Published:Updated:

இனி எல்லாம் சுகமே - 7

இனி எல்லாம் சுகமே - 7
பிரீமியம் ஸ்டோரி
இனி எல்லாம் சுகமே - 7

செரிமானம் அறிவோம்!ஹெல்த்

இனி எல்லாம் சுகமே - 7

செரிமானம் அறிவோம்!ஹெல்த்

Published:Updated:
இனி எல்லாம் சுகமே - 7
பிரீமியம் ஸ்டோரி
இனி எல்லாம் சுகமே - 7
இனி எல்லாம் சுகமே - 7

செரிமானப் பிரச்னைகளில் மிக முக்கியமானது எதுக்களிப்பு. கேஸ்ட்ரோ ஈசோஃபீகல் ரெஃப்லெக்ஸ் (Gastro esophageal Reflux Disease (GERD)) என்பதைத்தான் `எதுக்களித்தல்’ என்கிறோம். இது, சர்வசாதாரணமாக எப்போதாவது ஏற்படக்கூடிய ஒரு பிரச்னை. ஆனால், நாள்பட்ட எதுக்களித்தல் இருந்தால், எச்சரிக்கையாக இருக்க வேண்டும். சரி, எதுக்களித்தல் ஏன் வருகிறது... எப்படி வருகிறது? 

உணவுக்குழாய்க்குக் கீழே இரைப்பை அமைந்திருக்கிறது. உணவுக்குழாயையும் இரைப்பையையும் இணைக்கும் இடத்தில் ஒரு வால்வு இருக்கும். இந்த வால்வு அவசியம் இல்லாமல் திறக்கும்போதுதான், உணவுக்குழாயில் பிரச்னை வருகிறது. வயிறு நிறையச் சாப்பிடும்போது, உணவு இரைப்பை முழுதும் நிறைந்து, மேலே ஏறி உணவுக்குழாயில் இருக்கும் கீழ் வால்வைத் தள்ளும், கீழ் வால்வு கொஞ்சம் மெதுவாகத் திறந்து கொடுக்கும்போது, இரைப்பையில் இருக்கும் அமிலம், உணவு போன்றவை உணவுக்குழாயில் மேலே ஏறி பிரச்னையை ஏற்படுத்துகிறது. இரைப்பையில் சுரக்கும் பெப்ஸின், கல்லீரலில் சுரக்கும் பித்தநீர் போன்றவைகூட சில நேரங்களில் இரைப்பையில் இருந்து மேலே ஏறிவிடும்.

வயிறு நிரம்பச் சாப்பிட்டால்தான் எதுக்களித்தல் வரும் என்பது இல்லை, வேறு சில காரணங்களாலும் ஏற்படலாம். இரைப்பை நெஞ்சாங்கூட்டில் ஏறிக்கொள்ளும் ‘ஹையாடஸ் ஹெர்னியா’ இருப்பவர்களுக்கு அடிக்கடி எதுக்களித்தல் பிரச்னை ஏற்படலாம். ஆஸ்துமா, இதய நோய்கள், ஆஸ்டியோபொரோசிஸ் போன்ற பிரச்னைகளுக்காக மாத்திரை சாப்பிடுவதால் உணவுக்குழாயில் இருக்கும் வால்வின் செயல்திறன் குறைந்து, எதுக்களித்தல் வரலாம். வயது அதிகரிக்கும்போது உணவுக்குழாய் வால்வுகளின் செயல்திறன் இயல்பாகவே குறையும். மனிதனின் வாழ்நாள் அதிகரித்து வருவதால்தான், எதுக்களித்தல் பிரச்னையும் அதிகரிக்கிறது. எதுக்களித்தல் காரணமாக சைனஸ், தொண்டைக் கமறல், குரல் தேய்தல், குரல் பிசிறுதல் போன்ற பிரச்னைகளும் ஏற்படக்கூடும்.

எதுக்களிப்பு ஏற்பட்டால் உடனே சோடா அருந்துவது வாடிக்கையாகிவிட்டது. இது பெருந்தவறு. சோடா அருந்தி ஏப்பம் விடும்போது வாய் வழியே வாயுக்கள் வெளியேறிவிடும், வாயுக்கள் வெளியேறுவதால், எதுக்களித்தல் சீராகிவிடும் என நினைக்கிறார்கள். இது தவறு. இது ஒரு தற்காலிக நிம்மதி உணர்வே தவிர, நிரந்தரத் தீர்வு இல்லை. இந்தப் பழக்கம் தொடர்ந்தால், கூடுதலாய் அடிக்கடி தொடர் ஏப்பம் வரும் தொந்தரவும் வந்துசேரும்.   என்றோ ஒரு நாள் எதுக்களித்தல் பிரச்னை இருந்தால்,  மருத்துவர் பரிந்துரைப்படி, ஆன்டாசிட் மாத்திரைகளையோ, மருந்தையோ வாங்கிச் சாப்பிட்டால் சரியாகிவிடும்.

இனி எல்லாம் சுகமே - 7

50 வயதுக்கு மேல் எதுக்களித்தல் ஏற்பட்டாலோ, எதுக்களித்தல் பிரச்னையுடன் வாந்தி, பசி குறைதல், எடை குறைதல் இருந்தாலோ, பரம்பரையில் யாருக்காவது அல்சர், புற்றுநோய் வந்திருந்தாலோ, ரத்தசோகை, வாந்தி எடுக்கும்போது ரத்தம் வந்தாலோ, உடல் பருமன், மூட்டு வலி போன்ற பிரச்னைகளுக்கு மாத்திரை சாப்பிடுபவராக இருந்து, எதுக்களித்தல் பிரச்னை ஏற்பட்டாலோ உடனடியாக மருத்துவரை  அணுகுவது நல்லது. மிகச் சிலருக்கு மட்டும்  நாட்பட்ட எதுக்களித்தல் பிரச்னைக்குச் சில காரணங்களைப் பொறுத்து அறுவைசிகிச்சை தேவைப்படலாம்.

 ஒரு விஷயம்  மீண்டும் மீண்டும் தொந்தரவு கொடுத்தால், அதற்கு ஏற்ப நாம் மாறிவிடுவோ அல்லவா? அதுபோலத்தான் நமது உடலும். தொடர்ந்து எதுக்களித்தல் பிரச்னை ஏற்பட்டால், உணவுக்குழாய் அரித்து, ஒரு கட்டத்தில்  அங்கே இருக்கும் திசுக்கள் தடிமனாக மாறிவிடும். இந்த நிலை. ‘பேரேட் ஈசோஃபேகஸ்’ எனப்படும். இந்தப் பிரச்னை ஏற்பட்டால், உணவுக்குழாயில் புற்றுநோய் வரவும் வாய்ப்பு இருக்கிறது. பயப்பட வேண்டாம். பொதுவாக, பேரேட் பிரச்னையால் ஆயிரத்தில் இரண்டு மூன்று பேருக்குத்தான் புற்றுநோய் வருகிறது. புற்றுநோய் வரும் வரை கவனிக்காமல் இருப்பதைவிட, எதுக்களித்தல் வராமல் தவிர்ப்பதும், வந்தாலும் அதை சிகிச்சை மூலம் குணப்படுத்திவிடுவதுமே சிறந்த வழிமுறை. அளவான எடையுடன் இருப்பது, உணவுமுறையில் மாற்றம், சரியான பொசிஷனில் படுத்து உறங்குவது என மூன்று விஷயங்களை ஒழுங்காகக் கையாண்டாலே எதுக்களித்தல் பிரச்னை வருவதைப் பெரும்பாலும் தவிர்த்துவிட முடியும்.

- தொடரும்

சாக்லேட்,  ஆல்கஹால், தக்காளி, சிட்ரஸ் பழங்கள், சில வகை மசாலாப் பொருட்கள், புதினா முதலான மூலிகை இலைகள், வெள்ளரி போன்றவை பொதுவாக எதுக்களித்தல் பிரச்னையை ஏற்படுத்தும். இவற்றைச் சாப்பிட்ட பின்னர் எதுக்களித்தல் வருவதை உணர்ந்தால், பின்னர் அதைச்  சாப்பிடுவதைத் தவிர்த்துவிட வேண்டும். கார்பனேட்டட் குளிர்பானங்களை அருந்துவதை நிறுத்த வேண்டும். காஸ் அடைக்கப்பட்ட பானங்களில் இருக்கும் அமிலம் எதுக்களித்தல் பிரச்னையை ஏற்படுத்தி, உணவுக்குழாயை அரித்துவிடும். எனவே, வெயில் காலத்தில் தாகத்துக்காகக்கூட சோடா குளிர்பானங்களை அருந்த வேண்டாம். மோர், இளநீர், பழச்சாறு போன்றவையே சிறந்தவை.

காஃபின் நிறைந்த பானங்களை அளவோடு அருந்த வேண்டும் அல்லது குறைத்துவிட வேண்டும். அதிக அளவு காபி அருந்துபவர்களுக்குகூட எதுக்களித்தல் ஏற்படலாம்.

எப்படிப் படுக்க வேண்டும்?

ஒழுங்கற்ற பொசிஷனில் உறங்குவதும் எதுக்களித்தல் ஏற்பட முக்கியக் காரணம். குப்புறப் படுப்பது, வித்தியாசமான கோணங்களில் கால்களை மடக்கி, நீட்டிப் படுப்பது, மல்லாந்து படுப்பது போன்றவை தவறு. எப்போதுமே, படுக்கையில் இடதுபுறம் திரும்பிப் படுப்பதுதான் சிறந்தது. அதிகபட்சம் 80 - 90 சதவிகிதத்துக்கு மேல் வயிறு நிரம்பும் அளவு சாப்பிடுவதைத் தவிர்க்க வேண்டும். இரைப்பையில் செரிமானம் நடப்பதற்கு சராசரியாக மூன்று மணி நேரம் ஆகும். எனவே, உணவு உண்ட பின்னர் உடனடியாக அதிகப் பளு தூக்குவது, கடினமானப் பயிற்சிகள் செய்வது போன்றவற்றைத் தவிர்க்க வேண்டும்.