Published:Updated:

ஸ்வீட் எஸ்கேப் - 27

சர்க்கரையை வெல்லலாம்ஹெல்த்க.பரணீதரன், சர்க்கரை நோய் சிறப்பு மருத்துவர்

பிரீமியம் ஸ்டோரி
ஸ்வீட் எஸ்கேப் - 27

ர்க்கரையைக் கட்டுப்படுத்த உணவு, உடற்பயிற்சியுடன் மாத்திரை மருந்து எடுத்துக் கொள்வதன் முக்கியத்துவம் பற்றிக்  கடந்த இதழில் சொல்லியிருந்தேன். அதைப்படித்த வாசகர் ஒருவர், ‘சர்க்கரையைக் கட்டுக்குள் வைக்க உதவும் மாத்திரையே, சர்க்கரை அளவைக் குறைத்துவிடாதா? அதுவும் மிகப்பெரிய பிரச்னைதானே’ என்று கேட்டிருந்தார். மாத்திரை எடுத்துக்கொள்வது சர்க்கரை அளவைக் கட்டுக்குள் வைத்திருப்பதற்குத் தான்.  என்ன மாத்திரை என்ன மாதிரியான செயல் பாட்டைக் கொண்டிருக்கிறது என்று தெரிந்து கொள்வதன் மூலம், மாத்திரை எடுத்துக்கொள்வதில் உள்ள சந்தேகத்தைப் போக்க முடியும் என்றேன். டைப் 1 சர்க்கரை நோயாளிகளுக்கு இன்சுலின் மட்டும்தான் தீர்வு என்பதால், அதைப் பற்றி அடுத்து வரும்  இதழ்களில் பார்ப்போம்.  இந்த இதழில், டைப் 2 சர்க்கரை நோய்க்குப் பரிந்துரைக்கப் படும் முக்கிய மாத்திரைகள், அவற்றின் செயல்பாடுகளைப் பற்றி ச் சொல்கிறேன்.

ஸ்வீட் எஸ்கேப் - 27

சர்க்கரை அளவைக் கட்டுக்குள் வைக்கும் உங்களுக்கான சிகிச்சையை நிர்ணயிப்பதில் மருத்துவர் அதிகக் கவனம் செலுத்துகிறார். உணவுக்கட்டுப்பாடு, உடற்பயிற்சியுடன் இந்த மாத்திரைகளை எடுத்துக்கொள்வதால், ரத்தத்தில் சர்க்கரை அளவு, கொலஸ்ட்ரால் அளவு மற்றும் ரத்த அழுத்தத்தைக் கட்டுக்குள் வைக்கலாம்.   சர்க்கரை நோயால் ஏற்படக்கூடிய சிக்கல்களைத் தவிர்த்து ஆரோக்கியமான வாழ்க்கைத்தரத்தைப் பெறலாம்.

சர்க்கரை நோய்க்காக அளிக்கப்படும் மாத்திரை, ஊசி எதுவும் சர்க்கரை நோயைக் குணப்படுத்து வதற்காக அளிக்கப்படுவது இல்லை. சர்க்கரை அளவைக் கட்டுக்குள் வைக்க மட்டுமே அளிக்கப் படுகின்றன. எனவே, டாக்டர் பரிந்துரைக்கும் மருந்துகளைத் தொடர்ந்து எடுத்துவர வேண்டும். குறிப்பிட்ட கால இடைவெளியில் எடுக்கும் மருந்தின் அளவை மாற்றிக்கொள்ள வேண்டும். சர்க்கரை நோயாளிகளுக்கு இரண்டு விதமான மருந்துகள் அளிக்கப்படுகின்றன.  சிலருக்கு  இந்த  இரண்டையும் சேர்த்து எடுக்கச் சொல்லிப் பரிந்துரைக்கப்படும். இவை இரண்டையும், ஒன்றாக எடுத்துக்கொண்டாலும், இவை இரண்டும், வெவ்வேறு பணிகளையே செய்யும். வழக்கமாகப் பரிந்துரைக்கப்படும் மருந்துகள், அவற்றின் செயல்பாடுகளைத் தெரிந்துகொள்வதன் மூலம் உங்களுக்கு இது புரியும்.

மெட்ஃபார்மின்


‘அமெரிக்கன் டயாபடீஸ் அசோசியேஷன்’ டைப் 2 சர்க்கரை நோயாளிகளுக்கு முதல் கட்டமாகப்  பரிந்துரைக்கும் மருந்து மெட்ஃபார்மின். இந்த மாத்திரை கல்லீரல், ரத்தத்தில் வெளியிடும் குளூக்கோஸ் அளவைக் கட்டுப்படுத்துகிறது. நம்முடைய உடல் செல்கள் இன்சுலினுக்கு மிகவும் திறனுடன் செயல்பட்டு குளூக்கோஸை ஈர்க்கச் செய்கிறது.

சர்க்கரை நோயாளிகளுக்கு மட்டுமல்ல... சர்க்கரை நோய் வர வாய்ப்புள்ள பெரியவர்களுக்கு, அவர்கள் வாழ்க்கைமுறையை மாற்றியமைப்ப துடன் மெட்ஃபார்மின் மாத்திரையும் பரிந்துரைக்கப்படுகிறது. உடல் பருமனானவர் களுக்கும் மெட்ஃபார்மின் பரிந்துரைக்கப்படும். இந்த மாத்திரை எடுத்துக்கொள்பவர்களுக்கு, குமட்டல், வயிற்றுப்போக்கு போன்ற சில பக்கவிளைவுகள் ஏற்படலாம். சிறுநீரகச் செயல்திறன் குறைந்தவர்கள் இந்த மாத்திரையை எடுக்கக்கூடாது.

சல்பனைல்யூரியா (Sulphonylureas)

சல்பனைல்யூரியா மாத்திரை கணையத்தில் இன்சுலின் சுரப்பைத் தூண்டும். உடல் பருமனாக இல்லாதவர்களுக்கும், மெட்ஃபார்மின் எடுக்காதவர்களுக்கும் இந்த மாத்திரை பரிந்துரைக்கப்படும். இது, இன்சுலின் அளவை அதிகரிப்பதால், சர்க்கரை அளவு குறைய வாய்ப்பு உள்ளது. மேலும், உடல் எடை அதிகரிப்பு, குமட்டல், வயிற்றுப்போக்கு போன்ற பக்க விளைவுகளும் ஏற்படலாம்.

பயோகிளிட்டசோன் (Pioglitazone)

பயோகிளிட்டசோன் மாத்திரை,  உடல் செல்கள் இன்சுலினை அதிக சென்சிட்டிவாக இருக்கச் செய்து, ரத்தத்தில் இருந்து குளூக்கோஸை ஈர்க்கச் செய்யும். இது சல்பனைல்யூரியா அல்லது மெட்ஃபார்மின் அல்லது இந்த இரண்டுடனும் சேர்த்து அளிக்கப்படும். இது உடல் எடை, காலில் வீக்கம் போன்ற பிரச்னைகளை ஏற்படுத்தலாம். ஏற்கெனவே, இதயச் செயல்இழப்புப் பிரச்னை இருந்தாலோ, எலும்பு முறிவுக்கான வாய்ப்பு இருந்தாலோ, அவர்கள் பயோகிளிட்டசோன் மாத்திரையை எடுக்கக்கூடாது.

கிளிப்டின் (Gliptins)

நன்றாகப் பசிக்கிறது, சாப்பிடச் செல்கிறோம்... ஒரு பிளேட் பிரியாணி  நம் முன்னே வைக்கப்படுகிறது. உடனே, நம் உடலில் ஜி.எல்.பி என்று ஒரு ஹார்மோன் சுரக்கும். இது,  உணவு வரத் தயாராக இருக்கிறது,  எனவே, ரத்தத்தில் குளூக்கோஸ் அளவு அதிகரிக்கப்போகிறது, இதை எதிர்கொள்ள இன்சுலினைச் சுரக்க வேண்டும் என்று சிக்னல் அனுப்பும். பிடித்த உணவை, ஆசையாக எடுத்துச் சாப்பிட ஆரம்பிப்போம். இதுவரை எந்தப் பிரச்னையும் இல்லை. ஆனால், சர்க்கரை நோயாளிகளுக்கு, வாயில் உணவை வைத்த அடுத்த விநாடியேகூட ஜி.எல்.பி ஹார்மோன் செயல்இழந்துபோகும். இதனால், இன்சுலின் சுரப்பு நின்றுவிடும். கிளிப்டின் என்ற மாத்திரை எடுப்பது, இந்த  ஹார்மோன் செல்இழப்பைத் தாமதம் செய்யும். இதனால், போதுமான அளவு இன்சுலின் சுரப்பதற்கான வாய்ப்பை ஏற்படுத்தித் தரும். சல்பனைல்யூரியா,  பயோகிளிட்டசோன் மாத்திரை எடுக்கமுடியாத நிலையில் உள்ளவர்களுக்கு இந்த மாத்திரை பரிந்துரைக்கப் படும். இந்த மாத்திரை எடுப்பதால், சர்க்கரை அளவு உயராமல் தடுக்கலாம். அதேநேரத்தில், மிகவும் கீழே இறங்காமலும் இருக்கும். இந்த மாத்திரை எடுப்பதால் உடல் பருமன் ஏற்படும் என்ற பிரச்னையும் இல்லை.

எஸ்.ஜி.எல்.டி2 (SGLT2)

நம்முடைய உடலில் உள்ள தேவையற்ற கழிவுகள்,  அதிகப்படியான நீர்,  ஊட்டச்சத்துக்களை வெளி யேற்றும் பணியைச் சிறுநீரகங்கள் செய்கின்றன. அதிகப்படியான குளூக்கோஸ் ரத்தத்தில் இருந்தாலும்கூட, குளூக்கோஸ் நமக்குத் தேவையான பொருள் என்பதால், ரத்தத்தைச் சுத்தம் செய்யும் சிறுநீரகத்தின் நெஃப்ரான்கள், அதை மீண்டும் கிரகித்து ரத்தத்தில் சேர்க்கும். எஸ்.ஜி.எல்.டி2 மாத்திரை மீண்டும் இந்தச் சர்க்கரையைக் கிரகிக்கச் செய்யாமல் வெளியேற்றச் செய்கிறது. அதுவும், இந்த மாத்திரை குறைந்த நேரம் மட்டுமே செயல்படும் தன்மை கொண்டது என்பதால், மொத்த குளூக்கோசும் வெளியேறிவிடும் என்று பயப்படத் தேவையில்லை.

எஸ்.ஜி.எல்.டி2 மாத்திரை,  டாபாகிளிஃபோஸின், கேனாகிளிஃபோஸின், எம்பாகிளிஃபோஸின் என மூன்று விதங்களில் வருகிறது. இதை மருத்துவர் பரிந்துரைத்தால் மட்டுமே ஒருநாளைக்கு ஒன்று என்ற அளவில் எடுத்துக் கொள்ளவேண்டும். இந்த மாத்திரை எடுப்பதால் சிலருக்குச் சிறுநீரகப் பாதை நோய்த் தொற்று ஏற்படுவதற்கான வாய்ப்பு உள்ளது. அதேநேரத்தில், தொடர்ந்து இந்த மாத்திரையை எடுத்துக்கொள்வதால் இதயத்தின் செயல்திறன் மேம்படுவதாகவும் ஆய்வுகள் தெரிவிக்கின்றன.

அகர்போஸ் (Acarbose)

உணவு எடுக்கும்போது, ரத்தத்தில் சர்க்கரை அளவு உயர்வதை இது தவிர்க்கிறது. அதாவது, வயிற்றில் செரிமானம் ஆனதும் குளூக்கோஸ் ரத்தத்தில் கலக்கும். அதற்கு முன்னதாகவே, இந்த மாத்திரை குளூக்கோஸை கிரகித்துவிடும். அதனால் குறைவான அளவிலேயே குளூக்கோஸ் ரத்தத்தில் சேரும். அதை, உடலின் இன்சுலின் சுரப்பே செல்கள் பயன்படுத்தும்படி செய்துவிடும். இதை எடுக்கும் சிலருக்கு. வயிற்றுப்போக்கு, வீக்கம் போன்ற பிரச்னைகள் ஏற்படலாம்.

நேட்டிகிளைனைடு மற்றும் ரெப்பகிளைனைடு (Nateglinide and Repaglinide)

நேட்டிகிளைனைடு மற்றும் ரெப்பகிளைனைடு ஆகியவை, கணையத்தில் இன்சுலின் சுரப்பைத் தூண்டுகின்றன. பொதுவாக இவற்றை அனைவருக்கும் பரிந்துரைப்பது இல்லை. சரியான நேரத்தில் உணவு உண்ண முடியாதவர்களுக்கு இது பரிந்துரைக்கப்படும். இந்த மாத்திரையின் செயல்படும் காலமும் மிகக் குறைவுதான். எனவே, சாப்பிடுவதற்கு முன்பு இதை எடுத்துக்கொண்டால் போதும். இந்த மாத்திரை எடுத்துக்கொள்ளும்போது உடல் எடை அதிகரிப்பு, சர்க்கரை அளவு மிகவும் குறைதல் போன்ற பாதிப்புகள் ஏற்படலாம்.

- தொடரும்

ஸ்வீட்டர்

சர்க்கரை நோயாளிகள் சர்க்கரை அளவைக் கட்டுக்குள் வைக்க, உடற்பயிற்சி, உணவுக் கட்டுப்பாடு ஆகியவற்றுடன் மாத்திரை மருந்து எடுத்துக்கொள்வதும் அவசியம்.

டயாபடீஸ் டவுட்

“டாக்டர், சர்க்கரை அளவை மிகவும் சரியாக வைத்திருக்க நான் பின்பற்ற வேண்டிய வழிமுறைகளைப் பற்றிச் சொல்லுங்கள்?”


* உங்களுக்குப் பரிந்துரைக்கப்பட்ட மாத்திரை மருந்துகள் பற்றி உங்கள் மருத்துவர் அல்லது மருந்தாளுநரிடம் பேசி, அவற்றின் செயல்பாடுகளை முழுமையாகத் தெரிந்துகொள்ளுங்கள்.

* சில மாத்திரைகள் உடனடியாகச் செயல்பட ஆரம்பிக்கும். சில மாத்திரைகள் நீண்ட நேரம் எடுத்துக் கொள்ளும். எனவே, எவ்வளவு காலத்துக்கு புதிய மருந்தை எடுத்துக்கொள்ள வேண்டும், அவை எப்படிச் சர்க்கரை அளவைக் குறைக்கின்றன என்று கேட்கவும்..

* புதிதாகப் பரிந்துரைக்கப்பட்ட மாத்திரையால் எந்த அளவுக்குச் சர்க்கரை அளவு குறைந்திருக்கிறது என்பதைக் கவனிக்க வேண்டும்.  மாத்திரை எடுத்துக்கொள்வதால் எவ்வளவு புள்ளிகளில் மாறுதல் வந்திருக்கிறது என்பதைத் தெரிந்துகொள்வதன் மூலம், மாத்திரை டோஸ் எவ்வளவு எடுக்கலாம் என்று திட்டமிட முடியும்.

* குறிப்பிட்ட மாத்திரை எடுத்துக்கொள்வதால் ஏற்படக்கூடிய பக்க விளைவுகளை முழுமையாகத் தெரிந்திருக்க வேண்டும்.

* உங்கள் உடல் நலம் மற்றும் நீங்கள் ஏற்கெனவே  எடுத்துவரும் மாத்திரை மருந்து ஆகியவற்றைப் பொறுத்தே உங்களுக்கு மருத்துவர் மாத்திரைகளைப் பரிந்துரைக்கிறார். எனவே, சுயமாக மாத்திரை வாங்கிப் பயன்படுத்துவது, மாத்திரையைக் குறைப்பது போன்றவற்றைச் செய்ய வேண்டாம்.

* மருத்துவர் அறிவுறுத்திய கால இடைவெளியில் ரத்தத்தில் சர்க்கரை அளவைப் பரிசோதனை செய்துகொள்ளுங்கள். இதனால், உங்கள் மருந்து எந்த அளவுக்கு ஆற்றலுடன் செயல்பட்டிருக்கிறது என்பதைக் கண்டறியலாம்.”

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு