Published:Updated:

இனி எல்லாம் சுகமே - 24

இனி எல்லாம் சுகமே - 24
பிரீமியம் ஸ்டோரி
இனி எல்லாம் சுகமே - 24

செரிமானம் அறிவோம்!

இனி எல்லாம் சுகமே - 24

செரிமானம் அறிவோம்!

Published:Updated:
இனி எல்லாம் சுகமே - 24
பிரீமியம் ஸ்டோரி
இனி எல்லாம் சுகமே - 24
இனி எல்லாம் சுகமே - 24

“உடல் எடையைக் குறைக்க வேண்டும். ஆனால், என்னால் முடியவில்லை, எனக்கு எந்த நோயும் இல்லை. ஆனால், எனது பருமனான உடலைப் பார்க்க எனக்கே பிடிக்கவில்லை. எனது எடையும் உயரமும் ஒரே எண்கள்தான். அலகுகள்(International System of Units) மட்டும்தான் வித்தியாசம். பேரியாட்ரிக் (Bariatric) சிகிச்சை இதற்கு நல்ல தீர்வாக அமையுமா டாக்டர்?” எனக் கடலூரைச் சேர்ந்த மகேஷ் குமார் கடிதம் எழுதி இருந்தார். இந்த இறுதி அத்தியாயத்தில் நான் விரிவாகப் பேசப்போவது  பேரியாட்ரிக் அறுவைசிகிச்சை குறித்துத்தான்.

`பேரோ’ (Baro) என்றால் பாரம், எடை எனப் பொருள் வரும். `ஐயட்டிரிக்ஸ்’ (Iatrics) என்றால் மருத்துவம். எடைக்கான மருத்துவம் என்பதுதான்  பேரியாட்ரிக் (Bariatric) என்பதன் பொருள். உடல்பருமன் என்பதை ‘உலக சுகாதார நிறுவனம்’ ஒரு நோய் என்றே குறிப்பிட ஆரம்பித்து உள்ளது. ஏனெனில், ஒவ்வோர் ஆண்டும் உடல்பருமன் பிரச்னையால் அவதிப்படுபவர்களின் எண்ணிக்கை, விறுவிறுவென அதிகரித்துவருகிறது. 

ஒருவர் எவ்வளவு எடைக்குள் இருந்தால் ஆரோக்கியம் என்பதைக் குறிப்பிட பி.எம்.ஐ என்ற அளவைக் கடைப்பிடிக்கிறார்கள். பி.எம்.ஐ அளவு, 25-க்குள் இருந்தால் நல்லது. 25-29-க்குள் இருந்தால், அதிக உடல் எடைகொண்டவர்கள் (Over weight) என்றும், 30-க்கு மேல் இருந்தால், உடல்பருமன் (Obesity), 40-க்கு மேல் இருந்தால், மிக மோசமான உடல்பருமன் எனவும் வரையறுக்க முடியும். `பேரியாட்ரிக்’ எனப்படும் உடல்பருமன் குறைப்பு அறுவைசிகிச்சைகள், பி.எம்.ஐ 30-க்கு மேல் இருப்பவர்களுக்குச் செய்யலாம். ஆனால், அதில் சில நிபந்தனைகள் உள்ளன.

ஒட்டுமொத்த விகடனுக்கும் ஒரே ஷார்ட்கட்!

இனி எல்லாம் சுகமே - 24

உடல்பருமனாக இருப்பவர்களுக்கு, சர்க்கரை நோய், ரத்த அழுத்தம், இதய நோய்கள் போன்ற வேறு ஏதாவது பிரச்னைகள் இருந்தால், அதன் தீவிரத்தைப் பொறுத்து உடல்பருமன் அறுவை சிகிச்சை குறித்து நோயாளியும் மருத்துவரும் கலந்து பேசி முடிவு செய்யலாம். பி.எம்.ஐ 40 க்கு மேல் இருந்து, எவ்வளவோ முயன்றும் உடல் எடையைக் குறைக்க முடியவில்லை என்றால், நோய்கள் அப்போதைக்கு இல்லாவிட்டாலும், விரைவில் பல நோய்கள் தாக்கக்கூடும் என்பதால், மருத்துவர் களிடம் பலகட்ட ஆலோசனைகள் செய்து முடித்த பின்னர் உடல்பருமன் அறுவைசிகிச்சை செய்து கொள்ளலாம்.

சரி, முதலில் ஒரு விஷயத்தை நன்றாகப் புரிந்துகொள்ள வேண்டும். உடல்பருமன் குறைப்பு அறுவைசிகிச்சை என்பது நிச்சயம் அழகுக்காகச் செய்யப்படும் காஸ்மெட்டிக் சிகிச்சை கிடையாது. வெறும் அழகுக்காக இந்த அறுவைசிகிச்சையைச் செய்ய நோயாளியும் முடிவு எடுக்கக் கூடாது. ஏனெனில், பல அசம்பாவிதங்கள் நிகழ்ந்த வரலாறு உண்டு. அறுவைசிகிச்சை செய்தால்தான் ஓரளவுக்காவது ஆரோக்கியத்துடன் நீண்ட காலம் வாழ முடியும் என எண்ணுபவர்கள் மட்டும்தான் இந்தச் சிகிச்சையைச் செய்துகொள்ள வேண்டும்.
ஏனெனில், இந்தச் சிகிச்சையைச் செய்து கொண்ட பின்னர், பக்கவிளைவுகள் அதிகமாக ஏற்பட வாய்ப்பு உண்டு. உடல்பருமன் அறுவைசிகிச்சையில் மூன்று முக்கியமான முறைகள் உள்ளன.  செயற்கையாக, இரைப்பையில் ரப்பர் பேண்டு போட்டு, இரைப்பையின் கொள்ளளவைக் கட்டுப்படுத்துவது முதல் வகை.

சிறுகுடலின் ஆரம்பப்பகுதியை விடுத்து, இரைப்பையை நேரிடையாகச் சிறுகுடலின் பிற்பகுதியில் இணைப்பது ‘கேஸ்ட்ரிக் பைபாஸ் அறுவைசிகிச்சை.’ இந்த முறையில் அதிகமாகச் சாப்பிடவும் முடியாது; சாப்பிட்ட உணவு முழுவதும் செரிக்கவும் செய்யாது.

மூன்றாவதாக, ‘கேஸ்ட்ரிக் ஸ்லீவ்’ எனும் முறை பிரபலமாகி இருக்கிறது. இரைப்பையைச் செதுக்கி, குறிப்பிட்டப் பகுதிகளைச் சுமார் 70 சதவிகிதம் அளவுக்கு வெட்டி எடுத்து, சிறு இரைப்பையாக மாற்றி சிறுகுடலோடு இணைக்கும் முறை இது.

இது போன்ற உடல்பருமன் அறுவைசிகிச்சையை செய்துகொள்வதற்கு முன்னர், மருத்துவர்கள் டயட் மூலமாகவோ, மாத்திரை, மருந்துகள் மூலமாகவோ உடல் எடையைக் குறைக்கவைக்க முடிகிறதா? எடை குறைகிறது எனில், எவ்வளவு சதவிகித உடல் எடை இழப்பு ஏற்படுகிறது என்பதைப் பரிசோதிப்பார்கள். அதன் பின்னரே அறுவைசிகிச்சை குறித்து முடிவெடுக்கப்படும். உடல்பருமன் அறுவைசிகிச்சை செய்துகொண்ட பின்னர், விரும்பிய உணவுகளை விரும்புகிற அளவுக்குச் சாப்பிட முடியாது. செரிமான சக்தி குறையும். நிறைய ஊட்டச்சத்து மாத்திரைகள் எடுத்துக்கொள்ள வேண்டி இருக்கும். சாப்பிட்ட திருப்தி இருக்காது. நிறையத் தண்ணீர் குடிக்க முடியாது. இதை எல்லாம் தெரிந்துகொண்டு, மனதளவில் தயாரான பின்னர்தான் நோயாளிகள் இந்த சிகிச்சைக்கு ஒப்புக்கொள்ள வேண்டும்.

பேரியாட்ரிக் அறுவைசிகிச்சை செய்த பின்னர், முதல் ஓர் ஆண்டுக்குள்தான் 40-50 சதவிகிதம் வரை உடல் எடை குறையும். எனவே, அறுவைசிகிச்சை செய்த மறுநாளே, ஸ்லிம்மாகி ஃபேஸ்புக் புரொஃபைல் படத்துக்கு போஸ் கொடுக்கலாம் என்பது போன்ற கற்பனைகள் வேண்டாம். அவசியத்துக்கு ஏற்ப, இந்த வகை அறுவைசிகிச்சைகளைச் செய்துகொண்டு, மருத்துவர் ஆலோசனை மற்றும் கண்காணிப்பின் கீழ், மகிழ்ச்சியுடன் வாழ்பவர்களும் இருக்கிறார்கள்.

உடல் எடை குறைப்பு அறுவைசிகிச்சை செய்துகொள்ள விரும்புபவர்கள், முதலில் நல்ல மருத்துவமனை மற்றும் டாக்டர்களைத் தேர்ந்தெடுக்க வேண்டும். அந்த மையத்தில் எவ்வளவு பேர் இந்தச் சிகிச்சையைச் செய்திருக்கிறார்கள்; சிகிச்சையளிக்கும் மருத்துவரின் அனுபவம் என்ன? அந்த மையத்தில் நல்ல உபகரணங்கள் இருக்கின்றனவா? பொது மருத்துவர், அறுவைசிகிச்சை செய்யும் மருத்துவர், ஊட்டச்சத்து நிபுணர், பிசியோதெரபிஸ்ட், கவுன்சலிங் தரும் மருத்துவர் ஆகியோர் உள்ளிட்ட பிரத்யேகக் குழு இருக்கிறதா என செக் செய்துகொள்ள வேண்டும்.

எல்லோரும் இன்புற வாழ்த்துகள்!

- முற்றும்!

தொகுப்பு: பு.விவேக் ஆனந்த்

பேரியாட்ரிக் சிகிச்சை செய்வதால் செரிமான மண்டலத்துக்கு என்ன பிரச்னை?

1.எதுக்களித்தல் ஏற்படலாம்.

2.வயிற்றுப் பொருமல் ஏற்படலாம்.

3.ஊட்டச்சத்தைச் சரியாகச் சிறுகுடலால் உறிஞ்ச முடியாது.

4.தயமின் உள்ளிட்ட வைட்டமின்கள் மற்றும் நுண்ணூட்டச்சத்துக்கள் குறைபாடு ஏற்படலாம்.

செரிமானம் காக்க 11 கட்டளைகள்!

1. ஆறு முதல் எட்டு மணி நேரம் தூங்க வேண்டும்.

2. சரியான நேரத்துக்குக் காலை, மதிய உணவுகளைச் சாப்பிட வேண்டும், இரவு உணவை படுக்கைக்குச் செல்லும் இரண்டு, மூன்று மணி நேரத்துக்கு முன்னராக முடித்துவிட வேண்டும்.

3. எல்லா காய்கறிகள், கீரைகள், பழங்கள், தானியங்கள் போன்றவற்றையும் சாப்பிடுங்கள். தென்னிந்திய உணவு முறைதான் செரிமானத்துக்கு மிகவும் ஏற்றது.

4. ஒரு நாளின் உணவில், ஐந்தில் ஒரு பங்கு நிச்சயம் காய்கறிகள் இருக்க வேண்டும்.

5. தினமும் இரண்டு முதல் இரண்டரை லிட்டர் தண்ணீர் அவசியம்.

6. குளிர் பானங்கள், பாக்கெட் சிப்ஸ், டீப் ஃப்ரை செய்யப்பட்ட உணவுகள், ஃபாஸ்ட் ஃபுட், மைதா உணவுகள் போன்றவற்றைத் தவிர்த்திடுங்கள்.

7. வீட்டில் தயாரிக்கும் ஆரோக்கியமான சிறுதானிய நொறுக்குத்தீனிகள், கடலை மிட்டாய், இனிப்பு வகைகள் போன்றவற்றை அளவோடு சாப்பிடுங்கள்.

8. மீண்டும் மீண்டும் ஒரே எண்ணெயை சூடுபடுத்தி பயன்படுத்தக் கூடாது.

9. தினமும் ஒரு எண்ணெய் என எல்லா வகையான எண்ணெய்களையும் பயன்படுத்துங்கள். செக்கில் ஆட்டிய எண்ணெயைப் பயன்படுத்துவது நல்லது. சூடுபடுத்தும்போது சீக்கிரம் புகை வந்தால், அது பயன்படுத்த உகந்த எண்ணெய், எவ்வளவு சூட்டையும் தாங்குகிறது எனில் அந்த எண்ணெய் வேண்டாம்.

10. மனஅழுத்தம் வேண்டாம். விளையாட்டு, உடற்பயிற்சி நிச்சயம் வேண்டும். தியானம் நல்லது.

11. சுய மருத்துவம் செய்யக் கூடாது. தேவையான சமயங்களில் தகுந்த மருத்துவரை அணுகுங்கள்.