Published:Updated:

மாடர்ன் மெடிசின்.காம் - 15 - எலும்பு வலுவிழப்பு நோய்க்குப் புதிய சிகிச்சை

ஒட்டுமொத்த விகடனுக்கும் ஒரே ஷார்ட்கட்

Use App
மாடர்ன் மெடிசின்.காம் - 15 - எலும்பு வலுவிழப்பு நோய்க்குப் புதிய சிகிச்சை
மாடர்ன் மெடிசின்.காம் - 15 - எலும்பு வலுவிழப்பு நோய்க்குப் புதிய சிகிச்சை

கு.கணேசன், பொதுநல மருத்துவர்ஹெல்த்

பிரீமியம் ஸ்டோரி

ம்பது வயதைக் கடந்துவிட்டால் போதும். உயர் ரத்த அழுத்தம், நீரிழிவு, கண் புரை, காது கேளாமை, மாரடைப்பு, மூட்டுவலி எனப் பல நோய்கள் வரிசைகட்டி வந்து நிற்கும். இப்போது, புதிதாக ‘ஆஸ்டியோபோரோசிஸ்’ (Osteoporosis) என்று அலோபதி மருத்துவர்களால் அழைக்கப்படும் ‘எலும்பு வலுவிழப்பு நோய்’ இந்த வரிசையில் சேர்ந்துள்ளது. அதிலும் குறிப்பாக மாதவிலக்கு நின்ற பெண்களுக்கு இந்த நோய் அதிக பாதிப்பைத் தருகிறது.

உடல் உழைப்பு குறைந்து போனது, உடற்பயிற்சி இல்லாதது, மேற்கத்திய உணவுமுறைகளைப் பின்பற்றுவது போன்ற பல காரணங்களால் இந்த நோய் ஏற்படுவது இப்போது அதிகரித்து வருகிறது.  

மாடர்ன் மெடிசின்.காம் - 15 - எலும்பு வலுவிழப்பு நோய்க்குப் புதிய சிகிச்சை

‘எலும்பு வலுவிழப்பு நோய்’ என்றால் என்ன?

 நம் உடலுக்கு வடிவம் தருகிற எலும்புகள்தான் உடல் உறுப்புகளையும் தாங்கிப் பிடிக்கின்றன; நடப்பது, நிற்பது, குனிவது போன்ற உடல் இயக்கங்களுக்குத் தசைகளுடன் இணைந்து செயல்படுகின்றன. இதற்காக ஒவ்வொரு எலும்பும் குறிப்பிட்ட கால இடைவெளியில் தன்னைப் புதுப்பித்துக்கொள்கிறது. எலும்பில் உள்ள பழைய செல்கள் அழிக்கப்பட்டு, புதிய செல்கள் உற்பத்தியாகின்றன. இளமையில் இந்தச் செயல்பாடு மிக வேகமாக நிகழும். வயது ஆகஆக இது மெதுவாக நிகழும். பொதுவாக 35 வயதுக்குப் பிறகே புதிய செல்கள் உருவாகுவது தாமதமாகும். பழைய செல்கள் அழிந்த இடங்களில் புதிய செல்கள் உருவாகாமலும் போகும். அப்போது எலும்பின் இயல்பான அடர்த்தி (Bone mass) குறையும். இதற்கு ‘ஆஸ்டியோபீனியா’ (Osteopenia) என்பது ஆங்கிலப் பெயர். தமிழில், ‘எலும்புத் திண்மக் குறைவு நோய்.’

ஐம்பது வயதுக்கு மேல் எலும்பின் அடர்த்தி இன்னும் குறையும்போது அதில் சிறுசிறு துவாரங்கள் விழுந்து வலிமையை இழக்கும். இதன் விளைவாக எளிதில் நிற்க முடியாமல், அதிக தூரம் நடக்க முடியாமல் போகலாம். கை கால்களில் வலி உண்டாகலாம். நாளடைவில் அந்த எலும்பு முறிந்து போகவும் அதிக வாய்ப்பு உண்டாகிறது. இதைத்தான் ‘எலும்பு வலுவிழப்பு நோய்’ என்கிறோம்.

மாடர்ன் மெடிசின்.காம் - 15 - எலும்பு வலுவிழப்பு நோய்க்குப் புதிய சிகிச்சை

காரணங்கள்

எலும்பு வலிமையை இழப்பதற்குப் பல காரணங்கள் உள்ளன.  முதுமையில் ஆண்களுக்கு ‘டெஸ்டோஸ்டீரான்’  ஹார்மோன் குறைவதால் இது ஏற்படுகிறது. பெண்களுக்கு மாதவிலக்கு நின்றதும் ‘ஈஸ்ட்ரோஜென்’ ஹார்மோன் சுரப்பது குறைந்துவிடுவதால் இவர்களுக்கு எலும்பு பலவீனம் அடைந்து ‘எலும்பு வலுவிழப்பு நோய்’ வந்துவிடுகிறது. அடுத்து, புகைபிடித்தல், மது அருந்துதல், போதைப்பழக்கம், உடல் பருமன், தைராய்டு பிரச்னை போன்ற பலவற்றால் இந்த நோய் ஏற்படுகிறது.

பரம்பரை ரீதியாகவும் இது வரலாம். வறுமை, பசியின்மை, வயிற்றில் அறுவைசிகிச்சை செய்தல் போன்றவற்றின் காரணமாகத் தேவையான ஊட்டச்சத்துள்ள உணவுகளை நெடுங்காலம் சாப்பிடாதவர்களுக்குக் கால்சியம் மற்றும் வைட்டமின் டி குறைபாடு ஏற்படும். இந்த இரண்டு ஊட்டச்சத்துகளும் எலும்பின் வலிமைக்கும் திண்மைக்கும் அடிப்படையானவை. எனவே, இந்தச் சத்துகள் குறையும்போது இவர்களுக்குக் காலப்போக்கில் ‘எலும்பு வலுவிழப்பு நோய்’ வர வாய்ப்புண்டு.

இதுபோல், உடற்பயிற்சி இல்லாதவர்களுக்கும், உடல் உழைப்புக் குறைந்தவர்களுக்கும் வலிப்பு நோய்க்கான மாத்திரைகள் மற்றும் ஸ்டீராய்டு மருந்துகளைத் தொடர்ந்து பல வருடங்களுக்கு எடுத்துக்கொள்பவர்களுக்கும் இந்த நோய் வரலாம். ஒல்லியாக உள்ளவர்களுக்கு ஏற்கெனவே எலும்புகள் பலவீனமாக இருக்கும் என்பதால் முதுமையில் இவர்களுக்கு ‘எலும்பு வலுவிழப்பு நோய்’ விரைவில் வந்துவிடும். அட்ரீனல் ஹார்மோன் மற்றும் பேராதைராய்டு ஹார்மோன்களின் அதீதச் செயல்பாடு காரணமாகவும் இந்த நோய் ஏற்படுவதுண்டு.

என்னென்ன தொல்லைகள்?

மாடர்ன் மெடிசின்.காம் - 15 - எலும்பு வலுவிழப்பு நோய்க்குப் புதிய சிகிச்சை



பெரும்பாலும் இந்த நோய் பல ஆண்டுகளாக உடலுக்குள்ளேயே மறைந்திருந்து, இறுதியில் எலும்பு முறிவு ஏற்படும்போதுதான் வெளியில் தெரியவரும். கீழே விழாமல், உடலில் எவ்வித அடியும் படாமல் எலும்பு முறிவு ஏற்படுவதுதான் இந்த நோயின் தனித்தன்மை. இடுப்பெலும்பு, முதுகெலும்பு, மணிக்கட்டு ஆகியவற்றில்தான் எலும்பு முறிவு அதிகமாக ஏற்படும்.

நோயைக் கண்டறிவது எப்படி?   

நாற்பது வயதுக்கு மேற்பட்டவர்கள் குறிப்பிட்ட கால இடைவெளியில் மருத்துவரைச் சந்தித்து ‘டெக்சா ஸ்கேன்’ (Dexa Scan) எனும் பரிசோதனை மூலம் இந்த நோயை அறியலாம். இது எலும்பின் அடர்த்தியை – அதாவது திண்ம அளவை - (Bone Mineral Density – BMD) அளக்கும் பரிசோதனை. எலும்பு முறிவு ஏற்படுவதற்கு முன்பாகவே எலும்பின் திண்ம அளவைச் சொல்லிவிடும். அதை  ‘டி ஸ்கோர்’ ( T Score) என்று சொல்கின்றனர். இந்த அளவு, பிளஸ் 1 எஸ்டி(SD)க்கும், மைனஸ் 1 எஸ்டிக்கும் இடையில் இருந்தால், அது இயல்பு அளவு. மைனஸ் 1 எஸ்டி முதல் மைனஸ் 2.5 எஸ்டிக்கும் இடைப்பட்டதாக இருந்தால், அது எலும்புத் திண்மக்குறைவு நோயைக் குறிக்கும். மைனஸ் 2.5 எஸ்டிக்கும் கீழ் இருந்தால், அது எலும்பு வலுவிழப்பு நோயைக் குறிக்கும்.

இந்த அளவுகளை வைத்து ஒருவருக்கு எதிர்காலத்தில் எலும்பு முறிவு ஏற்பட வாய்ப் புள்ளதா என்பதையும் ஏற்கெனவே சிகிச்சையை மேற்கொள்கிறவர்களுக்கு அது பலன் தருகிறதா என்பதையும் இதன்மூலம் தெரிந்துகொள்ளலாம்.

மாடர்ன் மெடிசின்.காம் - 15 - எலும்பு வலுவிழப்பு நோய்க்குப் புதிய சிகிச்சை

சிகிச்சை என்ன?

முதுமையில் எலும்பு வலுவுக்குத் தேவைப்படும் கால்சியம் மற்றும் வைட்டமின் – டி சத்துகள் உடலில் குறைவதால், அவற்றுக்கு முதலில் சிகிச்சை தரப்படும். தினமும் ஒருவருக்கு 500 - 1000 மில்லி கிராம் கால்சியம் தேவை. இதை மாத்திரைகள் மூலம் பெற்றுக்கொள்ளலாம். மேலும், தினமும் 2,000 யூனிட்டுகள் என்ற அளவில் வைட்டமின்-டி மாத்திரையைச் சாப்பிடலாம். அல்லது வாரத்துக்கு 60,000 யூனிட்டுகள்  கொண்ட ஒரு மாத்திரை  என்ற அளவில் ஆறு வாரங்களுக்கும், அதற்குப்பிறகு மாதம் ஒரு மாத்திரையையும் சாப்பிடலாம்.

இந்த நோய்க்கு ஊசி மருந்துகளும் வந்துள்ளன.  ‘பிஸ்பாஸ்போனேட்’ (Bisphosphonate) வகை மருந்து கள் என்று அழைக்கப்படும் அலென்ட்ரோனேட் (Alendronate), பேன்ட்ரோனேட் (Bandronate), ஸோலிடிரோனிக் அமிலம் (Zoledronic acid) எனப் பலதரப்பட்ட மருந்துகள் கிடைக்கின்றன. மருத்து வரின் ஆலோசனையில் இவற்றையும் பயன்படுத்திப் பலன் அடையலாம். சில பெண்களுக்கு ‘ஹார்மோன் மாற்று சிகிச்சை’ (Hormone Replacement Therapy) தரப்படுவதும் உண்டு. என்றாலும் இதன் பக்க விளைவாகக் கருப்பைவாய்ப் புற்றுநோய் வருவதற்கு அதிக வாய்ப்பு உள்ளதாக ஓர் எச்சரிக்கைத் தகவலும் வந்துள்ளது.

புதிய சிகிச்சை என்ன?

இந்த நோய்க்கு ‘ரோமோசோஸுமாப்’ (Romosozumab) எனும் பெயரில் புதிதாக ஒரு மருந்து கண்டுபிடிக்கப்பட்டுள்ளது. இங்கிலாந்தில் அலபாமா பல்கலைக்கழகத்தைச் சேர்ந்த மருத்துவ ஆராய்ச்சியாளர்கள் இதைக் கண்டுபிடித்துள்ளனர். இது வயோதிகத்தில் எலும்பு செல்கள் புத்தாக்கம் பெறுவதைத் தடுக்கின்ற  ‘ஸ்கிலிரோஸ்டின்’ (Sclerostin) எனும் புரதத்தைச் சிதைத்துவிடுகிறது. இதனால் எலும்பின் திண்ம அளவு சீராக இருக்கிறது, அதன் வலு குறைவதில்லை; எலும்பு முறிவுக்கு வழி ஏற்படுவதில்லை. இதுவரை இந்த நோய்க்குக் கொடுக்கப்பட்ட ‘பிஸ்பாஸ்போனேட்’ வகை மருந்துகள் எல்லாமே எலும்பு செல்கள் சிதைவடைவதைத் தடுத்து, நோயைத் தடுத்து வந்தன. இதற்கு மாறாக, இந்தப் புதிய மருந்தானது எலும்பு செல்கள் புதிதாக வளர்வதற்கும் துணை புரிவதால், எலும்புகள் வலுவிழப்பதற்கு வாய்ப்பே இல்லாமல் போகிறது. நோய் நன்கு கட்டுப்படுகிறது. எனவே, இந்த மருந்துக்கு உலக அளவில் நல்ல வரவேற்பு உள்ளது. பெண்களுக்கு எலும்பு முறிவு ஏற்படாமல் பாதுகாக்கப் பிறந்த மருந்து இது. மிக விரைவில்  மருந்துச்சந்தைக்கு வர இருக்கிறது.

(தேடுவோம்)

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு