Published:Updated:

ஸ்வீட் எஸ்கேப் - 22

ஸ்வீட் எஸ்கேப் - 22
பிரீமியம் ஸ்டோரி
News
ஸ்வீட் எஸ்கேப் - 22

சர்க்கரையை வெல்லலாம்

ஸ்வீட் எஸ்கேப் - 22

வ்வொரு மாதமும் கர்ப்பிணிகளுக்கு ரத்தத்தில் உள்ள சர்க்கரை அளவை தெரிந்துகொள்ள பரிசோதனை மேற்கொள்ளப்படும். அப்படித்தான், அனிதாவுக்கும் செய்யப்பட்டது. ஆறு மாதங்கள் வரை, சர்க்கரை அளவு நார்மல் என்றே வந்தது. ஏழாவது மாதம் செய்யப்பட்ட பரிசோதனையில், அவருக்கு கர்ப்ப கால சர்க்கரைநோய் வந்திருப்பது தெரியவந்தது. ``எனக்கு இதுவரை டயாபடீஸ் இல்லை. திடீரென்று எப்படி வந்தது? கர்ப்பப்பையில் குழந்தை நன்றாக வளரவும், பிரசவத்துக்குப் பிறகு குழந்தைக்குத் தாய்ப்பால் கொடுக்கவும் நன்றாகச் சாப்பிட வேண்டும் என்று சொல்வார்களே... எனக்கு சர்க்கரைநோய் வந்துவிட்டதால், சரியாகச் சாப்பிட முடியாதே!’’ என்று கவலைப்பட்டார்.

``கவலைப்பட வேண்டாம். இது கர்ப்ப காலத்தில் மட்டும் வரக்கூடிய சர்க்கரைநோய். பிரசவத்துக்குப் பிறகு நார்மல் ஆகிவிடும். பத்தில் ஒரு கர்ப்பிணிக்கு இது வரக்கூடியதுதான். அதனால், எச்சரிக்கையா இருந்தாலே போதுமானது. கவலைப்படத் தேவையில்லை” என்றேன்.

கர்ப்பிணிகளுக்கு ரத்தத்தில் சர்க்கரை அளவு அதிகரிப்பதை `கர்ப்ப கால சர்க்கரைநோய்’ (Gestational Diabetes Mellitus (GDM)) என்கிறோம். இதை, `சர்க்கரைநோய்’ என்று சொல்வதைவிட, `குளூக்கோஸ் ஏற்பில் சிறு குறைபாடு’ எனச் சொல்லலாம். கர்ப்பக் கால சர்க்கரைநோய் ஏற்படும் கர்ப்பிணிகளில் 90 சதவிகிதம் பேர் இதைக் கண்டறிவது இல்லை; அல்லது, கண்டறிந்தாலும், சரியான சிகிச்சை எடுத்துக்கொள்வது இல்லை. இதனால், தாய்க்கும் குழந்தைக்கும் பல்வேறு உடல்நலக் குறைபாடுகள், பிரசவக் கால சிக்கல்கள் ஏற்படுகின்றன. சரியான சிகிச்சை எடுக்காவிட்டால், இந்தப் பெண்களுக்கு எதிர்காலத்தில் சர்க்கரைநோய் ஏற்படுவதற்கான வாய்ப்பும் உள்ளது. இந்தியாவில், 10 முதல் 14.3 சதவிகித கர்ப்பிணிகளுக்கு கர்ப்ப கால சர்க்கரைநோய் ஏற்படுகிறது. இது மேற்கத்திய நாடுகளைவிட அதிகம்.

ஸ்வீட் எஸ்கேப் - 22

எப்படி ஏற்படுகிறது?

கர்ப்பக் காலத்தின் இரண்டாவது மற்றும் மூன்றாவது ‘மூன்று மாத’ காலத்தில் (Trimesters), அதாவது 4 முதல் 9-வது மாதம் வரை, பெண்ணின் உடலில் ஏராளமான ஹார்மோன் மாற்றங்கள் (நஞ்சுக்கொடியில் சுரக்கும் ஹார்மோனானது இன்சுலின் செயல்திறனைக் குறைக்கிறது) நடக்கின்றன. இந்தக் காலகட்டத்தில்தான், கர்ப்பிணிக்கு அதிக அளவில் இன்சுலின் தேவை ஏற்படுகிறது. இது பெண்ணின் இயல்பான இன்சுலின் தேவையைக் காட்டிலும் இரண்டு, மூன்று மடங்கு அதிகமாக இருக்கும்.

இன்சுலின் பயன்பாட்டைப் பற்றி நாம் பலமுறை படித்திருக்கிறோம். செல்களின் இயக்கத்துக்கு குளுக்கோஸ் தேவை. ரத்தத்தில் உள்ள குளுக்கோஸை செல்களுக்குள் சென்று சேர்க்கும் பணியை இன்சுலின் செய்கிறது. கர்ப்பிணியின் உடல், கர்ப்பக் காலத்தின் தேவைக்கு ஏற்ப இன்சுலினைச் சுரக்காதபோது, செல்களுக்கு குளுக்கோஸ் போய்ச் சேருவது இல்லை. இதனால், ரத்தத்தில் சர்க்கரை தேங்கிவிடுகிறது. கர்ப்பக் காலத்தில் போதுமான அளவில் சுரக்கவில்லை என்பது மட்டுமல்ல... இன்சுலினுக்கு எதிரான தன்மை காரணமாகவும் சர்க்கரைநோய் ஏற்படுகிறது. இதற்கு, அதிக உடல் எடை, முந்தைய கர்ப்பக் காலத்தில் ஏற்பட்ட சர்க்கரைநோய், தாய், தந்தைக்கு சர்க்கரைநோய் இருப்பது, பாலிசிஸ்டிக் ஓவரி சிண்ட்ரோம் பிரச்னை இருப்பது எனப் பல காரணங்கள் உள்ளன.

கண்டறிவது எப்படி?

தமிழ்நாடு அரசு, அனைத்து கர்ப்பிணிகளுக்கும் அவர்களின் முதல் மாத வருகையில் இருந்தே எளிய சர்க்கரைநோய் பரிசோதனை செய்து கொள்ள சில வழிகாட்டுதல்களை அளித்திருக்கிறது. மருத்துவமனை அல்லது ஆய்வுக் கூடத்தில், 75 கிராம் குளூக்கோஸை    நீரில் கலந்து அருந்தக் கொடுப்பார்கள். இரண்டு மணி நேரத்துக்குப் பிறகு எடுக்கும் ரத்தப் பரிசோதனை முடிவு  ≥140 mg/dL (140 அல்லது அதற்கு மேல்) என்ற அளவில் இருந்தால், அது கர்ப்ப கால சர்க்கரைநோய் என கண்டறியப்படும். இந்த பரிசோதனை மேற்கொள்ள வெறும் வயிற்றில் வர வேண்டிய தேவையும் இல்லை.

பாதிப்புகள்


கர்ப்ப கால சர்க்கரைநோய் பிரசவ காலச் சிக்கல்களுக்கு வழிவகுக்கும். இது கர்ப்பிணிக்கு, உயர் ரத்த அழுத்தம், வலிப்பு, நீண்ட பிரசவ வலி, பொய்யான பிரசவ வலி, சிசேரியன், பிரசவத்துக்குப் பிறகு ரத்தப்போக்கு, நோய்த்தொற்று போன்ற பிரச்னைகளை ஏற்படுத்தலாம். திடீர் கருச்சிதைவு (Spontaneous abortion), கர்ப்பப்பையிலேயே மரணம், குழந்தை இறந்து பிறத்தல், வளர்ச்சிக் குறைபாடு, தோள்பட்டை பிரச்னை மற்றும் காயங்களுடன் பிறத்தல், பால் சர்க்கரை நோய், சுவாச நோய் ஆகியவை ஏற்படலாம்.

தீர்வு

பெரும்பான்மையான கர்ப்ப கால சர்க்கரை நோயை உணவுப் பழக்கத்தின் மூலமாகவே கட்டுப்படுத்தலாம். கார்போஹைட்ரேட் அதிகம் உள்ள உணவுகளைத் தவிர்ப்பது, ஊட்டச்சத்து மிக்க உணவை மூன்று வேளையாக உட்கொள்வதற்கு பதில், ஆறு வேளையாக சிறிய உணவாகப் பிரித்து உண்பது, உடற்பயிற்சி செய்வது ஆகியவற்றின் மூலம் கர்ப்ப கால சர்க்கரைநோய் பாதிப்பில் இருந்து தப்பலாம்.

அப்படியும் சர்க்கரை அளவு கட்டுக்குள் வரவில்லை என்றால், அவர்களுக்கு மட்டும் இன்சுலினை, ஊசி மூலம் செலுத்த வேண்டியிருக்கும். கர்ப்ப கால சர்க்கரைநோய் காலத்தில், டாக்டர் பரிந்துரைத்த கால இடைவெளியில் ரத்தப் பரிசோதனை செய்து, ரத்தத்தில் சர்க்கரை அளவைக் கண்காணிக்க வேண்டும். சர்க்கரை அளவைக் கட்டுக்குள் வைத்திருப்பதன் மூலம் பிரசவ காலச் சிக்கல்களைத் தவிர்க்க முடியும்.

- தொடரும்

ஸ்வீட்டர்

கர்ப்ப காலத்தில் சர்க்கரை அளவைக் கட்டுக்குள் வைப்பதன் மூலம் தாய், சேய் இருவரின் ஆரோக்கியத்தையும் காக்கலாம்.

டயாபடீஸ் டவுட்

சரண்யா, சென்னை

``நான் இப்போது எட்டு மாத கர்ப்பமாக இருக்கிறேன். எனக்கு கர்ப்ப கால சர்க்கரைநோய் இருப்பதாக சொல்கின்றனர். இது என்னுடைய குழந்தைக்குப் பாதிப்பை ஏற்படுத்துமா?’’

``கர்ப்ப கால சர்க்கரைநோய் என்பது, கர்ப்ப காலத்தின் இறுதிப் பகுதியில் தாயின் ரத்தத்தில் சர்க்கரை அளவு கட்டுக்குள் இல்லாமல் போவது. சர்க்கரை அளவைக் கட்டுக்குள் வைப்பதன் மூலம் இதைத் தவிர்க்க முடியும்.

கட்டுக்குள் வைக்கவில்லை என்றால்தான் அது குழந்தையைப் பாதிக்கும். உங்களுக்கு இப்போது கர்ப்ப கால சர்க்கரைநோய் கண்டறிந்திருக்கிறார்கள் என்றால், உங்கள் கணையம் தேவையைப் பூர்த்தி செய்ய, அதிக அளவில் வேலை செய்து இன்சுலினைச் சுரக்கிறது. ஆனால், அது உங்கள் சர்க்கரை அளவைக் குறைக்கவில்லை. அதேநேரத்தில், குளூக்கோஸ், ஊட்டச்சத்துக்கள் குழந்தையை அடைவதுபோல, இன்சுலின் நஞ்சுக்கொடியைத் தாண்டி குழந்தையை அடைவது இல்லை. இதனால், உள்ளே சென்ற கூடுதல் குளூக்கோஸை எதிர்கொள்ள குழந்தையின் கணையம் அதிக இன்சுலினைச் சுரக்கிறது. குழந்தைக்குக் கூடுதல் குளூக்கோஸ் கிடைக்கும்போது, அது கொழுப்பாக மாற்றப்பட்டு, சேகரிக்கப்பட்டு, குழந்தையின் எடை அதிகரிக்கக் காரணமாகிவிடுகிறது.

இதுவே பிரசவத்தின்போது வெளிவர முடியாத சூழல் ஏற்பட்டு தோள்பட்டை காயம் ஏற்படக் காரணமாகிகிறது. மேலும், அதிக இன்சுலின் சுரப்பு காரணமாக, பிறக்கும்போது குழந்தைக்கு குளூக்கோஸ் அளவு குறைவாக இருக்கலாம். இதனால், சுவாசப் பிரச்னை ஏற்படலாம். குழந்தை வளர்ந்து பெரியவனாகும்போது உடல்பருமன், டைப் 2 சர்க்கரை நோய் ஏற்படவும் வாய்ப்புள்ளது. எனவே, நடைப்பயிற்சி, உணவுக் கட்டுப்பாடுகள் மூலம் சர்க்கரை அளவைக் கட்டுக்குள் வைத்திருந்து, ஆரோக்கியமான குழந்தையைப் பிரசவியுங்கள்.’’

பிரசவத்துக்குப் பிறகு

கர்ப்ப கால சர்க்கரை ஏற்பட்ட பெண்கள் பிரசவத்துக்குப் பிறகு ஆறு வாரங்கள் கழித்து கட்டாயம் குளூக்கோஸ் டாலரன்ஸ் பரிசோதனை செய்து, ரத்த சர்க்கரை அளவு இயல்புநிலைக்குத் திரும்பிவிட்டதா என்பதை உறுதி செய்துகொள்ள வேண்டும். பெரும்பாலான பெண்கள் இதை செய்ய தவறுவதால், ஓர் ஆண்டிலேயே அவர்களுக்கு சர்க்கரை நோய் ஏற்படுவதை காண்கிறோம்.