Published:Updated:

இனி எல்லாம் சுகமே - 20

இனி எல்லாம் சுகமே - 20
பிரீமியம் ஸ்டோரி
இனி எல்லாம் சுகமே - 20

செரிமானம் அறிவோம்!

இனி எல்லாம் சுகமே - 20

செரிமானம் அறிவோம்!

Published:Updated:
இனி எல்லாம் சுகமே - 20
பிரீமியம் ஸ்டோரி
இனி எல்லாம் சுகமே - 20
இனி எல்லாம் சுகமே - 20

“நல்லது செய்யாவிட்டாலும் பரவாயில்லை, உபத்திரவம் கொடுக்காமல் இருந்தால் போதும்” எனச் சொல்வார்கள். இந்த வாக்கியம் பித்தப்பைக்கு அப்படியே பொருந்தும். கல்லீரலுக்குக் கீழே பேரிக்காய் வடிவில் இருக்கிறது பித்தப்பை. சுமார் நான்கு இன்ச் அளவில் இருக்கும் இந்த உறுப்பு செரிமானத்துக்கு உதவக்கூடியது. மிகவும் முக்கியமானது.  பித்தப்பை ஒழுங்காகச் செயல்பட்டால் மட்டுமே உடலில் இருக்க வேண்டும். இல்லையெனில், அறுவைசிகிச்சை செய்து அகற்ற வேண்டியதுதான். உலகில் அதிகம் செய்யப்படும் அறுவைசிகிச்சைகளில் பித்தப்பை நீக்க அறுவைசிகிச்சையும் ஒன்று.

பித்த நீரின் முக்கியத்துவத்தை நம் முன்னோர்கள் அப்போதே உணர்ந்து வைத்திருந்தார்கள். அதனால்தான் வாதம், கபம், பித்தம் என மூன்றையும் வைத்து உடல்நிலையைக் குறிப்பிட்டு, மருத்துவம் பார்த்தார்கள்.

சரி, பித்தப்பையின் வேலை என்ன?

கல்லீரலில் பித்த நீர் உருவாகிறது. இது சேமிக்கப்படும் இடம்தான் பித்தப்பை. நாம் சாப்பிடும் உணவு, இரைப்பையில் அரைக்கப்பட்டுக் கூழாக, சிறுகுடலின் டியோடினத்துக்கு வருகிறது. உணவில் இருக்கும் மாவுச்சத்து, புரதச்சத்து, கொழுப்புச்சத்து ஆகியவற்றைப் பொறுத்து, உடனடியாக கணையத்தில் இருந்து என்சைம்கள் சுரந்து, டியோடினத்தில் விழும். உணவில் உள்ள கொழுப்பை செரிமானம் செய்ய, கோலிசிஸ்டோகைனின் என்ற ஹார்மோன் உடனடியாகச் சுரந்து, ‘கொழுப்பு வந்தாச்சு, பித்த நீரை வெளியிட வேண்டும்’ என மூளைக்கு தகவல் செல்லும். மூளையில் இருந்து உத்தரவு வந்ததும், பித்தப்பையில் இருந்து தேவையான பித்த நீர் வெளிப்பட்டு, பித்தநாளம் வழியாக டியோடினத்துக்கு வரும். கொழுப்பு தண்ணீரில் கரையாது என்பதால், பித்த நீரில் இருக்கும் உப்புகளால் உறிஞ்சப்பட்டு, சிறுகுடலில் செரிமானம் ஆகிறது. பித்த நீர் உற்பத்தி செய்யப்படாவிட்டாலோ, பித்தப்பையில் ஏதாவது கோளாறு ஏற்பட்டு, பித்தநீர் சரியாக வெளிவராவிட்டாலோ சிக்கல்தான். செரிமானம் தடைப்படுவதுடன் பித்தப்பையில் கற்களும் உருவாகும்.

இனி எல்லாம் சுகமே - 20

ஒட்டுமொத்த விகடனுக்கும் ஒரே ஷார்ட்கட்!

பித்தப்பை கற்கள்

கல்லீரலில் தினமும் சுமார் ஒன்று முதல் ஒன்றரை லிட்டர் பித்தநீர் உற்பத்தியாகிறது. இந்தப் பித்த நீர் அடர்த்தியாகி, பித்தப்பையில் தேங்குகிறது. தேவையான அளவுக்குக் கொழுப்புச்சத்துள்ள உணவை எடுக்காவிட்டால், பித்தநீர் பித்தப்பையிலேயே தேங்கிவிடும். இது பிறகு கற்களாக உருவாகலாம். பித்தப்பையில் வீக்கம்,  தலசீமியா நோய், பிளிரூபின் அதிகமாக இருப்பது போன்ற காரணங்களாலும் பித்தப்பைக் கற்கள் உருவாகலாம். பித்தப்பைக்குள் இருக்கும் தசைகளில் எங்கேயாவது பித்தப்பைக் கற்கள் மாட்டிக்கொண்டும் பெரிதாகலாம்.

சர்க்கரை நோயாளிகள், ஹார்மோன் சமச்சீரின்மைப் பிரச்னை, வேகமாக உடல் எடையைக் குறைப்பவர்களுக்கு பித்தப்பைக் கற்கள் உருவாகலாம். மரபியல்ரீதியாக வருவதற்கு வாய்ப்பு இருப்பதால், சந்ததியில் யாருக்காவது பித்தப்பைக் கல் பாதிப்புகள் இருந்தால், கவனமாக இருக்க வேண்டியது அவசியம்.

பித்தப்பைக் கற்களில் இரண்டு வகைகள் உள்ளன. சில கற்கள் வலியை ஏற்படுத்தும்; சில கற்கள் வலியைத் தராது. மாஸ்டர் ஹெல்த் செக்அப் போன்று ஏதாவது பரிசோதனை செய்து கொள்ளும்போதுதான் தெரியவரும். நெல்லிக்காய் அளவில் இருந்து கொய்யாக்காய் அளவுக்குக்கூட கற்கள் இருக்கலாம்.

பித்தப்பை கல் அறிகுறிகள்

சாப்பிட்டு, மூன்று முதல் நான்கு மணி நேரத்துக்குள் மேல் வயிற்றில் வலி ஏற்படுகிறது என்றால், பித்தப்பையில் பிரச்னை எனப் புரிந்துகொள்ளலாம். பித்தப்பையில் கற்கள் என்ற விஷயத்தைக் கேள்விப்பட்டால் பலரும் கேட்கும் கேள்வி, “மருந்து கொடுத்து பித்தப்பைக் கற்களைக் கரைக்க முடியாதா, டாக்டர்? பித்தப்பையை அகற்றியே ஆக வேண்டுமா?”  என்பதுதான். பித்தப்பை மிகவும் மென்மையானது, அறுவைசிகிச்சை செய்து மீண்டும் அதைத் தைக்க முடியாது என்பதால், கல்லை அகற்றும் அறுவைசிகிச்சை நடந்ததே இல்லை. மருந்து கொடுத்துப் பித்தப்பைக் கற்களைக் கரைக்க முடியாது. பித்தப்பையில் கற்கள் இருந்தாலும், வலி வராத வரை பிரச்னை இல்லை. ஆனால், வலி வந்தாலோ, வாந்தி, உடற்சோர்வு, பசியின்மை உள்ளிட்ட விஷயங்கள் ஏற்பட்டாலோ பித்தப்பையை அகற்றுவதே நல்லது. லேப்ராஸ்கோப்பி அறுவைசிகிச்சை மூலம் பித்தப்பையை எளிதில் அகற்றிவிடலாம்.

பித்தப்பைக் கற்களில் சிக்கலான ஒருவகைக் கற்கள் உண்டு. இவை, பித்தப்பையை வீங்கச்செய்துவிடும். மேல் வயிற்றில் இருந்து வலி பரவி, நெஞ்சுப் பக்கமாக வலிக்கும். பலர் இதை நெஞ்சு வலி என நினைத்து பதறியடித்து, அவசர சிகிச்சைப் பிரிவுக்குச் செல்வார்கள். ஆனால், பரிசோதனை செய்தால் இதயத்தில் எந்தப் பிரச்னையும் இருக்காது. பித்தப்பைக் கற்களால் உண்டான வலி என்பது பிறகுதான் தெரியும்.

‘பித்தப்பையை அகற்றினால், பித்த நீர் என்னாவது? அசைவம் சாப்பிட முடியாதே’ எனப் பலர் வருத்தப்படுவார்கள். அந்தக் கவலையே வேண்டாம். கல்லீரலில் இருந்து பித்த நீர், பித்தக்குழாய் வழியாக நேரடியாகச் சிறுகுடலுக்குச் செல்லும். எனவே, அசைவம் சாப்பிட முடியாதே என்ற கவலை வேண்டாம்.

அறுவைசிகிச்சைக்குப் பிறகும் ருசியான சாப்பாட்டை அளவோடு, மருத்துவர் பரிந்துரைப்படி சாப்பிடலாம். வலி இருந்தும் அகற்றாமல் வைத்திருந்து, சிலர் நாட்டுமருந்து என எதையாவது சாப்பிட்டுவிடுகிறார்கள். அப்போது பித்தப்பைக் கற்கள் கணையத்தைத் தாக்கினாலோ, பித்தப்பையில் பொத்துக்கொண்டாலோ, பெரிய பிரச்னை ஆகிவிடும். கவனமாக இருங்கள்.

இனி எல்லாம் சுகமே - 20

பித்தப்பை குழாய் 

பித்தப்பைக் குழாயில் பித்தப்பைக் கற்கள் வந்தால், உடனடி சிகிச்சை அவசியம். பிரசவ வலிக்குப் பிறகு மிக மோசமான வலி எதுவென்றால், அது பித்தப்பைக் குழாயில் கற்கள் மாட்டிக்கொண்டு அவதிப்படுவதுதான். சில சமயம், பித்தக்குழாயில் கற்கள் அடைத்துக்கொண்டால், மஞ்சள்காமாலை ஏற்படும். இந்த மஞ்சள் காமாலையை எந்த மருத்துவத்தாலும் குணப்படுத்த முடியாது. கற்களை உடனே அகற்ற வேண்டும். மஞ்சள் காமாலையில் பல வகைகள் இருப்பது தெரியாமல், தவறான சிகிச்சையை எடுத்துக்கொண்டால், உயிருக்கேகூட ஆபத்து ஏற்படலாம். பரிசோதனை செய்து, எதனால் பிரச்னை ஏற்படுகிறது என்ற மூல காரணத்தைக் கண்டறிந்து, அதற்கான சிகிச்சை எடுப்பதுதான் புத்திசாலித்தனம்.

பித்தக் குழாயில் கற்கள் ஏற்பட்டால், சில சமயம் கிருமித்தொற்று ஏற்படவும் வாய்ப்பு உள்ளது. சிறுகுடலில் இருக்கும் கிருமிகள் மேலே பித்தக் குழாய்க்குள் சென்று, பாதிப்பை ஏற்படுத்தும். இதனை, அசெண்டிங் கொலாஞ்சிடிஸ் (Ascending Cholangitis) என்பர். இந்தக் கோளாறு ஏற்பட்டால், அடுத்தடுத்து செப்டிசீமியா உள்ளிட்ட பிரச்னைகள் வரக்கூடும். இதனால், கல்லீரல்கூட  பாதிக்கப்படலாம். பித்தக்குழாயில் ஏதாவது பிரச்னை என்றால், வாய் வழியாக எண்டோஸ்கோப்பி கருவியைச் சிறுகுடல் வரை செலுத்தி, அங்கிருந்து ஒரு சின்ன ஒயர் மூலமாக பலூன் அனுப்பி, கற்களை அகற்ற முடியும். எனவே, பயம் வேண்டாம்.

பித்தப்பைக் கற்களால் மஞ்சள்காமாலை, கணைய அழற்சி, கடுமையான வலி என மூன்றில் எது வேண்டுமானாலும் வரலாம். ஒவ்வொருவருக்கும் பிரச்னை ஒவ்வொரு விதமாக இருக்கும். எனவே, மருத்துவமும் அதற்கேற்ப மாறுபடும்.

பித்தப்பை புற்றுநோய்

பித்தப்பைக்கு அல்ட்ரா சவுண்டு பரிசோதனை நல்லது. இந்தியாவில் பித்தப்பை புற்றுநோய் மிக அரிது. பயப்பட வேண்டாம். இப்போது, ஸ்கேன் பரிசோதனைகள் மூலமாகக் கற்களுக்கு முந்தைய பாலிப் கட்டிகளைக் கண்டுபிடிக்கும் வசதி வந்துவிட்டது. பாலிப் கட்டிகளின் அளவைப் பொறுத்து, தேவைப்பட்டால் முன்கூட்டியே சிகிச்சை எடுத்துக்கொள்ளலாம்.

பித்தப்பைக் கற்கள் உருவாகாமல் தடுக்க வேண்டும் என்றால், அதிக கொழுப்பு உள்ள உணவுகளையும் சிப்ஸ் முதலான நொறுக்குத்தீனிகளையும் கூடுமானவரை தவிர்த்திடுங்கள். தினசரி சமச்சீரான உணவைச் சாப்பிட்டு வந்தால்,  இந்தப் பிரச்னை வராமல் தடுக்கலாம்.

- தொடரும்

நான்கு ‘எஃப்’ ரிஸ்க்

இனி எல்லாம் சுகமே - 20

பித்தப்பை கற்கள் வருவதற்கான வாய்ப்பை ‘4 எஃப் ரிஸ்க்’ (4F Risk) என்பர்.

ஃபேட் (Fat) - அதிக கொழுப்பு மற்றும் உடல் பருமனானவர்கள்.

ஃபெர்ட்டிலிட்டி (Fertility) - அதிக குழந்தை  பெற்றவர்கள்,  கருவுறுதல் பிரச்னை இருப்பவர்கள்.

ஃபீமேல் (Female) - பெண்கள்.

ஃபார்ட்டி (Fourty) - 40 வயதைக் கடந்தவர்கள்.

இந்த நான்கு எஃப் பிரிவினருக்கு பித்தப்பைக் கற்கள் உருவாவதற்கான வாய்ப்பு அதிகம்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism