Published:Updated:

ஸ்வீட் எஸ்கேப் - 16

ஸ்வீட் எஸ்கேப் - 16
பிரீமியம் ஸ்டோரி
ஸ்வீட் எஸ்கேப் - 16

சர்க்கரையை வெல்லலாம்

ஸ்வீட் எஸ்கேப் - 16

சர்க்கரையை வெல்லலாம்

Published:Updated:
ஸ்வீட் எஸ்கேப் - 16
பிரீமியம் ஸ்டோரி
ஸ்வீட் எஸ்கேப் - 16
ஸ்வீட் எஸ்கேப் - 16

ர்க்கரை நோயால் வரக்கூடிய பாதிப்புகள் என்றதும் கால்புண், கண்ணில் ஏற்படும் குளுக்கோமா, சிறுநீரகப் பாதிப்புகள்தான் நம் நினைவுக்கு வரும். உடலின் மிக முக்கியமான மற்ற உறுப்புக்களுக்கு ஏற்படும் பாதிப்புகள் நம் நினைவுக்கு வருவது இல்லை. நம் வாழ்வின் ஒவ்வொரு நொடியும் பயன்படுத்தும் முக்கியமான ஓர் உறுப்பு நுரையீரல். சர்க்கரை நோய் வந்துவிட்டால், நுரையீரல் தொடர்பான சில பிரச்னைகள் ஏற்படுவதற்கான வாய்ப்பும் உள்ளது. நுரையீரல் செயல்பாட்டில், அதாவது நம்முடைய சுவாசத்தில், மிகப்பெரிய தாக்கத்தை ஏற்படுத்தக்கூடியதாகவும் சர்க்கரை நோய் இருக்கிறது.

இதனுடன், கொழுப்பு நிறைந்த உணவை எடுத்துக்கொள்வது, உடல் உழைப்பு இன்மை போன்ற ஆரோக்கியமற்ற வாழ்க்கைமுறை, புகைப்பழக்கம் என ஒவ்வொன்றும் கூடும்போது, சுவாசித்தல் திறன் குறைகிறது.

நுரையீரல் நோய்த்தொற்று

சர்க்கரை அளவைக் கட்டுக்குள் வைத்திருக்காத சர்க்கரை நோயாளிகளுக்கு, நோய் எதிர்ப்பு மண்டலத்தின் செயல்திறன் குறைகிறது. இதன் மூலம், எந்த வகையான நோய்த்தொற்றும் எளிதில் ஏற்படக்கூடிய வாய்ப்பு உருவாகிறது. அதாவது, மற்றவர்களைக் காட்டிலும் சர்க்கரை நோயாளிகளுக்கு நோய்த்தொற்று அதிகமாகவும் விரைவாகவும் ஏற்பட வாய்ப்பு உள்ளது. இதனால்தான், சர்க்கரை நோயாளிகளுக்கு சாதாரண சளி, ஃபுளு காய்ச்சல், இதர தொற்றுநோய்கள் விரைவாக ஏற்படுகின்றன; குணமாகவும் நாளாகிறது. எனவேதான், சர்க்கரை அளவைக் கட்டுக்குள்வைத்திருந்து, சர்க்கரை நோயை மிகவும் கவனமாகக் கையாள வேண்டும் என்று மீண்டும் மீண்டும் சொல்கிறேன்.

நுரையீரலைப் பாதிக்கும் இரண்டு மிக மோசமான நோய்த்தொற்றுகள் உள்ளன. அவை, நிமோனியா மற்றும் நுரையீரல் காசநோய். இவை இரண்டுமே மிகப்பெரிய பாதிப்பை ஏற்படுத்தக்கூடியவை.

நிமோனியா

நிமோனியா தொற்று ஏற்பட்டால் நுரையீரலில், சுவாசக் குழாயில் வீக்கம் ஏற்படுகிறது. இதனால், காற்று உள்ளே நுழைவதில் பாதிப்பு ஏற்படுகிறது. இதைச் சமாளிக்க, நுரையீரல் இன்னும் அதிக அளவில் செயல்படவேண்டியிருக்கிறது. இந்தப் பாதிப்பை ஏற்படுத்தும் பாக்டீரியா கிருமிக்கு ஸ்ட்ரெப்ட்டோகாக்கஸ் நிமோனியா (Streptococcus pneumoniae) என்று பெயர்.

சர்க்கரை நோய் தவிர்த்து, சிறுநீரகம், கல்லீரல், இதயப் பிரச்னைகள், ஆஸ்துமா உள்ளிட்ட பிரச்னைகள்கூட நிமோனியா நோய்த்தொற்றுக்குக் காரணமாக இருக்கலாம். நிமோனியா நோய்த்தொற்று ஏற்பட்டால், சுவாசித்தலில் சிரமம், காய்ச்சல், அதிவேக இதயத்துடிப்பு, குளிர் அல்லது அதீத வெப்பம் என உடல் வெப்பநிலையில் மாற்றம், பசியின்மை, நெஞ்சுவலி போன்ற அறிகுறிகள் இருக்கும். நிமோனியாவுக்குச் சரியான சிகிச்சை எடுத்துக்கொள்ளவில்லை எனில், மிகப்பெரிய பாதிப்பை ஏற்படுத்தும். நுரையீரலில் நீர்கோத்து, சுவாசிக்க முடியாத சூழலை ஏற்படுத்தும்.

இதைச் சரிப்படுத்த முடியும் என்பதுதான் ஆறுதலான விஷயம். போதுமான ஓய்வு, ஆன்டிபயாடிக்ஸ் எடுத்துக்கொண்டாலே போதும். மாத்திரை எடுக்க ஆரம்பித்ததுமே அறிகுறிகள் மறைந்துவிடும். அதற்காக, மருந்து எடுத்துக்கொள்வதை நிறுத்தக் கூடாது. டாக்டர் பரிந்துரைத்த காலம் வரையில் கட்டாயம் இந்த மருந்துகளை எடுத்துக்கொள்ள வேண்டும். இல்லை எனில், மீண்டும் கிருமி பாதிப்பு மிகவும் தீவிரமாக ஏற்படும். மிகத் தீவிரமான பாதிப்பு உள்ளவர்களை மருத்துவமனையில் அனுமதித்து சிகிச்சை அளிக்க வேண்டியிருக்கும்.

காசநோய்

இதுவும் பாக்டீரியாவால் ஏற்படக்கூடிய பாதிப்புதான். இது சூழலுக்கு ஏற்ப தன்னை மாற்றிக்கொண்டு, மனித உடலுக்கு வெளியேயும் தாக்குப்பிடித்து வாழக்கூடியது. அதிக அளவில் மக்கள் பயன்படுத்தும் பஸ், ரயிலின் கைப்பிடிகள், பொதுக் கழிப்பறை கைப்பிடிகளில் நீண்ட காலம் உயிரோடு இருக்கும். காற்றின் மூலம் பரவக்கூடிய இந்தக் கிருமி, நம் சுவாசத்தின்போது உடலுக்குள் நுழையும். நோய்த்தொற்று உள்ளவர்கள் தும்மும்போதும் இருமும் போதும் கிருமி வெளிப்பட்டு, மற்றவர்களுக்குப் பாதிப்பை ஏற்படுத்தும். சர்க்கரை நோயாளிகளைப் போன்று நோய் எதிர்ப்பு சக்தி குறைவானவர்களுக்கு, உடனடியாகப் பாதிப்பை ஏற்படுத்தும்.

சோர்வு, உடல் எடைக்குறைவு, மாலை நேரத்தில் காய்ச்சல், பசியின்மை, வியர்வை, இருமல், துர்நாற்றத்துடன் கூடிய சளி போன்றவை இதன் அறிகுறிகள். பொதுவாக, நோய்க் கிருமி நன்கு வளர்ச்சியடையும் வரை இந்த அறிகுறிகள் வெளிப்படாமலே இருக்கும்.

காசநோய் வந்தால் குறைந்தது ஆறு மாதங்கள் தொடர்ந்து ஆன்டிபாக்டீரியல் மருந்து எடுக்க வேண்டும். நிமோனியா போலவே, மருத்துவர் பரிந்துரைத்த காலம் வரையில் மருந்துகளைத் தவறாமல் எடுத்துக்கொள்ள வேண்டும். இல்லை எனில், இந்தக் கிருமி மருந்துக்கு எதிராகச் செயல்படும் தன்மையைப் பெற்றுவிடும்.

ஸ்வீட் எஸ்கேப் - 16

சி.ஓ.பி.டி

நாட்பட்ட மூச்சுக்குழாய் அடைப்பு நோய் (Chronic Obstructive Pulmonary Disorder (COPD)) வந்தால், மூச்சுக்குழாய்கள் வீக்கம் அடையும். அதில் இருந்து திரவம் சுரக்கும். இதனால், சுவாசித்தலே சிரமமாகிவிடும். நுரையீரல் நோய்களில் மிக முக்கியமானது இது. இதற்கு மிக முக்கியக் காரணம் சிகரெட் புகைத்தல் மற்றும் புகை சூழ்ந்த இடத்தில் இருப்பதுதான். தொடர்ந்து புகையை சுவாசிக்கும்போது, நுரையீரல் மற்றும் மூச்சுக்குழாய் சுவர்களில் பாதிப்பை ஏற்படுத்தும். இதனால், இதன் சுருங்கி விரியும் திறன் (Elasticity) குறைந்துவிடுகிறது.

தொடர்ந்து பாதிப்பு ஏற்படும்போது, சுவாசித்தல் தடைப்படுகிறது, இதனால், ரத்தத்தில் ஆக்சிஜன் சேர்வதும் குறைகிறது.  சர்க்கரைநோய் உள்ளவர்களுக்கும் நுரையீரல் மற்றும் சுவாசக் குழாய் சுருங்கி, விரியும் திறன் பாதிக்கப்படுகிறது. இதனால், சுவாசித்தல் கடினமாகிறது. இதனால்தான், சர்க்கரை நோயாளிகளுக்கு சிகரெட் பழக்கம் மிகப்பெரிய ஆபத்தை ஏற்படுத்திவிடும் என்று எச்சரிக்கிறோம். சுவாசித்தலில் சிரமம், குறிப்பாக உடற்பயிற்சி செய்யும்போது, சுவாசிக்கும்போது விசில் அடிப்பது போன்ற சத்தம் ஏற்படுவது, சளியுடன்கூடிய இருமல், நெஞ்சக நோய்த்தொற்று, சோர்வு போன்றவை இதன் அறிகுறிகள். புகைபிடிப்பவர்கள் இது சிகரெட் புகைத்ததால் ஏற்பட்ட பாதிப்பு என்று நினைத்துக்கொண்டு இருந்துவிடுவர். சி.ஓ.பி.டி நோய்க்கு சிகிச்சை இல்லை. ஆரம்பநிலையிலேயே கண்டறிந்து சிகிச்சை பெறுவதன் மூலம் நுரையீரல் மேலும் பாதிப்படையாமல் பாதுகாக்க முடியும். முற்றிய நிலையில் இருப்பவர்களுக்கு கட்டுப்படுத்த மட்டுமே சிகிச்சை உண்டு. எனவே, புகைப்பழக்கத்தை முற்றிலுமாகக் கைவிடுவது நல்லது.

நுரையீரல் காக்க

ரத்தத்தில் சர்க்கரை அளவைக் கட்டுக்குள்வைப்பதன் மூலம் நோய் எதிர்ப்பு சக்தி குறையாமல் பாதுகாக்கலாம். இதனால், பாக்டீரியா உள்ளிட்ட கிருமித் தொற்று ஏற்படுவதைத் தடுக்க முடியும். ரத்தத்தில் அதிக அளவில் குளுக்கோஸ் இருப்பது பாக்டீரியாவுக்குப் போதுமான ஆகாரமாக மாறிவிடும். இதனுடன், ஆரோக்கியமான வாழ்க்கைமுறை, சுகாதாரப் பழக்கங்களைப் பின்பற்றுவதன் மூலம் நுரையீரல் நோய்த்தொற்றைத் தடுக்க முடியும்.

- தொடரும்

ஸ்வீட்டர்

மற்றவர்களைக் காட்டிலும் சிகரெட் புகைப்பவர்களுக்கு சர்க்கரைநோய் வருவதற்கான வாய்ப்பு 20 முதல் 40 சதவிகிதம் அதிகம்.

டயாபடீஸ் டவுட்

“என்னுடைய அப்பா, அம்மா இருவரும் 60 வயதைக் கடந்தவர்கள். இருவருக்கும் சர்க்கரைநோய் உள்ளது. அவர்களுக்கு அடிக்கடி சுவாசப்பாதை நோய்த்தொற்று ஏற்படுகிறது. இதைத் தடுக்க, பெரியவர்கள் போட்டுக்கொள்ளும்படி ஏதேனும் தடுப்பூசி உள்ளதா?”

“பெரியவர்களுக்கான தடுப்பூசி இருக்கிறது. குறிப்பாக, சர்க்கரை நோயாளிகள் இந்தத் தடுப்பூசியைப் போட்டுக்கொள்ளும்படி நாங்கள் பரிந்துரைக்கிறோம். இன்ஃபுளுவென்சா தடுப்பூசியை ஆண்டுக்கு ஒருமுறை போட்டுக்கொள்வதன் மூலம், பருவகாலத்தில் ஏற்படக்கூடிய ஃபுளு காய்ச்சலைத் தடுக்கலாம். நிமோனியாவுக்கும் தடுப்பூசி இருக்கிறது. 60 வயதைக் கடந்தவர்கள், சர்க்கரை நோயாளிகள் அனைவரும் ஒருமுறை இந்தத் தடுப்பூசியைப் போட்டுக்கொண்டாலே போதும்.
 
சர்க்கரை நோயாளிகளில் அதிகம் பேருக்கு மரணம் மற்றும் அதிக பாதிப்பை ஏற்படுத்தக்கூடியதாக நிமோனியாவும் இன்ஃபுளுவென்சாவும் இருக்கின்றன. வேறு எந்த ஒரு பிரச்னைக்காக மருத்துவமனையில் அனுமதிக்கப்படும் சர்க்கரை நோயாளிகளுக்குக்கூட இப்போது எல்லாம் இந்த இரண்டு வகையான தடுப்பூசிகளையும் பரிந்துரைக்கிறோம்.”