Published:Updated:

அலர்ஜியை அறிவோம் - 7

அடுக்குத் தும்மல்ஹெல்த்

பிரீமியம் ஸ்டோரி
அலர்ஜியை அறிவோம் - 7

டுக்குத் தும்மலைக் கவனிக்காமல் விட்டால் அது சைனஸ் பிரச்னையாக உருவெடுத்து ரொம்பவே சிரமப்படுத்தும் என்று கடந்த இதழிலேயே சொல்லியிருந்தேன். தொடர் ஒவ்வாமை காரணமாக மூக்குப் பகுதியில் உள்ள சைனஸ் அறைகள் மற்றும் மியூக்கஸ் லைனிங்கில் வீக்கம் ஏற்பட்டு சைனஸ் பிரச்னை ஏற்படுகிறது.

‘சைனஸ்’ என்றால் என்ன?

நம் மூக்கைச் சுற்றி நான்கு ஜோடி காற்றுப்பைகள் உள்ளன. இவற்றுக்கு சைனஸ் (Paranasal Sinuses) என்று பெயர். மூக்கின் உட்புறமாக புருவத்துக்கு மேலே நெற்றியில் உள்ளது, ஃபிரான்டல் சைனஸ். மூக்கின் இரு புறமும் கன்னங்களில் உள்ளவை, மேக்ஸிலரி சைனஸ். கண்களுக்கும் மூக்குக்கும் நடுவில் உள்ளது, எத்மாய்டு சைனஸ். கண்களுக்குப் பின்புறம் மூளையை ஒட்டி உள்ளது, ஸ்பீனாய்டு சைனஸ். இவற்றில் ஏதாவது ஒன்றில் பாதிப்பு ஏற்பட்டாலும் பிரச்னைதான்.

நாம் சுவாசிக்கும் காற்றை, தேவையான வெப்பத்தில் நுரையீரலுக்குள் அனுப்பும் முக்கியமான வேலையை இந்த சைனஸ் காற்று அறைகள் செய்கின்றன. சாதாரணமாக சைனஸ் அறைகளில் இருந்து சிறிதளவு திரவம் சுரந்து, மூக்குக்கு வரும். மூக்கில் ‘மியூகஸ் மெம்பரேன்’ எனும் சளிச்சவ்வு இருக்கிறது. சைனஸ் திரவம் இதை ஈரப்படுத்திக்கொண்டே இருக்கிறது. இதனால், வெளிக்காற்று வெப்பத்துடன் நுழைந்தாலும், அது ஈரப்படுத்தப்பட்டு நுரையீரலுக்குள் அனுப்பப்படுகிறது. இந்த சைனஸ் அறைகளின் திரவ வடிகால்கள் அடைபட்டு, அங்கு திரவம் தேங்கும்போது, அங்கு அழற்சி உண்டாகும். இதன் விளைவால் சைனஸ் பிரச்னை (Sinusitis) ஏற்படுகிறது.

அலர்ஜியை அறிவோம் - 7

சைனஸ் பாதிப்பு ஏன்?

ஆரோக்கியக் குறைவு, சுற்றுச்சூழல் மாசு, ஒவ்வாமை இந்த மூன்றும்தான் சைனஸ் பிரச்னைக்கு முக்கியக் காரணங்கள். பாக்டீரியா, வைரஸ், பூஞ்சைத் தொற்றுகள் மூலமாகச் சளி பிடிக்கும்போது சைனஸ் தொல்லை ஏற்படுகிறது. மூக்குத் துவாரத்தை இரண்டாகப் பிரிக்கிற நடு எலும்பு வளைவாக இருப்பது, ‘பாலிப்’ என அழைக்கப்படுகிற மூக்குச் சதை வளர்ச்சி இரண்டும் இந்தப் பிரச்னையைத் தூண்டுகின்றன.

அழற்சியே அடிப்படை

மாசடைந்த காற்றில் கலந்து வரும் தொற்றுக் கிருமிகள் சைனஸ் அறைக்குள் நுழையும்போது, அங்கு உள்ள ‘சளிச்சவ்வு’ வீங்கி  அழற்சியாகும். இதனால், அளவுக்கு அதிகமாக நிணநீர் சுரந்து, மூக்கு வழியாக வெளியேறும். ஜலதோஷம் பிடித்தால், தூசு, புகை, வாசனைத் திரவியம் காரணமாக ஒவ்வாமை ஏற்பட்டால், மிகவும் குளிர்ச்சியானதைச் சாப்பிட்டால், பனியில் நடந்தால், மழையில் நீண்ட நேரம் நனைந்தால் இதே நிலைதான்.

சைனஸ் அறையில் அழற்சி அதிகமாகும் போதும், மூக்கில் சதை வளரும்போதும் இந்த நீர் வெளியேற முடியாத அளவுக்கு மூக்கு அடைத்துக்கொள்ளும். அப்போது மூக்கை உறிஞ்சிக்கொண்டே இருப்பார்கள். இதனால், சைனஸ் அறையில் அழுத்தம் அதிகரித்து, நிலைமை மோசமடையும்.

அறிகுறிகள் என்னென்ன?

அடிக்கடி தும்மல், மூக்கு ஒழுகுதல், மூக்கடைப்பு, தலைவலி சைனஸ் பாதிப்பின் பொதுவான அறிகுறிகள். முகம் கனமாகத் தெரியும். கண்ணுக்குக் கீழே, கன்னம், முன்நெற்றியைத் தொட்டால் வலி ஏற்படும். தலையைக் குனிந்தால் தலை பாரம் அதிகரிக்கும். இவற்றுடன் காய்ச்சல், தொண்டையில் சளி கட்டுவது, இரவில் இருமல் வருவது, உடல் சோர்வு போன்றவையும் சேர்ந்துகொள்ளும். பற்கள்கூட வலிக்கலாம். மஞ்சள் அல்லது பச்சை நிறத்தில் கட்டியான மூக்குச்சளி வெளியேறும். சைனஸ் பாதிப்பு நீடித்தால், சளியில் துர்நாற்றம் வீசும். வாசனை தெரியாது; ருசியை உணர முடியாது.

அலர்ஜியை அறிவோம் - 7

நோய் வகைகள்

திடீர் சைனஸ் அழற்சி (Acute sinusitis). இது திடீரெனத் தாக்கும். இரண்டு வாரங்கள் இதன் பாதிப்பு இருக்கும். ஒரு சிலருக்கு அதிகபட்சமாக நான்கு வாரங்கள் வரை பாதிப்பு நீடிக்கும்.

மிதமான சைனஸ் அழற்சி (Subacute sinusitis). இதுவும் திடீரெனத் தாக்குவதுதான். இதன் பாதிப்பு எட்டு வாரங்கள் வரை இருக்கும்.

நீடித்த சைனஸ் அழற்சி (Chronic sinusitis). இதன் பாதிப்பு எட்டு வாரங்களுக்கு மேல் நீடிக்கும்.

தொடரும் சைனஸ் அழற்சி (Recurrent sinusitis). ஒரு வருடத்தில் மூன்று முறைக்கு மேல் சைனஸ் தொல்லை வந்திருந்தால்,  அதைத் தொடரும் சைனஸ் அழற்சி என்கிறோம்.

பரிசோதனைகள் என்னென்ன?

சைனஸ் பிரச்னையைக் கண்டறிய எக்ஸ்-ரே எடுக்கப்படும். இதில் சந்தேகம் ஏற்பட்டால் சி.டி.ஸ்கேன் அல்லது எம்.ஆர்.ஐ பரிந்துரைக்கப்படும். இப்போது, மூக்கு எண்டோஸ்கோப்பி (Nasal endoscopy) பரிசோதனை மூலமும் சைனஸ் பாதிப்பைத் துல்லியமாகக் கணிக்க முடிகிறது. இவற்றுடன் வழக்கமான ரத்தப்பரிசோதனைகள், ஒவ்வாமையைக் கண்டறியும் பரிசோதனைகள், சளிப் பரிசோதனைகள் ஆகியவையும் மேற்கொள்ளப்படும்.

என்னென்ன சிகிச்சைகள்?

ஒவ்வாமைதான் முக்கியக் காரணியாக இருப்பதால், அந்த ஒவ்வாமையை அகற்றும் சிகிச்சையை முதலில் மேற்கொள்ள வேண்டும். மூக்கு ஒழுகுவதை நிறுத்த மாத்திரை பரிந்துரைக்கப்படும். மூக்கடைப்பைப் போக்க, மூக்கில் சொட்டுமருந்து விடுவது அவசரத்துக்கு உதவும். ஆனால், இதையே தொடர்ந்து மேற்கொள்வது நல்லது அல்ல. இதற்குப் பதிலாக, ஸ்டீராய்டு கலந்த மூக்கு ஸ்பிரேயர்களைப் பயன்படுத்தலாம். இவற்றால் பக்கவிளைவு எதுவும் ஏற்படாது. மூக்கின் வெளிப்புறத்திலிருந்து இவற்றைப் பயன்படுத்துவதால், ரத்தத்தில் ஸ்டீராய்டு மருந்து கலப்பதற்கு வாய்ப்பு இல்லை. மருத்துவர் சொல்லும் கால அளவுக்கு இந்த மூக்கு ஸ்பிரேயர்களைப் பயன்படுத்த வேண்டியது முக்கியம்.

மூக்கடைப்பைப் போக்க டிங்க்சர் பென்சாயின், மென்தால், யூகலிப்டஸ் மருந்து போன்றவற்றைப் பயன்படுத்தி,  காலையிலும் இரவிலும் நீராவி பிடிப்பது நல்லது. இதனால் மூக்கில் உள்ள சளி இளகி வெளியேறிவிடும். தொற்றுக் கிருமிகள் இருப்பதாகத் தெரிந்தால், தகுந்த ஆன்ட்டிபயாடிக் மருந்துகளை மருத்துவர் பரிந்துரை அடிப்படையில், அவர் சொல்லும் கால அளவுக்குச் சாப்பிட வேண்டும். நிவாரணம் கிடைக்கிறது என்பதற்காக நோயாளி சுயமாக ஆன்ட்டிபயாடிக்கை சாப்பிடக் கூடாது.

எண்டோஸ்கோப்பி உதவும்!

முன்பு எல்லாம் சைனஸ் திரவத்தை வெளியேற்ற மூக்கினுள் துளை போடுவார்கள். இதற்குப் பயந்தே பலரும் சிகிச்சைக்கு வரத் தயங்கினர். இப்போது, எண்டோஸ்கோப்பி உதவியுடன், ‘பலூன் சைனுபிளாஸ்டி’ (Balloon sinuplasty) எனும் நவீன சிகிச்சை முறையில், வலி இல்லாமல் மிகத் துல்லியமாக சிகிச்சை அளித்து முழுநிவாரணம் அளிக்க முடியும். மூக்கின் நடு எலும்பு வளைவு, சதை வளர்ச்சி போன்றவற்றுக்கும் இந்தக் கருவி மூலம் சிகிச்சை தர முடியும்.

அலர்ஜியை அறிவோம் - 7

பக்கவிளைவுகள் என்னென்ன?

ஒருவருக்கு சைனஸ் தொல்லை நீடிக்குமானால், அல்லது அவர் சரியான சிகிச்சைமுறைகளைக் கடைப்பிடிக்கவில்லை என்றால், தன்னுடைய அன்றாடப் பணிகளை உற்சாகத்துடன் செய்ய முடியாது. வேலையில் கவனம் செலுத்த முடியாது. அதனால் பணிகளின் தரம் குறையும். மேலும், சைனஸ் பாதிப்பு மிகவும் மோசமானால், சமயங்களில் அங்கு உள்ள நோய்த்தொற்று மூளைக்கும் பரவிவிடும். அப்போது மூளையில் அழற்சி ஏற்பட்டு, மூளைக் காய்ச்சல், மூளை உறைக் காய்ச்சல், மூளையில் சீழ் கட்டுவது போன்ற ஆபத்தான நோய்களுக்கு வழிவிடும்.

தடுப்பது எப்படி?


சுயசுத்தம், சுற்றுப்புறச் சுகாதாரம் பேணுவதன் மூலம் கிருமித் தொற்றிலிருந்து பாதுகாத்துக்கொள்ள வேண்டும். சமச்சீரான உணவைச் சாப்பிட்டு ஆரோக்கியம் காக்க வேண்டும். அடிக்கடி ஜலதோஷம் பிடிப்பதைத் தவிர்க்க வேண்டும். ஜலதோஷம் உள்ளவர்களின் அருகிலிருப்பதைத் தவிர்க்க வேண்டும். ஒவ்வாமைப் பொருளைத் தவிர்க்க வேண்டும். தூசு, புகைக்கு ஒவ்வாமை உள்ளவர்கள் வாகனத்தில் செல்லும்போது முகத்தில் சுகாதார மாஸ்க் அணிந்துகொள்ளலாம். தினமும் குறைந்தது அரை மணி நேரம் பிராணாயாமம் செய்ய வேண்டும். தேவையான அளவுக்குத் தண்ணீர் குடிக்க வேண்டும். ஐஸ், ஐஸ்க்ரீம் போன்ற குளிர்ச்சியான உணவுப் பதார்த்தங்களை அவசியம் தவிர்க்க வேண்டும்.

- எதிர்வினை தொடரும்

படங்கள்: எம்.உசேன், மாடல்: இம்ரான்

செய்யக் கூடாதவை

குளிர்பானங்களைக் குடிக்கவே கூடாது.

பனியில் அலையக் கூடாது.

புகைபிடிக்கக் கூடாது.

புகை சூழ்ந்த இடங்களில் வசிக்கக் கூடாது.

மூக்குப்பொடி போடக் கூடாது.

அசுத்தமான நீர்நிலைகளில் குளிக்கக் கூடாது.

மூக்கை பலமாக சிந்தக் கூடாது.

விரல்களால் அடிக்கடி மூக்கைக் குடையக் கூடாது.

மூக்கடைப்பைப் போக்கும் இன்ஹேலரை அடிக்கடி பயன்படுத்தக் கூடாது. அப்படிச் செய்தால், சைனஸ் அறையில் அழுத்தம் அதிகமாகி, அழற்சி தீவிரமடையுமே தவிர, குறையாது. இதுபோல் ‘வேப்பரப்’ களிம்பை அளவுக்கு மேல் மூக்கின் மீது தடவினால், மூக்கில் உள்ள ரத்தக்குழாய்களில் வெடிப்பு ஏற்பட்டு மூக்கு புண்ணாகிவிடும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு