Published:Updated:

டாக்டர் நியூஸ்

டாக்டர் நியூஸ்
பிரீமியம் ஸ்டோரி
டாக்டர் நியூஸ்

தகவல்

டாக்டர் நியூஸ்

தகவல்

Published:Updated:
டாக்டர் நியூஸ்
பிரீமியம் ஸ்டோரி
டாக்டர் நியூஸ்
டாக்டர் நியூஸ்

நல்லதை உண்ணுங்கள்; கெட்டதைத் தவிருங்கள்!

ருவர், `நல்ல உணவைச் சாப்பிட வேண்டும்’ என நினைக்கிறார்; இன்னொருவர், `கெட்ட உணவைச் சாப்பிட்டுவிடக் கூடாது’ என்று நினைக்கிறார். இருவரில் யாருடைய எண்ணம் சிறப்பானது? மேலோட்டமாகப் பார்த்தால், இரண்டுமே ஒன்று எனத் தோன்றலாம். ஆனால் நிபுணர்கள் `முன்னேற்ற கவனம்’, `தடுத்தல் கவனம்’ என  இரண்டாகப் பிரிக்கிறார்கள். முன்னேற்ற கவனம்... `உடல்நலத்துக்கு உகந்த உணவுகளை உட்கொள்ள வேண்டும்’ என்று நினைப்பது; தடுத்தல் கவனம்... `தீங்கு விளைவிக்கும் உணவுகளைத் தடுக்க வேண்டும்’ என்று நினைப்பது. `இரண்டாம் வகையைவிட முதல் வகையைச் சேர்ந்தவர்கள்தாம் ஊட்டச்சத்து பற்றி அதிகம் தெரிந்துகொள்கிறார்கள். அதன் மூலம் தங்களின் உணவுப் பழக்கத்தை மேம்படுத்தி, பலனடைகிறார்கள்’ என்கிறது தைவானில் நடந்த அண்மைய ஆய்வு. இதன்படி, `கெட்டதை உண்ணக் கூடாது’ என்று நினைப்பவர்களுக்குப் பெரிய பலன் எதுவும் கிடைப்பதில்லையாம்; `நல்லதை உண்ண வேண்டும்’ என்ற மனப்போக்குதான் பலனளிக்கும் மாற்றங்களைத் தருமாம். 

இயல்பாக வாழச்செய்யும் உடற்பயிற்சி!

ஒட்டுமொத்த விகடனுக்கும் ஒரே ஷார்ட்கட்!

டாக்டர் நியூஸ்



ஒரு நாட்டிலிருந்து இன்னொரு நாட்டுக்குச் செல்பவர்கள் மற்றும் இரவுப் பணி செய்பவர்கள் தொடர்ந்து ஒழுங்கற்ற நேரங்களில் வேலைக்குச் செல்லவேண்டியிருக்கிறது. இதனால் அவர்கள் சரியான நேரத்துக்குத் தூங்க முடியாமல் சிரமப்படுகின்றனர். இதற்குக் காரணம், கண்ட நேரத்தில் தூங்கி, கண்ட நேரத்தில் எழுந்து கண்ட நேரத்தில் சாப்பிடுவதால், இவர்களின் உடல் கடிகாரங்கள் குழம்பிவிடுகின்றன. உலகெங்கும் பல்லாயிரக்கணக்கானோர் சந்தித்துவரும் இந்தப் பிரச்னைக்கு இப்போது ஒரு புதிய தீர்வு கிடைத்திருக்கிறது. அரிஸோனா மாநிலப் பல்கலைக்கழகம் நடத்திய ஓர் ஆய்வில், உடற்பயிற்சி மூலம் மனித உடல் கடிகாரத்தை விரும்பியபடி மாற்றியமைக்க முடியும் என்பது தெரியவந்துள்ளது. எடுத்துக்காட்டாக, காலை 7 மணிக்கு அல்லது மதியம்     1 முதல் 4 மணிக்குள் உடற்பயிற்சி செய்தால் உடல் கடிகாரம் பின்னோக்கி நகர்கிறதாம், இரவு 7 முதல் 10 மணிக்குள் உடற்பயிற்சி செய்தால் அது பின்னோக்கி நகர்கிறதாம்.ஆக, ஒழுங்கற்ற நேரங்களில் பணிபுரிபவர்கள் அதற்கேற்பத் தங்களது உடற்பயிற்சி நேரத்தை மாற்றியமைத்தால், உடல் கடிகாரத்தை ஒழுங்குபடுத்தலாம்; ஓரளவு இயல்பான வாழ்க்கையைப் பெறலாம்.

மூச்சை இழுத்து யோசித்தால், நல்ல தீர்வு கிடைக்கும்!

தேர்வில் ஏதாவது கேள்விக்குப் பதில் தெரியாவிட்டால், ‘மூச்சை நன்றாக இழுத்துவிட்டு யோசி’ என்று மாணவர்களுக்கு அறிவுரை சொல்வார்கள். `அதன் மூலம் கவனம் அதிகரிக்கும்; முன்னர் மறந்துபோன விஷயங்கள்கூட நினைவுக்கு வரும்’ என்று நம்பப்படுகிறது. இந்த நம்பிக்கைக்கு இப்போது ஓர் அறிவியல் அடிப்படையும் கிடைத்திருக்கிறது. இஸ்ரேலைச் சேர்ந்த வீஜ்மன் அறிவியல் கல்விக்கழகம் நடத்திய ஆய்வு ஒன்றில், மூச்சை உள்ளிழுக்கும்போது மனித மூளை இன்னும் சிறப்பாகச் செயல்படுவது தெரியவந்திருக்கிறது. இந்த ஆய்வில் பங்கேற்றவர்களிடம் பல கேள்விகள் கேட்கப்பட்டன. பதில் சொல்லும்போது, ஒவ்வொரு முறை மூச்சை உள்ளிழுத்தபோதும் அவர்களுடைய சிந்தனை மேம்பட்டிருப்பதைக் கண்டறிந்திருக்கிறார்கள்; முன்பைவிட, தகவல்கள் தெளிவாகச் செயல்முறைப்படுத்தப்படுவதையும் கண்டறிந்திருக்கிறார்கள். அடுத்த முறை ஏதேனும் ஒரு சவால் வரும்போது, ஒரு முறை மூச்சை நன்கு உள்ளிழுத்தபடி யோசியுங்கள், தீர்வு கிடைக்கலாம்.

டாக்டர் நியூஸ்

ஆரஞ்சு ஜூஸ் அருந்துவது நல்லதா?

ஆரஞ்சு ஜூஸ், நம் அனைவருக்குமே பிடிக்கும். ஆனால், கடைகளில் விற்கப்படும் ஆரஞ்சு ஜூஸில் அதிகச் சர்க்கரை சேர்க்கிறார்கள். அதனால், அந்த ஜூஸைத் தொடர்ந்து அருந்துவது உடல்நலனுக்கு ஆகாது என்று நிபுணர்கள் பயமுறுத்துகிறார்கள். இந்தக் குழப்பத்தைத் தீர்க்கும்விதமாக, ஆரஞ்சுச் சாற்றை ஆதரிக்கும் ஆய்வுக் கட்டுரை சமீபத்தில் வெளியாகியிருக்கிறது.

பிரிட்டிஷ் ஊட்டச்சத்து இதழில் வெளியான அந்தக் கட்டுரையின்படி, நாள்தோறும் ஆரஞ்சுச் சாறு அருந்துபவர்களின் மூளையில் ரத்தம் உறைவதற்கான வாய்ப்பு 24 சதவிகிதம் குறைய வாய்ப்பிருக்கிறது. அதாவது, அவர்களுக்குப் பக்கவாதம் வருவதற்கான வாய்ப்பு கிட்டத்தட்ட கால்வாசி குறைகிறது. இதேபோல், ஆரஞ்சுச் சாற்றைத் தொடர்ந்து அருந்துபவர்களின் ரத்தக்குழாய்கள் சேதமடைவதற்கான வாய்ப்பு 12 சதவிகிதம் குறைகிறதாம். இதன் மூலம், அவர்களுக்கு இதயம் சார்ந்த பிரச்னைகள் வரும் வாய்ப்பு அரிதாகிறதாம்.

இந்த ஆய்வு முடிவுக்குப் பிறகும், ஆரஞ்சு ஜூஸில் சேர்க்கப்படும் சர்க்கரையை எண்ணிக் கவலைப்படுபவர்கள், நேரடியாக ஆரஞ்சுப் பழத்தையே சாப்பிட்டுவிடலாம் அல்லது கடைகளில் ஆரஞ்சு ஜூஸ் அருந்தாமல் வீடுகளில் நாமே தயாரித்து அருந்தலாம். அதில் நிறைய நன்மைகள் உள்ளன.

டாக்டர் நியூஸ்

கண்நோய்களை குணப்படுத்தும் ஜெல்!

கண்ணின் விழிப்பரப்பில் ஏற்படும் காயங்களை ஆற்ற, தற்போது அறுவை சிகிச்சை தேவைப்படுகிறது. உலகெங்கும் பல்லாயிரக்கணக்கானோர் இந்தப் பிரச்னைகளுக்காக அறுவை சிகிச்சை செய்துகொள்கிறார்கள். இதனால் வேறு சில சிக்கல்கள் ஏற்படவும் வாய்ப்பிருக்கிறது. தற்போது, விழி தொடர்பான பிரச்னைகளை குணப்படுத்த ஒரு ஜெல் கண்டுபிடிக்கப்பட்டிருக்கிறது. `Science Advances’ என்ற இதழில் சமீபத்தில் வெளியான ஆய்வுக் கட்டுரையொன்றில் இந்தத் தகவல் தெரியவந்திருக்கிறது. இந்த ஜெல் பார்ப்பதற்குத் தெளிவாகக் காணப்படும்; இதை உபயோகிப்பதும் எளிது. ஆனால், இதன் மீது நீல ஒளி படும்போது அது கெட்டிப்பட்டுவிடும். இயற்கையான கருவிழிப்படலத்தின் தன்மைகளை ஏற்றுக்கொள்ளும். அதன் பிறகு, கார்னியா செல்கள் அதனுடன் இணைந்து வளரத் தொடங்கும். இதன் மூலம், விழிசார்ந்த பல்வேறு பிரச்னைகள் எளிதில் குணமாகும். தற்போது பரிசோதனை நிலையிலுள்ள இந்த மருந்து, பொதுமக்களின் பயன்பாட்டுக்கு வர நாளாகும். ஆனால், அதிகச் செலவாகும், சிக்கலான பல அறுவை சிகிச்சைகளை இதன் மூலம் குறைக்கலாம் என்ற நம்பிக்கை உண்டாகியிருக்கிறது.

டாக்டர் நியூஸ்

வயதானவர்களின் மனநலனுக்கு உதவும் நட்ஸ்!

`வயது அதிகரிப்பதால் சிந்தனை, நினைவாற்றல் மற்றும் தகவல்களைப் புரிந்துகொண்டு செயல்படும் வேகத்தில் பிரச்னைகள் வருவது இயல்பே. அதே நேரம், இவற்றைக் கணிசமாகக் குறைக்க ஒரு வழி இருக்கிறது’ என்கிறது சமீபத்திய ஆராய்ச்சி ஒன்று. தெற்கு ஆஸ்திரேலியப் பல்கலைக்கழகத்தின் ஆய்வாளர்கள் சீனாவில் நடத்திய இந்த ஆய்வின்படி, நாள்தோறும் சுமார் 10 கிராம் நட்ஸ் சாப்பிடுபவர்களின் சிந்தனை, புரிந்துகொள்ளும் திறன் மற்றும் நினைவாற்றலில் 60 சதவிகிதம்வரை முன்னேற்றம் இருக்கக்கூடும் என்று தெரிகிறது. இதன் மூலம் வயது சார்ந்த மனநலப் பிரச்னைகளைக் குறைக்கலாம். ஆரோக்கியமான கொழுப்பு மற்றும் நார்ச்சத்து நிறைந்தவை நட்ஸ். `இவற்றால் கொலஸ்ட்ராலின் அளவு குறையும்; அறிவாற்றல் நலம் பெருகும்’ என்று பலன்களை அடுக்குகிறார்கள் நிபுணர்கள். வயதானவர்கள் உடல்நலத்தைப்போலவே மனநலத்தையும் கவனித்துக்கொள்ள வேண்டும். அதற்கு, நாள்தோறும் உணவுடன் சிறிதளவு நட்ஸ் சேர்த்துக்கொள்வது நல்லது.

என்.ராஜேஷ்வர்

டாக்டர் நியூஸ்
டாக்டர் நியூஸ்

தூக்கத்திலிருந்து  விழித்ததும், சரியாக ஐந்து நிமிடங்களில் கண்ட கனவின் பாதியை மூளை மறந்துவிடும். 10 நிமிடங்களில் 90 சதவிகிதத் தகவல்கள் மறந்துபோகும்.   

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism