Published:Updated:

சர்க்கரையை வெல்லலாம் - 21

சர்க்கரையை வெல்லலாம் - 21
பிரீமியம் ஸ்டோரி
சர்க்கரையை வெல்லலாம் - 21

சர்க்கரை நோய் - நம்பிக்கைகள் Vs உண்மைகள்நவம்பர் 14 - உலக சர்க்கரை நோய் விழிப்புஉணர்வு தினம்ஹெல்த்

சர்க்கரையை வெல்லலாம் - 21

சர்க்கரை நோய் - நம்பிக்கைகள் Vs உண்மைகள்நவம்பர் 14 - உலக சர்க்கரை நோய் விழிப்புஉணர்வு தினம்ஹெல்த்

Published:Updated:
சர்க்கரையை வெல்லலாம் - 21
பிரீமியம் ஸ்டோரி
சர்க்கரையை வெல்லலாம் - 21
சர்க்கரையை வெல்லலாம் - 21

21 -ம் நூற்றாண்டில், உலகின் மிகப் பெரிய தொற்றாநோயாக உருவெடுத்துவருகிறது சர்க்கரைநோய். ஒவ்வோர் ஆண்டும் சர்க்கரை நோயாளிகளின் எண்ணிக்கை அதிகரித்துக்கொண்டே போகிறது. கடந்த ஆண்டின் புள்ளிவிவரப்படி, உலக அளவில் 41.5 கோடி சர்க்கரை நோயாளிகள் உள்ளனர். 2040-ம் ஆண்டில் இது 64.2 கோடியாக அதிகரித்துவிடும். அதாவது, உலகில் பத்தில் ஒருவர் சர்க்கரை நோயாளியாக இருப்பார்.

சர்க்கரை நோயாளிகள் ஒருபக்கம் என்றால், உலகில் 31.8 கோடி பேர் சர்க்கரை நோய் ஏற்படக்கூடிய நிலையில் உள்ளனர். இவர்கள் முறையான சிகிச்சை, வாழ்க்கைமுறை மாற்றத்தைப் பின்பற்றவில்லை எனில், இவர்களுக்கு விரைவிலேயே சர்க்கரைநோய் வந்துவிடும் ஆபத்து உள்ளது. ஆனால், தங்களுக்கு இந்த பாதிப்பு இருக்கிறது என்பதையே அறியாமல் இவர்கள் இருக்கிறார்கள் என்பதுதான் அதிர்ச்சியான விஷயம்.

இந்தியாவில் 6.9 கோடி பேர் சர்க்கரை நோயாளிகள். இது 2040-ம் ஆண்டில் 12.3 கோடியாக அதிகரிக்கும் எனக் கணிக்கிடப்பட்டுள்ளது. சர்க்கரை நோயாளிகளின் எண்ணிக்கை அதிகரிக்க, போதிய விழிப்புஉணர்வு இல்லை என்பதே முக்கியக் காரணமாக இருக்கிறது. அனைவரிடமும் சர்க்கரைநோய் பற்றிய விழிப்புஉணர்வைக் கொண்டு சேர்ப்பதன் மூலம், சர்க்கரை நோயாளிகளின் எண்ணிக்கையைக் குறைக்க முடியும்.

சர்க்கரையை வெல்லலாம் - 21

ஒட்டுமொத்த விகடனுக்கும் ஒரே ஷார்ட்கட்!

நம்பிக்கை: சர்க்கரை நோய் ஒரு தீவிர பாதிப்பை ஏற்படுத்தும் நோய் அல்ல.

உண்மை நிலை: இது தவறான கருத்து. சர்க்கரை நோய் பாதிப்பால் இறப்பவர்களின் எண்ணிக்கையில் மார்பகப் புற்றுநோய், எய்ட்ஸ் நோயால் இறப்பவர்களின் எண்ணிக்கையில் பாதிதான். ஒருவருக்குச் சர்க்கரைநோய் இருந்தால், அவருக்கு மாரடைப்பு வருவதற்கான வாய்ப்பு இரட்டிப்பாகிறது. அதுபோல், உடலின் ஒவ்வோர் உறுப்பையும் பாதித்து உயிரிழப்பு, உடல்நலக் குறைவுக்கான வாய்ப்பை அதிகரிக்கச் செய்கிறது சர்க்கரைநோய். எனவே, இதை ஒரு சாதாரண பாதிப்பு என்று கருதி ஒதுக்கிவிட முடியாது. ஆனால், சர்க்கரைநோயால் ஏற்படக்கூடிய சிக்கல்களைத் தவிர்த்து, ஆரோக்கியமான வாழ்க்கை வாழ முடியும் என்பது மகிழ்ச்சியான செய்தி.

நம்பிக்கை: அதிக அளவில் சர்க்கரை சாப்பிடுவதால் சர்க்கரை நோய் ஏற்படுகிறது.

உண்மை நிலை:
டைப் 1 சர்க்கரைநோய் மரபியல் ரீதியாக ஏற்படலாம். சிலருக்கு எதனால் ஏற்பட்டது என்றேகூடக் கண்டறிய முடிவதில்லை. டைப் 2 சர்க்கரைநோயை ஏற்படுத்துவதில், மரபியல் மற்றும் வாழ்க்கைமுறைக் காரணிகள் முக்கியப் பங்கு வகிக்கின்றன. உடல்பருமனாக இருப்பதும், உடல் எடை அதிகரிக்கக்கூடிய அதிக கலோரி கொண்ட உணவுகளை எடுத்துக்கொள்வதும்கூட டைப் 2 சர்க்கரைநோய்க்கான வாய்ப்பை அதிகரிக்கிறது. அதேபோல், சர்க்கரை அளவு அதிகமாக உள்ள உணவுகள், பானங்களை அருந்துவதும்கூட டைப் 2 சர்க்கரைநோயை ஏற்படுத்தலாம்.

சர்க்கரையை வெல்லலாம் - 21

நம்பிக்கை: என்னுடைய குடும்பத்தில் யாருக்கும் சர்க்கரைநோய் இல்லை. எனவே, நான் மிகவும் பாதுகாப்பாக இருக்கிறேன்.

உண்மை நிலை:
டைப் 2 சர்க்கரை நோய் ஏற்படுவதற்கான பல காரணிகளில், குடும்ப மரபியல் என்பது ஒன்று. ஆனால், அது மட்டுமே சர்க்கரைநோய் வருமா, வராதா என்பதை நிர்ணயிப்பது இல்லை.

உடல் உழைப்பு அற்ற வாழ்க்கைமுறை, அதிக கலோரி நிறைந்த உணவுகளை எடுத்துக்கொள்வது, அதிக மனஅழுத்தம், உடல்பருமன் ஆகியவை இருந்தால், யாருக்கு வேண்டுமானாலும் சர்க்கரைநோய் ஏற்படலாம்.

நம்பிக்கை:
சர்க்கரைநோய் அறிகுறிகள் எனக்குத் தெரியும். அறிகுறிகள் தென்படும்போது பார்த்துக்கொள்ளலாமே!

உண்மை நிலை: எல்லா நேரங்களிலும் இது சரியாக இருக்காது. சில நேரங்களில் அறிகுறிகள் மிகவும் தாமதமாகவே வெளிப்படும். சிலருக்கு எந்த அறிகுறியையும் வெளிப்படுத்தாமலேயே வந்துவிடும்.

நம்பிக்கை: சர்க்கரைநோய் உள்ள பெண்கள் கருத்தரிக்கக் கூடாது.

உண்மை நிலை:
சர்க்கரை அளவைக் கட்டுக்குள் வைத்திருப்பதன் மூலம் பெண், இயல்பான முறையில் கருத்தரிக்கவும் சுகப்பிரசவம் ஆகவும் வாய்ப்புகள் உள்ளன. இவர்களுக்குப் பிறக்கும் குழந்தையின் ஆரோக்கியமும் நன்றாகவே இருக்கும்.

நம்பிக்கை: கர்ப்பக் கால சர்க்கரைநோயைப் பெரிதாக எடுத்துக்கொள்ளத் தேவையில்லை. பிரசவத்துக்குப் பிறகு, அது தானாகவே மறைந்துவிடும்.

உண்மை நிலை:
பிரசவத்துக்குப் பிறகு சர்க்கரைநோய் மறைந்துவிடும் என்றாலும், கர்ப்பக் காலத்தில் ஏற்படக்கூடிய சர்க்கரைநோய், தாய்க்கும் குழந்தைக்கும் எதிர்காலத்தில் டைப் 2 சர்க்கரைநோய் ஏற்படுவதற்கான வாய்ப்பை அதிகரிக்கிறது. எனவே, கர்ப்பக் காலத்தில் சர்க்கரையின் அளவைக் கட்டுக்குள் வைத்திருப்பதன் மூலமே இந்தப் பாதிப்பைத் தவிர்க்க முடியும்.

சர்க்கரையை வெல்லலாம் - 21

நம்பிக்கை: சர்க்கரை நோயாளிகள் தங்கள் ரத்தத்தில் சர்க்கரை அளவின் ஏற்ற இறக்கங்களை உணர முடியும். இதனால் அடிக்கடி பரிசோதனை செய்துகொள்ளத் தேவையில்லை.

உண்மை நிலை: எப்போதும் இது சாத்தியமில்லை. சிலருக்கு ரத்தத்தில் சர்க்கரை அளவு குறைவது தெரியவே தெரியாது. இதனால், ஹைபோகிளைசீமியா பாதிப்பு ஏற்படலாம். இது மிகவும் ஆபத்தானது. மேலும், சர்க்கரை அளவு குறைவதால் ஏற்படக்கூடிய அறிகுறிகள் சளி, ஃபுளு காய்ச்சலின்போதும் ஏற்படலாம். சர்க்கரை அளவு அதிகரித்ததால், அடிக்கடி சிறுநீர் வெளியேறும். சிறுநீர்ப்பாதையில் நோய்த்தொற்று இருந்தால்கூட அதிக அளவில் சிறுநீர் கழிக்கும் உணர்வு ஏற்படும். எனவே, இந்தக் குழப்பங்களைத் தவிர்க்க, அவ்வப்போது ரத்தப் பரிசோதனை செய்துகொள்வது நல்லது.

நம்பிக்கை: சர்க்கரை நோயாளிகள் இனிப்புகளைச் சாப்பிடக் கூடாது.

உண்மை நிலை: சர்க்கரை நோயாளிகள் இனிப்புகளை முற்றிலும் தவிர்க்க வேண்டும் என்றில்லை. சிறிய அளவில், வழக்கமான உணவுகளை எடுத்துக் கொள்வதுபோல இனிப்புகளையும் எடுத்துக்கொள்ளலாம். இது, உடனடியாகச் செரிமானம் ஆகி ரத்தத்தில் கலப்பதைத் தாமதப்படுத்தும். அதிக சர்க்கரை உள்ள குளிர்பானங்கள், உணவுகள் மிக எளிதில் செரிமானம் ஆகி, ரத்தத்தில் உடனடியாக அதிக அளவில் சர்க்கரை அளவை அதிகரிக்கச் செய்துவிடும்.

சர்க்கரையை வெல்லலாம் - 21

நம்பிக்கை: சர்க்கரை நோயாளிகளுக்கென உள்ள பிரத்யேக உணவுப் பழக்கத்தைத்தான் பின்பற்ற வேண்டும்.

உண்மை நிலை: அனைவருக்கும் ஏற்ற ஆரோக்கியமான உணவுப் பழக்கத்தையே சர்க்கரை நோயாளிகளும் பின்பற்றலாம். அதாவது, அதிக அளவில் முழு தானியங்கள், காய்கறிகள், பழங்களைச் சேர்த்துக்கொள்ளலாம். கொழுப்பு மற்றும் அதிக சுத்திகரிக்கப்பட்ட சர்க்கரையை எடுத்துக்
கொள்வதைக் குறைக்க வேண்டும். பொதுவாக, சர்க்கரை நோயாளிகளை வண்ணமயமான உணவுகளை எடுத்துக்கொள்ளச் சொல்வோம். அதாவது கீரைகள், காய்கறிகள், பழங்கள்! வெள்ளையானதைத் தவிர்க்கச் சொல்வோம். அதாவது, அரிசி, மைதா, சர்க்கரை உள்ளிட்டவை.

சர்க்கரையை வெல்லலாம் - 21

நம்பிக்கை: சர்க்கரை நோயாளிகளுக்கு கார்போஹைட்ரேட் மிகவும் கெடுதலானது.

உண்மை நிலை: ஆரோக்கியமான டயட் முறையில் கார்போஹைட்ரேட்டும் இடம் பெறும் என்பதால், மொத்தத்தில் கார்போஹைட்ரேட் என்றாலே தவறு என்று ஒதுக்கிவிட முடியாது. பட்டை தீட்டப்பட்ட, ப்ராசஸ் செய்யப்பட்ட கார்போஹைட்ரேட்டைத் தவிர்க்க வேண்டும். இயற்கை வடிவில் கிடைக்கும் கார்போஹைட்ரேட்டில் நார்ச்சத்து, வைட்டமின்கள், தாதுஉப்புக்கள் நிறைவாக உள்ளன. எனவே, நல்ல கார்போஹைட் ரேட்டைத் தேர்ந்தெடுத்துச் சாப்பிட வேண்டும்.

சர்க்கரையை வெல்லலாம் - 21

நம்பிக்கை: சர்க்கரை நோயாளிகள் உடல் எடையைப் பெருமளவு குறைத்தாலே போதும், சர்க்கரைநோய் பாதிப்பு குறையும்.

உண்மை நிலை: உடல் எடையில் ஏழு சதவிகிதம் அளவுக்குக் குறைத்தாலே நல்ல பலனைப் பெறலாம். அதாவது, 70 கிலோ எடை கொண்ட ஒருவர் 5 கிலோ குறைத்தாலே போதும்.

நம்பிக்கை:
இன்சுலின் எடுத்துக்கொள்ளும் நிலையில் உள்ள சர்க்கரை நோயாளிகள் மிகவும் ஆபத்தான நிலையில் இருக்கிறார்கள் என்று அர்த்தம்.

உண்மை நிலை:
அப்படியல்ல! சர்க்கரைநோய் என்பது கொஞ்சம் கொஞ்சமாக முதிர்ச்சியடையும் பாதிப்பு. அதனால், சிலருக்கு இன்சுலின் தேவைப்படலாம். இன்சுலின் பயன்படுத்துவதன் மூலம் சர்க்கரை அளவைக் கட்டுக்குள் கொண்டு வரலாம். இதனால், எதிர்காலத்தில் சிறுநீரகச் செயல் இழப்பு உள்ளிட்ட சிக்கல்கள் ஏற்படுவதைத் தவிர்க்க முடியும்.

- பா.பிரவீன்குமார்

படம்: சி.சுரேஷ் பாபு

டிப்ஸ்...

*சர்க்கரை அளவு சாப்பிடுவதற்கு முன் 80-110 மி.கி/டெசிலிட்டர் என்ற அளவிலும், சாப்பிட்டு இரண்டு மணி நேரம் கழித்து 120-140-க்குள்ளும் இருக்க வேண்டும்.

*தினசரி உடற்பயிற்சியும், 30 நிமிடங்களுக்கு நடைப்பயிற்சியும் செய்யலாம்.

*உடல் எடை குறைப்பு, உப்பைக் குறைத்துக்கொள்வது, மனஅழுத்தத்தைத் தவிர்ப்பதன் மூலம் ரத்த அழுத்தத்தைக் கட்டுப்படுத்தலாம்.

*போதுமான அளவு தூக்கமும் ஓய்வும் தேவை.

*எங்கே செல்வதாக இருந்தாலும், எந்த வகையான சர்க்கரைநோய், என்ன மருந்து, எவ்வளவு எடுத்துக்கொள்கிறீர்கள் என்கிற விவரம் அடங்கிய அட்டையைக் கையில் வைத்திருக்க வேண்டும்.

*டாக்டரின் பரிந்துரைக்கு ஏற்ப மருத்துவப் பரிசோதனை செய்துகொள்ள வேண்டும்.