Published:Updated:

நோய் நாடி..! - ஆஸ்துமா... உங்களை அண்டாமல் இருக்க வேண்டுமா?

ஒட்டுமொத்த விகடனுக்கும் ஒரே ஷார்ட்கட்

Use App
நோய் நாடி..! - ஆஸ்துமா...  உங்களை அண்டாமல்  இருக்க வேண்டுமா?
நோய் நாடி..! - ஆஸ்துமா... உங்களை அண்டாமல் இருக்க வேண்டுமா?

கம்ப்ளீட் மெடிக்கல் கைடு

பிரீமியம் ஸ்டோரி
நோய் நாடி..! - ஆஸ்துமா...  உங்களை அண்டாமல்  இருக்க வேண்டுமா?

‘‘நோய்களைப் பற்றி தொடர்ந்து வெளிச்சம் தந்துவரும் ‘நோய் நாடி’ தொடரில், ஆஸ்துமா பற்றிய அடிப்படை விளக்கத்தில் தொடங்கி, சோதனை முறைகள், சிகிச்சை முறைகள் வரை விரிவாகப் பேசுகிறார் தாம்பரம் - சானிடோரியத்தில் உள்ள நெஞ்சக மருத்துவமனையின் துணை கண்காணிப்பாளரும், பேராசிரியருமான நெஞ்சக நோய் சிறப்பு மருத்துவர் வினோத்குமார்.

ஆஸ்துமா என்னும் தொல்லை மிக்க நோய் வர முக்கியக் காரணம், நாமும், நம் சுற்றுப்புறச் சூழலும்தான்’’ என்ற டாக்டர் தொடர்ந்தார்...

ஆஸ்துமா என்பது என்ன..?

நோய் நாடி..! - ஆஸ்துமா...  உங்களை அண்டாமல்  இருக்க வேண்டுமா?

ஆஸ்துமா என்பது ஒரு வகையான ஒவ்வாமைக் கோளாறு (allergic disorder). இது, பிறந்த குழந்தை முதல் முதியவர் வரை ஆண் - பெண் பாகுபாடின்றி யாருக்கும் ஏற்படலாம். அதிலும் இந்தியா போன்ற சுற்றுச்சூழல் மாசுபாடு (குறிப்பாக காற்று மாசுபாடு) நிறைந்த நாடுகளில் அதிகமானோர் ஆஸ்துமாவால் பாதிக்கப்படுகிறார்கள். சுற்றுச்சூழல் மாசுபாடு, கட்டடப் பணி தூசு, ஏ.சி காற்று, புகைபிடித்தல் இவை நான்கும் ஆஸ்துமாவை வரவழைக்கும் மிக முக்கியக் காரணிகள் என்பது குறிப்பிடத்தக்கது.

ஆஸ்துமா எப்படி உருவாகிறது..?

சாதாரணமாகவே 10 பேரில் 8 பேருக்கு ஏதாவது ஒவ்வாமைக் கோளாறு இருக்கக்கூடும். அதில் 2 பேர் ஆஸ்துமாவால் பாதிக்கப் பட்டவர்களாக இருப்பார்கள். நம் மனித உடலில் கழுத்துப் பகுதியில் ஒரு குழாயாகச் செல்லும் காற்றுக்குழாய், கீழே செல்லச் செல்ல இரண்டாகி, நான்காகி, எட்டாகி, பதினாறாகி... கடைசியில் 300 மில்லியனாகப் பரவி நம் நுரையீரலுக்குள் செல்லும். இந்தப் பாதையானது நாம் சுவாசிக்கும் காற்றில் உள்ள மாசு தொடங்கி புகைபிடித்தல் வரைக்கும் உண்டாகும் பாதிப்புகளால் சுருங்குதல், புண் ஏற்படுதல், சளி உற்பத்தியாதல் என பாதிப்படையும். இதனால் சாதாரண மூக்கடைப்பு தொடங்கி மூச்சுப் பிரச்னைவரை ஏற்பட்டு, இறுதியில் அது ஆஸ்துமாவாக மாறக்கூடும்.

ஆஸ்துமா பரவும் நிலை!

நோய் நாடி..! - ஆஸ்துமா...  உங்களை அண்டாமல்  இருக்க வேண்டுமா?

• முதலில் மூக்கு ஒழுகுதல், மூக்கு அடைப்பு, சைனஸ் பிரச்னை, தலைவலி, தலைபாரம் போன்றவை உண்டாகும்.

• அதைத் தொடர்ந்து அவ்வப்போது வீஸிங் வரக்கூடும்.

• கடைசியில் அது ஆஸ்துமாவாகி, வீஸிங் தொடர்ந்து நீடிக்க ஆரம்பிக்கும்.

ஆஸ்துமா... அறிகுறிகள்!

• மூச்சு வாங்குதல்

• மூச்சு சத்தம் வெளியில் கேட்பது

• உடல் இளைத்தல்

• இருமல்

• சளி

இந்த அறிகுறிகள் வெளிப்படும்போது, பலரும் அதைப் பெரிதாகக் கண்டுகொள்வதில்லை. சிலர் தாங்களாகவே மருந்துக் கடைகளில் மாத்திரை வாங்கிச் சாப்பிடுகிறார்கள். மிகவும் சிலரே மருத்துவரை அணுகி ஆரம்ப நிலையிலேயே ஆஸ்துமாவை விரட்டுகிறார்கள்.

என்ன செய்ய வேண்டும்..?

நோய் நாடி..! - ஆஸ்துமா...  உங்களை அண்டாமல்  இருக்க வேண்டுமா?

மேற்கண்ட அறிகுறிகள் இருப்பவர்கள் உடனடியாக அருகில் உள்ள பொதுமருத்துவர் அல்லது குடும்ப மருத்துவரிடம் செல்ல வேண்டும். ஆஸ்துமாவைப் பொறுத்தவரையில் ஆரம்பநிலையில் கண்டறிந்து குணப்படுத்துவது மிகவும் நல்லது... எளிதும்கூட!

பெரும்பாலும் ஆரம்பநிலை ஆஸ்துமா பிரச்னைக்கு மாத்திரை கள், இன்ஹேலர் என்று சொல்லக் கூடிய வாய் வழியாக புகையை இழுத்துவிடுதல், புகை மருந்து போன்றவையே போதுமானவை. அப்படி ஆரம்பத்தில் சரிசெய்யாத பட்சத்தில் நுரையீரல் பாதிப்புவரை உண்டாகி, உயிரிழப்பு வரை அழைத்துச் செல்லக்கூடும். அதனால் ஆஸ்துமா விஷயத்தில் போதிய விழிப்பு உணர்வும், கூடுதல் அக்கறையும் கொண்டு செயல்படுதல் அவசியம்.

சோதனை முறைகள்!

1. கிளினிக்கல் எக்ஸாமினேஷன் டெஸ்ட் (Clinical Examination Test):  இது நேரடியாக நோயாளியைப் பார்த்து, கேட்டு, கண்டறியும் சோதனை முறை.

நோய் நாடி..! - ஆஸ்துமா...  உங்களை அண்டாமல்  இருக்க வேண்டுமா?

2. ஸ்பைரோமெட்ரி டெஸ்ட் (Spirometry Test): கணினியில் பொருத்தப்பட்ட ஸ்பைரோமெட்ரி கருவி வழியாக நோயாளியை ஊதச்சொல்லிக் கண்டறியும் முறை. இதன் மூலமாக நுரையீரல் இயக்கம், ஆஸ்துமா அளவு போன்றவற்றை மிகத்துல்லியமாகக் கண்டறியலாம்.

3. ஈஸ்னோஃபீலீயா டெஸ்ட் (eosinophilia test): நம் உடலில் உள்ள ரத்த வெள்ளைஅணுக்களின் எண்ணிக்கையைக் கண்டறியும் ரத்தப் பரிசோதனை முறை இது.

4. மற்ற பரிசோதனைகள் (Other Tests): 95% ஆஸ்துமா பிரச்னைகளை மேற்கண்ட மூன்று சோதனை முறைகளிலேயே கண்டறிந்து சரிசெய்துவிடலாம். மீதமுள்ள 5% தீவிர ஆஸ்துமா பிரச்னை (தீவிர வீஸிங் பிரச்னை, ஆக்ஸிஜன் லெவல் குறைவாக இருப்பது) உள்ளவர்களுக்கு இ.சி.ஜி, எக்கோ போன்ற பரிசோதனைகள் தேவைப் படும். இவர்களுக்கு ஊசி, புகைமருந்து, ஆக்ஸிஜன் மாஸ்க் வழியாக ஆக்ஸிஜன் செலுத்துதல் தீர்வாக அமையும்.

சிகிச்சை முறைகள்!

மாத்திரை மருந்துகள்: ஆரம்பநிலை ஆஸ்துமா பிரச்னை உள்ளவர்களுக்கு மாத்திரை மருந்துகளே போதுமானதாக இருந்தாலும், அதை உட்கொள்வதால் அது ரத்தத்தில் கலந்து உடல் முழுக்கப் பரவி பலவிதமான பக்கவிளைவுகளை ஏற்படுத்தக்கூடும். அதனால் இன்ஹேலர் எனப்படும், புகையை வாய்வழியாக இழுக்கக்கூடிய, சிறிய அளவிலான கருவி மூலமான சிகிச்சையே நல்லது.

நோய் நாடி..! - ஆஸ்துமா...  உங்களை அண்டாமல்  இருக்க வேண்டுமா?

ஆக்ஸிஜன் மாஸ்க்: நுரையீரலுக்கு நேரடியாக ஆக்ஸிஜன் மாஸ்க் மூலமாக காற்றுக்குழாய் வழியாக ஆக்ஸிஜன் செலுத்தும் சிகிச்சை இது. பெரும்பாலும் ஆஸ்துமாவுக்கு மாத்திரை மருந்துகள், ஊசிகள் தொடங்கி ஆக்ஸிஜன் மாஸ்க் சிகிச்சை வரையே போதுமானது. இதற்காக அறுவை சிகிச்சைகள் எதுவும் கிடையாது என்பது குறிப்பிடத்தக்கது.

புகைமருந்து: ஆஸ்துமாவால் பாதிக்கப்படும் குழந்தைகளுக்கும் முதியவர்களுக்கும் நேரடியாக புகை மருந்துகள் வழங்கப்படும். இதுவே அவர்களுக்குப் போதுமானது.

வருமுன் காப்பது எப்படி?

• புகைப்பழக்கத்தை அடியோடு தவிர்க்க வேண்டும்; புகைபிடிப்பவர்கள் அருகில் இருப்பதும் கூடாது.

• தூசு, புகை நிறைந்துள்ள இடங்களுக்குச் செல்வதைத் தவிர்க்கலாம். முடியாதபட்சத்தில் கைக்குட்டை கொண்டு தூசு சுவாசக்குழாயில் செல்லாதவாறு பாதுகாப்போடு இருக்கலாம்.

• ஏ.சி பயன்படுத்துவோர் வாரம் ஒருமுறை அதனை முறையாகச் சுத்தம் செய்ய வேண்டும். புகைக்கு அடுத்தபடியாக இன்றைக்கு அதிகமானோர் பாதிக்கப்படுவது ஏ.சி-யால் என்பது கூடுதல் தகவல்.

• வீட்டில் பயன்படுத்தும் ஊதுவத்தி, சாம்பிராணி, வாசனைப் பொருட்கள் போன்றவற்றை தரமானதாக வாங்கி அளவோடு பயன்படுத்தலாம். முடிந்தவரை தவிர்ப்பதும் நல்லது.

• கழிவறையைச் சுத்தப்படுத்த பயன் படுத்தும் ஆசிட்டில் இருந்து வெளிவரும் வாசனை, புகை போன்றவை அதிக பாதிப்பை ஏற்படுத்தக் கூடியவை. அதனால் போதிய பாதுகாப்பு வசதிகளோடு அவற்றைக் கையாள வேண்டியது முக்கியம்.

• பெயின்ட், சுண்ணாம்பு, வார்னிஷ் அடிக்கும்போது அந்த வாசனை சுவாசத்தின் வழியாக நேரடியாக நுரையீரலுக்குச் சென்று பாதிப்பை ஏற்படுத்தக்கூடும் என்பதால், போதிய பாதுகாப்புடன் (முகத்தில் கைக்குட்டை கட்டிக்கொள்வது) இருக்க வேண்டும்.

• இனிப்பு மற்றும் கடல் உணவுகள் ஆஸ்துமாவுக்கு வழிவகுக்கும் என்பதால் முடிந்தவரை தவிர்க்கவும்.

• யோகா, நீச்சல் போன்ற பயிற்சிகள் ஆஸ்துமா பிரச்னையை அருகில் நெருங்கவிடாத பாதுகாப்புக் கவசங்கள்.

• தீபாவளி சமயத்தில் பட்டாசுகள் வெளிப் படுத்தும் நச்சுப்புகையால், ஆண்டுதோறும் ஆஸ்துமா நோயாளிகளின் எண்ணிக்கையும், ஏற்கெனவே நோயுள்ளவர்களுக்கு அதன் தீவிரமும் அதிகரிக்கிறது என்பதால், அதிலிருந்து விலகியிருக்க வேண்டும்.

• ``மொத்தத்தில், ஆஸ்துமா என்பது மரபு நோய் கிடையாது. அதை நாம்தான் நம் அன்றாடச் செயல்பாட்டு தவறுகளால் பெறுகிறோம். போதிய விழிப்பு உணர்வுடன், பாதுகாப்பு நடவடிக்கைகளையும் மேற்கொள்ளும்போது, ஆண்டுதோறும் ஏறுமுகத்தில் போய்க் கொண்டிருக்கும் ஆஸ்துமா நோயாளிகளின் எண்ணிக்கையை இறங்குமுகத்தில் பயணிக்க வைக்க முடியும்’’ - நம்பிக்கை தந்து நிறைவு செய்தார் டாக்டர் வினோத்குமார்.

சா.வடிவரசு படங்கள்:  ப.சரவணகுமார்

குழந்தைகளுக்கு வருமா..?

`குழந்தைகளுக்குக்கூட ஆஸ்துமா வரக்கூடுமா?’ என்ற கேள்வி பலருக்கு எழலாம். `ஆம்’ என்பதே பதில். பிறந்த குழந்தைக்குக்கூட வைரஸ் தொற்று காரணமாக ஆஸ்துமா வரக்கூடும். இதனைச் சரிசெய்துவிடலாம். மேலும், சிறு வயதில் ஆஸ்துமா பிரச்னை உள்ள குழந்தைகளுக்கு, வளர வளர அவர்களின் நோய் எதிர்ப்புச் சக்தி வளரும்போது, 17, 18 வயதில் முழுமையான நோய் எதிர்ப்புச் சக்தி பெற்று ஆஸ்துமாவில் இருந்து விடுதலைபெறுவார்கள்.

வீட்டைச் சுற்றி..!

தினமும் வீட்டைக் கூட்டுவது, அழுக்குத் துணிகளைத் துவைப்பது, துவைத்த துணிகளை நன்றாக உலரவைத்து பயன்படுத்துவது, வீட்டில் தூசிகள் படியாதவாறு பார்த்துக்கொள்வது, வீட்டைச் சுற்றி குப்பை, தண்ணீர் தேங்காதவாறு பார்த்துக்கொள்வது, சுவர்களில் பூஞ்சை படியாதவாறு பார்த்துக்கொள்வது, ஓட்டடை (சிலந்தி வலை) சேராதவாறும், அப்படிச் சேர்ந்தால் அதை நீக்கும்போது போதிய பாதுகாப்போடும் செயல்படுவது, ரூம் ஸ்பிரே விஷயத்தில் கூடுதல் எச்சரிக்கையோடு இருப்பது, வீட்டில் நாய், பூனை, லவ் பேர்ட்ஸ் போன்றவற்றை வளர்ப்பவர்கள் அவற்றை சுத்தத்தோடும், அவற்றிடம் பழகும்போது கூடுதல் விழிப்போடும் இருப்பது, முட்டை, பால் போன்றவற்றால் அலர்ஜி ஏற்பட்டால் அவற்றைத் தவிர்ப்பது... ஆஸ்துமா பிரச்னையில் இருந்து விலகியிருக்க இந்த அன்றாடச் செயல்பாடுகளில் கவனம் செலுத்துவது மிகவும் முக்கியம்.

ஆஸ்துமாவால் இறப்பு... ஏன்?

ஆஸ்துமாவால் இறப்பவர்களின் எண்ணிக்கை மிகவும் குறைவுதான் என்றாலும், அப்படி இறப்பவர்கள் எதனால் இறக்கிறார்கள் என்பதற்கான காரணங்கள் முக்கியமானவை. அதிகமாகப் புகைபிடிப்பவர்கள், இதயப் பிரச்னை உள்ளபோது புகைபிடிப்பவர்கள், நிமோனியா காய்ச்சலால் பாதிக்கப்படுபவர்கள்... இவர்களுக்கு ஆஸ்துமா பாதிப்பு மரணம் வரை ஏற்படுத்துகிறது. நார்மலாக ஆக்ஸிஜன் லெவல் 100 என்ற அளவில் இருக்கும். இது 85-க்கும் கீழே சென்றால் மரணம் ஏற்படும் வாய்ப்பு மிக அதிகம்.

இந்தியாவில் 2 கோடி பேர்!

கடந்த ஆண்டு உலகளவில் மேற்கொள்ளப்பட்ட ஆய்வு ஒன்றில் 30 கோடி பேர் ஆஸ்துமாவால் பாதிக்கப்பட்டுள்ளதாகவும், அதில் 2.5 லட்சம் பேர் உயிரிழந்துவிட்டதாகவும் சொல்லப்படுகிறது. அதேபோல் உலக சுகாதார அமைப்பு இந்திய அளவில் மேற்கொண்ட ஆய்வு ஒன்றில், 1.5 - 2 கோடி பேர் ஆஸ்துமா பாதிப்புக்கு உள்ளாகி இருப்பதாகக் கண்டறியப்பட்டுள்ளது. மேலும், ஆண்டுதோறும் ஆஸ்துமா நோயாளிகளின் எண்ணிக்கை அதிகரிக்க போதிய விழிப்பு உணர்வு இல்லாததும், அதிகரித்து வரும் சுற்றுச்சூழல் மாசுபாடும்தான் காரணம் எனவும் சொல்லப்பட்டுள்ளது.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு