Published:Updated:

ஸ்வீட் எஸ்கேப் - 23

ஸ்வீட் எஸ்கேப் - 23
பிரீமியம் ஸ்டோரி
ஸ்வீட் எஸ்கேப் - 23

சர்க்கரையை வெல்லலாம்

ஸ்வீட் எஸ்கேப் - 23

சர்க்கரையை வெல்லலாம்

Published:Updated:
ஸ்வீட் எஸ்கேப் - 23
பிரீமியம் ஸ்டோரி
ஸ்வீட் எஸ்கேப் - 23
ஸ்வீட் எஸ்கேப் - 23

ர்க்கரை அளவு அதிகரித்தால் என்ன ஆகும், கட்டுக்குள் வைக்கவில்லை என்றால், உடலில் உள்ள ஒவ்வோர் உறுப்பும் எப்படிப் பாதிக்கப்படும் என்பதைப் பற்றிப் பார்த்தோம். இந்த இதழில், சர்க்கரை நோயாளிகள் மிகவும் அதிக அளவில் பயப்படும் முக்கிய விஷயமான சர்க்கரை அளவு குறைவதைப் பற்றிச் சொல்லப்போகிறேன். “சர்க்கரை குறைவதால், சர்க்கரை நோயாளிகள் சந்தோஷம்தானே அடைய வேண்டும்? ஏன் பயப்பட வேண்டும்?” என்று கேட்கலாம். தாழ்நிலைச் சர்க்கரையால் அவர்கள் அடையும் பாதிப்புகளைச் சொன்னால், என்ன பிரச்னைகள் வரும் என்பது புரியும்.

தாழ்நிலைச் சர்க்கரை என்றால் என்ன?

ரத்தத்தில் சர்க்கரை அளவு இயல்புநிலையைக் காட்டிலும் குறைவதைத் தாழ்நிலை சர்க்கரை என்கிறோம். சர்க்கரை நோயாளிகளுக்கு ரத்தத்தில் சர்க்கரை அளவு 70 மி.கி/டெ.லி என்ற அளவு அல்லது அதற்கும் கீழாகச் சென்றுவிடுவதைத் தாழ்நிலைச் சர்க்கரை என்கிறோம்.

அறிகுறிகள்

ரத்தத்தில் சர்க்கரை அளவு இயல்பைவிடக் குறையும்போது உடனடி மாற்றங்கள் ஏற்படும். அனைவருக்கும் ஒரே மாதிரியான அறிகுறிகள் வெளிப்படும் என்று இல்லை. நபருக்கு நபர் இது வேறுபடும். மிக லேசானது முதல் மிகத் தீவிரமான அறிகுறிகள்கூட வெளிப்படலாம். சில நேரத்தில் சிலருக்கு எந்த அறிகுறியும் ஏற்படாது.

மிக மோசமான அளவுக்குச் செல்லும்போது, சுயமாகச் சரி செய்துகொள்ள முடியாது. அந்த மாதிரியான சூழ்நிலையில் அருகில் உள்ளவர்களின் உதவி தேவைப்படும். அதனால், மிகத்தீவிர தாழ்நிலைச் சர்க்கரை அளவை அடைவது ஆபத்தானது. உடனடியாகச் சரிசெய்ய வேண்டியது. இந்தப் பிரச்னை பெரும்பாலும் டைப் 1 சர்க்கரை நோயாளிகளுக்கு அதிக அளவில் ஏற்படுகிறது.

என்ன காரணம்?


தாழ்நிலைச் சர்க்கரை ஏற்படுவதற்கு இன்சுலின் மற்றும் இதர சர்க்கரை நோயைக் கட்டுப்படுத்தும் மாத்திரைகள் எடுத்துக்கொள்வதுதான் காரணம். இந்த மருந்து, ஊசி எடுக்கும்போது, உடலில் அளவுக்கு அதிகமான இன்சுலின் இருக்கிறது. அது, ரத்தத்தில் உள்ள குளுக்கோஸை உடலின் செல்களுக்குக் கொண்டு சேர்த்துவிடுவதால், சர்க்கரை அளவு தாழ்நிலைக்கு வந்துவிடுகிறது. சில சர்க்கரை நோய்க்கான மாத்திரைகள் இந்தப் பிரச்னைக்குக் காரணம் என்பதால், அவ்வப்போது மருத்துவரை ஆலோசித்து, மாத்திரைகளை எடுத்துக்கொள்வது நல்லது.

சில உணவுகள், செயல்கள்கூட ஹைப்போகிளைசீமியா ஏற்படக் காரணமாகின்றன. அவை...

கார்போஹைட்ரேட் போதாமை


உணவில் கார்போஹைட்ரேட் எடுத்துக்கொள்ளும்போது, செரிமான மண்டலம் அதை குளுக்கோஸாக மாற்றி ரத்தத்தில் சேர்க்கிறது. இது, ரத்தத்தில் சர்க்கரை அளவை அதிகரிக்கச் செய்கிறது. போதுமான அளவு கார்போஹைட்ரேட் எடுத்துக்கொள்ளாமல், சர்க்கரையைக் கட்டுப்படுத்தும் மாத்திரை எடுக்கும்போது, அது ரத்தத்தில் சர்க்கரை அளவைக் குறைத்துவிடுகிறது. இதனால், ஹைப்போகிளைசீமியா ஏற்படுகிறது.

ஸ்வீட் எஸ்கேப் - 23

உணவைத் தவிர்த்தல்

உணவைத் தவிர்க்கும்போதும் நேரம் கழித்துச் சாப்பிடும்போதும் ரத்தத்தில் சர்க்கரை அளவு குறைந்துவிடுகிறது. நீண்ட நேரம் சாப்பிடாமல் தூங்கும் நேரத்தில்கூட தாழ்நிலைச் சர்க்கரை பிரச்னை ஏற்படலாம்.

அதிகப்படியான உடல் உழைப்பு

வழக்கமாகச் செய்வதைக் காட்டிலும் அதிக உடல் உழைப்பு, உடற்பயிற்சி மேற்கொள்ளும்போது சர்க்கரை அளவு குறைய ஆரம்பிக்கும். இது, அடுத்த 24 மணி நேரம் வரை தாக்கத்தை ஏற்படுத்தும்.

மது அருந்துதல்

ரத்தத்தில் சர்க்கரை அளவு சீராக இருப்பதை ஆல்கஹால் பாதிக்கிறது. சாப்பிடாமல் மது அருந்தினால் பாதிப்பு இன்னும் அதிகமாக இருக்கும். மது அருந்தியதால் ஏற்படும் பாதிப்புகளும் தாழ்நிலைச் சர்க்கரைப் பாதிப்புகளும் ஒரே மாதிரியாகத் தெரிவதால், ஹைப்போகிளைசீமியா மிகத்தீவிரமாக ஏற்படலாம்.

உடல்நலக் குறைவு

உடல்நலக் குறைவு இருக்கும்போது, போதுமான அளவு உணவு உட்கொள்வது இல்லை. இதனால், உடலில் ரத்தச் சர்க்கரை அளவு குறைந்துவிடும்.

ஹைப்போகிளைசீமியாவைத் தவிர்ப்பது எப்படி?

சில நேரங்களில், சர்க்கரை நோயாளிகளுக்கு தாழ்நிலைச் சர்க்கரை ஏற்பட்டிருப்பது தெரியாது. இந்த மாதிரியான சூழலில் இவர்கள் உடனடியாக ரத்தத்தில் சர்க்கரை அளவைக் கண்டறிந்து அதன்படி நடவடிக்கைகள் மேற்கொள்ள வேண்டும்.

ஹைப்போகிளைசீமியா பாதிப்பு வந்தவர்கள், தங்கள் மருத்துவரிடம் கேட்டு அவ்வப்போது ரத்தத்தில் சர்க்கரை அளவைக் கண்காணிக்க வேண்டும். குறிப்பிட்ட இடைவெளியில் தொடர்ந்து பரிசோதிக்கும்போது எப்போது ரத்த சர்க்கரை அளவு குறைகிறது என்பதைக் கண்டறிந்துவிடலாம்.
சீரான இடைவெளியில் உணவு உட்கொள்ளுதல்

மூன்று நேர உணவுப் பழக்கத்துக்குப் பதில், உணவைச் சிறிது சிறிதாகப் பிரித்து, ஆறு வேளையாகச் சாப்பிடலாம். அவ்வப்போது, ஆரோக்கியமான நொறுக்குத்தீனிகள் எடுத்துக்கொள்ளலாம். இதில், கார்போஹைட்ரேட் சரியான அளவில் இருக்க வேண்டும். இது, ரத்தத்தில் சர்க்கரையின் அளவை சமநிலையில் காக்கும்.

பாதுகாப்பான உடல் உழைப்பு

உடற்பயிற்சி மற்றும் உடல் உழைப்பு, ரத்தத்தில் சர்க்கரை அளவைக் குறைக்கச் செய்யும். எனவே, உடல் உழைப்புக்கு முன், உடல் உழைப்பின்போது, அதற்குப் பின் ரத்தத்தில் சர்க்கரை அளவைக் கண்காணிக்க வேண்டும். இதற்கு ஏற்ற வகையில் மாத்திரை எடுத்துக்கொள்வதை மாற்றியமைப்பது, கார்போஹைட்ரேட் எடுத்துக்கொள்வது போன்றவற்றைத் திட்டமிடலாம். உதாரணத்துக்கு, உடற் பயிற்சி செய்வதற்கு முன்பு நொறுக்குத்தீனி எடுத்துக்கொள் கிறீர்கள் என்றால், இன்சுலின் அளவைக் குறைத்துக் கொள்ளலாம். இதன்மூலம், ரத்தத்தில் சர்க்கரை அளவு மிக மோசமான அளவுக்குக் குறைவதைத் தடுக்க முடியும்.

மருத்துவரிடம் பேசுங்கள்!

ஹைப்போகிளைசீமியா ஏற்பட்டது என்றால் மருத்துவரிடம் தெரிவியுங்கள். அதற்கு ஏற்ப, உங்கள் மாத்திரை, மருந்துகளை அவர் மாற்றியமைப்பார். இதன்மூலம், ரத்தத்தில் சர்க்கரை அளவை இயல்புநிலையில் பராமரிக்கலாம். ஆரோக்கியமான சமச்சீரான உணவுமுறை, மாத்திரைகள், உடற்பயிற்சி செய்வது பற்றித் திட்டமிடுங்கள். இது, தாழ்நிலைச் சர்க்கரை உருவாவதைத் தடுக்கும்.

- தொடரும்

அறிகுறிகள்...

*சாதாரண நிலை முதல் நடுத்தர நிலை வரை

*நடுக்கம்

*வியர்வை

*பசி

*தலைவலி

*பார்வை மங்குதல்

*தூக்கம் அல்லது சோர்வு

*மயக்கம்

*குழப்பம்

*கவனிக்க முடியாத நிலை

*எரிச்சல் உணர்வு அல்லது பதற்றம்

*நடவடிக்கையில் மாறுதல்

*அதிவேக அல்லது சீரற்ற

*இதயத் துடிப்பு

*தீவிர தாழ்நிலை சர்க்கரை அறிகுறி

*சாப்பிட, அருந்த முடியாத  நிலை

*வலிப்பு

*சுயநினைவு இழத்தல்

ஸ்வீட்டர்

சர்க்கரை நோயாளிகள் எந்தக் காரணம் கொண்டும் உணவைத் தவிர்க்கக் கூடாது. குறிப்பாக, சர்க்கரை நோய்க்கு மாத்திரைகள் எடுப்பவர்கள் கவனத்துடன் இருக்க வேண்டும்.

டயாபடீஸ் டவுட்

எம்.குமாரசாமி, வேலூர்.


“நீண்ட நாட்களாக எனக்குச் சர்க்கரைநோய் உள்ளது. இதற்காக, டாக்டர் பரிந்துரைப்படி இன்சுலின் ஊசி மற்றும் மாத்திரைகள் எடுத்துவருகிறேன். ஆனால், சமீப காலமாகச் சர்க்கரை அளவு அடிக்கடி குறைகிறது. சர்க்கரை அளவு குறைவதைக் கட்டுப்படுத்த ஆலோசனை சொல்லுங்கள்.”

“தாழ்நிலைச் சர்க்கரையின் அறிகுறிகள் அடிக்கடி தென்பட்டால், உங்கள் ரத்தச் சர்க்கரை அளவைக் கண்காணியுங்கள். சர்க்கரை அளவு 70 அல்லது அதற்குக் கீழ் செல்லும்போது, கடைகளில் கிடைக்கும் குளுக்கோஸ் வாங்கி, தண்ணீரில் 15 மி.கி கலந்து பருகுங்கள். இல்லை எனில், குளுக்கோஸ் மாத்திரைகள் நான்கு எடுத்துக்கொள்ளலாம். அரைகப் ப்ரெஷ் ஜூஸ், ஒரு டேபிள்ஸ்பூன் சர்க்கரை, சிறிது உலர் திராட்சை என ஏதாவது ஒன்றை எடுத்துக்கொள்ளலாம். 15 நிமிடங்களுக்குப் பிறகு மீண்டும் ரத்தச் சர்க்கரையைப் பரிசோதனை செய்யுங்கள். இன்னும், ரத்தச் சர்க்கரை அளவு குறைவாக இருந்தால், மீண்டும் 15 மி.கி குளுக்கோஸ் எடுத்துக்கொள்ளுங்கள். அதன்பிறகு, 15 நிமிடங்கள் கழித்து மீண்டும் பரிசோதனை செய்து பார்க்க வேண்டும். ரத்தத்தில் சர்க்கரை அளவு இயல்புநிலைக்குத் திரும்பும் வரையில் இதைச் செய்ய வேண்டும்.

தாழ்நிலைச் சர்க்கரை ஏற்பட்ட உணர்வு உள்ளது; அடுத்த உணவு வேளைக்கு இன்னும் ஒரு மணி நேரம் இருக்கிறது என்றால், நொறுக்குத்தீனி எடுத்துக்கொள்ளுங்கள். அது, குளுக்கோஸ் அளவு இயல்புநிலையில் இருக்க உதவும். அதனால், ஆரோக்கியமான நொறுக்குத்தீனி அல்லது பழங்களைக் கையில் வைத்திருங்கள்.

மருத்துவரிடம் உங்கள் நிலையைப் பற்றி சொல்வதை வழக்கமாக வைத்திருங்கள். குறிப்பிட்ட இடைவெளியில் டாக்டரைச் சந்தித்து, ‘மருந்து, மாத்திரை எடுத்துக்கொள்வதில் ஏதேனும் மாற்றம் செய்ய வேண்டுமா’ என்பதைக் கேட்டுக்கொள்ளுங்கள்.

கல்லீரல், சிறுநீரகச் செயல் இழப்பு ஏற்பட்டவர்களுக்கு, தாழ்நிலைச் சர்க்கரை ஏற்பட வாய்ப்பு மிகமிக அதிகம். எனவே, ரத்தத்தில் சர்க்கரை அளவைக் கட்டுக்குள் வைப்பதற்கான வழியைப் பின்பற்ற வேண்டும். தாழ்நிலைச் சர்க்கரை ஏற்பட்டால், உடனே சிகிச்சை பெற வேண்டும். இது, மிக மோசமான விளைவுகள் ஏற்படுவதைத் தவிர்க்கும்.