Published:Updated:

இனி எல்லாம் சுகமே - 17

இனி எல்லாம் சுகமே - 17
பிரீமியம் ஸ்டோரி
News
இனி எல்லாம் சுகமே - 17

செரிமானம் அறிவோம்!

இனி எல்லாம் சுகமே - 17

நாம் உட்கொள்ளும் உணவு, உணவுக்குழாய் வழியாக இரைப்பைக்குச் சென்று, கூழாக்கப்பட்டு, வெளியே தள்ளப்படுவதற்கு சராசரியாக மூன்று மணி நேரம் ஆகிறது. இரைப்பையில் வெளிவரும் உணவு சிறுகுடலில் விழுகிறது. அங்கே, கணைய நீர் மற்றும் பித்த நீரால் சத்துக்கள் பிரிக்கப்பட்டு, உறிஞ்சப்பட்டு, கடைசியில் கழிவாக பெருங்குடலை  அடைய, மேலும் மூன்று மணி நேரம் ஆகிறது.

பெருங்குடல் ஒரு கழிவுத் தொழிற்சாலை எனச் சொல்லலாம். திரவக்கழிவுகளில் எஞ்சியிருக்கும் உப்புகள், நீர் போன்றவை இங்கே உறிஞ்சப்பட்டு திடக்கழிவாக மாற்றப்படுகிறது. திடக்கழிவு ஒன்று சேர்ந்து, மலக்குடல் வழியாக வெளியேறுகின்றன. பெருங்குடலில் நடக்கும் இந்தப் பயணத்துக்கு 36 மணி நேரம் தேவைப்படுகிறது. நாம் சாப்பிடும் உணவு மலமாக வெளியே வர, சராசரியாக 42 மணி நேரம் தேவை. பெருங்குடல் ஆரோக்கியமாக இல்லை என்றாலோ, ஏதாவது ஒரு பகுதி ஸ்ட்ரைக் செய்தாலோ, உணவு ஒழுங்காகச் செரிக்கப்படாமல், வயிற்றுப்போக்காக வெளியேறும்; அல்லது, மலச்சிக்கல் ஏற்படும்.

நாம் உட்கொண்ட உணவு ஒழுங்காகச் செரிக்கப்பட்டு, சரியான நேரத்தில் கழிவாக வெளியேறாமல்போனால், நமது உடல்நலம் கடுமையாகப் பாதிக்கப்படும். அந்த வகையில் பெருங்குடல் முக்கியத்துவம் வாய்ந்த பல வேலைகளைச் செய்கிறது. பெருங்குடல், சுமார் ஐந்து அடி  நீளம் கொண்டது. உணவு, புவியீர்ப்பு விசைக்கு எதிராக மேலே ஏறி, கீழே இறங்கும் வித்தியாசமான பயணம் இங்கு நடக்கிறது. சிறுகுடலைவிட நீளத்தில் குறைவாக இருந்தாலும், அகலத்தில் பெரியது என்பதாலேயே பெருங்குடல் எனப்படுகிறது.

பெருங்குடல்வாய் (Cecum), குடல்வால் (Appendix), ஏறுமுகக் குடல் (Ascending Colon), ஹெபாடிக் வளைவு (Hepatic Flexure), குறுகிய குடல் (Transverse Colon), மண்ணீரல் வளைவு (Splenic Flexure), இறங்குமுகக் குடல் (Descending Colon), நெளிவுக்குடல் (Sigmoid Colon), மலக்குடல் (Rectum), ஆசன வாய் (Anus) என, பெருங்குடலை 10 பாகங்களாகப் பிரிக்கலாம்.

இனி எல்லாம் சுகமே - 17

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

பெருங்குடல் பயணம்

சிறுகுடலில் இருந்து வெளிவரும் உணவுக்கழிவு, வயிற்றின் வலது பக்கத்தில் உள்ள பெருங்குடலின் ஆரம்பப்பகுதியான பெருங்குடல்வாய்க்குள்  நுழைகிறது. இங்கேதான் குடல்வாலும் இருக்கிறது.

பெருங்குடல்வாய்


பெருங்குடல்வாய், சுமார் ஐந்தாறு செ.மீ. நீளம் இருக்கும். சிறுகுடலில் இருந்து சத்துக்கள் உறிஞ்சப்பட்டு,  மீதமிருக்கும்  கைம் (Chyme) எனும் உணவு எச்சமானது, கொஞ்சம் கொஞ்சமாக பெருங்குடல்வாய்ப் பகுதிக்கு வரும். பெருங்குடல் வாய் சுவரில் எண்ணிலடங்கா பாக்டீரியா உள்ளன. உணவு எச்சத்துடன் இங்கே இருக்கும் நல்ல பாக்டீரியா ஒன்றாகச் சேர்ந்து, பெருங்குடல் வாய் சுவர்களின் வழியாக, புவியீர்ப்பு விசைக்கு எதிராக ஏறுமுகமாகப் பெருங்குடலின் அடுத்த பகுதிக்குச் செல்லும்.

குடல்வால்


நமது உடலில் குடல்வால் இருப்பதற்கான அவசியம் என்ன என்பது குறித்து பஞ்சாயத்து ஓடிக்கொண்டிருக்கிறது. பச்சைமிளகாய் அளவுக்கு இருக்கும் இந்தக் குடல்வாலுக்குள் ஏகப்பட்ட நல்ல பாக்டீரியா இருப்பதாகவும், காய்ச்சல் போன்ற பாதிப்புகள் வரும்போது, இந்த நல்ல பாக்டீரியா மூலம் நமது உடலுக்கு நோய் எதிர்ப்புச் சக்தி கிடைப்பதாகவும் பல மருத்துவ வல்லுநர்கள் கருத்துத் தெரிவித்திருக்கின்றனர். ஆனால், குடல்வால் அறுவைசிகிசிச்சை செய்ய வேண்டிய நிலை வந்தால், தாராளமாக அகற்ற வேண்டியதுதான் நல்லது. ஏனெனில், குடல்வால் இல்லை என்றாலும், பெருங்குடல் மற்றும் சிறுகுடலில் இருக்கும் பாக்டீரியாவே நோய் எதிர்ப்புச் சக்திக்குத் துணைபுரியும்.

ஏறுமுகக் குடல்

பெருங்குடல்வாயில் இருந்து நேராக மேற்புறமாக எட்டு இன்ச் நீளத்துக்கு இருப்பது ஏறுமுகக் குடல். பொதுவாக, உணவில் 90 சதவிகித சத்துக்கள் சிறுகுடலிலேயே உறிஞ்சப்பட்டுவிடும். சிறுகுடலில் இருந்து வரும் எச்ச திரவ உணவில், செரிக்க முடியாத  வைட்டமின் கே, பி1, பி2, பி12 போன்றவை இருக்கும். இந்தச் சத்துக்கள் அனைத்தும் பெருங்குடல் பாக்டீரியாவுக்கு உணவாக மாறுகின்றன. எச்ச திரவ உணவில் இருக்கும் நீரையும் பெருங்குடல் சுவர் உறிஞ்சிவிடும். பெருங்குடல் சுவர் மூலமாக நீர் நமது உடலுக்கு மறுசுழற்சி செய்யப்படுகிறது. தண்ணீரும் சத்துக்களும் உறிஞ்சப்பட்ட பிறகு, ஓரளவு திட நிலையில் கழிவுப் பொருட்கள் மாற்றப்பட்டு, பெருங்குடலின் அடுத்த பகுதிக்கு அனுப்பப்படும். பெருங்குடலின் இந்தப் பகுதி ஒழுங்காக வேலை செய்யவில்லை எனில், மலத்தில் திரவம் அதிகமாக இருக்கும். ஒருநாளைக்கு சிறுகுடலில் இருந்து சராசரியாக இரண்டு லிட்டர் திரவம் அனுப்பப்பட்டால், அதை வெறும் 200 மி.லி ஆக மாற்றிவிடும் வல்லமை படைத்தது பெருங்குடல்.

ஹெப்பாடிக் வளைவு மற்றும் குறுகிய குடல்

ஏறுமுகக் குடல் கல்லீரலை நோக்கிச் செல்லும், இந்த இடத்தில் கல்லீரலைப் பெருங்குடல் தொந்தரவு செய்யாமல் இருப்பதற்காக, ஒரு வளைவு இருக்கும். இதைத்தான் ஹெப்பாடிக் வளைவு என்கிறார்கள். ஏறுமுகமாக இருக்கும் பெருங்குடலின் பகுதியைத் தாண்டி அடுத்து இருப்பது, வலது பக்கத்தில் இருந்து இடது புறமாகச் செல்லும் குறுகிய குடல். இது, கிட்டத்தட்ட 46 செ.மீ நீளம் இருக்கும். இதுவும், மிஞ்சிய நீரை உறிஞ்சி, கழிவுப் பொருட்களை வெளியேற்றும் வேலையைத்தான் செய்கிறது. பெருங்குடலில் இருக்கும் தசைகள் சுருங்கி விரிந்து, மெள்ள மெள்ள கழிவுகளை அடுத்த பகுதிக்குத் தள்ளும். இந்தப் பகுதியில் இருக்கும் தசைகளில் ஏதாவது பிரச்னை ஏற்பட்டால், கழிவுப் பொருட்களை வெளியேற்றும் ‘ஆட்டோமேட்டிக் மெக்கானிசம்’ பாதிக்கப்படும்.

இனி எல்லாம் சுகமே - 17

இறங்குமுகக் குடல்

குறுக்குவாட்டில் வரும் குடல் பகுதி, மண்ணீரல் மீது மோதாமல் இருக்கவே மண்ணீரல் வளைவு இருக்கிறது. இந்த வளைவுக்குப் பிறகு, குடல் கீழ்நோக்கி இறங்கும். இதன் நீளம் 25 செ.மீ. இந்தப் பகுதியிலும் கொஞ்சம் நீர், வைட்டமின் உறிஞ்சப்படுகின்றன. இங்கே இருக்கும் பல பில்லியன் பாக்டீரியா, கழிவுகளை நொதித்து, இன்னும் திடமாக மாற்றி, அடுத்த பகுதிக்கு அனுப்பும்.

நெளிவுக்குடல்


பெருங்குடலின் மிக முக்கியமான பகுதி இதுதான். கழிவுகளின் சேமிப்புக் கிடங்கு இந்தப் பகுதி. வளைவாக எஸ் போன்று இருப்பதால், இதற்கு சிக்மாய்டு குடல் எனப் பெயர் வந்தது. இந்தக் குடலுக்கு பிரத்யேக நரம்புகள் மற்றும் ரத்தநாளம் உண்டு. சிக்மோடோஸ்கோப்பி எனும் பரிசோதனை மூலம் இந்தப் பகுதியை ஆராயலாம். பெருங்குடல் புற்றுநோயைத் தடுப்பதற்கு இந்த நெளிவுக்குடல் உதவுகிறது. நெளிவுக்குடலில் ஏதேனும் கட்டிகள் வளர்வது தெரிந்தால், சிக்மோடோஸ்கோப்பி மூலம் அறிந்து, அவற்றை உரிய சிகிச்சை மூலம் அகற்றிவிட முடியும்.

மலக்குடல்

மலக்குடல் ஒரு மலக்கிடங்கு. மூளைக்கும் மலக்குடலுக்கும் நேரடித் தொடர்பு உண்டு. நமது மூளையில் இருந்து சிக்னல் சென்று, மலக்குடல் இருக்கும் பகுதியில் அழுத்தம் உண்டாக்கும். அப்போதுதான், மலம் கழிக்க வேண்டும் என்ற உணர்வு ஏற்படும்.

ஆசன வாய்

செரிமான மண்டலத்தின் கடைக்கோடி உறுப்பு. ஆசன வாய் வழியாகத்தான் மலம் வெளியேறுகிறது. இதில், இரண்டு விதமான வால்வுகள் இருக்கின்றன. இந்த வால்வுகள் மனிதனின் உணர்வுகளைப் புரிந்துகொண்டு அதற்கு ஏற்ப திறந்து, மூடும். பெருங்குடலில் கழிவை பாக்டீரியா நொதிப்பதால், கிட்டத்தட்ட தினமும் 10 லிட்டர் வாயுக்கள் உற்பத்தி செய்யப்படும். அவற்றில், சிறிதளவு தினமும் 10-20 முறை மனிதனுக்குத் தெரிந்தோ தெரியாமலோ வெளியேறும். வாயுக்கள் வெளியேற வேண்டிய நிலை இருந்தால், மனிதன் விரும்பினால் கட்டுப்படுத்த முடியம். அதேபோல, மலம் எது, வாயு எது எனப் பிரித்தறியும் திறன் கொண்ட உணர்வு உள்ள வால்வு கொண்டதும் ஆசன வாய்தான்.

பெருங்குடல் பகுதியில் ஏற்படும் தொந்தரவுகளில் மிக முக்கியமானது பெருங்குடல் புற்றுநோய், உணவு உண்டதும் மலம் கழிக்கும் பிரச்னை (ஐ.பி.எஸ்). இதுதவிர மூலம், மலச்சிக்கல் என சில பிரச்னைகள் உள்ளன. அவை ஏன் வருகின்றன, அவற்றுக்கு என்னதான் தீர்வு என்பது குறித்து அடுத்தடுத்துப் பார்ப்போம்.

- தொடரும்