Published:Updated:

“விருப்பு, வெறுப்பையெல்லாம் ஓரங்கட்டிட்டுதான் ஓட்டணும்!” - டிரைவர் பார்த்திபன்

“விருப்பு, வெறுப்பையெல்லாம் ஓரங்கட்டிட்டுதான் ஓட்டணும்!” - டிரைவர் பார்த்திபன்
பிரீமியம் ஸ்டோரி
News
“விருப்பு, வெறுப்பையெல்லாம் ஓரங்கட்டிட்டுதான் ஓட்டணும்!” - டிரைவர் பார்த்திபன்

உடலுக்கும் தொழிலுக்கும் - 4

யணங்கள் எப்போதுமே தித்திப்பானவை. காற்றை ஊடாடிப் பறக்கும் ரயில் பயணமாகட்டும், இரவு நேர ஜன்னலோரப் பேருந்துப்  பயணமாகட்டும்... அத்தனையும் பரவசம்தான். கனத்த மனதை லேசாக்கும் சுகானுபவத்தைப் பயணம் தருகிறது. குழந்தை மனதுடன் பயணத்தை ரசிக்கும் இயல்பு அனைவரிடமும் இருக்கும். ஆனால், பயணத்தை மட்டுமே வாழ்வாதாரமாகக்கொண்டிருக்கும் ஓர் ஓட்டுநரிடம் அதே மனநிலையைக் காண  முடியுமா? தஞ்சை மாவட்டம், திருக்காட்டுப்பள்ளியைச் சேர்ந்தவர் பார்த்திபன். 24 ஆண்டுகளாக டாக்ஸி டிரைவராகப் பணியாற்றிவருகிறார். 17 ஆண்டுகள் வாடகை கார்  ஓட்டியவர், இப்போது சொந்தமாக வாகனம் வாங்கி டிரைவராகத் தன் பணியைத் தொடர்கிறார். 

“விருப்பு, வெறுப்பையெல்லாம் ஓரங்கட்டிட்டுதான் ஓட்டணும்!” - டிரைவர் பார்த்திபன்

``டிரைவிங் கத்துக்கிட்டா நிறைய ஊர்களுக்குப் போகலாம், சுத்திப் பார்க்கலாம்கிற ஆசையில பத்தாவதோட படிப்பை நிறுத்திட்டேன். வண்டிகள்ல கிளீனரா  வேலை பார்த்து, அப்படியே படிப்படியா கார் ஓட்டக் கத்துக்கிட்டு டிரைவராகிட்டேன்” என தான் ஓட்டுநராக மாறிய தருணத்தைப் பகிர்ந்துகொள்கிறார் பார்த்திபன். இரவு, பகல் பார்க்காமல் தொடர்ந்து கண்விழித்து கார் ஓட்டுவதால், உடலளவிலும் மனதளவிலும் ஏற்பட்ட பாதிப்புகளைத் தொடர்ந்து பகிர்கிறார் அவர்.

“பல வருஷமா கார் ஓட்டுறதால முதுகுவலி, இடுப்புவலி அதிகமாக இருக்கு. வண்டி ஓட்டக் கால்களை அதிகம் பயன்படுத்துறதால முழங்கால்வலியும் எடுக்கும். இன்ஜின் பக்கத்துல இருந்து ஓட்டுறதால உடல் சூடாகிடும். வண்டி ஓட்டிக்கிட்டிருக்கும்போது அதிகமா உடம்பு வலிச்சா, வண்டியை நிறுத்தி டீ சாப்பிட்டு, கொஞ்சம் ரிலாக்ஸ் பண்ணிக்குவேன். ராத்திரி  நேரத்துல ரொம்பத் தூக்கம் வந்தா, வண்டியை ஓரம் கட்டிட்டு 20 நிமிஷம் தூங்கிட்டு மறுபடியும் ஓட்டுவேன்.

சவாரி வந்தவங்களை இறக்கிவிட்ட பிறகு கொஞ்ச  நேரம் தூங்கி ஓய்வெடுத்துக்குவேன். பக்கத்து மாநிலத்துக்கெல்லாம் போகும்போது, எத்தனை நாளானாலும் ராத்திரி வண்டியிலேயேதான் தூங்குவேன். `வண்டியை  யாரும் திருடிட்டுப் போயிடுவாங்களோ’னு பயமா இருக்கும். பகல் நேரத்துல ட்ரிப் போகும்போது வாடிக்கையாளர்களை இறக்கிவிட்டுட்டாலும் ஓய்வெடுக்க முடியாது.  அடிக்கிற வெயில்ல 10 நிமிஷம்கூடத் தூங்க முடியாது. சில நேரம் முதல் நாள் காலையில தொடங்கி இரவு முழுக்க வண்டி ஓட்டி, மறுபடியும் அடுத்த நாள் பகல்லயும் தொடர்ச்சியா வண்டி ஓட்டுற நிலைமை ஏற்படும். அப்பல்லாம் அதிகமா தூக்கம் வரும். ஆனாலும் தூக்கத்தைக் கட்டுப்படுத்திக்கிட்டு ஓட்டுவேன். தூரமான இடங்களுக்குப் போகும்போது நல்ல சாப்பாடு கிடைக்காது. கிடைக்கிறதை வாங்கிச் சாப்பிட்டுக்குவேன். அதிகமாகச் சாப்பிட்டாலும் வண்டி ஓட்டும்போது தூக்கம்  வந்துடும். அதனால நல்லாப் பசிச்சாக்கூட அரை வயிறுதான் சாப்பிடுவேன். `தூக்கம் வந்துடுமே’னு இரவு நேரங்கள்ல சாப்பிடாம வண்டி ஓட்டுறதும் உண்டு. 

எல்லா வாடிக்கையாளர்களும் நல்லவிதமா நடந்துக்குவாங்கனு சொல்ல முடியாது. சிலர் கோபமாப் பேசுவாங்க. அந்த மாதிரி நேரத்துல  உணர்வுகளைக் கட்டுப்படுத்திட்டு வண்டி ஓட்டுவேன்.கோபப்பட்டு ஏதாவது பேசிட்டா, வாடிக்கையாளர்களை இழந்துடுவோம். அதனால அவங்களை அனுசரிச்சுப் போயிடுவேன். அது மாதிரி நேரங்கள்ல மனசு ரொம்ப சங்கடப்படும். விருப்பு, வெறுப்பையெல்லாம் ஓரம்கட்டிவெச்சிட்டுதான் வேலை செய்றேன்.  

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
“விருப்பு, வெறுப்பையெல்லாம் ஓரங்கட்டிட்டுதான் ஓட்டணும்!” - டிரைவர் பார்த்திபன்

குடிச்சுட்டு வண்டியில வர்றவங்களாலதான் அதிகத் தொல்லை. அவங்க விருப்பத்துக்கு ஆடிப் பாடி கும்மாளம் அடிச்சுக்கிட்டு வருவாங்க. அந்த மாதிரி நேரத்துல வண்டியையும் சரியா ஓட்ட முடியாது. கட்டுப்பாடில்லாம இங்கேயும் அங்கேயும் போகும். போதையில இருக்கிறவங்க, பேசினாலும்  புரிஞ்சுக்கிற நிலையில இருக்க மாட்டாங்க. பெரும்பாலும் இளைஞர்கள்தான் இது மாதிரி நடந்துக்குவாங்க. ‘ஏன் இப்படி செய்றீங்க?னு கேட்டா, ‘நாங்க ஜாலியா  இருக்கோம்... உங்களுக்கு என்ன பிரச்னை?’னு கேப்பாங்க. ஒருமுறை கொடைக்கானலுக்கு ட்ரிப் போயிட்டு, மலையிலருந்து கீழே இறங்கும்போது, எதிரே வந்த வண்டி மோதிருச்சு. அதிர்ஷ்டவசமா யாருக்கும் ஒண்ணும் ஆகலை. வண்டிக்குதான் சேதம்.இந்தத் தொழில்ல, வர்ற வருமானம் அன்றாடத் தேவைக்குத்தான் சரியாக இருக்கு.  சேமிப்பைப் பத்தியெல்லாம் நினைச்சுக்கூடப் பார்க்க முடியாது. காப்பீடு மாதிரியான சேமிப்புகள்கூட கைவசம் இல்லை. அப்பப்போ உடம்பு சரியில்லாமப் போகுது. டாக்டர்கிட்ட போகணும்னுதான்  நினைப்பேன். அதுகூட முடியாம தள்ளித் தள்ளிப் போவுது. உடல் மட்டுமில்லை, மனசளவுலயும் மிகவும் சிரமப்பட்டுதான் இந்தத் வேலையை செஞ்சுக்கிட்டு இருக்கேன்.

ஒரு மனிதனின் அடிப்படை விஷயங்கள் சாப்பாடு, தூக்கம். இந்த இரண்டும்கூட சரியாகக் கிடைக்காதபோது, ‘ஏன்டா இந்தப் பொழப்புக்கு வந்தோம்’னுதான் தோணும். `படிக்கிற காலத்துல படிச்சிருக்கலாமே’னு வருத்தமா இருக்கும்.  என் ரெண்டு பிள்ளைகளையும் நல்லாப் படிக்க வைக்கணும். அவங்க விருப்பப்படி என்ன வேணும்னாலும் படிக்கட்டும். ஆனா, என்னைப்போலக் கஷ்டப்படக் கூடாது” என்கிறார் வருத்தம் தோய்ந்த குரலில்.

``காத்திருக்கும் நேரத்தில் நடக்கலாம்!’’  

“விருப்பு, வெறுப்பையெல்லாம் ஓரங்கட்டிட்டுதான் ஓட்டணும்!” - டிரைவர் பார்த்திபன்

கார் ஓட்டுநர்களுக்கான உடல்நலப் பிரச்னைகளுக்கு தீர்வு சொல்கிறார் பொதுநல மருத்துவர் அருணாச்சலம்.

“கார் ஓட்டுநர்கள் கிளட்ச், கியர், பிரேக் என்று மாற்றி மாற்றி இயக்குவதால், கணுக்கால், முழங்கால், இடுப்பு ஆகியவை பாதிக்கப்படும். இதே நிலை தொடரும்போது அந்தப்  பகுதிகளில் தேய்மானம் அதிகமாகி, நிரந்தரவலி ஏற்படும். அறுவை சிகிச்சை செய்யவேண்டிய நிலைகூட ஏற்படலாம். ஓட்டுநர்கள் வாகனங்களின்  இருக்கையை தங்கள் உயரத்துக்கும், சௌகர்யத்துக்கும் ஏற்றவாறு அட்ஜஸ்ட் செய்து உட்கார வேண்டும். போக்குவரத்து நெரிசலில் அதிக நேரம் நிற்க வேண்டி வந்தால், காலால் அழுத்தமாக பிரேக்கை மிதிப்பதற்கு பதில் ‘ஹேண்ட் பிரேக்’கைப் பயன்படுத்தலாம். வாகனத்தின் பாகங்களை குறிப்பிட்ட நாள்களுக்கு ஒருமுறை மாற்றவேண்டியதும்  அவசியம்.

வாடிக்கையாளரை இறக்கிவிட்டு, காத்திருக்கும் நேரத்தில் வண்டியிலேயே உட்கார்ந்திருக்காமல்          20 நிமிடங்கள் நடப்பது, கைகால்களை மடக்கி, நீட்டுவது, குனிந்து பாதங்களைத் தொடுவது போன்ற ‘ஸ்ட்ரெட்சிங்’ பயிற்சிகளைச் செய்யலாம். இதனால் ரத்த ஓட்டம் சீராகி, உடலுக்கும் மனதுக்கும் புத்துணர்ச்சி கிடைக்கும். அதிக நேரம் வாகனம் ஓட்டுவதால் உடல் சூடாவதைத் தடுக்க தண்ணீர் குடிப்பதுதான் ஒரே வழி. ஒருநாளைக்கு குறைந்தபட்சம் ரெண்டு லிட்டர் தண்ணீராவது குடிக்க வேண்டும். அதேபோல, போதிய இடைவெளியில் சிறுநீர் கழிக்கவேண்டியதும் அவசியம். சிலர் வாடிக்கையாளர்களைத் திருப்திப்படுத்த அதிகமாக ஏ.சி-யை இயக்குவார்கள். அதனால்  மூக்கு, காது, தொண்டையில் பிரச்னை ஏற்படலாம்.

ஓட்டுநருக்கும் எட்டு மணி நேரத் தூக்கம் அவசியம். தூக்கம் சரியாக இல்லையென்றால் மனஅழுத்தம், எரிச்சல், கோபம் ஏற்படும். இரவில் குறைவான நேரம்  தூங்கினால், பகலில் தூங்க வேண்டும். உணவைப் பொறுத்தவரை பச்சைக் காய்கறிகள், பழங்கள் அதிகம் சாப்பிட வேண்டும். கேரட், முள்ளங்கி, வெள்ளரிக்காய், தக்காளி, கொய்யாப்பழம் ஆகியவற்றை வாங்கி வைத்துக்கொண்டு கிடைக்கும் நேரத்தில் சாப்பிடலாம். சரியாகச் சாப்பிட முடியாத நேரங்களில், அதை ஈடுகட்டும் வகையில்  பிஸ்கட், பன், பிரெட் போன்றவற்றைச் சாப்பிட்டு உடலுக்குத் தேவையான கலோரிகளைப் பெறலாம். வாகனம் ஓட்டும்போது அதிகமாகச் சாப்பிட முடியாது என்பதால், சிறிய இடைவெளிகளில் இது போன்ற உணவுகளை உட்கொள்வது நல்லது.’’

வந்தனை செய்வோம்...

ஜெனி ஃப்ரீடா - படங்கள்: தே.தீட்ஷித்

“விருப்பு, வெறுப்பையெல்லாம் ஓரங்கட்டிட்டுதான் ஓட்டணும்!” - டிரைவர் பார்த்திபன்

உளவியல் உண்மைகள்!

ருவரிடம் கைளைக் குலுக்கவேண்டிய சூழ்நிலையில், கைளைக் கைக்குட்டையால் துடைத்த பிறகு, திடமாக அவரின் கைகளைப் பற்றிக்கொண்டு, கண்களைப் பார்த்து, மெல்லிய புன்னகையுடன் கைகுலுக்க வேண்டும். மிகவும் மெலிதாகவோ அல்லது மிகவும் திடமாகவோ, கைகளைக் குலுக்க கூடாது. அது உங்களைப் பற்றிய தவறான புரிந்துணர்வை ஏற்படுத்திவிடும்.