Published:Updated:

ஸ்வீட் எஸ்கேப் - 12

சர்க்கரையை வெல்லலாம்டயாபடீக் நியூரோபதி

பிரீமியம் ஸ்டோரி
ஸ்வீட் எஸ்கேப் - 12

சிறுநீரகத்தைத் தொடர்ந்து உடலின் மிக முக்கிய உறுப்புகளுள் ஒன்றான நரம்பு மண்டலத்துக்குள் நுழைவோம். ஆம், சர்க்கரை நோய் நரம்புகளையும் விட்டுவைப்பது இல்லை. சர்க்கரை நோயாளிகளுக்கு வரக்கூடிய நரம்பு தொடர்பான பிரச்னைக்கு டயாபடீக் நியூரோபதி (Diabetic Neuropathy) என்று பெயர். தொடர்ந்து, ரத்தத்தில் சர்க்கரை அளவு அதிகமாக இருக்கும்போது, நரம்பு இழைகள் மற்றும் ரத்தக் குழாய்கள் பாதிக்கப்படுகின்றன.

சர்க்கரை அளவு அதிகரிக்கும்போது, அது நரம்புகளின் தகவல் பரிமாற்றப் பணியைப் பாதிக்கிறது. மேலும், சர்க்கரையானது மிக நுண்ணிய ரத்தக் குழாய் சுவர்களையும் பாதிப்படையச் செய்கிறது. இதனால், ரத்தக் குழாய்களால் நரம்புகளுக்குப் போதுமான அளவு ஆக்சிஜன் மற்றும் ஊட்டச்சத்துக்களை அளிக்க முடியாத நிலை ஏற்படுகிறது. சர்க்கரை நோய் உள்ள யாருக்கு வேண்டுமானாலும் டயாபடீக் நியூரோபதி வரலாம். இருப்பினும், பின்வரும் விஷயங்கள்தான் வாய்ப்பை அதிகரிக்கின்றன.

ஸ்வீட் எஸ்கேப் - 12

கட்டுப்பாடற்ற சர்க்கரை அளவு

ரத்தத்தில் சர்க்கரை அளவைக் கட்டுக்குள் வைக்காததுதான் எல்லா பிரச்னைகளுக்கும் முக்கியக் காரணமாக இருக்கிறது. சர்க்கரை அளவைக் கட்டுக்குள்வைப்பதன் மூலம் எல்லா பாதிப்புகளில் இருந்தும் தப்பலாம்.

நீண்ட கால சர்க்கரை நோய்

எத்தனை ஆண்டுகளாக சர்க்கரை நோய் உள்ளது என்பதைப் பொருத்தும் டயாபடீக் நியூரோபதிக்கான வாய்ப்பு அதிகரிக்கிறது. சர்க்கரை அளவைக் கட்டுக்குள் வைக்காதபோது, இதற்கான வாய்ப்பு மேலும் அதிகரிக்கிறது.

சிறுநீரகப் பாதிப்பு

சர்க்கரை நோய் காரணமாக சிறுநீரகப் பாதிப்பு ஏற்படலாம். சிறுநீரகம் பாதிக்கப்படும்போது, உடலில் உள்ள நச்சுக்களை வெளியேற்றுவதில் பாதிப்பு ஏற்படுகிறது. இப்படி உடலில் தங்கும் நச்சுக்களால் நரம்புகள் பாதிக்கப்படும்.

அதிக உடல் பருமன்

சர்க்கரை நோயாளிகளுக்கு பி.எம்.ஐ 24-க்கு மேல் இருந்தால், அவர்களுக்கு டயாபடீக் நியூரோபதி வருவதற்கான வாய்ப்பு அதிகரிக்கிறது.

சிகரெட் புகைத்தல்

புகைபிடிக்கும் பழக்கமானது ரத்தக்குழாய் சுவரைச் சுருக்குகிறது. இதனால், கால் மற்றும் பாதங்களுக்குச் செல்லக்கூடிய ரத்தத்தின் அளவு குறைகிறது. இதனால், காலில் ஏற்படும் புண்கள் ஆறுவதில் பிரச்னை ஏற்படுகிறது. மேலும், நரம்பு மண்டலத்தில் பாதிப்பை ஏற்படுத்துகிறது.

நியூரோபதியில் நான்கு வகைகள் உள்ளன. அவை, பெரிஃபெரல் நியூரோபதி (Peripheral Neuropathy), ஆட்டானமிக் நியூரோபதி (Autonomic neuropathy), ப்ராக்‌ஸிமல் நியூரோபதி (Proximal neuropathy), ஃபோகல் நியூரோபதி (Focal neuropathy).

பெரிஃபெரல் நியூரோபதி

அதிக அளவில் காணப்படும் நியூரோபதி இது. இந்தப் பிரச்னை உள்ளவர்களுக்கு,  பாதம் மற்றும் கால் முதலில் பாதிக்கப்படும். பிறகு, கைகள் பாதிக்கப்படும். காலில் மதமதப்பு, உணர்ச்சியற்ற நிலை, வலியை உணரும் தன்மை குறைவு, பிடிப்பு, ஊசி குத்தியது போன்ற வலி, சிலருக்குத் தொடு உணர்வு அதிகரித்தல் (சாதாரண பெட்ஷீட்கூட அவர்களுக்குத் தாங்க முடியாத பாரமாகத் தெரியும்), தசைச்சோர்வு, நிலைத்தடுமாற்றம், காலில் அடிக்கடி புண், நோய்த்தொற்று, வலி போன்றவை ஏற்படும்.

ஆரம்பநிலை அறிகுறிகள் தென்படும்போதே, சர்க்கரை அளவைக் கட்டுக்குள் வைப்பதன் மூலம் பாதிப்பைத் தவிர்க்கலாம். மருந்துகளும் உள்ளன.

ஸ்வீட் எஸ்கேப் - 12

ஆட்டானமிக் நியூரோபதி

ஆட்டானமிக் என்றாலே அது நம் கட்டுப்பாட்டில் இல்லாத நரம்பு என்று புரிந்துகொள்ள முடியும். மூளையின் உத்தரவுக்கு ஏற்பச் செயல்பட்டு, உடலைக் கட்டுப்படுத்தும் பணியை இந்த நரம்புகள் செய்கின்றன. இதயம், சிறுநீர்ப்பை, நுரையீரல், வயிறு, இரைப்பை, சிறுகுடல், இனப் பெருக்க உறுப்புக்கள், கண்கள் என முக்கிய உறுப்புக்களைக் கட்டுப்படுத்துகின்றன.

பொதுவாக சர்க்கரை அளவு குறையும்போது அதன் அறிகுறிகளை சர்க்கரை நோயாளிகள் உணர்வார்கள். ஆனால், ஆட்டானமிக் நியூரோபதி இருக்கும்போது சர்க்கரை அளவு குறைவதை உணர்வதில் குறைபாடு ஏற்படும்.

மலச்சிக்கல் அல்லது வயிற்றுப்போக்கு அல்லது இந்த இரண்டும் சேர்ந்தும் வரலாம். செரிமானம் தாமதமாதல், வாந்தி, குமட்டல் உணர்வு, வீக்கம் மற்றும் பசியின்மை போன்றவை ஏற்படலாம். சிலருக்கு விழுங்குவதில் சிரமம் ஏற்படும். ஆண்களுக்கு, விரைப்புத்தன்மைப் பிரச்னை, பெண்களுக்குப் பிறப்புறுப்பு உலர்தல் போன்ற பாலியல் பிரச்னைகள் ஏற்படலாம். அதிகப்படியான அல்லது மிகக் குறைவான வியர்வை, கட்டுப்பாடு அற்ற ரத்த அழுத்தம், இதயத் துடிப்பு விகிதம், உடலின் வெப்பநிலையைப் பராமரிப்பதில் பிரச்னை, வெளிச்சத்தில் இருந்து இருட்டுக்குச் செல்லும்

போது அதற்கு ஏற்ப, கண் தன்னை மாற்றிக்கொள்ளும் திறனில் மாற்றம் போன்ற பிரச்னைகள் ஏற்படலாம்.

ப்ராக்ஸிமல் நியூரோபதி

இதில், தொடை, இடுப்பு, பின்புறம் மற்றும் கால் பகுதி நரம்புகள் பாதிக்கப்படும். டைப் 2 சர்க்கரை நோயாளிகளுக்கு இந்தப் பிரச்னை ஏற்படுவதற்கான வாய்ப்பு அதிகம். அறிகுறிகள் பெரும்பாலும் உடலின் ஒரு பக்கத்தில் இருக்கும். சிலருக்கு ஒரு புறத்தில் இருந்து அறிகுறிகள் பரவும். இவர்களுக்குத் திடீரென்று இடுப்பு அல்லது பின்புறத்தில் தாங்க முடியாத வலி ஏற்படும். தசைப் பாதிப்பு காரணமாக உடல் பலவீனம், உட்கார்ந்த நிலையில் இருந்து எழுந்திருப்பதில் பிரச்னை, வயிற்றில் பாதிப்பு ஏற்பட்டால் வயிற்றுப் பகுதியில் வீக்கம், உடல் எடை குறைதல் போன்ற பிரச்னை ஏற்படலாம்.

ஃபோக்கல் நியூரோபதி


ஃபோக்கல் நியூரோபதியில் ஒரு குறிப்பிட்ட நரம்பு அமைப்புப் பாதிக்கப்படும். அது, முகத்துக்கான நரம்பாக இருக்கலாம் அல்லது கால் நரம்பாக இருக்கலாம். இது, திடீரென நடந்துவிடும். வயது அதிகமானவர்களுக்கு இந்தப் பிரச்னை ஏற்பட வாய்ப்பு அதிகம்.

ஃபோக்கல் நியூரோபதி தாங்க முடியாத வலியை ஏற்படுத்தும். பொதுவாக, இது நீண்டகாலப் பிரச்னையை ஏற்படுத்துவது இல்லை. இந்த அறிகுறிகள் எல்லாம் சில வாரங்கள் முதல் சில மாதங்களில் குறைந்து, மறைந்துவிடும். எந்த நரம்பு பாதிக்கப்பட்டுள்ளது என்பதைப் பொருத்து அறிகுறிகள் மாறுபடும். இவர்களுக்கு, பார்வையில் பாதிப்பு ஏற்படலாம், இதனால், அனைத்தும் இரண்டாகத் தெரியும். முகத்தின் ஒரு பக்கத்தில் செயல் இழப்பு ஏற்படலாம். முன் தொடையில் வலி ஏற்படலாம். சில நேரங்களில் நரம்பு அழுத்தப்படும்போது, கார்பல் டனல் சிண்ட்ரோம் என்ற பிரச்னை ஏற்படலாம். இவர்களுக்கு, கை கால் விரல்களில் கூச்ச உணர்வு, மதமதப்பு இருக்கும். கையில் வலுவற்ற உணர்வு இருக்கும். இதனால் பொருட்களைக் கீழே போடுவார்கள்.

தீர்வு?


டயாபடீக் நியூரோபதி வந்துவிட்டால் அதற்குத் தீர்வு இல்லை. ஆனால், நம்மால் பாதிப்பைத் தாமதப்படுத்த முடியும். டாக்டர் பரிந்துரைப்படி, பாதப் பராமரிப்பு, ரத்த அழுத்தம், சர்க்கரை அளவுக் கட்டுப்பாடு, ஆரோக்கியமான உணவுப் பழக்கம், உடற்பயிற்சி, உடல் எடையைக் கட்டுக்குள்வைத்தல், புகைப்பழக்கத்தைக் கைவிடுதல், மது அருந்துவதை நிறுத்துதல் போன்றவற்றைச் செய்தால், பாதிப்பைத் தாமதப்படுத்தலாம். டயாபடீக் நியூரோபதி மிகவும் சிக்கலானது. இதை நம்மால் வராமல் தடுக்கவோ, தாமதப்படுத்தவோ முடியும் என்பதுதான் மிகவும் நல்ல செய்தி. இதற்கு சர்க்கரை நோயாளிகள் செய்ய வேண்டியது ரத்தத்தில் சர்க்கரை அளவைக் கட்டுக்குள்வைப்பது மட்டும்தான்.

- தொடரும்

ஸ்வீட்டர்

சர்க்கரையைக் கட்டுக்குள் வைத்திருங்கள். நரம்புப் பிரச்னைகளில் இருந்து விடுதலை பெறுங்கள். தினசரி பாதங்களைக் கவனியுங்கள்.

டயாபடீக் டவுட்

“என் அம்மாவுக்கு சர்க்கரை நோய் உள்ளது. அவருக்குக் குறிப்பிட்ட கால இடைவெளியில் ரத்தப் பரிசோதனை செய்து, மருத்துவர் ஆலோசனை பெற்றுவருகிறேன். டயாபடீக் நியூரோபதி பாதிப்பு இருக்கிறதா எனக் கண்டறிய ஏதேனும் வழிமுறை உள்ளதா?”

கீதா, கோயம்புத்தூர்.

“டயாபடீக் நியூரோபதியை அதன் அறிகுறிகள், மருத்துவ வரலாறு மற்றும் உடல் பரிசோதனை மூலம் கண்டறியலாம். பரிசோதனையின்போது, மருத்துவர் உங்கள் அம்மாவின் தசையின் வலிமை, தொடு உணர்வு, அதிர்வு என்று சில விஷயங்களைப் பரிசோதிப்பார். அதைத் தொடர்ந்து சில பரிசோதனைகளுக்குப் பரிந்துரைப்பார்.

ஃபிலமென்ட் (Filament) பரிசோதனை

மென்மையான நைலான் இழையால் ஆன மோனோஃபிலமென்ட் கொண்டு தொடு உணர்வு பரிசோதிக்கப்படும்.

நரம்புத் தொடர்புறுத்தல் ஆய்வு (Nerve conduction studies)

இந்தப் பரிசோதனையில் எவ்வளவு விரைவாக கை, கால் நரம்புகள் மின்னணு சிக்னல்களைப் பரிமாற்றுகின்றன எனக் கண்டறியப்படும். பொதுவாக, கார்பல் டனல் சிண்ட்ரோம் பிரச்னையைக் கண்டறிய இந்தப் பரிசோதனை செய்யப்படுகிறது. சர்க்கரை நோயாளிகள் ஒவ்வொருவரும் ஆண்டுக்கு ஒரு முறையாவது தங்கள் பாதங்களை முழுப் பரிசோதனைக்கு உட்படுத்த வேண்டும் என்று அமெரிக்க டயாபடீக் அசோசியேஷன் பரிந்துரைக்கிறது.

இதனுடன், உங்கள் அம்மாவுக்கு காலில் ஏதேனும் வெடிப்பு, புண், தோல் தடிப்பு, கொப்பளம் மற்றும் எலும்பு மூட்டில் இயல்புக்கு மீறிய நிலை ஏதேனும் இருக்கிறதா என்று ஒவ்வொரு முறை மருத்துவரைச் சந்திக்கும்போதும் பரிசோதித்துக்கொள்ளுங்கள்.”

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு