Published:Updated:

ஸ்வீட் எஸ்கேப் - 14

சர்க்கரையை வெல்லலாம்

பிரீமியம் ஸ்டோரி
ஸ்வீட் எஸ்கேப் - 14

ர்க்கரை நோய் உடலில் எந்த ஒரு பாகத்தையும் பாதிக்கும். சிறுநீரகம், நரம்பு மண்டலம் போன்ற உள் உறுப்புக்களை மட்டும் அல்ல... சருமத்திலும் பாதிப்பை ஏற்படுத்தக்கூடியது சர்க்கரை நோய். இன்னும் சொல்லப்போனால், சிலருக்கு சர்க்கரை நோயின் முதல் அறிகுறியே சருமத்தில்தான் வெளிப்படும். சர்க்கரை நோய், பல வழிகளில் சருமத்தைப் பாதிக்கிறது. கிட்டத்தட்ட மூன்றில் ஒருவர் தங்கள் வாழ்நாளில் ஒருமுறையாவது சர்க்கரை நோய் காரணமாக சருமப் பிரச்னை ஏற்பட்டு அவதியுறுகின்றனர். இதில் நல்ல விஷயம் இதைக் குணப்படுத்த முடியும் என்பதுதான். ரத்தத்தில் சர்க்கரை அளவைக் கட்டுக்குள்வைப்பதன் மூலம், இந்தப் பாதிப்பைத் தடுக்க முடியும்.

இந்த சருமப் பிரச்னைகள் சர்க்கரை நோயாளிகளுக்கு மட்டும் அல்ல... அனைவருக்கும் ஏற்படக்கூடிய பிரச்னைதான். ஆனாலும், சர்க்கரை நோய் இருந்தால், அவர்களுக்கு வருவதற்கான வாய்ப்பு மிகமிக அதிகம். இவை, பாக்டீரியல் நோய்த்தொற்று, பூஞ்சைத்தொற்று (Fungal Infections) மற்றும் அரிப்பு போன்றவை.

ஸ்வீட் எஸ்கேப் - 14

பாக்டீரியா தொற்று

சர்க்கரை நோயாளிகளுக்கு பலவகையான பாக்டீரியா தொற்று ஏற்படலாம். இவற்றை, ஸ்டாய்ஸ் (கண் இமைச் சுரப்பிகளில் ஏற்படக்கூடிய நோய்த்தொற்று), கொப்பளம், முடி வேர்க்காலில் ஏற்படக்கூடிய நோய்த்தொற்று, சருமத்தின் அடி ஆழத்தில் ஏற்படக்கூடிய நோய்த்தொற்று, நகத்தைச் சுற்றிலும் ஏற்படக்கூடிய தொற்று என்று வகைப்படுத்தலாம்.

தொற்று ஏற்பட்ட திசுக்கள் வழக்கத்துக்கு மாறாக, வெப்பமாகவும், வீக்கத்துடனும், சிவந்தும், வலியுடனும் காணப்படும். பல வகையான நுண்ணுயிரிகள் தொற்றை ஏற்படுத்தலாம். இதில் ஸ்டெப் என்படும் ஸ்டாஃபிலோகாக்கஸ் (Staphylococcus) பாக்டீரியா முக்கியமானது. இந்த பாக்டீரியா தொற்று சர்க்கரை நோயாளிகளின் உயிரைப் பறிக்கக்கூடிய அளவுக்குத் தீவிரமானது. நல்லகாலமாக, தற்போது, இந்தத் தொற்று காரணமாக உயிரிழப்பு ஏற்படுவது குறைந்து உள்ளது. இதற்கு, நல்ல ஆற்றல்மிக்க ஆன்டிபயாடிக் மற்றும் ரத்தத்தில் சர்க்கரையை கட்டுக்குள் வைக்கும் வழிமுறைகள் உருவானதுதான் காரணம்.

பூஞ்சைத் தொற்று

ஸ்வீட் எஸ்கேப் - 14

சர்க்கரை நோயாளிகளுக்கு பாதிப்பை ஏற்படுத்தக்கூடிய பூஞ்சைத் தொற்றுக்களில் முக்கியமானது காண்டிடா அல்பிகான்ஸ் (Candida albicans). உடலில் ஈரப்பதமான பகுதியில் அதாவது, நகத்தைச் சுற்றி உள்ள பகுதி, விரல்களுக்கு இடைப்பட்ட பகுதி, வாயின் முனை, தொடை மற்றும் அக்குள் பகுதியில் வளர ஆரம்பிக்கிறது. படர்தாமரை, அத்லெட்ஸ் ஃபுட் மற்றும் வெஜைனல் போன்ற சில நமைச்சலை உண்டாக்கக்கூடியது.

அரிப்பு

ஸ்வீட் எஸ்கேப் - 14

அரிப்பு பிரச்னை ஏற்படுவதற்கு உலர் சருமம், நோய்த்தொற்று, உடலின் அந்தப் பகுதிக்கு போதுமான ரத்த ஓட்டம் இன்மை போன்ற காரணங்கள் உள்ளன. இதில், போதுமான ரத்த ஓட்டம் இல்லாத நிலை என்பது கால் மற்றும் பாதத்தில்தான் அதிகம் ஏற்படுகிறது. இந்தப் பிரச்னைக்கு ரசாயனம் குறைவான மைல்டு சோப் பயன்படுத்தி சுத்தம்செய்து, மாய்ச்சரைசர் மற்றும் சருமப் பராமரிப்பு கிரீம்களைப் பயன்படுத்தலாம்.

டயாபடீக் டெர்மோபதி

ஸ்வீட் எஸ்கேப் - 14

கடந்த இதழில் சர்க்கரை நோயாளிகளுக்கு நுண்ணிய ரத்தக் குழாய்கள் பாதிப்படைவதைப் பற்றித் தெரிவித்திருந்தேன். இது, சருமப் பிரச்னை ஏற்படவும் காரணமாகிவிடுகிறது. இதை ‘டயாபடீக் டெர்மோபதி’ என்கிறோம். இந்தப் பிரச்னை உள்ளவர்களுக்கு, சருமம் பழுப்பு நிறத்துக்கு மாறும், செதில் செதிலான தோல் உதிரும். இது வட்ட அல்லது நீள்வட்ட வடிவில் இருக்கும். பலரும் இதை வயது அதிகரிப்பதால் சருமத்தில் ஏற்படக்கூடிய பிரச்னை என்று தவறாக நினைத்துக்கொள்கின்றனர்.

தோல் தடிப்பு (Acanthosis Nigricans)

ஸ்வீட் எஸ்கேப் - 14

கழுத்தின் பக்கவாட்டுப்பகுதி, அக்குள் மற்றும் இடுப்புப் பகுதியில் சருமம் பழுப்பு நிறத்துக்கு மாறும். சில நேரங்களில் கைகள், தோள்பட்டை மற்றும் மூட்டுப்பகுதியிலும் சருமம் மாறும். பெரும்பாலும் இந்தப் பிரச்னை உடல் பருமன் உள்ளவர்களுக்கு ஏற்படும். இது, இன்சுலின் ரெசிஸ்டென்ஸ் (செயல்திறன் குறைவு) பிரச்னையின் ஓர் அறிகுறி. சர்க்கரை நோய்க்கு முந்தைய நிலை எனப்படும் ப்ரீ டயாபடீஸ் நிலையில் இது ஏற்படும். இவர்கள் தங்கள் உடல் எடையைக் கட்டுக்குள் கொண்டுவந்தால், ரத்தத்தில் சர்க்கரை அளவைக் கட்டுக்குள் வைத்தால் இந்தப் பிரச்னை மறைந்துவிடும்.

- தொடரும்

ஸ்வீட்டர்

சர்க்கரையை கட்டுப்படுத்த எடுத்துவைக்கும் ஒரு சிறு அடி கூட பெரிய பலனைத் தரும். அதற்கான முயற்சியை இப்போதே தொடங்குவோம். சர்க்கரை நோயைக் கண்டு கவலைப்படுபவராக (worrier)இல்லாமல், அதை எதிர்த்துப் போராடும் வீரனாக (warrior) இருப்போம்.

டயாபடீக் டவுட்

“சர்க்கரை நோயாளிகள் தங்கள் சருமத்தைப் பராமரிப்பதற்கான வழிமுறைகள் என்னென்ன?”


“சருமத்தை ஆரோக்கியமாகப் பராமரிக்க, முதலில் முழு உடலையும் ஆரோக்கியமாகப் பராமரிப்பதுதான் நல்ல வழி. இதற்கு ஆரோக்கியமான, சரிவிகித உணவு எடுத்துக்கொள்வது, போதுமான அளவு தண்ணீர் அருந்துவது, மனஅழுத்தத்தைக் கட்டுப்படுத்துவது மற்றும் ரத்தத்தில் சர்க்கரை அளவைக் கட்டுக்குள் வைப்பது முக்கியம். சர்க்கரை நோயால் ஏற்படக்கூடிய சருமப் பிரச்னைகளைத் தவிர்க்க, சருமத்தின் மீது ஒரு கண் வைக்க (கவனிக்க) வேண்டியது அவசியம். ஆரோக்கியமான பழக்க வழக்கங்களைப் பின்பற்றுவதன் மூலம், சருமப் பிரச்னைகளை மட்டும் அல்ல, பல்வேறு உடல்நலக் குறைபாடுகளையும் தவிர்க்க முடியும். இதனுடன், பொது சுகாதாரத்திலும் கவனம் செலுத்த வேண்டும். தினசரி இரண்டு முறை குளிப்பது, அவ்வப்போது கைகளை சுத்தம் செய்துகொள்வது, நோய்த்தொற்று வளர வாய்ப்பு உள்ள அக்குள், இடுப்பு, தொடை இடுக்குப் பகுதிகளை சுத்தமாகப் பராமரிப்பது, தேவை எனில், மாய்ஸ்சரைசர் கிரீம் பயன்படுத்துவது நல்லது. காற்றோட்டமான, பருத்தி ஆடையைப் பயன்படுத்த வேண்டும். குளித்து முடித்ததும் இந்தப் பகுதிகளை நன்கு உலர்வாகத் துடைக்க வேண்டும். உள்ளாடைகளைத் தினமும் துவைத்துப் பயன்படுத்த வேண்டும். சோப், ஷாம்பு, சருமப் பராமரிப்பு கிரீம்களில் அதிக ரசாயனம் இல்லாமல், மைல்டானவற்றைப் பயன்படுத்த வேண்டும்.

சில வாசனைத் திரவியங்கள், நிறங்கள் நம்மை ஈர்ப்பதாக இருக்கலாம். ஆனால், இதனால் ஒவ்வாமை ஏற்பட வாய்ப்பு உள்ளது. இவற்றைத் தவிர்க்க வேண்டும். இதேபோல, சில மருந்துகளும்கூட ஒவ்வாமையை ஏற்படுத்தக்கூடும். சர்க்கரை நோய்க்கு எடுத்துக்கொள்ளும் மருந்துகள் காரணமாக ஒவ்வாமை ஏற்படுகிறது என்றால், உடனடியாக உங்கள் மருத்துவரின் ஆலோசனை பெற வேண்டும். சுய மருத்துவத்தைத் தவிர்க்க வேண்டும்.”

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு