Published:Updated:

அதீத ஊட்டம் ஆரோக்கியமல்ல!

ஹெல்த்ஷைனி, ஊட்டச்சத்து நிபுணர்

பிரீமியம் ஸ்டோரி

ளவுக்கு மிஞ்சினால் அமிர்தம் மட்டுமல்ல ஆரோக்கியமும் ஆபத்துதான். ஆரோக்கியம் எப்படி ஆபத்தாகும் என்கிறீர்களா? ஆரோக்கியம் என நினைத்துக்கொண்டு சிலர் செய்கிற தவறான விஷயங்கள் அப்படித்தான்.

ஊட்டச்சத்துக் குறைபாடு என்பது எந்தளவுக்கு உடனடியாகக் கவனிக்கப்பட வேண்டிய விஷயமோ அதேபோன்றதுதான் அதீத ஊட்டமும். உடலுக்குத் தேவையைவிட அதிகமாகக் கிடைக்கிற ஊட்டமும் அனாவசியமானதுதான். அப்படியொரு நிலைதான் ஹைப்பர் விட்டமினோசிஸ் (Hypervitaminosis). அப்படி என்றால் என்ன? ஹைப்பர்விட்டமினோசிஸ் எப்படி ஆரோக்கியக் கேட்டுக்கு வழிவகுக்கும்? விளக்கமாகப் பார்ப்போம்.

அதீத ஊட்டம் ஆரோக்கியமல்ல!

ஹைப்பர்விட்டமினோசிஸ்

நாம் சாப்பிடும் உணவுகளிலிருந்து கிடைக்கும் ஊட்டச்சத்துகள் இரண்டு வகைப்படும். ஒன்று, பெரிய ஊட்டச்சத்துகள். மற்றொன்று, சிறிய ஊட்டச்சத்துகள். நம் உடலுக்குப் பெரிய ஊட்டச்சத்துகளின் தேவைதான் அதிகம். சிறிய ஊட்டச்சத்துகளின் தேவை சற்றுக் குறைவாகவே இருக்கும். தேவை குறைவாக இருந்தாலும், உடலின் இயக்கத்துக்கும் வலிமைக்கும் சிறிய ஊட்டச்சத்துகளே துணைபுரிகின்றன. சிறிய ஊட்டச்சத்துகளில்தான் வைட்டமின்களும் மினரல்களும் வருகின்றன.  

அதீத ஊட்டம் ஆரோக்கியமல்ல!


நம் உடலுக்கு ஒருநாளைக்கு எவ்வளவு ஊட்டச்சத்து தேவை என்பதை இந்திய மருத்துவ ஆராய்ச்சிக் கவுன்சிலின்கீழ் செயல்படும் தேசிய ஊட்டச்சத்துக்கழகம் பரிந்துரை செய்துள்ளது. இதற்கு ‘பரிந்துரைக்கப்பட்ட உணவு அளவீடுகள்’ என்று பெயர். வைட்டமின்களின் அளவு  IU (International Units) என்ற அளவீட்டில் குறிப்பிடப்படுகிறது. உதாரணமாக, ஒருநாளைக்கு ஓர் ஆணுக்கு வைட்டமின் டி 1000 IU   தேவைப்படும். இது, சூரியஒளி மூலமாகவும் உணவுகள் மூலமாகவும்  கிடைக்கும்.

வைட்டமின் ‘டி’ நம் சருமத்துக்கு மிக அவசியமான ஒரு வைட்டமின். ஆனால்,  நம் உடலுக்குத் தேவைப்படும் அளவைவிட அதிகமாகும்போது அதனால் பல்வேறு தீமைகள் உண்டாகும். நாம் உண்ணும் உணவின் மூலமாக இந்த வைட்டமின்கள் கிடைக்கும்போது அது தேவையான அளவுகளைவிட  அதிகமாவதற்கான வாய்ப்புகள் இல்லை.

ஆனால், வைட்டமின் சத்துக்கான மாத்திரைகளை உட்கொள்ளும்போது அவற்றின் அளவு அதிகமாக வாய்ப்பு உண்டு. நம் உடலில் உள்ள வைட்டமின்கள், தேவையான அளவைவிட அதிகமாவதே ‘ஹைப்பர்விட்ட மினோசிஸ்’.

அதீத ஊட்டம் ஆரோக்கியமல்ல!

வைட்டமின்களின் வகைகள்

வைட்டமின்கள் பொதுவாக இரண்டு வகைப்படும். அவை கொழுப்பில் கரையக்கூடிய வைட்டமின்கள் மற்றும் நீரில் கரையக்கூடிய வைட்டமின்கள். நீரில் கரையக்கூடிய வைட்டமின்களால் உடலுக்கு அதிகமான பாதிப்பில்லை. ஏனென்றால், அவை சிறுநீர் மூலமாகவோ வியர்வை மூலமாகவோ வெளியேறிவிடும்.

கொழுப்பில் கரையக்கூடிய வைட்டமின்கள் அதிகமானால்,  நம் உடலுக்குப் பல்வேறு பாதிப்புகள் ஏற்படும். ஏனெனில், கொழுப்பில் கரையக்கூடிய வைட்டமின்கள் சிறுநீர் மூலமாகவோ வியர்வை மூலமாகவோ வெளியேறாது. அவை உடலில் கல்லீரலிலோ சிறுநீரகத்திலோ அப்படியே தங்கிவிடும்.

வைட்டமின் ஏ, டி, இ மற்றும் கே ஆகியவை கொழுப்பில் கரையக்கூடிய வைட்டமின்கள். வைட்டமின் பி மற்றும் சி ஆகிய இரண்டும் நீரில் கரையக்கூடியவை.

பொதுவாக, வைட்டமின் பி மற்றும் சி ஆகிய இரண்டின் தேவையும் மிகக் குறைந்த அளவே இருக்கும். மேலும், இவை இரண்டும் நீரில் கரையக்கூடிய வைட்டமின்கள் என்பதால், இவற்றால் உடலுக்குப் பாதிப்புகள் குறைவு. ஆனால், கொழுப்பில் கரையக்கூடிய வைட்டமின்கள் அப்படி இல்லை. உதாரணமாக, ஓர் ஆணின் உடலில்  வைட்டமின் டி-யின் அளவு 4000 IU-வைவிட அதிகமானால் அது நச்சுத்தன்மையை  ஏற்படுத்தும்.

அதீத ஊட்டம் ஆரோக்கியமல்ல!

ஹைப்பர்விட்டமினோசிஸின் அறிகுறிகள்

ஆரம்பத்தில்  அஜீரணக் கோளாறுகள், தொடர்ச்சியான வாந்தி, வயிற்றுப்போக்கு, வாயின் ஓரத்தில் புண்கள் ஆகியவை ஏற்படும்.ஆனால், இதேநிலை தொடர்ந்தால்  நரம்பு தொடர்பான கோளாறுகள் உருவாகும். அதிகமான தலைவலி, தூக்கம் ஏற்படும். எப்போதும் ஒருவித வெறுப்புணர்வு இருந்துகொண்டே இருக்கும். இந்த நிலையில், கோமா முதல் மரணம் வரை ஏற்பட வாய்ப்புள்ளது.

யாரைப் பாதிக்கும்?

பெரும்பாலும் கர்ப்பிணிகளும் முதியவர்களும் தான் வைட்டமின்  குறைபாடு உள்ளவர்களாக இருப்பார்கள். இதனால் வைட்டமின் மாத்திரைகளை  அதிகமாக உட்கொள்வார்கள். இவர்கள் மருத்துவரிடம் பரிசோதித்த பின்னர்தான் ஒவ்வொரு முறையும் மருந்து மாத்திரைகளை உட்கொள்ள வேண்டும். கர்ப்பிணிகள் தங்கள் தேவைக்கு அதிகமாக வைட்டமின் மாத்திரைகள் உட்கொள்வது  கருவிலுள்ள குழந்தையைப் பாதிக்கும். அதேபோல்  முதியவர்கள் அதிகமாக உட்கொண்டால் மரணம் ஏற்படக்கூட வாய்ப்பு உண்டு.  முதியவர்கள் மட்டுமின்றி அனைவருமே இந்த விஷயத்தில் கவனமாக இருக்க வேண்டும்.

தடுக்கும் வழிகள்

நம் உடலில் வைட்டமின் தேவை இருந்தால் அதை நாம் உண்ணும் உணவுகள் மூலமாகவே சரிசெய்ய வேண்டும். பழங்கள், காய்கறிகள் ஆகியவற்றை உண்ணும்போது நம் உடலுக்குத் தேவையான அத்தனை வைட்டமின்களும் எளிதாகக் கிடைக்கின்றன. ஒருவேளை மாத்திரைகளின் மூலம் இதனைச் சரிசெய்ய நினைத்தால், மருத்துவரின் அறிவுரையோடுதான் உட்கொள்ள வேண்டும்.

ஒவ்வொரு நாளும் நம் உடலில் பழைய செல்கள் அழிந்து புதிய செல்கள் உருவாகும். அழியும் செல்கள் அதிகமாகவும் உருவாகும் செல்கள் குறைவாகவும் இருந்தால், நம் உடலில் எண்ணற்ற பாதிப்புகள் உண்டாகும். அதைச் சமநிலைப்படுத்தும் வேலையை இந்த வைட்டமின்களில் உள்ள ஆன்டிஆக்ஸிடண்ட்கள் தான் செய்கின்றன. நாம் உண்ணும் உணவுகள்கூட வைட்டமின்கள் துணையின்றிச் சக்தியாக மாறாது.

நாம் வெறுமனே பால் குடித்துவிட்டு  வீட்டுக்குள் இருந்தால், அதன் பலன் நமக்குக் கிடைக்காது. பால் குடித்த பின்னர் சூரிய ஒளியில் சிறிது நேரம் நின்றால்தான் பால் குடித்த பலன் முழுமையாகக் கிடைக்கும்.

ஆக, வைட்டமின்கள் குறித்துத் தெளிவாகப் புரிந்துகொள்வோம். ஹைப்பர்விட்டோமி னோசிஸ் வராமல் தற்காத்துக்கொள்வோம்!

- இரா.செந்தில்குமார்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு