Published:Updated:

எந்தப் பிரச்னைக்கு எந்த மருத்துவர்? - ஒரு வழிகாட்டி

எந்தப் பிரச்னைக்கு எந்த மருத்துவர்? - ஒரு வழிகாட்டி
பிரீமியம் ஸ்டோரி
News
எந்தப் பிரச்னைக்கு எந்த மருத்துவர்? - ஒரு வழிகாட்டி

எந்தப் பிரச்னைக்கு எந்த மருத்துவர்? - ஒரு வழிகாட்டி

எந்தப் பிரச்னைக்கு எந்த மருத்துவர்? - ஒரு வழிகாட்டி
எந்தப் பிரச்னைக்கு எந்த மருத்துவர்? - ஒரு வழிகாட்டி

ரகுநந்தனன்
சென்னை மருத்துவக் கல்லூரி
பொது மருத்துவத் துறைப் பேராசிரியர்

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

னிதனின் ஆயுள்காலம் அதிகரித்திருப்பதில் நவீன மருத்துவத்தின் பங்கு முதன்மையானது. அதிகமாகிவரும் நோய்களின் வேகத்தைவிட, பல மடங்கு வேகத்தில் அதற்கான காரணங்களையும் தீர்வுகளையும் கண்டுபிடித்துவிடுகிறார்கள் மருத்துவர்கள். 1820-ம் ஆண்டு ஓர் இந்தியனின் சராசரி ஆயுள்காலம்   21 ஆண்டுகள் மட்டுமே. அது 1950-ம் ஆண்டில்  52 ஆக அதிகரித்து, தற்போது 70-க்கும் மேலாகி நிற்கிறது. நாளை அது 100-ஐத் தொடலாம் அல்லது அதைத் தாண்டலாம். இதற்கான காரணத்தை ஆராய்ந்தால், அசுர வேகத்தில் முன்னேறிய மருத்துவ வளர்ச்சியே நம் கண்முன் நிற்கும். எண்ணற்ற தடுப்பு மருந்துகள், புதிய ஆராய்ச்சிகள், புதுப்புது மருத்துவ உபகரணங்கள் என மருத்துவத் துறை நாளுக்கு நாள் வளர்ச்சி அடைந்துகொண்டிருக்கிறது.

எந்தப் பிரச்னைக்கு எந்த மருத்துவர்? - ஒரு வழிகாட்டி
எந்தப் பிரச்னைக்கு எந்த மருத்துவர்? - ஒரு வழிகாட்டி

அதிலும் மிகவும் குறிப்பிடத்தக்க ஒரு முன்னேற்றமாக இருப்பது தலை முதல் கால்வரையிலான ஒவ்வொரு பாகத்துக்கும் தனித் தனி துறை வல்லுநர்கள் அதிகரித்திருப்பதே. ஆனால், நம்மில் பலருக்கும் எந்தப் பிரச்னைக்கு எந்த மருத்துவரைச் சந்திப்பது என்று தெரிவதில்லை. அதனால் இரண்டு, மூன்று மருத்துவர்களிடம் சிகிச்சையெடுத்து, சரியாகாத சூழலில் கடைசியாகத்தான் சரியான துறை மருத்துவரிடம் வந்து சேர்கிறார்கள். இதனால் தேவையற்ற பண விரயமும் அலைச்சலும் ஏற்படுகின்றன. இது போன்ற குழப்பங்களுக்குத் தீர்வு காணும்விதமாக, எந்தப் பிரச்னைக்கு எந்த மருத்துவரைச் சந்திக்க வேண்டும் என்பது பற்றி விளக்குகிறார் சென்னை மருத்துவக் கல்லூரி பொது மருத்துவத் துறைப் பேராசிரியர் ரகுநந்தனன்.

எந்தப் பிரச்னைக்கு எந்த மருத்துவர்? - ஒரு வழிகாட்டி

தலை

தலைவலி, தலைச்சுற்றல், மயக்கம், மறதிநோய் போன்று தலைப் பகுதியில் ஏற்படும் பிரச்னைகள் மற்றும் நரம்பு தொடர்பான பிரச்னைகளுக்கு  நரம்பியல் மருத்துவரிடம் (Neurologist) சிகிச்சை எடுத்துக்கொள்ள வேண்டும். தலையில் செய்யவேண்டிய அறுவை சிகிச்சைகளை, நரம்பியல் அறுவை சிகிச்சை நிபுணரிடம் (Neurosurgeon) செய்துகொள்ள வேண்டும்.

எந்தப் பிரச்னைக்கு எந்த மருத்துவர்? - ஒரு வழிகாட்டி

கண்

பார்வைக் குருடு, நிறக் குருடு, காட்சிக் குறைபாடு போன்ற பார்வைக் குறைபாடுகள், விழித்திரை பாதிப்பு, மாறுகண் பாதிப்பு, கண்புரை, கண்களில் ஏற்படும் கட்டிகள், கண் நரம்புக் கோளாறுகள், கண்ணில் நீர்வழிதல், விழித்திரையில் ரத்தக்கசிவு போன்ற கண் தொடர்பான அனைத்துப் பிரச்னைகளுக்கும் கண் மருத்துவரிடம் (Ophthalmologist) சிகிச்சை எடுத்துக்கொள்ள வேண்டும்.

எந்தப் பிரச்னைக்கு எந்த மருத்துவர்? - ஒரு வழிகாட்டி

கண் தொடர்பான அறுவை சிகிச்சை, செயற்கைக் கண் பொருத்துதல் போன்றவற்றுக்கு கண் அறுவை சிகிச்சை நிபுணரிடம் சிகிச்சை எடுக்க வேண்டும். இதில் பல்வேறு பிரிவுகள் இருக்கின்றன. உதாரணமாக, கண் நரம்புகளில் ஏற்படும் பாதிப்புகளுக்கு கண் நரம்பு மருத்துவரிடம் (Neuro-ophthalmologist) சிகிச்சை பெற வேண்டும். கண்ணில் உருவாகும் புற்றுநோய்க்கு கண் புற்றுநோய் மருத்துவரிடம் (Ocular Oncologist) சிகிச்சை எடுத்துக்கொள்ள வேண்டும். இவை தவிர, குழந்தைகளுக்கு ஏற்படும் கண் பாதிப்புகளுக்கு குழந்தைகளுக்கான கண் மருத்துவரிடம்(Pediatric Ophthalmologist) சிகிச்சை எடுத்துக்கொள்ள வேண்டும்.

எந்தப் பிரச்னைக்கு எந்த மருத்துவர்? - ஒரு வழிகாட்டி


காது, மூக்கு, தொண்டை

மூக்கு ஜவ்வு வீங்குதல், மூக்கின் சில்லு தள்ளியிருத்தல், மூக்கில் ரத்தம் வழிதல், மூக்கின் வால்வுகள் சுருங்குதல், தொடர்ச்சியாக  மூக்கு அடைத்துக்கொள்ளுதல் போன்று மூக்கில் உண்டாகும் பிரச்னைகளுக்கும், காது கேளாமை, காதுவலி, காது இரைச்சல், காதில் சீழ் வடிதல் போன்று காது தொடர்பான பிரச்னைகளுக்கும், தொண்டைப்புண், தொண்டை கரகரப்பு, டான்சிலைட்டிஸ் அடினாய்டு அழற்சி, குரல்வளை பாதிப்புகள், குரல் நாண்கள் பாதிப்பு, குறட்டை போன்று தொண்டை தொடர்பான பிரச்னைகளுக்கும் காது, மூக்கு, தொண்டை நிபுணரிடம் (ENT Specialist) சிகிச்சை எடுத்துக்கொள்ளலாம்.

எந்தப் பிரச்னைக்கு எந்த மருத்துவர்? - ஒரு வழிகாட்டி


பல்

பல் கூச்சம், பல் சொத்தை, வாய் நாற்றம், உடைந்த பற்கள், பற்கறை, ஈறு வீக்கம், பற்கள் சீரான அமைப்பில் இல்லாமல் இருத்தல், சர்க்கரை நோயாளிகளுக்கான பல் பிரச்னைகள், முதியோர் மற்றும் குழந்தைகளுக்கான பல் பிரச்னைகள், விபத்தால் ஏற்படும் பல் பாதிப்பு என பல் தொடர்பான அனைத்துப் பிரச்னைகளுக்கும் பல் சிகிச்சை நிபுணர்களிடம் (Dentists) சிகிச்சை எடுத்துக்கொள்ள வேண்டும். இதிலும் பல பிரிவுகள் இருக்கின்றன. உதாரணமாக, பற்களின் சீரான வரிசை மற்றும் ஈறுகளில் உண்டாகும் பிரச்னைகளுக்கு `ஆர்த்தோடாண்டிஸ்ட்’-டிடமும்(Orthodontist), பற்களின் செல்களில் உண்டாகும் பிரச்னைகளுக்கு `எண்டோடாண்டிஸ்ட்-டிடமும்’ (Endodontist), குழந்தைகளுக்கு உண்டாகும் பல் பிரச்னைகளுக்கு குழந்தைகளுக்கான பல் மருத்துவரிடமும் (Pediatric Dentist) சிகிச்சை எடுத்துக்கொள்ள வேண்டும்.

எந்தப் பிரச்னைக்கு எந்த மருத்துவர்? - ஒரு வழிகாட்டி


கழுத்து

கழுத்துவலி, கழுத்துப் பிடிப்பு போன்ற கழுத்து தொடர்பான பிரச்னைகளுக்கு நாளமில்லாச் சுரப்பி நிபுணரிடம் (Endocrinologist) சிகிச்சை எடுத்துக்கொள்ள வேண்டும். பொது மருத்துவரிடமும் சிகிச்சை எடுத்துக்கொள்ளலாம். தைராய்டு பிரச்னைகளுக்கு நாளமில்லாச் சுரப்பி அறுவை சிகிச்சை நிபுணர்களிடம் (Surgical Endocrinologists) சிகிச்சை எடுத்துக்கொள்ள வேண்டும்.

எந்தப் பிரச்னைக்கு எந்த மருத்துவர்? - ஒரு வழிகாட்டி


இதயம்

நெஞ்சுவலி, படபடப்பு, குழந்தைகளின் உடல் நீல நிறத்தில் மாறுதல், குழந்தைகள் அடிக்கடி மயக்கம் அடைதல், அடிக்கடி வியர்த்தல், உயர் ரத்த அழுத்தம், மயக்கம், கைகால் வீக்கம், மூச்சுவாங்குதல் போன்ற பிரச்னைகளுக்கு இதயநோய் நிபுணர்களிடம் (Cardiologists) சிகிச்சை எடுத்துக்கொள்ள வேண்டும். அறுவை சிகிச்சை செய்ய வேண்டும் என அவர்கள் அறிவுறுத்தும் பட்சத்தில் இதய அறுவை சிகிச்சை நிபுணரிடம் (Cardiothoracic Surgeon) சிகிச்சை பெற வேண்டும்.

எந்தப் பிரச்னைக்கு எந்த மருத்துவர்? - ஒரு வழிகாட்டி


நெஞ்சுப் பகுதி

இருமல், சளி, காய்ச்சல், எடை குறைதல், சளியுடன் ரத்தம் கசிதல், மூச்சிரைப்பு, மூச்சுத்திணறல்,  ஆஸ்துமா, காசநோய் போன்ற பிரச்னைகளுக்கு நெஞ்சக நோய் மருத்துவரிடம் (Thoracic Medicine) சிகிச்சை எடுத்துக்கொள்ள வேண்டும்.

எந்தப் பிரச்னைக்கு எந்த மருத்துவர்? - ஒரு வழிகாட்டி


இரைப்பை மற்றும் குடல்

வயிற்றுவலி, வயிற்றில் எரிச்சல், மஞ்சள்காமாலை, வயிற்றுப்போக்கு, மலத்துடன் ரத்தம் கசிதல், மலம் கறுப்பு நிறத்தில் வெளியேறுதல், அடிக்கடி மலம் கழித்தல், நெஞ்செரிச்சல், புளித்த ஏப்பம், வாய்வுக் கோளாறுகள் போன்ற பிரச்னைகளுக்கு இரைப்பை மற்றும் குடலியல் மருத்துவ நிபுணர்களிடம்
(Gastroenterologists) சிகிச்சை எடுத்துக்கொள்ள வேண்டும்.

எந்தப் பிரச்னைக்கு எந்த மருத்துவர்? - ஒரு வழிகாட்டி


சிறுநீரகம்

கால் வீக்கம், முக வீக்கம், சிறுநீர் குறைவாகப் போவது, சிறுநீர் அடைப்பு, தூங்கும்போது சிறுநீர் போவது, சிறுநீர் கழிக்கும்போது வலி, எரிச்சல், சிறுநீரின் நிறத்தில் மாற்றம், சிறுநீரில் ரத்தம் கசிதல், சிறுநீர்ப் பாதைத்தொற்று போன்ற சிறுநீரகம் தொடர்பான பிரச்னைகளுக்கு  சிறுநீரக மருத்துவரிடம் (Nephrologist) சிகிச்சை பெற வேண்டும். சிறுநீரகக்கல், புராஸ்டேட் சுரப்பியில் ஏற்படும் பிரச்னை, சிறுநீரகப் பாதையில் புற்றுநோய் போன்ற அறுவை சிகிச்சை செய்யவேண்டிய பிரச்னைகளுக்கு சிறுநீரக அறுவை சிகிச்சை நிபுணரிடம் (Urologist) சிகிச்சை எடுத்துக்கொள்ள வேண்டும்.

எந்தப் பிரச்னைக்கு எந்த மருத்துவர்? - ஒரு வழிகாட்டி


புற்றுநோய்

புற்றுநோய் உருவாகும் இடத்தைப் பொறுத்து பல வகைப்படும். அவற்றில் மார்பகப் புற்று (Breast Cancer), கர்ப்பப்பைவாய்ப் புற்று (Cervical Cancer), வாய்ப் புற்று (Oral Cancer), மலக்குடல் ஆசனவாய்ப் புற்று (Colorectal Cancer) ஆகியவை அதிகம் பேரை பாதிப்பவை. இந்தப் பிரச்னைகளுக்கு புற்றுநோய் சிறப்பு மருத்துவரிடம் (Oncologist) சிகிச்சை எடுத்துக்கொள்ள வேண்டும். அறுவை சிகிச்சை செய்யவேண்டிய தேவை ஏற்பட்டால், புற்றுநோய் அறுவை சிகிச்சை நிபுணரிடம்(Surgical Oncologist) சிகிச்சை பெற வேண்டும்.  கதிரியக்கப் புற்றுநோய் மருத்துவ நிபுணர்களும் (Radio Oncologists) இருக்கிறார்கள். கதிரியக்க சிகிச்சைகளுக்கு அவர்களிடம் சிகிச்சை மேற்கொள்ள வேண்டும்.

எந்தப் பிரச்னைக்கு எந்த மருத்துவர்? - ஒரு வழிகாட்டி


மூச்சுவிடுவதில் சிரமம், ரத்தத்துடன் சளி வருவது, நீண்ட நாள்களாக தொடர் இருமல், செரிமானக் கோளாறு, புண் அல்லது அல்சர் குணமாகாமல் இருப்பது, உணவு விழுங்குவதில் சிரமம் ஆகியவை புற்றுநோயின் அறிகுறிகளாக இருக்கலாம். இந்த அறிகுறிகள் இருந்தால், உடனடியாக மருத்துவரிடம் பரிசோதனை செய்துகொள்வது நல்லது.

எந்தப் பிரச்னைக்கு எந்த மருத்துவர்? - ஒரு வழிகாட்டி


எலும்பு  மற்றும் மூட்டு

எலும்பில் வலி, எலும்புத் தேய்மானம், எலும்பு முறிவு, வீக்கம், எலும்பு அடர்த்திக் குறைபாடு, எலும்புப் புரை என தலை முதல் கால்வரையிலான எலும்புகளில் உண்டாகும் பிரச்னைகளுக்கு எலும்பு சிகிச்சை மருத்துவர்களிடம் (Orthopedic Doctors) சிகிச்சை எடுக்க வேண்டும். மூட்டுவலி, குடைச்சல், விரைப்பு, உணவு விழுங்குவது கடினமாக இருப்பது, மூட்டுத் தேய்மானம், வாதநோய்கள், தோள்மூட்டுப் பிடிப்பு, தோள்மூட்டு தசைக் கிழிவு, மூட்டு விலகுதல் போன்று மூட்டு தொடர்பான அனைத்துப் பிரச்னைகளுக்கும் மூட்டுவலி சிறப்பு மருத்துவர்களிடம் (Rheumatologists) சிகிச்சை எடுத்துக்கொள்ளலாம்.

எந்தப் பிரச்னைக்கு எந்த மருத்துவர்? - ஒரு வழிகாட்டி


ரத்தம்

எந்தவிதமான உடல்நலப் பிரச்னை என்றாலும், நாம் முதலில் செய்வது ரத்தப் பரிசோதனைதான். அதன் அடிப்படையில் உடலில் எத்தகைய பாதிப்புகள் ஏற்பட்டுள்ளன என்பதைக் கண்டறியலாம். இந்தப் பரிசோதனைகளின் முடிவுகளை ரத்தவியல் நிபுணர்தான் (Hematologist) உறுதிசெய்ய வேண்டும்.  பரிசோதனைகளை மட்டுமல்லாமல் ரத்த உற்பத்திக் குறைவு, ரத்தச்சோகை போன்ற ரத்தம் தொடர்பான பிரச்னைகளுக்கும் ரத்தவியல் நிபுணர்களிடம் சிகிச்சை எடுத்துக்கொள்ளலாம். தானமாகப் பெறப்படும் ரத்த மாதிரிகளை முறையாகப் பராமரிப்பது போன்ற செயல்பாடுகளும் ரத்தவியல் நிபுணர்களின் மேற்பார்வையில்தான் நடைபெறும்.

எந்தப் பிரச்னைக்கு எந்த மருத்துவர்? - ஒரு வழிகாட்டி


நாளம்

ரத்த நாளங்களில் ஏற்படும் பிரச்னைகளுக்கு ரத்த நாள அறுவை சிகிச்சை நிபுணர்களிடம் (Vascular Surgeons) சிகிச்சை பெற வேண்டும். அதிகமாகப் புகைபிடிப்பவர்களுக்குக் கால்கள் கருமையாகக் காணப்படும். அது ரத்தநாளத்தில் ஏற்பட்டுள்ள பிரச்னைக்கான அறிகுறியே.

எந்தப் பிரச்னைக்கு எந்த மருத்துவர்? - ஒரு வழிகாட்டி


மனம்

உடல்நலனைவிட மனநலம் ஆரோக்கியமாக இருக்கவேண்டியது அவசியம். தற்போது பலருக்கு மனநலம் சார்ந்த பாதிப்புகள் அதிகரித்துவருகின்றன. பதற்றம், தூக்கமின்மை, சோகம், தேவையற்ற பயம், காதில் குரல் கேட்பது, கவனக்குறைவு, எதிலும் விருப்பமின்மை, வீண் சந்தேகம், தனியாகச் சிரிப்பது, அழுவது, குழப்பம் போன்றவை மனநலம் பாதிக்கப்பட்டதற்கான அறிகுறிகள். மேற்கண்ட அறிகுறிகள் இருந்தால்,
மனநல மருத்துவரிடம் (Psychiatrist) சிகிச்சை எடுத்துக்கொள்ள வேண்டும்.

எந்தப் பிரச்னைக்கு எந்த மருத்துவர்? - ஒரு வழிகாட்டி


பாலியல் பிரச்னைகள்

கிரந்தி, வெட்டை, ஹெர்பிஸ், பிறப்புறுப்புகளில் ஏற்படும் மருக்கள் மற்றும் தாம்பத்யப் பிரச்னைகளுக்கு பாலியல் நோய் சிகிச்சை மருத்துவரிடம் (Sexologist) சிகிச்சை எடுத்துக்கொள்ள வேண்டும்.

எந்தப் பிரச்னைக்கு எந்த மருத்துவர்? - ஒரு வழிகாட்டி


சர்க்கரைநோய்

அதிக தாகம், அதிகப் பசி, அடிக்கடி சிறுநீர் கழித்தல்,  பார்வைத்திறன் குறைதல், எடை குறைதல், புண்கள் ஆறும் தன்மை குறைதல், சருமத்தில் அரிப்பு, சிறுநீர்த் தொற்று போன்றவை சர்க்கரைநோயின் பொதுவான அறிகுறிகள். இவை தவிர முடி உதிர்தல், உடல் எடை குறைதல், கைகால் மரத்துப்போதல், நரம்பு பாதிப்பு, ரத்த நாளங்கள் பாதிப்படைதல் போன்றவை ‘ப்ரீ டயாபடிஸ்’ எனப்படும் சர்க்கரைநோய்க்கு முந்தைய நிலையின் அறிகுறிகள். மேற்கண்ட அறிகுறிகள் இருந்தால், கண்டிப்பாக சர்க்கரைநோய் நிபுணரிடம் (Diabetologist) சிகிச்சை எடுத்துக்கொள்ள வேண்டும்.

எந்தப் பிரச்னைக்கு எந்த மருத்துவர்? - ஒரு வழிகாட்டி


சருமம்

சொறி, சிரங்கு, முகப்பரு, முடி உதிர்வு, பொடுகு, சோரியாசிஸ், வெண்புள்ளிகள், சருமத்தொற்று, முடி உதிர்வு, சருமம் நிறம் மாறுவது, தடித்து வற்றிப்போதல், தழும்புகள், மருக்கள் என சருமத்தில் ஏற்படும் பிரச்னைகள் பல. சருமத்தின் ஆரோக்கியம் குறைந்தால், அதில் ஆங்காங்கே சிவந்துபோதல், அரிப்பு, கொப்புளம், நிற மாற்றம், முடி உதிர்வு, வாய்ப்புண், நகம் உடைதல் போன்ற அறிகுறிகள் தென்படும். உடனடியாக சரும மருத்துவரிடம் (Dermatologist) சிகிச்சை எடுத்துக்கொள்ள வேண்டும்.

எந்தப் பிரச்னைக்கு எந்த மருத்துவர்? - ஒரு வழிகாட்டி


ஊட்டச்சத்துக் குறைபாடு

ஊட்டச்சத்துக் குறைபாட்டால் உலக அளவில் ஏராளமானோர் பாதிக்கப்பட்டிருக்கிறார்கள். உணவு கிடைக்காமல் பாதிப்புக்குள்ளாவோர் ஒருபுறமிருக்க, போதிய வசதிகள் இருந்தும், சாப்பிடும் உணவு சரிவிகிதமாக இல்லாததால் பலர் பாதிக்கப்படுகிறார்கள். போதிய ஊட்டச்சத்து கிடைக்காததால் நோய்த் தாக்குதல்களுக்கும் ஆளாகிறார்கள். அதேபோல, குழந்தைகள், வளரிளம் பருவத்தினர், முதியோர் என அனைத்து வயதினரும் எந்த மாதிரியான உணவுகளைச் சாப்பிட வேண்டும் என்பதும் பலருக்குத் தெரிவதில்லை. உணவு மற்றும் ஊட்டச்சத்து தொடர்பான அனைத்து சந்தேகங்களுக்குத் தீர்வு சொல்லவும், சரியாக வழிநடத்தவுமே ஊட்டச்சத்து நிபுணர்களும் (Nutritionists), உணவியல் நிபுணர்களும் (Dietitians) இருக்கிறார்கள். அவர்களின் ஆலோசனைகளைச் சரியாகப் பின்பற்றினால் நோய் நொடியின்றி வாழலாம்.

எந்தப் பிரச்னைக்கு எந்த மருத்துவர்? - ஒரு வழிகாட்டி


வலி நீக்கம் மற்றும் ஆதரவு சிகிச்சை

மரணத்தை நெருங்கும் தருவாயிலுள்ள முதியோருக்குச்  சரியான நேரத்தில் உணவு கொடுத்து, மருந்து, மாத்திரைகள் கொடுத்து, அவர்களை ஆரோக்கியமாக கவனித்துக்கொள்ளும் சிகிச்சைக்கு, `வலி நீக்கம் மற்றும் ஆதரவு சிகிச்சை’ என்று பெயர். ஆங்கிலத்தில் இதை `பேலியேட்டிவ் கேர்’ (Palliative Care) என்று அழைக்கிறார்கள். ஆரோக்கியமாகக் கவனித்துக்கொள்வதன் மூலம் அவர்களின் ஆயுள்காலத்தை நீட்டிக்கவும், வாழ்வின் கடைசித் தருணத்தில் அவர்களைக் கஷ்டப்படாமல் பார்த்துக்கொள்வதற்கான சிகிச்சையாகவும் இது இருக்கிறது.

எந்தப் பிரச்னைக்கு எந்த மருத்துவர்? - ஒரு வழிகாட்டி


உடல்வலிகள்

முதுகுவலி, கைகால் வலி, உடல்வலி போன்ற வலிகளைத் தீர்ப்பதற்காகவே `உடல் மருத்துவம் மற்றும் மறுவாழ்வு சிகிச்சை’ (Physical Medicine and Rehabilitation) என்ற பிரிவு இருக்கிறது. அன்றாடம் ஏற்படும் உடல் அலுப்புகளைச் சரிசெய்வதுடன், விபத்தில் நடக்க முடியாமல் போனவர்களுக்கு நடக்க உதவுவது, அறுவை சிகிச்சைகளுக்குப் பிறகான செயல்பாடுகளுக்கு உதவுவது என அனைத்துவிதமான உடல் அசைவுச் செயல்பாடுகளுக்கும் இந்தப் பிரிவு மருத்துவர்களிடம் சிகிச்சை எடுத்துக்கொள்ளலாம்.

எந்தப் பிரச்னைக்கு எந்த மருத்துவர்? - ஒரு வழிகாட்டி


உறுப்பு மாற்று அறுவை சிகிச்சை

முகத்தில் ஏற்படும் எலும்பு முறிவு (Face
Fracture), மைக்ரோ வாஸ்குலர் சர்ஜரி, உதட்டுப் பிளவு, அண்ணப் பிளவு, காது வளர்ச்சிக் குறைபாடு,  தீக்காயம் போன்ற பிரச்னைகளுக்கு உறுப்பு மாற்று அறுவை சிகிச்சை நிபுணரிடம் (Plastic Surgeon) சிகிச்சை எடுத்துக்கொள்ளலாம். கைகால் மாற்று அறுவை சிகிச்சைகள், திருநங்கைகளுக்கான உறுப்பு மாற்று சிகிச்சை, செயற்கை கைகால் பொருத்துதல் போன்ற சிகிச்சைகளையும் அவர்கள் வழங்குவார்கள்.

எந்தப் பிரச்னைக்கு எந்த மருத்துவர்? - ஒரு வழிகாட்டி


குழந்தைகள்

ஒன்று முதல் பதினெட்டு வயதுவரை உள்ளவர்களுக்கு எத்தகைய உடல்நலப் பிரச்னைகள் ஏற்பட்டாலும், குழந்தைகள்நல மருத்துவரிடம்தான் (Pediatrician)சிகிச்சை எடுத்துக்கொள்ள வேண்டும். முதல் ஆயிரம் நாள்களில்தான், அந்தக் குழந்தையின் ஒட்டுமொத்த வாழ்க்கைக்கான ஆரோக்கியம் தீர்மானிக்கப்படும். எனவே, குழந்தை சரியாகப் பால் குடிக்காமல் இருந்தாலோ, அடிக்கடி அழுதுகொண்டே இருந்தாலோ உடனடியாக மருத்துவரிடம் அழைத்துச் செல்ல வேண்டும். பெரும்பாலும் குழந்தை பிறந்து ஆறு மாதங்கள் கழித்து, என்ன உணவு கொடுக்கலாம் என்பதில் தாய்மாருக்குக் குழப்பம் உண்டாகும். அப்போது குழந்தைகள்நல மருத்துவரிடம் ஆலோசனை பெற்று, அதற்கேற்ப உணவுகளைக் கொடுக்கலாம். எப்போது, என்ன தடுப்பூசி போட வேண்டும் என்பது போன்ற சந்தேகங்களையும் குழந்தைகள்நல சிறப்பு மருத்துவரிடம் கேட்டுத் தெரிந்துகொள்ளலாம்.

எந்தப் பிரச்னைக்கு எந்த மருத்துவர்? - ஒரு வழிகாட்டி


உதட்டுப் பிளவு, அண்ணப் பிளவு, ஒட்டிப் பிறந்த குழந்தைகளின் உறுப்புகளைப் பிரித்தல், பிறப்புறுப்பில் ஏற்படும் கோளாறுகள் போன்றவற்றுக்கு குழந்தைகள் அறுவை சிகிச்சை நிபுணர்
(Pediatric Surgeon) சிகிச்சையளிப்பார். பிறந்து ஒரு வருடம்கூட முடியாத பச்சிளம் குழந்தைகளுக்கு, 
பச்சிளம் குழந்தைகளுக்கான சிறப்பு நிபுணர்களிடம் (Neonatologist) சிகிச்சை பெற வேண்டும்.

எந்தப் பிரச்னைக்கு எந்த மருத்துவர்? - ஒரு வழிகாட்டி


முதியோர்

60 வயதுக்கு மேற்பட்டவர்களை, `முதியோர்’ என்கிறோம். அவர்களுக்குக் கண்புரை, காது கேளாமை, கை நடுக்கம், மலச்சிக்கல், நடை தள்ளாட்டம், அடிக்கடி தவறி கீழே விழுதல், பார்க்கின்சன், டிமென்ஷியா போன்ற பாதிப்புகள் உண்டாகும். இவை தவிர 40, 50 வயதுகளில் சர்க்கரைநோய் பாதிப்பு, உயர் ரத்த அழுத்தம், உடல் பருமன் போன்ற பிரச்னைகளும் தொடர்ந்துவரும். மேற்கண்ட அனைத்துப் பிரச்னைகளுக்கும் முதியோர்நல மருத்துவரிடம் (Geriatrician) சிகிச்சை எடுத்துக்கொள்ள வேண்டும்.

எந்தப் பிரச்னைக்கு எந்த மருத்துவர்? - ஒரு வழிகாட்டி


முதுமையால் உண்டாகும் பிரச்னைகளால் அவதிப்படுவதைவிட அதை வருமுன் (Preventive
Geriatrics) தடுப்பதற்கான முயற்சிகளில் ஈடுபட வேண்டும். `முதுமையின் இளமை’ என்று ஐம்பது வயதைச் சொல்கிறார்கள். அப்போதிருந்தே முதியோர்நல மருத்துவர் ஒருவரிடம் உடலைப் பரிசோதித்துக்கொள்வது நல்லது.

எந்தப் பிரச்னைக்கு எந்த மருத்துவர்? - ஒரு வழிகாட்டி


பெண்கள்

பெண்கள் சரியான வயதில் பூப்படையாதிருத்தல், மாதவிலக்கு தள்ளிப்போதல், அதிக ரத்தப்போக்கு, வெள்ளைப்படுதல், மார்பகங்களில் கட்டி, வலி, வீக்கம் போன்ற பிரச்னைகள் மட்டுமன்றி மகப்பேறு, பிரசவம், கருக்கலைப்பு, கருத்தடை அறுவை சிகிச்சை, மாதவிடாய் நிற்கும் காலங்களில் உண்டாகும் ரத்தஅழுத்தம், சர்க்கரைநோய் போன்ற அனைத்துப் பிரச்னைகளுக்கும்  மகப்பேறு மற்றும் மகளிர்நல மருத்துவரிடம் (Gynecologist) சிகிச்சை பெற வேண்டும். ஊட்டச்சத்து குறைபாடு, ரத்தச்சோகை போன்றவற்றுக்கும் மகளிர்நல மருத்துவரிடமே சிகிச்சை எடுத்துக்கொள்ளலாம்.

எந்தப் பிரச்னைக்கு எந்த மருத்துவர்? - ஒரு வழிகாட்டி


மயக்கவியல் பிரிவு

அவசரநிலை சிகிச்சை, இதய சிகிச்சை, விபத்து, விஷக்கடி, வலி மற்றும் அனைத்துவிதமான அறுவை சிகிச்சைகள், பிரசவம் போன்றவற்றில் மயக்கவியல் நிபுணர்களின் பங்கு மகத்தானது. இவர்களை `மயக்கவியல் நிபுணர்’ (Anesthetist) என்பார்கள். நோயாளிகளுடன் அவர்களுக்கு நேரடியான தொடர்பு இல்லையென்றாலும்கூட, பல்வேறு முக்கிய சிகிச்சைகளுக்கு பின்னிருந்து நம் உயிர்காக்க உதவும் அவர்களையும் அறிந்துகொள்ளவேண்டியது அவசியம்.

எந்தப் பிரச்னைக்கு எந்த மருத்துவர்? - ஒரு வழிகாட்டி


கதிரியக்கச் சிகிச்சை

நவீன மருத்துவ வளர்ச்சியில் கதிரியக்கத் துறையின் பங்கு மிக முக்கியமானது. எக்ஸ்ரே, சி.டி. ஸ்கேன், எம்.ஆர்.ஐ. ஸ்கேன், அல்ட்ரா சோனோகிராபி, மேமோகிராபி, ரேடியோதெரபி, மேக்னடிக் ரெசோனன்ஸ் ஆஞ்சியோகிராபி எனப் பல வகையான கதிரியக்கச் சாதனங்கள் இருக்கின்றன. உடலின் அனைத்து உறுப்புகளின் செயல்பாடுகளை அக்கு வேறு ஆணி வேறாக இவை படம்பிடித்துக் காட்டிவிடும்.

எந்தப் பிரச்னைக்கு எந்த மருத்துவர்? - ஒரு வழிகாட்டி


தலை முதல் கால்வரையிலான உடலின் குறுக்குவெட்டுத் தோற்றத்தை அழகாகப் படம் பிடித்துக் காட்டிவிடும். மிகத் துல்லியமாக பாதிக்கப்பட்ட இடத்தில் சரியான சிகிச்சையளிக்க, கதிரியக்கக் கருவிகள் உதவுகின்றன. கத்தியின்றி, ரத்தமின்றி பல அறுவை சிகிச்சைகளையும், கதிரியக்கத்தில் செயல்படும் கருவிகளின் மூலம் செய்யலாம். இத்தகைய கதிரியக்கக் கருவிகள் வெளியிடும் முடிவுகளை ஆராய்ந்து சொல்பவர்களை `கதிரியக்க நிபுணர்கள்’ (Radiologists) என்பார்கள். இவர்களைப் பற்றியும் ஒவ்வொருவரும் தெரிந்துகொள்ளவேண்டியது அவசியம்.

- இரா.செந்தில்குமார்

எந்தப் பிரச்னைக்கு எந்த மருத்துவர்? - ஒரு வழிகாட்டி


உடலையும் உள்ளத்தையும் நல்வழிப்படுத்தும் வழிகள், உணவுப் பழக்கங்கள், உடற்பயிற்சிகள் முதலிய வாழ்வியல் முறைகளை அறியவும், மருத்துவ உலகின் ஆச்சர்யங்களை விரல்நுனியில் தெரிந்துகொள்ளவும் ‘டாக்டர் விகடன்’ சோஷியல் நெட்வொர்க்கிங் பக்கங்களில் இணைந்திடுங்கள்.