Published:Updated:

மருத்துவம் நலமா? - நிஜமும் நிழலும் - 17 - ரத்த சோகை எனும் சோகம்!

மருத்துவம் நலமா? - நிஜமும் நிழலும் - 17 - ரத்த சோகை எனும் சோகம்!
பிரீமியம் ஸ்டோரி
மருத்துவம் நலமா? - நிஜமும் நிழலும் - 17 - ரத்த சோகை எனும் சோகம்!

டாக்டர் வெ.ஜீவானந்தம்

மருத்துவம் நலமா? - நிஜமும் நிழலும் - 17 - ரத்த சோகை எனும் சோகம்!

டாக்டர் வெ.ஜீவானந்தம்

Published:Updated:
மருத்துவம் நலமா? - நிஜமும் நிழலும் - 17 - ரத்த சோகை எனும் சோகம்!
பிரீமியம் ஸ்டோரி
மருத்துவம் நலமா? - நிஜமும் நிழலும் - 17 - ரத்த சோகை எனும் சோகம்!
மருத்துவம் நலமா? - நிஜமும் நிழலும் - 17 - ரத்த சோகை எனும் சோகம்!

டந்த ஆண்டு ‘இண்டியா ஸ்பெண்ட் அறிக்கை’ அந்த அதிர்ச்சித் தகவலை வெளியிட்டது. ‘இந்தியாவில் 45 சதவிகித கர்ப்பிணிகள் ரத்தச்சோகையால் பாதிக்கப்பட்டுள்ளனர்’ என்பதுதான் அந்தத் தகவல். உலகிலேயே இந்தியாவில்தான் ரத்தச் சோகை பீடிக்கப்பட்ட கர்ப்பிணிகள் அதிகம். 

‘அனீமியா’ எனும் ரத்தச்சோகை, குறிப்பாகப் பெண்களையும் குழந்தைகளையும் பாதிக்கும் பிரச்னை. இந்தியாவில் பிரசவ மரணங்களையும், பள்ளிப்படிப்பை முடிக்காமல் பாதியில் நிற்கும் குழந்தைகளையும் கணக்கெடுத்தால் இந்த உண்மை புரியும். இந்தியாவில் நிகழும் 50 சதவிகித பிரசவ மரணங்களுக்கு ரத்தச்சோகையே காரணம். ஒரு கர்ப்பிணி ரத்தச்சோகையோடு இருந்தால், அதன் பாதிப்புகள் இன்னும் மோசமாக இருக்கலாம். கருவிலேயே சிசு இறப்பதற்கும், இயல்பான குழந்தையாக அது பிறக்காமல் போவதற்கும், குறைப்பிரசவம் நிகழ்வதற்கும், எடை குறைவான குழந்தை பிறப்பதற்கும் இதுவே காரணமாக இருக்கிறது.   

உலக மக்கள்தொகையில் சுமார் 200 கோடி பேர் ரத்தச்சோகையால் பாதிக்கப்பட்டுள்ளதாக உலகச் சுகாதார நிறுவனம் கூறுகிறது. இவர்கள் பெரும்பாலும் ஏழ்மை நிறைந்த ஆசிய, ஆப்பிரிக்க நாடுகளில் வாழ்பவர்களாகவே உள்ளனர். ‘ஏன் இந்த நிலைமை?’ என்பதைச் சிந்திக்கும்போது, ரத்தச்சோகை மருத்துவ நோய் மட்டுமல்ல, ஒரு சமூக நோயும் என்பது புரியும். இந்தியாவில் ரத்தச்சோகைக்கு மிக முக்கிய காரணம், வறுமைதான். வறுமை இவர்களுக்கு நல்ல சூழலைத் தருவதில்லை; சுகாதாரமான வாழ்விடத்தை உறுதி செய்வதில்லை; ஆரோக்கியமான உணவையும் பெறுவதற்குத் தடையாக இருக்கிறது; விழிப்பு உணர்வு பெறுவதற்கான கல்வியும் இதனாலேயே அவர்களுக்குக் கிடைப்பதில்லை.
ரத்தச்சோகை என்பது, ரத்தத்தில் உள்ள சிவப்பணுக்கள் (ஹீமோக்ளோபின்) குறைவால் உண்டாவது. இந்தச் சிவப்பணுக்களே உடலின் இயக்கத்துக்குத் தேவைப்படும் உயிர்க்காற்றான ஆக்சிஜனைச் சுமந்து செல்வன. இவை குறையும்போது சோர்வு, மூச்சிரைப்பு, படபடப்பு, இதயப் பாதிப்பு போன்றவை உண்டாகின்றன. இந்தச் சிவப்பு ரத்த அணுக்கள், எலும்பின் மையப்பகுதியில் உள்ள பஞ்சு போன்ற எலும்பு மஜ்ஜையில் உற்பத்தி செய்யப்படுகின்றன. ஒருமுறை உருவாகும் சிவப்பணு 120 நாட்கள் மட்டுமே உயிர் வாழும். பிறகு சிதைந்து சிறுநீர், மலம் மூலமாக வெளியேற்றப்படும். சிறுநீரின் மஞ்சள் நிறத்துக்கு இதுவும் ஒரு காரணமாகும். நெஞ்செலும்பு, இடுப்பெலும்பு போன்ற பெரிய எலும்புகள், சிவப்பணு உற்பத்தி செய்யும் ஆலைகள் போலத் தொடர்ந்து வேலை செய்கின்றன.

மருத்துவம் நலமா? - நிஜமும் நிழலும் - 17 - ரத்த சோகை எனும் சோகம்!

ஒட்டுமொத்த விகடனுக்கும் ஒரே ஷார்ட்கட்!

ரத்தச்சோகை மூன்று காரணங்களால் உண்டாகிறது 1. ரத்த அணுக்கள் உற்பத்தியில் குறைபாடு 2. ரத்த அணுக்கள் சிதைவு அதிகமாதல், 3. ரத்த இழப்பு.

ரத்த அணுக்களை உற்பத்தி செய்யும் எலும்பு மஜ்ஜைக்குத் தேவையான வைட்டமின் பி12, ஃபோலிக் ஆசிட் போன்றவை குறைவாகக் கிடைப்பதால் தாலசீமியா, குறைகொண்ட ரத்த சிவப்பணுக்கள் உற்பத்தியாவது, விரைவில் சிதைவது மற்றும் சிக்கில் செல் அனீமியா போன்றவை உண்டாகின்றன. இவை சிலருக்குப் பாரம்பர்யமாகத் தொடர்வதும் உண்டு.

ரத்த இழப்பால், குறிப்பாகப் பெண்களுக்கு ரத்தச்சோகை உண்டாகிறது. மாதவிலக்கு காலத்தில் அதிகமாக, பல நாட்கள் தொடர்ந்து ரத்த இழப்பு ஏற்படுவதைக் கூச்சம் காரணமாகப் பெண்கள் வெளியே சொல்வதில்லை. அதுபோல பிரசவக் காலத்தில் அதிகமான ரத்த இழப்பு உண்டாகலாம். ரத்தம் சில நிமிடத்தில் உறைந்து போகும் தன்மை கொண்டது என்பதால் ரத்தப்போக்கு கட்டுப்படுகிறது. குறைபாடுகள், ஹீமோஃபீலியா போன்ற காரணங்களால் ரத்தப் போக்கு அதிகமாகி உயிருக்கே ஆபத்து உண்டாவதுண்டு. கிராமப்புறப் பெண்கள் 10, 20 சதவிகித ரத்தத்துடன்கூடப் பிரசவத்துக்கு வருவதுண்டு. தொடர்ந்து பல பாட்டில்கள் ரத்தம் செலுத்துவதே உயிரைக் காப்பதற்கான ஒரே வழி. ஆனால், ஆரோக்கியமாக வரும் கணவரும், உறவினரும் கூட ரத்தம் கொடுக்க முன்வராத மூடத்தனத்தையும் காண்கிறோம். ரத்த தான உணர்வை வளர்ப்பதைத் தவிர அவசரக் காலத்தில் உயிர்காக்கும் வழி வேறில்லை.

மலேரியா காய்ச்சலுக்குச் சரியான மருந்து பெற முடியாத மலைவாழ் தோட்டத் தொழிலாளிகள் ரததச்சோகை ஏற்பட்டு இறப்பது சாதாரணமாக இன்றும் நிகழ்கிறது. வயிற்றில் பூச்சிகள், புழுக்கள் தொற்றுவதாலும் ரத்தச்சோகை ஏற்படலாம்.

ஆண்டுக்கு இரண்டு லட்சம் உயிர்களை இந்த ரத்தச்சோகை பலி கொள்கிறது. இத்தனை உயிர்களை பலிகொள்ளும் ரத்தச்சோகையை எளிதாக வெல்ல முடியும். கைகளைச் சுத்தமாகக் கழுவுதல், கழிப்பிட வசதி, பாதுகாக்கப்பட்ட குடிநீர், சத்துள்ள உணவு (கீரை, பயிறு வகைகள், பழங்கள், இறைச்சி), ரத்தப் பெருக்கத்துக்கு உதவும் மருத்துவம் (பி12, ஃபோலிக் ஆசிட், சுண்ணாம்புச்சத்து, பொட்டாசியம், இரும்புச்சத்து போன்றவை கொண்ட மருந்துகள் தருதல்), குழந்தைகளுக்கு ஆண்டுக்கு ஒருமுறை மெபென்டசால் போன்ற, வயிற்றில் இருக்கும் பூச்சிகளை நீக்கும் மருந்துகளை வழங்குதல் போன்றவை நமது இளைய தலைமுறையினரை ரத்தச்சோகையற்ற ஆரோக்கியமானவர்களாக மாற்றும்.

நம் குழந்தைகளின் வளர்ச்சியையே ரத்தச் சோகை தடுக்கிறது. மொழி அறியும் திறன், ஓடியாடி விளையாடும் ஆற்றல், மற்ற குழந்தைகளோடு பழகும் பண்பு என எல்லாமே அடிபட்டுப் போகின்றன. பச்சிளம் குழந்தைக்கு ரத்தச்சோகையால் ஏற்படும் இந்தப் பிரச்னைகளை, நாம் அதன்பின் இரும்புச்சத்து மாத்திரைகள் கொடுத்து சரி செய்ய முடியாது என்பதுதான் வேதனை. நோய் எதிர்ப்புச்சக்தியையும் ரத்தச் சோகை குறைப்பதால், தொற்று நோய்கள் தாக்கும் அபாயமும் ஏற்படுகிறது. 

பல சுகாதாரத் திட்டங்களையும், குழந்தைநலத் திட்டங்களையும் அரசு அமல்படுத்தி வருகிறது. ஊரக வேலைவாய்ப்பு உறுதித் திட்டமும் இதற்காகவே வந்தது. ‘உணவுப்பொருள்கள், பால், உப்பு போன்றவற்றில் இரும்பு, சுண்ணாம்பு, பொட்டாசியம், ஜிங்க், அயோடின் போன்ற நுண்ணூட்டச் சத்துக்களைக் கலப்பது அவசியம்’ எனும் புதிய சட்டத்தையும் அரசு இயற்றி உள்ளது. 

பெண்ணியவாதிகள் சமத்துவம், கல்வி, வேலைவாய்ப்பு போன்றவற்றுக்குப் போராடு வதுடன், கிராமங்களிலும், மலைப்பகுதிகளிலும் கல்வி பெற முடியாமல் அறியாமையில் சாகும் தம் தோழியர்களுக்கு முறையான ரத்த அளவுப் பரிசோதனை செய்தல், ரத்த இழப்பு பற்றிய விழிப்பு உணர்வூட்டுதல், சத்து மருந்துகள் வழங்குதல், சத்தான உணவு - தூய்மை பற்றிய கல்வி தருதல் போன்றவற்றுக்காகப் போராடுவதும் அவசியமானது. நகர்ப்புறங்களில் வாழும் வசதிவாய்ந்த பெண்களில்கூட பலரும் ரத்தச் சோகை கொண்டவர்களாகவே உள்ளனர். ரத்தச் சோகை மருத்துவ நோய் மட்டுமல்ல, பெண்களைக் கொல்லும் முதன்மையான சமூக நோயும்கூட. மாதர் இயக்கங்கள், தம் வறிய சகோதரிகளை மெல்லக் கொல்லும் ரத்தச்சோகையிலிருந்து விடுவிக்கும் சமூக நலப்பணிகளையும், போராட்டங்களையும் மேற்கொள்வது அவசியம்.

(நலம் அறிவோம்)

படம்:  எம்.விஜயகுமார்

‘விலை குறைத்து வாங்கவில்லை!’

கடந்த 17.5.17 இதழ் கழுகார் பகுதியில் ‘சர்ச்சையில் நிரஞ்சன் மார்டி’ என்ற பெட்டிச் செய்தி வெளியாகி இருந்தது. மத்திய அரசின் பொதுத்துறை நிறுவனமான இந்துஸ்தான் டெலிபிரின்டர்ஸ் நிறுவனத்துக்குச் சொந்தமான 10.46 ஏக்கர் நிலத்தை, அதன் கைடுலைன் மதிப்பு 387 கோடி ரூபாய் என இருந்தபோது, 272 கோடி ரூபாய்க்குக் கடந்த 2013-ம் ஆண்டில் வி.ஜி. என் கன்ஸ்ட்ரக்‌ஷன்ஸ் நிறுவனத்துக்கு விற்றது பற்றி அதில் குறிப்பிட்டிருந்தோம்.

இதைத் தொடர்ந்து வி.ஜி.என் கன்ஸ்ட்ரக்‌ஷன்ஸ் தரப்பில், விளக்கக் கடிதம் ஒன்றை அனுப்பியிருக்கிறார்கள். ‘2007 முதல் 2013 வரை பலமுறை ஆன்லைன் ஏலத்தில் இந்த இடத்தை விற்க முயன்றும் யாரும் வாங்க முன்வரவில்லை. 2012 செப்டம்பரில் இந்த நிலத்தின் அடிப்படை விலை ரூ.250 கோடி என நிர்ணயம் செய்யப்பட்டது. அதை நாங்கள் 2013-ல் ரூ.272 கோடிக்கு வாங்கினோம். 2013-ம் ஆண்டில் அந்தப் பகுதிக்கு கைடுலைன் மதிப்பு திடீரென நியாயமே இல்லாமல் மூன்று மடங்கு உயர்த்தப்பட்டதால், நாங்கள் குறைந்த விலைக்கு வாங்கியது போல் தெரிகிறது. உண்மையில், நான்கைந்து ஆண்டுகளாக விற்காமல் இருந்த இடத்தை நியாயமான விலையில்தான் நாங்கள் வாங்கினோம்’ என்று அதில் குறிப்பிட்டுள்ளனர்.