Published:Updated:

தொட்டால் தொற்றும்! - மவுஸ் முதல் மெனு கார்டு வரை - தப்பிப்பது எப்படி?

ஒட்டுமொத்த விகடனுக்கும் ஒரே ஷார்ட்கட்

Use App
தொட்டால் தொற்றும்! - மவுஸ் முதல் மெனு கார்டு வரை - தப்பிப்பது எப்படி?
தொட்டால் தொற்றும்! - மவுஸ் முதல் மெனு கார்டு வரை - தப்பிப்பது எப்படி?

ஹெல்த்சரண்யா பாரதி, பொதுநல மருத்துவர்

பிரீமியம் ஸ்டோரி

கிருமிகள் எங்கும் எதிலும் நீக்கமற நிறைந்து இருக்கின்றன. வளர்ந்து வரும் நாகரிகச் சமுதாயத்தில், கிருமித்தொற்றுக்கான ஆபத்துகள் இன்னும் அதிகரித்துள்ளன என்றுதான் சொல்ல வேண்டும். ‘இந்தப் பொருள் அதிகக் கிருமிகளைப் பரப்புகிறது, இந்தப் பொருள் அப்படி இல்லை’ என்றெல்லாம் அவ்வளவு எளிதாக நம்மால் கூறிவிட முடிவதில்லை. கிருமித்தொற்று ஆபத்துகளிலிருந்து எப்படித்தான் தப்பிப்பது? இதோ சில டிப்ஸ்!

தொட்டால் தொற்றும்! - மவுஸ் முதல் மெனு கார்டு வரை - தப்பிப்பது எப்படி?

கிருமித் தொற்றுகள் எப்படி ஏற்படும்...

தவிர்ப்பது எப்படி?

ஹோட்டல் மெனு கார்டு: உணவகங்களில் தட்டுகள், குவளைகள், மேசைகள் முதலியவை மட்டுமே சுத்தம் செய்யப்படும். மெனு கார்டுகள் சுத்தம் செய்யப்படுவதற்கான வாய்ப்பே இல்லை. உங்களுக்கு முன்னர் அதை உபயோகப்படுத்தியவர் ஏதாவது தொற்றுக்கிருமிகளை விட்டுச்சென்றிருந்தால், அதன் பாதிப்பு அதில் இருக்கும்.

எப்படித் தவிர்ப்பது?


உணவை முடிவு செய்துவிட்டு, ஆர்டர் கொடுத்த பிறகு கை கழுவ வேண்டும். அப்போது, மெனு கார்டின் மூலம் பரவும் வாய்ப்பு குறையும்.

பேனா மூடி: பேனா மூடியை சிலர் வாயில் வைப்பதைப் பார்த்திருப்போம். அப்படிச் செய்யும்போது, வாயில் இருந்து நோய்த்தொற்று உடலுக்குப் பரவும் ஆபத்து அதிகம்.

எப்படித் தவிர்ப்பது?

பேனாவை வாயில் வைப்பதை முழுமையாகத் தவிர்க்க வேண்டும்.

பல்குச்சி வைக்கும் பெட்டி: வெகு நாள்கள் இந்தப் பெட்டியை மாற்றாமல் வைத்திருப்பது, உள்ளே இருக்கும் பல்குச்சிகளுக்குப் பாதிப்பை ஏற்படுத்தும். சிறு துளைகளிலோ, இடுக்குகளிலோ பெட்டியை வைப்பது, கிருமிகளுக்கு வழிவகுக்கும்.

எப்படித் தவிர்ப்பது?

குறிப்பிட்ட காலங்களுக்கு ஒருமுறை புதிய பெட்டி ஒன்றை வாங்க வேண்டும். இதேபோல வெற்றிலைப் பெட்டிகளிலும் தொற்றுநோய்கள் ஏற்படும் வாய்ப்பு உள்ளது. வீட்டில் உள்ள பெரியவர்கள்தான் இதை உபயோகிப்பார்கள் என்பதால், அவர்களுக்கு நோய்த்தொற்று குறித்த விழிப்புஉணர்வை ஏற்படுத்த வேண்டும்.

கம்ப்யூட்டர் கீ போர்டு, மவுஸ்:
தினமும் உபயோகிக்கிற, தவிர்க்க முடியாத பொருள்கள் கம்ப்யூட்டர் கீ போர்டும் மவுஸும்.

எந்த வேலைகளுக்கு இடையிலும் நம்மை மறந்து கீ போர்டையும் மவுஸையும் விரல்கள் தீண்டிக்கொண்டே இருக்கும். இவை அதிகபட்சக் கிருமிகளைச் சுமந்து கொண்டிருப்பவை. பலரும் உபயோகிக்கிற நிலையில் அதன் தீவிரம் இன்னும் அதிகம்..

எப்படித் தவிர்ப்பது?

கீ போர்டு மற்றும் மவுஸ் உபயோகித்தபடி, சாப்பிடுவதைத் தவிர்க்க வேண்டும். இவற்றின் பயன்பாட்டுக்குப் பிறகு கைகளைக் கழுவுவதைப் பழக்கமாக்கிக் கொள்ள வேண்டும். வாரம் ஒருமுறையாவது கீ போர்டையும் மவுஸையும் துடைத்துப் பயன்படுத்த வேண்டும்.

செல்போன்: இன்று நாம் அதிகளவில் உபயோகிக்கும் பொருளாகிவிட்ட செல்போனால் ஏற்படும் கிருமித்தொற்று பாதிப்பு, அது வைக்கப்படும் இடத்தைப் பொறுத்தே அமையும். மணல் வெளிகளில் கீழே வைத்துவிட்டு, பின்னர் உபயோகப்படுத்துவது, வெகு நேரம் காதில் வைத்தபடியே பேசுவது... ஆகிய செயல்கள் கிருமித்தொற்று ஏற்படுவதற்கான வாய்ப்பாக அமையும்.

தொட்டால் தொற்றும்! - மவுஸ் முதல் மெனு கார்டு வரை - தப்பிப்பது எப்படி?



எப்படித் தவிர்ப்பது?

அன்றாடம் செல்போனைச் சுத்தப்படுத்த வேண்டும். பொதுவெளிகளில் தரையில் போனை வைப்பதைத் தவிர்க்க வேண்டும்.

ஹெட்செட்: ஒருவரது ஹெட்செட்டை மற்றொருவர் உபயோகப்படுத்துவதால் ஒவ்வாமை ஏற்படும். இதனால், காதுகளின் உள்ளே இருக்கும் சவ்வுகள் பாதிப்படையும்.

எப்படித் தவிர்ப்பது?

மற்றொருவருடைய ஹெட்செட்டை உபயோகப்படுத்தக் கூடாது. வேறு சந்தர்ப்பமே இல்லை என்ற நிலை வந்தால், அதுபோன்ற நேரத்தில் அதைச் சுத்தப்படுத்திவிட்டு, பின்னர் உபயோகப்படுத்தலாம். முடிந்த வரை ஹெட்செட் உபயோகத்தையேகூட தவிர்ப்பது நல்லது. ஏனெனில், ஹெட்செட் அதிகமாக அணிவது செவித்திறனில் பாதிப்பை ஏற்படுத்தும் என சமீபத்திய ஆய்வு ஒன்று கூறியுள்ளது.

தட்டு மற்றும் பாத்திரங்கள்: உணவு தொடர்பான வேலைகளுக்குத்தான் தட்டுகளும் பாத்திரங்களும் உபயோகப்படுத்தப்படுகின்றன. இவற்றை நன்கு கழுவிக் காய வைத்துவிட்டு, உபயோகப்படுத்துவதில் அதிக கவனம் கொள்ள வேண்டும்.

எப்படித் தவிர்ப்பது?


தட்டுகளையும் பாத்திரங்களையும் வெந்நீர் கொண்டு கழுவித் துடைப்பது நல்லது. எந்த நிலையிலும் தட்டுகளை பகிர்ந்துகொள்ளக் கூடாது. உணவை மட்டுமே பகிர்ந்துகொள்ளவும்.

பொம்மைகள்: விளையாடும்போது பொம்மையைக் கடிப்பது, மணலில் வைத்து விளையாடுவது, அழுக்கு நிறைந்த இடங்களில் இருந்து விளையாடுவது முதலியவை கிருமித்தொற்றுக்கான முக்கிய காரணியாக இருக்கும்.

எப்படித் தவிர்ப்பது?

குழந்தைகள் விளையாடும்போது அவர்கள் அருகில் இருந்து பார்த்துக்கொள்ளவேண்டியது அவசியம். பொம்மைகளையும் அவற்றுக்கு உபயோகப்படுத்தப்படும் துணிகளையும் அடிக்கடி சுத்தம் செய்ய வேண்டும்.

கைக்குட்டை மற்றும் துண்டு: இருமல், சளி, காய்ச்சல், வியர்வை மட்டுமில்லாமல், மற்ற ஒட்டுண்ணிகளும் கைக்குட்டைகள் மற்றும் துண்டுகளைப் பகிர்வதன் மூலம் எளிதில் பரவும்.

எப்படித் தவிர்ப்பது?


நாம் உபயோகப்படுத்தும் கைக்குட்டையை வேறு ஒருவருக்குத் தரக்கூடாது. அன்றாடம் துவைக்க வேண்டும். துண்டை நன்கு காய வைக்க வேண்டும். துவைத்து உபயோகிக்க வேண்டும். ஒரு துண்டை ஒருவருக்கு மேல் உபயோகிக்கக் கூடாது.

ஸ்ட்ரா: ஸ்ட்ராவை யாரும் ஷேர் செய்ய மாட்டர்கள் என்பதால், அது பேக் செய்யப்படும் கவரைப் பொறுத்து, அதன் நோய்த்தொற்று பாதிப்பு அமையும்.

எப்படித் தவிர்ப்பது?

ஸ்ட்ரா உபயோகிப்பதைத் தவிர்ப்பது நல்லது. பொது இடங்களில் ஜூஸ் குடிப்பதற்குப் பதிலாக, வீட்டிலேயே தயாரித்து அருந்துவது சிறப்பு.

கதவு மற்றும் தாழ்ப்பாள்:
உண்மையில் டாய்லெட் பேப்பர்களைவிட அதிக அளவு பாதிப்பு, கதவுக் கைப்பிடிகளில் இருக்கிறது. பொதுவான இடங்கள் அனைத்திலும் கதவுகளும் கைப்பிடிகளும் இருக்கின்றன. பலரும் அவற்றை உபயோகப்படுத்துவதால், அவற்றின் மூலம் பரவும் நோய்த்தொற்றுகள் அதிகம்

எப்படித் தவிர்ப்பது?

வேலை முடிந்து வீட்டுக்குள் நுழைந்ததும், முகம், கை கால்களை கழுவிவிட்டு உள்ளே வர வேண்டும். இப்படிச் செய்தால், கைகளில் இருந்து கிருமித்தொற்று பரவாமல் இருக்கும்.

துணி: துணிகளை அன்றாடம் துவைக்கவேண்டியது அவசியம். அப்படிச் செய்யாமல், மூட்டையாகச் சேர்த்து வைப்பது கிருமிகளை ஏற்படுத்தும். அவற்றை அடுத்த முறை உபயோகப் படுத்தும்போது, தொற்று பாதிப்பு ஏற்படும். ஷால், ஜீன்ஸ் முதலியவற்றைத் துவைக்காமல் பல நாள்கள் உபயோகிப்பது கிருமியை ஏற்படுத்தும்.

தொட்டால் தொற்றும்! - மவுஸ் முதல் மெனு கார்டு வரை - தப்பிப்பது எப்படி?



எப்படித் தவிர்ப்பது?

துணி மூட்டைகளைச் சேர்த்து வைக்கக் கூடாது. துவைக்காத துணியை உபயோகப் படுத்தக் கூடாது. உள்ளாடைகளை மூன்று மாதங்களுக்கு ஒரு முறை மாற்ற வேண்டும்.

 ஊக்கு: ஊக்கு முதலிய பொருள்களை வாயில் வைத்திருந்துவிட்டு உபயோகப் படுத்தும் பழக்கம் சிலருக்கு உண்டு. அப்படிச் செய்வது, வாயின் மூலம் நோய்த்தொற்றை ஏற்படுத்தும்.

எப்படித் தவிர்ப்பது?

ஊக்கு, ஹேர்பின் முதலியவற்றை எந்தக் காரணத்தைக்கொண்டும் வாயில் வைக்கக் கூடாது.

ரேஸர்ஸ்: ஆண்கள்தான் பெரும்பாலும் ரேஸர்ஸ் உபயோகப்படுத்துவார்கள். ஒருமுறை உபயோகப்படுத்தியதை மறுமுறை உபயோகப்படுத்துதல் கூடாது.

எப்படித் தவிர்ப்பது?

ஒரு முறை மட்டுமே ஒரு ரேஸரை உபயோகப்படுத்த வேண்டும்.

டிஷ்யூ பேப்பர்:
டிஷ்யூ பேப்பர்களை அப்புறப்படுத்தாமல் இருப்பது நோய்க் கிருமிக்கு வழிவகுக்கும். பயன்படுத்தாமல் இருக்கும் டிஷ்யூ பேப்பரில் கிருமி பாதிப்பு அதிகம் இருக்கும்.

எப்படித் தவிர்ப்பது?

துணிகளை உபயோகப்படுத்துவதைவிட டிஷ்யூ பேப்பரை உபயோகப்படுத்துவது நல்லது. நோய்த்தொற்றைத் தடுப்பதற்கு, ஒருமுறை மட்டுமே அவற்றை உபயோகப்படுத்த வேண்டும்.

கார்ட்ஸ்: நாம் அன்றாடம் உபயோகிக்கும்

ஏ.டி.எம் கார்டு, டெபிட் கார்டு என ஏகப்பட்ட கார்டுகள் உள்ளன. அவற்றை உபயோகிக்கும் இடங்களில் இருந்தெல்லாம் (உதாரணமாக, பெட்ரோல் பங்க், கடைகள், ஷாப்பிங் மால்) ஸ்வைப் செய்யும்போது, மெஷின்களில் இருந்து பாக்டீரியா தொற்றாக அது மாறும் வாய்ப்பு உள்ளது.

எப்படித் தவிர்ப்பது?

இன்றையச் சூழலில் கார்டுகளை உபயோகப் படுத்தாமல் இருப்பது சாத்தியமில்லை. கார்டு பயன்பாட்டுக்குப் பிறகு கைகளைக் கழுவிவிட்டே உணவு உண்ண வேண்டும்.

புத்தகங்கள்: வீடுகளில் கரையான்களால் அதிகம் பாதிப்படைவது புத்தகங்களாகத்தான் இருக்கும்.

புத்தகங்களை வெகு நாள்களுக்கு அலமாரிகளில் சேர்த்து வைப்பது கிருமிகளுக்கு வழிவகுக்கும். இந்தப் பாதிப்பு சுவர்களிலும் ஏற்படும் ஆபத்தும் உள்ளது.

எப்படித் தவிர்ப்பது?

அலமாரிகளை அவ்வப்போது சுத்தம் செய்ய வேண்டும். புத்தகங்களைச் சேகரித்து வைப்பது நல்ல பழக்கம் என்றாலும், அவற்றைப் பராமரிக்க வேண்டியது மிக அவசியம்.

டாய்லெட் பேப்பர்: வீடுகள், ஹோட்டல் அறைகள்... எனப் பல இடங்களில் இது உபயோகப் படுத்தப்படுகிறது. ஃப்ளஷ் அவுட்டில் உபயோகப் படுத்தப்படும் நீர் ஒவ்வொரு முறையும் தெறிக்கும் வாய்ப்பு உள்ளது. இவை அருகில் இருக்கும் டாய்லெட் பேப்பரில் படும்போது, பாதிப்பு அதிகளவில் இருக்கும்.

எப்படித் தவிர்ப்பது?

ஒவ்வொரு முறை டாய்லெட் பேப்பரை உபயோகப்படுத்தும்போதும், முதல் ஒரு மீட்டர் காகிதத்தைக் கிழித்து எறிந்துவிட வேண்டும். அதன் பிறகு உள்ள காகிதத்தை உபயோகப்படுத்த வேண்டும்.

புத்தகப் பை, அலுவலகப் பை: அன்றாடம் வேலைக்குச் சென்று வருபவர்கள், திரும்பி வரும் போது, பேருந்திலும், ரயிலிலும் வருவார்கள். பள்ளிக் குழந்தைகள் என்றால், தங்களின் கைப்பையை ஆங்காங்கே வைப்பதும் எடுப்பதுமாக இருப்பார்கள். இதனாலும், கிருமித்தொற்றுகள் பரவலாம்.

எப்படித் தவிர்ப்பது?

அன்றாடம் உபயோகிக்கும் பையை வாரம் ஒருமுறை துவைக்க வேண்டும். தேவை இல்லாத பொருள்களை அதில் சேமித்து வைப்பதைத் தவிர்க்கவேண்டும். வெளி இடங்களுக்குச் செல்லும்போது, பொதுவெளிகளில் பைகளை வைப்பதை முடிந்தவரைத் தவிர்க்கலாம்.

 சாவி:
இருசக்கர வாகனச் சாவி, வீட்டுச் சாவி முதலிய அனைத்துப் பொருள்களிலும் இருந்து கிருமித்தொற்று பரவும் வாய்ப்பு உள்ளது.

எப்படித் தவிர்ப்பது? 

சாவிகளைக் கண்ட கண்ட இடங்களில் வைக்கும் பழக்கத்தைக் கைவிட வேண்டும்.

 டூத் பிரஷ் ஸ்டாண்ட்: வீடுகளில் வைக்கும் வாஷ் பேசின், பெரும்பாலும் பாத்ரூம்களில் இருக்கும். இது போன்ற இடங்களில், பாத்ரூமில் இருக்கும் கிருமிகள் பிரஷ் மூலமாகப் பரவும் வாய்ப்பு உள்ளது.

எப்படித் தவிர்ப்பது?

பிரஷ் வாங்கும்போது தரும் மூடியைத் தொடர்ந்து உபயோகப்படுத்த வேண்டும். பல் விளக்குவதற்கு முன்னர், டூத் பிரஷ்ஷை நீரில் நன்கு கழுவ வேண்டும்.

- ஜெ.நிவேதா

தொட்டால் தொற்றும்! - மவுஸ் முதல் மெனு கார்டு வரை - தப்பிப்பது எப்படி?

ரூபாய் நோட்டு, நாணயம்: பேருந்துகள், மளிகைக் கடைகள், வீடுகள்... என அனைத்து இடங்களிலும் உபயோகிக்கப்படும் முக்கியமான ஒரு பொருள், பணம். பணத்திலிருந்து கிருமி பரவுவதற்கான ஒரே வாய்ப்பு, அது சேர்த்துவைக்கப்பட்டிருந்த இடம்தான். வெகு நாள்களாக ஒரே இடத்தில் இருந்திருக்குமானால், அதில் பாக்டீரியா பாதிப்புகள் அதிகம் இருக்கும்.

எப்படித் தவிர்ப்பது?   

பழைய நாணயமாக (அ) நோட்டாக இருந்தால், அதை உபயோகப்படுத்துவதை முடிந்தவரைத் தவிர்த்திடுங்கள். அதை அருகில் இருப்பவர்களிடம் கொடுப்பதைத் தவிர்ப்பது நல்லது. உபயோகப்படுத்தியே ஆகவேண்டும் எனில், அதன் பின்னர் நன்கு கையைக் கழுவிக்கொள்ளுங்கள்.

தொட்டால் தொற்றும்! - மவுஸ் முதல் மெனு கார்டு வரை - தப்பிப்பது எப்படி?

கை கழுவுவதற்கு முன்னர்...

 கை கழுவுதல் என்பது, மேற்கூறப்பட்ட அனைத்துப் பிரச்னைகளில் இருந்தும் ஒருவரைக் காக்கும். கை கழுவும்போது, கைவிரல்கள், விரல்களுக்கு இடையில் இருக்கும் இடங்கள், கை மணிக்கட்டு முதலிய அனைத்து இடங்களையும் நன்கு சுத்தம் செய்ய வேண்டும். நன்கு தேய்த்துக் கழுவிய பிறகு, சுத்தமான துணி ஒன்றை  எடுத்து, கையை நன்றாகத் துடைத்துக்கொள்ள வேண்டும். கை கழுவுவதற்கு, ஹேண்ட்-வாஷ் தவிர்த்துவிட்டு, சோப்பு நீரை உபயோகப்படுத்தலாம்.

தொட்டால் தொற்றும்! - மவுஸ் முதல் மெனு கார்டு வரை - தப்பிப்பது எப்படி?

டி.வி ரிமோட்: வீட்டில், ரிமோட்களை நாம் பல இடங்களில் வைப்போம்; எடுப்போம். குழந்தைகள் கையில் கொடுக்கும்போது அதை அவர்கள் வாயில் வைக்கும் வாய்ப்புகளும் அதிகம். இவையெல்லாம் நோய்த்தொற்றுக்கு வழிவகுக்கும்.

எப்படித் தவிர்ப்பது?   

நேரம் கிடைக்கும்போதெல்லாம், ரிமோட்டைத் துடைக்கவேண்டும். அதைப் பயன்படுத்தியபடியே உணவு உண்பது, ஸ்நாக்ஸ் கொறிப்பது போன்ற பழக்கங்களைத் தவிர்க்கவேண்டும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு