Published:Updated:

டாக்டர் டவுட் - நம்பர் ஒன் பிரச்னை!

ஒட்டுமொத்த விகடனுக்கும் ஒரே ஷார்ட்கட்

Use App
டாக்டர் டவுட் - நம்பர் ஒன் பிரச்னை!
டாக்டர் டவுட் - நம்பர் ஒன் பிரச்னை!

ஹெல்த்கண்ணன், பொதுமருத்துவர்

பிரீமியம் ஸ்டோரி

தூக்கத்தில் தன்னை அறியாமலேயே சிறுநீர் கழிக்கும் பழக்கம் குழந்தைப் பருவத்தில் பலருக்கும் உண்டு. வளரும்போது தானாகச் சரியாகிவிடும்  என்பது பெரும்பாலான பெற்றோர்களின் எண்ணம். அது சாத்தியமா, இதை ஆரம்பத்திலேயே சரிசெய்ய இயலுமா என்பதைப் பற்றியெல்லாம் பேசுகிறார் மதுரையைச் சேர்ந்த குழந்தைகள் நல மருத்துவர் கண்ணண்.

டாக்டர் டவுட் - நம்பர் ஒன் பிரச்னை!

சிறுநீர் எப்படி வெளியேறுகிறது?

 நம் சிறுநீரகத்தில் இருந்து, சிறுநீரானது சிறு குழாய்கள் வழியே சிறுநீர்ப்பையை வந்தடைகிறது. அது நிறைந்ததும் மூளைக்குத் தகவல் செல்கிறது. மூளை, சிறுநீர் கழிக்கும் உணர்வை நமக்கு ஏற்படுத்த, சிறுநீர் கழிக்கிறோம். இந்தச் சிறுநீர்ப் பையானது இரண்டு வயதுக்கு உட்பட்ட குழந்தைகளுக்குத் தன்னிச்சையாகச் செயல்படும்.

அதாவது, சிறுநீர் மெதுவாக சிறுநீர்ப்பையில் வந்து சேர்ந்தவுடன், தானாகவே சிறுநீர்ப்பை சுருங்கி, சிறுநீரை வெளியேற்றும். பின், வயது அதிகரிக்கும்போது இதன் கட்டுப்பாட்டை மூளை எடுத்துக்கொள்ளும். இந்தச் செயல்பாடு மூளையின் கட்டுப்பாட்டுக்குள் வந்த பிறகே, குழந்தைகள், தாங்கள் சிறுநீர் கழிக்க வேண்டிய தேவையைச் சொல்வார்கள்.

 பெட் வெட்டிங் (படுக்கையை நனைத்தல்)

 இரவு நேர உறக்கத்தின்போது தன்னை அறியாமலேயே சிறுநீர் கழித்துவிடுவதையே ‘பெட் வெட்டிங்’ என்கிறோம். படுக்கையில் சிறுநீர் கழித்தல் என்பது, பெரும்பாலான குழந்தைகளின் வளர்ச்சியில் ஏற்படும் ஒரு சாதாரண நிலையே. பெரியவர்களுக்குச் சில நோய்களின் காரணத்தாலும், வயது முதிர்வின் காரணமாகவும் பெட் வெட்டிங் ஏற்படலாம். படுக்கையில் சிறுநீர் கழிப்பதை ‘நைட் டைம் இன்கான்டினென்ஸ்’ (Night time incontinence) அல்லது ‘நாக்டர்னல் எனுரீசிஸ்’ (Nocturnalenuresis) என்பார்கள்.

 இந்தப் பிரச்னை ஏன் ஏற்படுகிறது?

 மூன்று வயதுக்கு மேற்பட்ட குழந்தைகளுக்கு இந்தப் பிரச்னை ஏற்படுவதற்குக் கழிப்பறை உபயோகிக்கும் பழக்கம் அவர்களுக்குச் சரியாகக் கற்றுத் தரப்படாததே காரணம்.

 பெரும்பாலும் பெட் வெட்டிங் என்பது இரண்டு வகைக் காரணிகளை கொண்டது. பிறந்ததிலிருந்தே படுக்கையில் சிறுநீர் கழிக்கும் பழக்கம் உள்ளவர்கள், ஒரு பிரிவினர். மற்றொரு பிரிவினர், குறிப்பிட்ட வயதுக்கு மேல் திடீரென்று படுக்கையில் சிறுநீர் கழிப்பவர்கள்.

 முதல் வகையைச் சார்ந்தவர்களுக்குச் சிறுவயது முதல் சிறுநீர் கழிக்கும் பழக்கம் ஒழுங்குபடுத்தாமல் விடப்பட்டிருக்கும் ; அல்லது, மன வளர்ச்சி குன்றியவர்களாக இருப்பார்கள்.

 இரண்டாம் வகையினர், ஏதேனும் மன அழுத்தத்தில் இருந்தால் படுக்கையை நனைக்கும் பிரச்னை ஏற்பட வாய்ப்பு உள்ளது. படுக்கையை நனைத்தல் என்பது வயது பார்க்காமல் எப்போது வேண்டுமானாலும், யாருக்கு வேண்டுமானாலும் ஏற்படலாம்.

டாக்டர் டவுட் - நம்பர் ஒன் பிரச்னை!

குழந்தைகளுக்கு இட மாற்றம் ஏற்படும் சூழல் அமையும்போது இப்பிரச்னை வரலாம். அதாவது படிக்கும் பள்ளியிலிருந்து வேறு பள்ளிக்கு மாற்றுவது, புதுப் பள்ளியில் சேர்ப்பது போன்ற காரணங்களினால் மன அழுத்தத்துக்கு ஆளாக நேரிட்டு பயத்தினால் படுக்கையை நனைப்பார்கள். பள்ளியில் சிறுநீர் கழிக்கும் இடம் சுத்தமாக இல்லையெனும்போது சிறுநீரை அடக்கும் பெண் குழந்தைகளுக்கு, சிறுநீரகத்தில் பாதிப்புகள் ஏற்பட்டு படுக்கையை நனைக்கும் பிரச்னைக்கு உள்ளாகலாம்.

சில குழந்தைகள் பிறந்ததில் இருந்தே படுக்கையை நனைத்துக் கொண்டு இருப்பார்கள். பிறவியிலேயே சிறுநீர்ப்பை சுருங்கி இருப்பதே இதற்குக் காரணம். மேலும், மலச்சிக்கல், சிறுநீர்த் தொற்று, சிறுநீர்ப்பை நிறைந்ததை உணர முடியாத நிலை, சிறுநீர்ப் பாதை மற்றும் நரம்பு மண்டல அமைப்பில் பிரச்னை உள்ளவர்களுக்கும் ‘ஸ்லீப் ஆப்னியா’, ‘டான்சிலைடிஸ்’ போன்ற பிரச்னைகள் உள்ளவர்களுக்கும் படுக்கையை நனைக்கும் தன்மை இருக்கும். இவற்றை பெற்றோர்கள் கவனித்து மருத்துவரிடம் காட்டிச் சரிசெய்ய வேண்டும்.

டாக்டர் டவுட் - நம்பர் ஒன் பிரச்னை!



 சரி செய்யும் முறைகள்

 இரவில் உறங்கச் செல்வதற்கு முன் திரவ உணவுகளை அதிகம் உண்பதைத் தவிர்க்க வேண்டும். தினமும் படுக்கைக்குச் செல்வதற்கு முன்பு சிறுநீர் கழித்துவிட்டுப் படுக்கச் செல்ல வேண்டும் என்பதைப் பழக்கமாக்குங்கள். அப்படிப் படுக்கையில் சிறுநீர் கழிக்கும் குழந்தை களுக்கு அவர்களுக்குப் புரிகின்ற வகையில் தவறுகளைச் சுட்டிக்காட்டுங்கள். வளர்ந்த பெண்களுக்கு இப்பிரச்னை இருந்தால் மகப்பேறு மருத்துவரிடம் காட்டி அதற்கான சிகிச்சையை எடுத்துக்கொள்ள வேண்டும்.

 சிகிச்சை முறைகள்

 குழந்தைகளுக்கு எடுத்துச் சொல்லியும் அவர்கள் படுக்கையை நனைப்பது தொடர்ந்தால், குழந்தைகள் நல மருத்துவரிடம் கூட்டிச் சென்று பரிசோதனை செய்வது நல்லது.

இவர்களுக்கு சிறுநீர்ப் பரிசோதனை, அல்ட்ரா சவுண்ட் பரிசோதனை மற்றும் உளவியல் பரிசோதனை போன்ற பரிசோதனைகள் செய்யப் படும். எல்லாப் பரிசோதனைகளிலும் குழந்தைகள் பாஸ் செய்துவிட்டால் அவர்களுடைய உணவுப் பழக்கத்தில் சிறிய மாறுதல் செய்தாலே போதும்.

ஆங்கில மருத்துவத்தில் இதற்கு இரண்டு வகை மருந்துகளை  மருத்துவர்கள் பரிந்துரைப்பார்கள். ஒன்று இமிபிரமின் (Imipiramin)  என்னும் மருந்து கலந்த டானிக். மற்றொன்று மூக்கின் வழியாகச் செலுத்துகின்ற டெஸ்மோபிரசின் (Desmopressin) என்கிற ஸ்பிரே. இந்த இரண்டு மருந்துகளும் சிறுநீரகப் பையினுள் சிறுநீரைத் தேக்கி வைத்துக் கொள்ளும். இதனால், தன்னை அறியாமல் சிறுநீர் கழிப்பது கட்டுக்குள் கொண்டு வரப்படும். இந்த மருந்துகளை இரவு உறங்குவதற்கு ஒரு மணி நேரத்திற்கு முன் பயன்படுத்த வேண்டும். 4 வயது முதல் 14 வயது வரையுள்ள குழந்தைகளுக்கு இவ்வகை மருந்துகள் உடனடித் தீர்வுகளை அளிக்கும். ‘தொட்டில் பழக்கம் சுடுகாடு மட்டும்’ என்பது போல சிறு வயதில் இருந்தே முறையான கழிப்பறை பழக்கங்களைக் கற்றுக்கொடுத்து விட்டாலே படுக்கையை நனைக்கும் பிரச்னை யிலிருந்து எளிதாகக் குழந்தைகளை மீட்டெடுக்க முடியும்.

- வித்யா காயத்ரி

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு