Published:Updated:

ஸ்வீட் எஸ்கேப் - 24

சர்க்கரையை வெல்லலாம்

செய்திகளை உடனுக்குடன் தெரிந்துகொள்ள... இங்கே க்ளிக் செய்து இன்றே விகடன் ஆப் இன்ஸ்டால் செய்யுங்கள்!

பிரீமியம் ஸ்டோரி
ஸ்வீட் எஸ்கேப் - 24

“டாக்டர் எனக்கு இரண்டு, மூணு நாளா ஜலதோஷம், காய்ச்சல் இருந்தது. அதனால, இன்சுலின், சர்க்கரைநோய் மாத்திரை எடுத்துக்கலை. இதனால பிரச்னை ஒன்னும் இல்லையே?’’ என்று கேட்டார், என்னிடம் தொடர் சிகிச்சை பெற்றுவரும் நோயாளி ஒருவர்.

சர்க்கரைநோயுடன் வாழ்பவர்களுக்கு ஒவ்வொரு நாளுமே சவாலான நாளாக இருக்கிறது. சர்க்கரையைக் கட்டுக்குள்வைக்க மாத்திரைகள், இன்சுலின் ஊசி, உணவுக் கட்டுப்பாடு, உடற்பயிற்சி என வாழ்பவர்கள், ஏதேனும் உடல்நலக் குறைவு வந்தால் என்ன செய்வது என்று திக்குமுக்காடிவிடுவர். உடல்நலக் குறைவு உள்ள நாட்களில் சர்க்கரையைக் கட்டுக்குள்வைப்பது சற்று சிரமமான விஷயம்தான். சாதாரணக் காய்ச்சல், சளிப் பிரச்னை என்றால், எந்தக் கவலையும் இன்றி படுக்கைக்குச் சென்று ஓய்வு எடுக்கலாம். ஆனால், ஓய்வு எடுப்பது மட்டுமே நல்ல தீர்வு அல்ல. உடல்நலக் குறைவு அல்லது நோய்த்தொற்று ரத்தத்தில் சர்க்கரை அளவை கட்டுக்குள்வைப்பதில் சிக்கலை உருவாக்கிவிடுகிறது. எனவே, இவர்கள் விழிப்புடன் இருந்து நோயைக் குணப்படுத்துவதுடன், சர்க்கரை அளவும் கட்டுக்குள் இருப்பதை உறுதிசெய்ய வேண்டும். இல்லை எனில், சர்க்கரை அளவு அதிகரித்து, டயாபடீக் கீட்டோஅசிடோசிஸ் (Diabetic Ketoacidosis) என்ற நிலையை உருவாக்கிவிடும். ஆனால், இதைத் தவிர்க்க முடியும்.

ஸ்வீட் எஸ்கேப் - 24

உடல்நலக் குறைவின்போது என்ன நடக்கிறது?

உடல்நலக் குறைவு ஏற்படும்போது, அறிகுறிகள் வெளிப்படுவதற்கு முன்பே உடல் அதை எதிர்கொள்ளத் தயாராகிவிடுகிறது. இதைக் கண்டறிய எளிய வழி, எந்தக் காரணமும் இன்றி, சீரான முறையில் ரத்தத்தில் சர்க்கரை அளவு அதிகரிப்பதுதான். எல்லோர் உடலிலும் நோயை எதிர்கொள்ள ஸ்ட்ரெஸ் ஹார்மோன்கள் அதிக அளவில் சுரக்கின்றன.

இந்த ஸ்ட்ரெஸ் ஹார்மோன்கள் கல்லீரலைத் தூண்டி, ரத்தத்தில் சர்க்கரை அளவை அதிகரிக்கச்செய்கின்றன. கல்லீரலும் அதிக அளவில் குளூக்கோஸை வெளியிடுகிறது. சர்க்கரைநோய் உள்ளவர்களுக்கு ஒன்று இன்சுலினே சுரப்பது இல்லை அல்லது மிகக் குறைந்த அளவில் இன்சுலின் சுரந்தாலும் அதை அவர்கள் உடல் பயன்படுத்த முடியாத நிலையில் இருக்கிறது. இதனால், இன்சுலின் ஊசி எடுப்பது போன்ற செயல்கள் மேற்கொள்ளவில்லை எனில், ரத்தத்தில் சர்க்கரை அளவு அதிகரிப்பது தொடர்கிறது.

ஸ்ட்ரெஸ் ஹார்மோன்களின் அதிகச் சுரப்பு காரணமாக உயர்ந்த ரத்த சர்க்கரையைக் கட்டுக்குள் வைக்க இன்சுலின் ஊசி, மாத்திரை எடுத்துக் கொள்ளவேண்டியது மிக அவசியம். வாந்தி போன்ற பிரச்னை இருந்தாலும் சரி, கட்டாயம் சர்க்கரைநோய்க்கான மருந்துகளை எடுத்துக் கொள்ள வேண்டும். இரண்டு அல்லது நான்கு மணி நேரத்துக்கு ஒருமுறை சர்க்கரை அளவைப் பரிசோதிப்பதும் 15 நிமிடங்களுக்கு ஒருமுறை நீர் அருந்துவதும் மிக மிக முக்கியம். இதன் மூலம், நீர் இழப்புப் பிரச்னையைத் தவிர்க்கலாம்.

இப்படி, மருந்து எடுக்காதபோது, அது டயாபடீக் கீட்டோஅசிடோசின் என்றப் பிரச்னையை உருவாக்கிவிடுகிறது. அதாவது, ரத்தம் மற்றும் சிறுநீரில் கீட்டோன் என்ற அமில அளவு அதிகரித்து, உடலில் நீர் இழப்பு ஏற்படும். உடலின் இயங்கு ஆற்றல் குளூக்கோஸ்தான். குளூக்கோஸ் இல்லாதபோது, கொழுப்புச்சத்தை உடைத்து, ஆற்றலை உடல் உற்பத்தி செய்துகொள்கிறது. சர்க்கரை நோயாளிகளுக்கு சர்க்கரை இருந்தும் பயன்படுத்த முடியாத நிலையில், கொழுப்பைச் சிதைத்து தேவையான கலோரியைப் பெற உடல் முயற்சிக்கிறது. கொழுப்பை ஆற்றலாக மாற்றும்போது, கீட்டோன் என்பது துணைப் பொருளாக உற்பத்தியாகிறது. அமிலத்தன்மை கொண்ட இந்த கீட்டோன், உடலில் அதிகரிக்கும் போது ரத்தம் மற்றும் செல்களின் அமிலத்தன்மை அதிகரிக்கிறது. இதனால், உடலின் ஒட்டுமொத்த செயல்திறனும் பாதிக்கப்படுகிறது.

டைப் 1 சர்க்கரை நோயாளிகளுக்கு இந்தப் பிரச்னை வருவதற்கான வாய்ப்பு அதிகம். டைப் 2 சர்க்கரை நோயாளிகளையும் இந்தப் பிரச்னை விட்டுவைப்பது இல்லை. எனவே, ரத்தத்தில் கீட்டோன்ஸ் அளவு அதிகரித்தால், அதைக் கட்டுப்படுத்தும் வழிமுறைகள் குறித்து மருத்துவரின் ஆலோசனையைப் பெறவேண்டியது அவசியம்.

வாய் உலர்தல், தூக்க உணர்வு, அதிகப்படியான குமட்டல், வயிற்றுவலி, வாந்தி அல்லது வயிற்றுப்போக்கு, சுவாசத்தில் பிரச்னை போன்றவை இதன் அறிகுறிகள். உடனடியாக மருத்துவரை அணுகி ஆலோசனை பெற வேண்டும். சிகிச்சைக்குத் தாமதமானால், அது பல்வேறு சிக்கல்களை உருவாக்கிவிடலாம். மருத்துவ மனையில் தங்கி சிகிச்சை பெறவேண்டிய அளவுக்குப் பிரச்னை முற்றலாம்.

நோயுற்ற நாட்களை எப்படி எதிர்கொள்வது?

எந்த உடல்நலக் குறைவு ஏற்பட்டாலும், தயங்காமல் உங்கள் சர்க்கரைநோய் சிகிச்சை நிபுணரின் ஆலோசனையைப் பெற வேண்டும். மருத்துவரை அழைப்பதற்கு முன்னர், ரத்தத்தில் சர்க்கரை அளவைப் பரிசோதித்துக்கொள்ள வேண்டும். தொடர்ந்து உடல்நலக் குறைவு இருந்தாலோ, இரண்டு மூன்று நாட்கள் ஆகியும் நிலைமை சீரடையவில்லை என்றாலோ, ஆறு மணி நேரத்துக்கு மேலாக வயிற்றுப்போக்கு அல்லது வாந்தி இருக்கிறது என்றாலோ, சர்க்கரைக்கான மாத்திரை எடுத்தும் சர்க்கரை அளவு 250-க்கு கீழ் குறையவில்லை என்றாலோ, உடல்நலக் குறைவு ஏற்பட்டு, என்ன செய்வது என்றே தெரியாத நிலையில் இருந்தாலோ உடனே மருத்துவரை அணுகி ஆலோசனை பெறுவது நல்லது.

- தொடரும்

ஸ்வீட்டர்

உடல்நலக் குறைவு காலத்தில் அதீத கவனத்துடன் இருந்து சிகிச்சை எடுத்துக்கொள்ளுங்கள். இது பல சிக்கல்களைத் தவிர்க்கும்.

டயாபடீஸ் டவுட்

கிருபாகரன், மதுரை.

``டாக்டர் எனக்கு 10 ஆண்டுகளுக்கு மேலாக சர்க்கரைநோய் உள்ளது. இப்போது, எனக்கு அடிக்கடி காய்ச்சல், வாந்தி, வாய்வு என உடல்நலக் குறைவு ஏற்படுகிறது. இதைத் தவிர்க்க, எதிர்கொள்ள வழி சொல்லுங்களேன்...’’

``உடல்நலக் குறைவு ஏற்படுவது இயற்கைதான். ஆனால், அடிக்கடி உடல்நலக் குறைவு ஏற்படுவதைத் தவிர்க்க முயற்சிக்கலாம். இதற்கு, அடிக்கடி உங்கள் கைகளைக் கழுவி சுத்தம் செய்ய வேண்டும். குறிப்பாக, உடல்நலக் குறைவு உள்ள நபரைச் சந்தித்த பிறகு, அவருடன் கைகுலுக்கிய பிறகு, பஸ், பொதுக் கழிப்பறைக் கைப்பிடி போன்ற நோய்க்கிருமிகள் பரவ வாய்ப்பு உள்ளவற்றைத் தொட்ட பிறகு தவறாமல் கை கழுவ வேண்டும். கிருமிகள் அழிய, சோப் போட்டு, 20 விநாடிகள் நன்கு தேய்த்து, வெதுவெதுப்பான நீரில் கை கழுவ வேண்டும்.

கைகளைக் கழுவுதற்கு முன்னதாக கண், மூக்கு, வாயைத் தொடுவதைத் தவிர்க்க வேண்டும். ஏனெனில், இதன் மூலம் ஃபுளு காய்ச்சல் பரவலாம். சர்க்கரை நோயாளிகளுக்கு இது நிமோனியா பாதிப்பை வரவழைத்துவிடும். ஃபுளுவுக்கு தடுப்பூசி எடுத்துக்கொள்வதன் மூலம் ஓரளவுக்குத் தப்பலாம். ஆனால், அது 100 சதவிகிதம் மீண்டும் ஃபுளு வராது என்று உறுதியளிக்காது.

குறிப்பிட்ட கால இடைவெளியில் மருத்துவப் பரிசோதனைகள் செய்ய வேண்டும். இது, சர்க்கரையைக் கட்டுக்குள் வைக்கவும், வேறு பாதிப்புகள் வருவதைத் தவிர்க்கவும் உதவும். ஆரோக்கியமானதைச் சாப்பிட வேண்டும், போதுமான அளவு தூங்கி ஓய்வு எடுக்க வேண்டும். ஸ்ட்ரெஸ் மிக முக்கியக் காரணியாக இருப்பதால், மனஅழுத்தத்தைக் கட்டுக்குள்வைக்க வேண்டும். வீட்டு வேலையோ, அலுவலக வேலையோ எதுவும் நெருக்கடி கொடுக்காத அளவுக்குப் பார்த்துக்கொள்ளுங்கள். தினசரி உடற்பயிற்சி, மகிழ்ச்சி அளிக்கும் பொழுதுபோக்குக் காரியங்கள் என அனைத்தும் ஒன்றிணையும்போது, உங்கள் உடலும் மனமும் ஆரோக்கியமாக இருக்கும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு