Published:Updated:

இனி எல்லாம் சுகமே - 12

இனி எல்லாம் சுகமே - 12
பிரீமியம் ஸ்டோரி
இனி எல்லாம் சுகமே - 12

செரிமானம் அறிவோம்!

இனி எல்லாம் சுகமே - 12

செரிமானம் அறிவோம்!

Published:Updated:
இனி எல்லாம் சுகமே - 12
பிரீமியம் ஸ்டோரி
இனி எல்லாம் சுகமே - 12
இனி எல்லாம் சுகமே - 12

“எனக்கு கேஸ்ட்ரைடிஸ் பிரச்னை இருக்கு. இதுக்கு நான் என்ன பண்ணணும்” இந்த வார்த்தைகளை நான் ஒவ்வொரு வாரமும் குறைந்தபட்சம் 10 பேரிடம் இருந்தாவது கேட்கிறேன். கேஸ்ட்ரைடிஸ் என்பதை மருத்துவரீதியாக விளக்கவேண்டும் எனில், இரைப்பை உட்தோலின் அழற்சி (Inflammation of inner mucosal lining of stomach) எனச் சொல்லலாம். 

இரைப்பைச் சுவரில் அழற்சி ஏற்பட்டால், அதன் பாதிப்பு வெவ்வேறு வகையான வெளிப்பாடாக நமக்குக் காட்டும். ஒரு சிலருக்கு பசி இருக்காது, சிலருக்கு மிக விரைவாக வயிறு நிறைந்த உணர்வு ஏற்படும். குமட்டல், வாந்தி, ஏப்பம், மேல்வயிற்று உப்புசம் போன்ற பிரச்னைகளும் சிலருக்கு வரலாம். இதுபோன்ற இரைப்பை பிரச்னைகளைச் சந்திக்கும்போது, பலருக்கும் எந்தப் பிரச்னையின் வெளிப்பாடாக இந்தக் கோளாறு வருகிறது எனத் தெரியாது. ஆனால், தனக்கு இந்தப் பிரச்னையாகத்தான் இருக்கும் என முடிவு செய்துகொண்டு, மருந்தகங்களுக்குச் சென்று சுயமாக மருந்து மாத்திரைகளை வாங்கிச் சாப்பிட்டுவிட்டு சரியாகவில்லை எனப்  புலம்புவார்கள். மேலே நான் சொன்ன இரைப்பை அழற்சியின் அறிகுறிகள் சில நாட்கள் அல்லது ஓரிரு வாரங்கள் மட்டும் நீடித்தால் அதனை, தற்காலிக கேஸ்ட்ரைடிஸ் (Acute Gastritis) என்றும் நீண்ட நாட்கள் நீடித்தால் நாட்பட்ட கேஸ்ட்ரைடிஸ் என்றும் சொல்லலாம்.

இனி எல்லாம் சுகமே - 12

இரைப்பை அழற்சியை எப்படிக் கண்டுபிடிப்பது?

இரைப்பை அழற்சியைக் கண்டறிய எண்டோஸ்கோப்பி உதவும். இதில், இரைப்பைக்குள் எண்டோஸ்கோப்பி கருவி செலுத்தப்பட்டு,  இரைப்பை அழற்சி இருக்கிறதா என்பதைக் கண்டறிய  முடியும். அதுமட்டும் அல்ல இரைப்பை உட்தோல் புள்ளி புள்ளியாய் சிதைந்து இருக்கிறதா, உள்மடிப்புகள் குறைந்து இருக்கிறதா, ரத்தக் குழாய்கள் அமைப்பில் மாறி இருக்கிறதா எனப் பல்வேறு தோற்ற மாற்றங்களை அறிய முடியும். இரைப்பையின் அடிப்பக்கம் அல்லது மேல்பக்கம் மட்டும் பாதிக்கப்பட்டிருக்கிறதா அல்லது இரைப்பை முழுவதும் அழற்சி இருக்கிறதா என்றும் பார்த்துச் சொல்ல முடியும். இது தவிர பேரியம் எக்ஸ்ரே, சி.டி ஸ்கேன் மூலமும் இரைப்பை அழற்சியைக்  கண்டறியலாம்.

நாட்பட்ட இரைப்பை அழற்சி

ஹெலிக்கோ பாக்டர் பைலோரி எனும் பாக்டீரியா இரைப்பையைத் தொற்றி அங்கே நீண்ட நாட்கள் வாழ்வது, இரைப்பைச் சுவரைச் சேதம்செய்யும் மாத்திரைகள், மூலிகைகளைத் தொடர்ந்து நீண்ட நாட்கள் எடுத்துக்கொள்வது, ஆட்டோஇம்யூன் எனப்படும் உடலின் நோய் எதிர்ப்பு செல்களே தன் உடல் செல்களைத் தாக்கும் பிரச்னை என மூன்று காரணங்களால் நாட்பட்ட இரைப்பை அழற்சி ஏற்படலாம்.

இந்த அழற்சியில் இரைப்பைச் சுவர் முழுவதும் அழற்சியால் பாதிக்கப்பட்டு மெலிந்துவிடும். இதனால், இரைப்பையில் இருக்க வேண்டிய அமிலம் சரியான அளவில் இருக்காது. அமிலம் குறைந்ததால் நாம் சாப்பிடும் உணவில் இருந்து இரும்புச்சத்தை உடல் கிரகிக்காது. வைட்டமின் பி-12 குறைபாடும் ஏற்படும். சிலர் ரத்தசோகை, சோர்வு என ஆண்டுக்கணக்கில் அவதிப்படுவார்கள். சம்பந்தேமே இல்லாமல் இரும்புச்சத்து மற்றும் வைட்டமின் மாத்திரைகளை எடுத்துக்கொள்வர். இதனால், எந்தப் பயனும் இல்லை. இவர்களுக்கு இரைப்பை அழற்சி இருக்க வாய்ப்பு உள்ளது.

இனி எல்லாம் சுகமே - 12

நமது உடலில் எந்தப் பிரச்னை ஏற்பட்டாலும் அதற்கு நேரடியான காரணத்தைவிட மறைமுகமாக மற்றொரு காரணம் இருக்கலாம். எது சரி எனத் தெரியாமல் சிகிச்சை எடுத்தால், பிரச்னை அதிகமாகுமே தவிர குறையாது.

செரிமான மண்டலம் என்பது ஒரு கடல். எங்கோ வெடிக்கும் பூகம்பத்தின் மூலம், சம்பந்தமே இல்லாத வேறு ஓர் இடத்தில் அதன் விளைவுகள் இருக்கும். நாட்பட்ட அழற்சிக்குக் காரணம் என்ன என்று கண்டறிந்து, ஆரம்ப நிலையிலேயே சிகிச்சை பெறுவதன் மூலம் முழு நலம் பெற முடியும்.

- தொடரும்

தற்காலிக இரைப்பை அழற்சியால் சில நேரம் ரத்த கசிவு ஏற்பட்டு ரத்த வாந்தி, மலத்தில் கருப்பு நிறத்தில் ரத்தம் வருதல் போன்றவை நிகழலாம். மாத்திரையோ, மருந்தோ, உணவோ  எது அழற்சிக்கான  காரணம் என அறிந்து அதை நிறுத்தினாலே, பிரச்னைகள் சரியாகிவிடும்.

இரைப்பை அழற்சிப் பிரச்னைக்குக் காரணம் என்னவென அறிந்து, அதற்கான சிகிச்சை எடுக்க வேண்டும். ஆஸ்பிரின், இரும்பு, பொட்டாசியம் மாத்திரை, மூட்டு வலிக்கான நிவாரண மாத்திரைகள் போன்ற பல வகை மருந்துகளின் பக்கவிளைவுகளால் இரைப்பை அழற்சி ஏற்படலாம். தவிர உணவு ஒவ்வாமை, நாட்டு மருந்து, பச்சையாகப் பூண்டு உண்பது போன்ற சில விஷயங்கள் காரணமாகவும் இரைப்பை அழற்சி ஏற்படும். மது அருந்துபவர்களுக்கும் இது வர அதிக வாய்ப்பு உள்ளது.

அதீத ஸ்ட்ரெஸ் காரணமாக இரைப்பை உட்தோலுக்கு ரத்த ஓட்டம் குறையும்போதும் இரைப்பை அழற்சி ஏற்படும். தவிர  தீவிர சிகிச்சைகளில் இருக்கும் நோயாளிகள், மூளையில் ஏதேனும் திடீர் பாதிப்பு உண்டானவர்கள், தீக்காயம்  ஏற்பட்டவர்களுக்கும் இந்த பிரச்னை வரலாம்.

கேஸ்ட்ரைடிஸ் போலவே கேஸ்ட்ரோபதி எனும் பிரச்னையும் உண்டு. இதில், இரைப்பையில் அழற்சி காணப்படாது. ஆனால், செல்கள் சிதைந்து இருக்கும். கேஸ்ட்ரோபதியைப் பொருத்தவரை வெள்ளை அணுக்கள் இரைப்பையில் காணப்படாது. எனவே, இதை பயாப்சியில் முழுமையாக அறிய முடியாது. ஒரு நோயாளிக்கு கேஸ்ட்ரோபதியா, கேஸ்ட்ரைடிஸ் பிரச்னையா என்பதை மிகச்சரியாகச் சொல்ல திசு சோதனை மட்டும் போதாது; திறமையான நோய்க்கூறு மருத்துவரும் (Pathologist) அவசியம்.