைத்த பருப்பைச் சேர்த்து வதக்கவும். இவற்றுடன் வெந்த காய்கறி கலவை, தேவையான அளவு உப்பு, மிளகாய்த்தூள், ஒரு கப் தண்ணீர் சேர்த்துக் கலந்து கொதிக்க விடவும். பருப்பு கொதித்ததும் காய்ச்சி ஆறவைத்த பால், கஸூரி மேத்தி, பெருங்காயத்தூள் சேர்த்து, சிறிது நேரம் கொதித்ததும் எலுமிச்சைச் சாறு கலந்து இறக்கவும்.

பீன்ஸ் கேரட் வதக்கல்

தேவை: பீன்ஸ் - 10, கேரட் - ஒன்று, பெரிய வெங்காயம் - ஒன்று, காய்ந்த மிளகாய் - ஒன்று, பூண்டு - ஐந்து பற்கள், வறுத்த வேர்க்கடலை - இரண்டு டேபிள்ஸ்பூன், சீரகம் - அரை டீஸ்பூன், கறிவேப்பிலை - சிறிதளவு, எண்ணெய் - ஒரு டீஸ்பூன், உப்பு - தேவையான அளவு.

கலோரியோ குறைவு... தெம்போ நிறைவு!  - 30 வகை வெஜ் ஸ்பெஷல் ரெசிப்பிகள்

செய்முறை: பீன்ஸை இரண்டு மூன்றாக நீளவாக்கிலும் கேரட்டை வட்ட வட்டமாகவும் வெங்காயத்தைப் பொடியாகவும் நறுக்கிக்கொள்ளவும். தண்ணீர் ஊற்றாமல் பூண்டு பற்களை அரைத்துக்கொள்ளவும். காய்ந்த மிளகாய் மற்றும் வறுத்த வேர்க்கடலையைக் கொரகொரப்பாகப் பொடித்துக் கொள்ளவும். ஒரு பாத்திரத்தில் அரை கப் தண்ணீரைக் கொதிக்க வைத்து, அதில் நறுக்கிய பீன்ஸ் மற்றும் கேரட்டைச் சேர்த்து லேசாக வேகவைத்து வடிகட்டிக்கொள்ளவும்.வாணலியில் எண்ணெய் விட்டு சூடானதும், அதில் சீரகம் சேர்த்துப் பொரிந்ததும் பூண்டு விழுதைச் சேர்த்து வதக்கி, வெங்காயம், கறிவேப்பிலை சேர்த்து வதக்கவும். இதில் வேகவைத்த பீன்ஸ், கேரட் மற்றும் தேவையான அளவு உப்பு சேர்த்து கலந்து பொடித்த வேர்க்கடலைக் கலவையைச் சேர்த்துக் கலந்து இறக்கவும்.

மஷ்ரூம் மசாலா

தேவை: காளான் - 150 கிராம், வெங்காயம் - இரண்டு, தக்காளி - மூன்று, ஏலக்காய் - இரண்டு, கிராம்பு - இரண்டு, அன்னாசிப்பூ - இரண்டு, பட்டை - இரண்டு சிறிய துண்டு, இஞ்சி - பூண்டு விழுது - அரை டீஸ்பூன், மஞ்சள்தூள் - அரை டீஸ்பூன், மிளகாய்த்தூள் - அரை டீஸ்பூன், கரம் மசாலாத்தூள் - கால் டீஸ்பூன், கஸூரி மேத்தி - ஒரு டேபிள்ஸ்பூன், காய்ச்சிய பால் - அரை கப், சோள மாவு - இரண்டு டீஸ்பூன், எண்ணெய் - இரண்டு டீஸ்பூன், உப்பு - தேவையான அளவு.

கலோரியோ குறைவு... தெம்போ நிறைவு!  - 30 வகை வெஜ் ஸ்பெஷல் ரெசிப்பிகள்

செய்முறை: காளான் களைச் சுத்தம் செய்து ஒரு பாத்திரத்தில் இரண்டு கப் தண்ணீர் ஊற்றி சிறிது உப்பு சேர்த்து வேகவைத்து, சிறு சிறு துண்டுகளாக நறுக்கவும். குக்கரில் உரித்த ஒரு பெரிய வெங்காயம், தக்காளி, ஏலக்காய், பட்டை, கிராம்பு, அன்னாசிப்பூ சேர்த்து அரை கப் தண்ணீர் ஊற்றி இரண்டு விசில் வரும் வரை வேகவைத்து விழுதாக அரைக்கவும். வாணலியில் எண்ணெய்விட்டு சூடானதும், அதில் பொடியாக நறுக்கிய வெங்காயம் சேர்த்து வதக்கி இஞ்சி - பூண்டு விழுதைச் சேர்த்து வதக்கவும். இத்துடன் அரைத்த விழுது, மஞ்சள்தூள், மிளகாய்த்தூள் சேர்த்து வதக்கி, வேகவைத்து நறுக்கிய காளான் துண்டுகளைச் சேர்த்துக் கலந்துகொள்ளவும். அதில் தேவையான அளவு உப்பு, கரம் மசாலாத்தூள் சிறிது தண்ணீர் சேர்த்துக் கொதிக்க விடவும். ஒரு சிறிய கிண்ணத்தில் சோள மாவுடன் இரண்டு டேபிள்ஸ்பூன் பால் சேர்த்துக் கலந்துகொள்ளவும். மசாலா நன்கு கொதித்ததும் சோள மாவு கலவையைச் சேர்த்துக் கலந்து கஸூரி மேத்தி மற்றும் மீதமுள்ள பால் சேர்த்து லேசாக கொதிவந்ததும் இறக்கவும்.

புடலங்காய் சப்ஜி

தேவை: பொடியாக நறுக்கிய புடலங்காய் - இரண்டு கப், வெங்காயம் - ஒன்று, தக்காளி - இரண்டு, பச்சை மிளகாய் - இரண்டு, மஞ்சள்தூள் - அரை டீஸ்பூன், மிளகாய்த்தூள் - அரை டீஸ்பூன், கரம் மசாலாத்தூள் - அரை டீஸ்பூன், கறிவேப்பிலை - சிறிதளவு, சீரகம் - கால் டீஸ்பூன், கடுகு - அரை டீஸ்பூன், எலுமிச்சைச்சாறு - இரண்டு டீஸ்பூன், உப்பு - தேவையான அளவு.

கலோரியோ குறைவு... தெம்போ நிறைவு!  - 30 வகை வெஜ் ஸ்பெஷல் ரெசிப்பிகள்

செய்முறை: மிக்ஸி ஜாரில் வெங்காயத்தையும் தக்காளியையும் தனித்தனியாக கொரகொரப்பாக அரைத்துக்கொள்ளவும். பச்சை மிளகாயைப் பொடியாக நறுக்கவும். வாணலியில் எண்ணெய்விட்டு சூடானதும், அதில் கடுகு, சீரகம், கறிவேப்பிலை சேர்த்துத் தாளிக்கவும். இதில் பொடியாக நறுக்கிய பச்சை மிளகாய் சேர்த்து வதக்கி, அரைத்த வெங்காய விழுதைச் சேர்த்து கைவிடாமல் வதக்கவும். வெங்காய விழுது நன்கு வதங்கியதும், அதில் தக்காளி விழுதைச் சேர்த்து வதக்கவும். இதில் மஞ்சள்தூள், மிளகாய்த் தூள் சேர்த்துக்கொள்ளவும். பொடியாக நறுக்கிய புடலங்காய் சேர்த்து கைவிடாமல் வதக்கவும். புடலங்காய் வதங்கியதும் தேவையான அளவு உப்பு, சிறிதளவு தண்ணீர் தெளித்து மூடி வைக்கவும். புடலங்காய் வெந்ததும் அதில் கரம் மசாலாத்தூள் சேர்த்து எலுமிச்சைச்சாறு கலந்து இறக்கவும்.

முளைப்பயறு பாஜி

தேவை: முளைகட்டிய பச்சைப்பயறு - ஒரு கப், பெரிய வெங்காயம் - ஒன்று, பூண்டு பற்கள் - ஐந்து, கீறிய பச்சை மிளகாய் - இரண்டு, புளிக்கரைசல் - கால் கப், சீரகம் - அரை டீஸ்பூன், மஞ்சள்தூள் - கால் டீஸ்பூன், மிளகாய்த்தூள் - அரை டீஸ்பூன், மல்லித்தூள் (தனியாத்தூள்) - அரை டீஸ்பூன், சீரகத்தூள் - ஒரு டீஸ்பூன், வெல்லம் - சிறிய துண்டு, காய்ச்சிய பால் - அரை கப், கொத்தமல்லித்தழை - சிறிதளவு, எண்ணெய் - இரண்டு டீஸ்பூன், உப்பு - தேவையான அளவு.

கலோரியோ குறைவு... தெம்போ நிறைவு!  - 30 வகை வெஜ் ஸ்பெஷல் ரெசிப்பிகள்

செய்முறை: வெங்காயம் மற்றும் பூண்டு பற்களைக் கொரகொரப்பாக அரைத்துக்கொள்ளவும். வாணலியில் எண்ணெய்விட்டு சூடானதும் அதில் சீரகம் சேர்த்துப் பொரிந்ததும் பச்சை மிளகாய் மற்றும் அரைத்த விழுதைச் சேர்த்து வதக்கவும். முளைகட்டிய பயற்றைச் சேர்த்து சிறிது நேரம் வதக்கி ஒரு கப் தண்ணீர் ஊற்றி மூடி வைக்கவும். பயறு பாதி வெந்ததும் அதில் தேவையான அளவு உப்பு, வெல்லம், புளிக்கரைசல், மஞ்சள்தூள், மிளகாய்த்தூள், சீரகத்தூள், மல்லித்தூள் (தனியாத்தூள்) சேர்த்துக் கலந்து கொதிக்கவிடவும். அவை நன்கு கொதித்ததும், அடுப்பை சிறு தீயில்வைத்து, காய்ச்சி ஆறவைத்த பால் சேர்த்து, சிறிது நேரம் கொதித்ததும் கொத்தமல்லித்தழை தூவி இறக்கவும்.

சோயா குடமிளகாய் மசாலா

தேவை: சோயா உருண்டைகள் - ஒரு கப், நீளமாக நறுக்கிய குடமிளகாய் - ஒன்று, பட்டை - சிறிய துண்டு, கிராம்பு - மூன்று, பெரிய வெங்காயம் - ஒன்று, காஷ்மீரி மிளகாய்த்தூள் - ஒரு டீஸ்பூன், கரம் மசாலாத்தூள் - கால் டீஸ்பூன், மிளகுத்தூள் - அரை டீஸ்பூன், வெங்காயத்தாள் - சிறிதளவு, எண்ணெய் - மூன்று டீஸ்பூன், உப்பு - தேவையான அளவு. அரைக்க: பெரிய வெங்காயம் - ஒன்று, தக்காளி - இரண்டு, இஞ்சி - சிறிய துண்டு, பூண்டு - ஐந்து பற்கள், சோம்பு - அரை டீஸ்பூன்.

கலோரியோ குறைவு... தெம்போ நிறைவு!  - 30 வகை வெஜ் ஸ்பெஷல் ரெசிப்பிகள்

செய்முறை: ஒரு பாத்திரத்தில் இரண்டு கப் தண்ணீர் ஊற்றி கொதிக்கவைத்து, சிறிதளவு உப்பு சேர்த்து சோயா உருண்டைகளை 10 நிமிடங்கள் ஊறவைத்துக் கழுவி பிழிந்துகொள்ளவும். பிழிந்த சோயா உருண்டைகளைப் பாதியாக நறுக்கி வைக்கவும். அரைக்கக்குறிப்பிட்டுள்ள பொருள்களை சிறிது தண்ணீர் சேர்த்து அரைத்துக்கொள்ளவும். அகலமான வாணலியில் அரை டீஸ்பூன் எண்ணெய்விட்டு சூடானதும், அதில் நறுக்கிய குடமிளகாய் சேர்த்து லேசாக வதக்கி, தனியாக வைக்கவும். அதே வாணலியில் மேலும் எண்ணெய்விட்டு சூடானதும் பட்டை, கிராம்பு சேர்த்துத் தாளித்து, பொடியாக நறுக்கிய வெங்காயம் சேர்த்து வதக்கவும். பின்பு அரைத்த விழுது, மிளகாய்த்தூள், தேவையான அளவு உப்பு சேர்த்து வதக்கவும். அவை வதங்கியதும் நறுக்கிய சோயா உருண்டைகளைச் சேர்த்துக் கலந்து நன்கு புரட்டி சிறிதளவு தண்ணீர் தெளித்து ஐந்து நிமிடங்கள் மூடி வைக்கவும். இதில் வதக்கிய குடமிளகாய்த் துண்டுகள், கரம் மசாலாத்தூள் மற்றும் மிளகுத்தூள் சேர்த்து நன்றாகக் கலந்து, பொடியாக நறுக்கிய வெங்காயத்தாள் சேர்த்து இறக்கவும்.

சுரைக்காய் பப்பு

தேவை: பொடியாக நறுக்கிய சுரைக்காய் - ஒரு கப், பாசிப்பருப்பு - கால் கப், துவரம்பருப்பு - கால் கப், மஞ்சள்தூள் - அரை டீஸ்பூன், கடுகு - ஒரு டீஸ்பூன், சீரகம் - ஒரு டீஸ்பூன், பச்சை மிளகாய் - மூன்று, காய்ந்த மிளகாய் - இரண்டு, பெருங்காயத்தூள் - ஒரு டீஸ்பூன், பூண்டு பற்கள் - நான்கு, புளி - சிறிய நெல்லிக்காய் அளவு, கறிவேப்பிலை - சிறிது, எண்ணெய் - இரண்டு டீஸ்பூன், உப்பு - தேவையான அளவு.

கலோரியோ குறைவு... தெம்போ நிறைவு!  - 30 வகை வெஜ் ஸ்பெஷல் ரெசிப்பிகள்

செய்முறை: பூண்டு பற்களைத் தோலுரித்துத் தட்டிக்கொள்ளவும். பச்சை மிளகாயைக் கீறிக்கொள்ளவும். புளியை ஊறவைத்து, மூன்று டேபிள் ஸ்பூன் தண்ணீர் ஊற்றிக் கெட்டியாகக் கரைத்துக்கொள்ளவும். பாசிப்பருப்பு மற்றும் துவரம்பருப்பை 10 நிமிடங்கள் ஊறவைக்கவும். ஒரு சிறிய குக்கரில் ஊறவைத்த பருப்பு, நறுக்கிய சுரைக்காய் சேர்த்து ஒரு கப் தண்ணீர் ஊற்றி நான்கு விசில் வரும் வரை வேகவைக்கவும். குக்கரைத் திறந்து தேவையான அளவு உப்பு, மஞ்சள்தூள், சிறிதளவு தண்ணீர் சேர்த்து லேசாக மசித்துக்கொள்ளவும். வாணலியில் எண்ணெய்விட்டு சூடானதும், அதில் கடுகு வெடித்ததும் சீரகம், காய்ந்த மிளகாய், பச்சை மிளகாய், கறிவேப்பிலை, பெருங்காயத்தூள் சேர்த்துத் தாளித்து புளித்தண்ணீரையும் சேர்த்து அடுப்பை அணைத்து வேகவைத்தவற்றுடன் சேர்த்து இரண்டு நிமிடங்கள் கொதிக்கவிட்டு இறக்கவும்.

பூசணிக்காய் சப்ஜி

தேவை: பூசணிக்காய் - 200 கிராம், பச்சை மிளகாய் - இரண்டு, பூண்டு பற்கள் - ஐந்து, மஞ்சள்தூள் - அரை டீஸ்பூன், மிளகாய்த்தூள் - கால் டீஸ்பூன், கடலைப்பருப்பு - இரண்டு டீஸ்பூன், தனியா (மல்லி) - ஒரு டீஸ்பூன், சீரகம் - அரை டீஸ்பூன், கறிவேப்பிலை - சிறிதளவு, கொத்தமல்லித்தழை - சிறிதளவு, எண்ணெய் - இரண்டு டீஸ்பூன், உப்பு - தேவையான அளவு.

கலோரியோ குறைவு... தெம்போ நிறைவு!  - 30 வகை வெஜ் ஸ்பெஷல் ரெசிப்பிகள்

செய்முறை: பூசணிக்காயைத் தோல் சீவி, நடுவில் இருக்கும் விதைகளை நீக்கி கனசதுரங்களாக நறுக்கிக்கொள்ளவும். பச்சை மிளகாயைப் பொடியாக நறுக்கவும். பூண்டு பற்களைத் தட்டிக்கொள்ளவும். வாணலியை சூடாக்கி கடலைப்பருப்பு, தனியா (மல்லி), சீரகத்தை வாசம் வரும் வரை வறுத்துப் பொடித்துக்கொள்ளவும். வாணலியில் எண்ணெய்விட்டு சூடானதும் அதில் பச்சை மிளகாயைச் சேர்த்து வதக்கவும். பிறகு தட்டிவைத்த பூண்டு பற்களைச் சேர்த்து சிறிது நேரம் வதக்கி, பூசணிக்காய்த் துண்டுகளைச் சேர்த்து வதக்கவும். பூசணிக்காய் லேசாக வதங்கியதும் உப்பு, மஞ்சள்தூள், மிளகாய்த்தூள் சேர்த்து வதக்கி, குறைவான சூட்டில் மூடிபோட்டு தண்ணீர் ஏதும் சேர்க்காமல் வேகவிடவும். பூசணிக்காய் வெந்ததும் அதில் பொடித்த கலவையைச் சேர்த்து நன்றாகப் புரட்டி கொத்தமல்லித்தழை, கறிவேப்பிலை சேர்த்து இறக்கவும்.

கத்திரிக்காய் வேர்க்கடலை கிரேவி

தேவை: கத்திரிக்காய் - 10, நீளமாக நறுக்கிய வெங்காயம் - இரண்டு, எண்ணெய் - மூன்று டீஸ்பூன், உப்பு - தேவையான அளவு. வறுத்து அரைக்க: வேர்க்கடலை - இரண்டு டேபிள்ஸ்பூன், காய்ந்த மிளகாய் - நான்கு, தனியா (மல்லி) - ஒரு டேபிள்ஸ்பூன், தேங்காய்த்துருவல் - ஒரு டேபிள்ஸ்பூன், சீரகம் - அரை டீஸ்பூன்.

கலோரியோ குறைவு... தெம்போ நிறைவு!  - 30 வகை வெஜ் ஸ்பெஷல் ரெசிப்பிகள்

செய்முறை: கத்திரிக் காயின் காம்பை நீக்கி, நான்கு பாகங்களாக லேசாகக் கீறி நறுக்கவும். வாணலியில் அரை டீஸ்பூன் எண்ணெய்விட்டு, காய்ந்ததும் தனியா (மல்லி), சீரகம், காய்ந்த மிளகாய், வேர்க்கடலை, தேங்காய்த்துருவல் சேர்த்து, வாசம் வரும்வரை வறுத்துக்கொள்ளவும். இவற்றை மிக்ஸி ஜாரில் சிறிது தண்ணீர் ஊற்றி, நைசாக அரைத்துக்கொள்ளவும். வாணலியில் எண்ணெய்விட்டு சூடானதும் அதில் வெங்காயம் சேர்த்து வதக்கவும். வெங்காயம் வதங்கியதும், கத்திரிக்காயைச் சேர்த்து மிதமான சூட்டில் வைத்து வதக்கவும். கத்திரிக்காய் பாதி வெந்ததும் அரைத்த விழுதைச் சேர்த்துக் கிளறி, மேலும் சிறிதளவு தண்ணீர், தேவையான அளவு உப்பு சேர்த்துக் கொதிக்க விடவும். கிரேவி நன்கு கொதித்து கத்திரிக்காய் வெந்து கெட்டியான பதத்துக்கு வந்ததும் இறக்கவும்.

கொத்தவரங்காய் சப்ஜி

தேவை: கொத்தவரங்காய் - 200 கிராம், பொடியாக நறுக்கிய வெங்காயம் - ஒன்று, தக்காளி - இரண்டு, பூண்டு விழுது - ஒரு டீஸ்பூன், மஞ்சள்தூள் - அரை டீஸ்பூன், மிளகாய்த்தூள் - ஒரு டீஸ்பூன், மல்லித்தூள் (தனியாத்தூள்) - இரண்டு டீஸ்பூன், சீரகம் - அரை டீஸ்பூன், கறிவேப்பிலை - சிறிதளவு, எண்ணெய் - இரண்டு டீஸ்பூன், உப்பு - தேவையான அளவு.

கலோரியோ குறைவு... தெம்போ நிறைவு!  - 30 வகை வெஜ் ஸ்பெஷல் ரெசிப்பிகள்

செய்முறை: கொத்தவரங்காயின் கீழே மற்றும் மேலே இருக்கும் பகுதியில் லேசாக நறுக்கி, ஓரத்தில் இருக்கும் நாரைப் பிரித்துக்கொள்ளவும். பின்பு நறுக்கவும். தக்காளியைத் தண்ணீர்விடாமல் அரைத்துக் கொள்ளவும். ஒரு பாத்திரத்தில் இரண்டு கப் தண்ணீர் ஊற்றி நறுக்கிய கொத்தவரங்காயைச் சேர்த்து வேகவைத்துக் கொள்ளவும். வாணலியில் எண்ணெய்விட்டு சூடானதும் சீரகம் சேர்த்துப் பொரிந்ததும் பொடியாக நறுக்கிய வெங்காயம் சேர்த்து வதக்கவும். வெங்காயம் சற்று வதங்கியதும், அதில் பூண்டு விழுதைச் சேர்த்து வதக்கவும். பின்பு தக்காளி விழுது, மஞ்சள்தூள், மிளகாய்த்தூள், மல்லித்தூள் (தனியாத்தூள்), தேவையான உப்பு சேர்த்து வதக்கவும். இதில் வேகவைத்த கொத்தவரங்காய் சேர்த்து நன்கு புரட்டி கிளறவும். கொத்தவரங்காயுடன் மசாலா நன்கு கலந்து சேர்ந்ததும் சிறிது கறிவேப்பிலை சேர்த்து இறக்கவும்.

தால் டோக்லே

தேவை: துவரம்பருப்பு - ஒரு கப், கடலைப்பருப்பு - ஒரு டேபிள்ஸ்பூன், பச்சை மிளகாய் - இரண்டு, சீரகம் - அரை டீஸ்பூன், இஞ்சி - சிறிய துண்டு, மஞ்சள்தூள் - அரை டீஸ்பூன், பெருங்காயத்தூள் - அரை டீஸ்பூன், பொடியாக நறுக்கிய வெங்காயம் - அரை கப், கொத்தமல்லித்தழை - சிறிதளவு, எலுமிச்சைப்பழம் - ஒன்று, எண்ணெய் - ஒரு டீஸ்பூன், உப்பு - தேவையான அளவு.

டோக்லா தயாரிக்க: கோதுமை மாவு - ஒரு கப், மிளகாய்த்தூள் - அரை டீஸ்பூன், ஓமம் - ஒரு டீஸ்பூன், எண்ணெய் - இரண்டு டேபிள்ஸ்பூன், உப்பு - தேவையான அளவு.

கலோரியோ குறைவு... தெம்போ நிறைவு!  - 30 வகை வெஜ் ஸ்பெஷல் ரெசிப்பிகள்

செய்முறை: துவரம்பருப்பு, கடலைப் பருப்பு இரண்டையும் சேர்த்து ஒரு மணி நேரம் ஊறவைக்கவும். அகலமான தட்டில் கோதுமை மாவு, மிளகாய்த்தூள், ஓமம், உப்பு மற்றும் எண்ணெய் சேர்த்துக் கலந்து தேவையான தண்ணீர் ஊற்றி, சப்பாத்தி மாவு பதத்துக்குப் பிசையவும். இவற்றை சிறு உருண்டைகளாக்கி வட்ட வட்டமாகத் தட்டிக்கொள்ளவும். குக்கரில் எண்ணெய்விட்டு சீரகம், துருவிய இஞ்சி, பச்சை மிளகாய் சேர்த்து வதக்கவும். ஊறவைத்த பருப்பைச் சேர்த்து ஒரு கப் தண்ணீர், மஞ்சள்தூள், பெருங்காயத்தூள், உப்பு சேர்த்து செய்துவைத்த டோக்லாக்களைச் சேர்த்து மேலும் இரண்டு கப் தண்ணீர் ஊற்றி நான்கு விசில் வரும் வரை வேகவைத்து இறக்கவும். கடைசியாகப் பொடியாக நறுக்கிய வெங்காயம், கொத்தமல்லித்தழை, எலுமிச்சைச்சாறு கலந்து பரிமாறவும்.

தட்டைப்பயறு தால்

தேவை: தட்டைப்பயறு - முக்கால் கப், பாசிப்பருப்பு - இரண்டு டேபிள்ஸ்பூன், மெல்லியதாக நறுக்கிய வெங்காயம் - அரை கப், பச்சை மிளகாய் - இரண்டு, இஞ்சி - அரை அங்குலத்துண்டு, தக்காளி - இரண்டு, மஞ்சள்தூள் - அரை டீஸ்பூன், மிளகாய்த்தூள் - அரை டீஸ்பூன், கரம் மசாலாத்தூள் - அரை டீஸ்பூன், கடுகு - அரை டீஸ்பூன், உளுத்தம்பருப்பு - அரை டீஸ்பூன், கறிவேப்பிலை - சிறிதளவு, கொத்தமல்லித்தழை - சிறிதளவு, எண்ணெய் - ஒரு டீஸ்பூன், உப்பு - தேவையான அளவு.

கலோரியோ குறைவு... தெம்போ நிறைவு!  - 30 வகை வெஜ் ஸ்பெஷல் ரெசிப்பிகள்

செய்முறை: தட்டைப்பயற்றைக் கழுவி, தேவையான அளவு தண்ணீர்விட்டு நான்கு மணி நேரம் ஊறவைக்கவும். பச்சை மிளகாய், இஞ்சி, தக்காளியைப் பொடியாக நறுக்கவும். சிறிய குக்கரில் எண்ணெய்விட்டு சூடானதும், அதில் கடுகு, உளுத்தம்பருப்பு சேர்த்துத் தாளிக்கவும். இதில் பொடியாக நறுக்கிய பச்சை மிளகாய், இஞ்சி சேர்த்து வதக்கி, வெங்காயத்தைச் சேர்த்து வதக்கவும். வெங்காயம் வதங்கியதும், கறிவேப்பிலை, தக்காளி சேர்த்து வதக்கவும். தக்காளி வதங்கியதும் மஞ்சள்தூள், மிளகாய்த்தூள் சேர்த்து லேசாக வதக்கி, பாசிப்பருப்பு, ஊறவைத்த தட்டைப்பயறு, உப்பு சேர்த்து ஒன்றரை கப் தண்ணீர் ஊற்றி, மூடிவைத்து ஐந்து விசில் வரும் வரை வேகவைத்துக்கொள்ளவும். குக்கரைத் திறந்து, அதில் கரம் மசாலாத்தூள் தூவி, லேசாக கொதி வந்ததும் கொத்தமல்லித்தழை தூவி இறக்கவும்.

காய்கறிகளை முதன்மையாகக்கொண்டு நாம் பலவிதமான சப்ஜிகளை உருவாக்கலாம். பெரும்பாலான காய்கறிகளில் கலோரிகள் குறைவாகவே உள்ளன. பீன்ஸ், கேரட், கொத்தவரங்காய், பூசணிக்காய், முள்ளங்கி, சுரைக்காய், வெள்ளரிக்காய் போன்ற காய்கறிகள் இதற்கு நல்ல எடுத்துக்காட்டுகளாக உள்ளன. இந்தக் காய்கறிகளை நீங்கள் விரும்பும் அளவுக்கு எடுத்துக்கொள்ளலாம். அதேபோல் பருப்பு வகைகள், பயறு, பட்டாணி போன்றவை குறைந்த கலோரி கொண்ட உணவுகள் ஆகும்.

முத்துலட்சுமி மாதவகிருஷ்ணன்
முத்துலட்சுமி மாதவகிருஷ்ணன்

“நம் இந்திய உணவில் சேர்க்கும் ஒவ்வொரு பொருளும் முக்கியமானவை. உதாரணமாக, பூண்டு உடலில் உள்ள கொழுப்பைக் கரைக்க உதவும். மஞ்சள், வெந்தயம், இஞ்சி, சீரகம் போன்ற மசாலா பொருள்கள் சுவையையும் மற்றும் ஊட்டச்சத்து நன்மைகளையும் சேர்க்கின்றன. குறைந்த கலோரி கொண்ட உணவுகள், உங்களுக்குத் தேவையான வைட்டமின்கள் மற்றும் தாதுக்களை வழங்குவதோடு உங்களுக்கு நல்ல ஆற்றலையும் தர உதவுகின்றன. பல வண்ணங்களிலுள்ள பழங்கள் மற்றும் காய்கறிகளை சாப்பிடுங்கள். அவற்றில் உள்ள ஆன்டி ஆக்ஸிடன்டுகள் நோய்களை எதிர்க்கும் பண்புகளைக் கொண்டவை. நாம் இப்போது நோய் எதிர்ப்பு சக்தியை அதிகரித்துக்கொள்ள வேண்டிய தருணத்தில் உள்ளோம். இந்த குறிப்புகளில், அது தேவையான அளவு இருப்பதால், அதை சமைத்துச் சாப்பிட்டு அதன் பலனைப் பெறுங்கள்” என்கிறார் சென்னையைச் சேர்ந்த முத்துலட்சுமி மாதவகிருஷ்ணன். அழகிய படங்களுடன் அவர் அளித்துள்ள 30 வகை குறைந்த கலோரி உணவுகள் இதோ உங்களுக்காக.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு