Published:Updated:

தொற்றுநோய்களின் உலகம்!

வி.ராமசுப்பிரமணியன் தொற்றுநோய் சிறப்பு மருத்துவர்ஹெல்த் - 2

பிரீமியம் ஸ்டோரி

ந்த உலகத்தில் மிகச்சிறப்பான எந்திரங்கள் பொருத்தப்பட்ட, ஆகச்சிறந்த தொழிற்சாலை எது தெரியுமா? உங்கள் உடல்தான். மனித உடலைப்போல மிகச்சிறப்பாக இயங்கும் தொழிற்சாலை, உலகத்தில் இதுவரை உருவாக்கப்படவேயில்லை. எத்தனை கிருமிகள்..? எவ்வளவு தூசுகள்? எத்தனை தாக்குதல்கள்..? ஆரோக்கியம் பற்றிக் கவலையே இல்லாமல் நாம் செய்கிற எத்தனையோ தவறுகளைத் தாங்கிக்கொண்டு இந்த உடல் தன்னைத்தானே தகவமைத்துக்கொண்டு செயல்பட்டுக்கொண்டே இருக்கிறது.  

தொற்றுநோய்களின் உலகம்!

ஓர் ஆச்சர்யமான, அதிர்ச்சியான செய்தி சொல்கிறேன். மனித உடம்பு செல்களால் ஆனது என்பது எல்லோருக்கும் தெரியும். உத்தேசமாக எத்தனை செல்கள் இருக்கும்? ஊகிக்க முடிகிறதா? 10 13. அதாவது, 10க்குப் பக்கத்தில் 13 சைபர் போட்டுக்கொள்ளுங்கள். அவ்வளவு செல்கள் நம் உடலில் இருக்கின்றன. சரி... நம் உடலில் எத்தனை பாக்டீரியாக்கள் இருக்கும்? 10 14 . ஆமாம். 10-க்குப் பக்கத்தில் 14 சைபர் போட்டால் என்ன வருமோ, அத்தனை பாக்டீரியாக்கள் நம் உடம்பில் இருக்கின்றன. மனிதர்கள் செல்களால் ஆனவர்கள் என்று சொல்வதைவிட, மனிதர்கள் பாக்டீரியாக்களால் நிரம்பியவர்கள் என்று சொல்வதுதான் சரியாக இருக்கும். 

தொற்றுநோய்களின் உலகம்!



மைக்ரோபயோம் (Microbiome) என்று ஒரு கணக்கீடு இருக்கிறது. ஓர் இடத்தில் என்ன மாதிரியான கிருமிகள் இருக்கின்றன என்பதைக் கண்டுபிடிப்பதற்கான கணக்கீடு. ‘ஹியூமன் மைக்ரோபயோம்’ பற்றி நிறைய ஆராய்ச்சிகள் நடந்துகொண்டிருக்கின்றன. பாக்டீரியாக்கள் இல்லாமல் மனித உடல் இல்லை. அவற்றை உடம்பில் தகுந்த அளவுக்கு, தகுந்த முறையில் நிர்வகிப்பதன் மூலம் ஆரோக்கியத்தை மேம்படுத்துவது பற்றிய ஆராய்ச்சிகளும் நடக்கின்றன.

பாக்டீரியாக்கள் எல்லாமே கெட்டவை அல்ல. எல்லாமே நல்லவையும் அல்ல. ஓரிடத்தில் நன்மை செய்யும் பாக்டீரியா, இன்னோர் இடத்தில் கெடுதல் செய்யும். குறிப்பிட்ட அளவாக இருக்கும்போது நன்மை செய்யும் பாக்டீரியா, அதிகரித்தால் கெடுதல் செய்யும். நம் குடலுக்குள் ஏராளமான பாக்டீரியாக்கள் இருக்கின்றன. நாம் சாப்பிடும் உணவு செரிமானமாக அவற்றின் பங்கு ரொம்பவே முக்கியம். பாக்டீரியாக்கள் உணவைச் சிதைத்து செரிக்கச் செய்யும்போது சில வாயுக்களும் அமிலங்களும் உருவாகும். அவைதான் வாயுவாக, கழிவாக வாடையோடு வெளியேறுகின்றன. ஆக, நாம் சாப்பிடும் உணவைச் செரித்து உடலுக்குத் தேவையான சத்துகளைக் கிரகிக்கச் செய்து, தேவையற்ற கழிவுகளை வெளியேற்றுவதில் பாக்டீரியாக்கள் முக்கியப் பங்கு வகிக்கின்றன. ஆனால், நல்ல பாக்டீரியாக்களை அடையாளம் கண்டு அவற்றை மட்டும் வளர்த்தெடுப்பது என்பது சவாலான வேலை.

தொற்றுநோய்களின் உலகம்!

திடீரென ஜலதோஷம் பிடிக்கிறது. அதற்காக, ஆன்டிபயாடிக் மாத்திரைகளைச் சாப்பிடுகிறோம். அந்த மாத்திரைகள், ஜலதோஷத்தை உருவாக்கிய பாக்டீரியாக்களை மட்டும் கொல்லாமல், குடலில் இருக்கிற பல நல்ல பாக்டீரியாக்களையும் கொன்று விடும். அதேநேரத்தில் கெட்ட பாக்டீரியாக்கள் அதிகமாகிவிடும். உதாரணத்துக்கு குளோஸ்ட்ரிடியம் டிஃபிஸிள்(Clostridium difficile) என்ற பாக்டீரியா அதிகமாகிக் கடுமையான பேதியை உருவாக்கிவிடும். கடுமையான காய்ச்சலும் வரும். இதை வெளியேற்றுவது சிரமமான வேலை.

இன்னோர் உதாரணம் பார்க்கலாம். பொதுவாக மனித உடலின் சராசரி அமிலத்தன்மை என்பது 7.4 பி.ஹெச் ( pH scale). பெண்களின் பிறப்புறுப்பில் அமிலத்தன்மை கொஞ்சம் மாறுபடும். உத்தேசமாக, 7.2 அல்லது 7.3 பி.ஹெச் இருக்கும். இந்த அமிலத்தன்மையை நிர்வகிப்பதில் லாக்டோபேசில்லஸ் (Lactobacillus) என்ற பாக்டீரியாவின் பங்கு முக்கியமானது. சுத்தம் செய்யும்போதோ, ஏதேனும் ஆன்டிபயாடிக் மாத்திரைகள் எடுத்துக்கொள்ளும்போதோ, இந்த லாக்டோபேசில்லஸ் பாக்டீரியாக்கள் இறந்துவிட்டால், அந்த இடத்தில் கெட்ட பாக்டீரியாக்கள் போய் அமர்ந்துகொள்ளும். அதனால் அமிலத்தன்மை கட்டுப்பாடு இழந்து 7.6- 7.7 பி.ஹெச் அளவுக்கு அதிகமாகிவிடும். அமிலத்தன்மை அதிகமானால் வாடை அதிகமாகும். இதை இன்பெக்‌ஷன் ( Infection) என்று சொல்ல முடியாது. இது பிரச்னைக்கான தொடக்கம். அறிகுறி. இதை ‘பாக்டீரியல் வெஜினோசிஸ்’ (Bacterial Vaginosis) என்று சொல்வோம்.

சரி... லாக்டோபேசில்லஸ் பாக்டீரியாவை நன்மை செய்யும் பாக்டீரியா என்று சொல்ல முடியுமா? ம்கூம்... அப்படிச் சொல்ல முடியாது. இந்த பாக்டீரியா ரத்தத்துக்குள் போனால் மனிதன் காலி. “யாரும் இருக்கும் இடத்தில் இருந்து கொண்டால் எல்லாம் சௌக்கியமே...” என்று பாடினாரே கண்ணதாசன்...அது பாக்டீரியாக்களுக்கும் பொருந்தும்!

-களைவோம்... 

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு