Election bannerElection banner
Published:Updated:

மழைக்காலத்தில் சளி, காய்ச்சல் வராமலிருக்க என்ன சாப்பிடலாம்? சித்த மருத்துவர் விளக்கம்

Cold
Cold ( pixabay )

மழைக்காலத்தில் நீர் அருந்துவது குறைந்துவிடும் என்பதால் நீர்க்காய்கறிகளைச் சேர்த்துக்கொள்ளலாம். ஆனால் ஜலதோஷம், சைனஸ் மற்றும் அலர்ஜி உள்ளவர்கள் அவற்றைத் தவிர்ப்பது நல்லது. அப்படியே சேர்த்துக்கொண்டாலும் மிளகு கொஞ்சம் அதிகமாகச் சேர்த்து சூடாகச் சாப்பிடலாம்.

மழை நல்லதுதான். ஆனால், அதில் நனைவதாலோ, தட்பவெப்பநிலையில் அது மாற்றத்தை ஏற்படுத்துவதாலோ மூக்கடைப்பில் தொடங்கி இருமல், தொண்டை கரகரப்பு, தலைவலி, ஜலதோஷம், நெஞ்சுச்சளி, காய்ச்சல் எனப் பாடாய்ப்படுத்தலாம். இத்தகைய பிரச்னைகள் ஏற்படாமலிருக்க முன்னெச்சரிக்கையாக நாம் சில நடவடிக்கைகளை எடுக்கவேண்டியது அவசியம். குறிப்பாக உணவுமுறையில் சில மாற்றங்களைச் செய்வதன்மூலம் மழைக்காலப் பிரச்னைகளில் இருந்து நம்மைக் காத்துக்கொள்ள முடியும்.

Rain
Rain
pixabay

மழைக்காலத்தில் தொல்லைகள் ஏற்படாமலிருக்க என்னென்ன செய்ய வேண்டும், எவற்றையெல்லாம் தவிர்க்க வேண்டும், என்னென்ன உணவுகளைச் சாப்பிட வேண்டும் என்று சித்த மருத்துவர் வி.விக்ரம்குமாரிடம் கேட்டோம். எளிமையான ஆலோசனைகளை அவர் சொன்னார்.

``மழைக்காலத்தில் வெப்பம் தணிந்து குளிர்ச்சியான சூழல் நிலவும். தட்பவெப்பநிலையில் ஏற்படும் மாற்றம் காரணமாக ஜலதோஷத்தில் தொடங்கி காய்ச்சல் எனப் பல்வேறு நலக்குறைவுகள் ஏற்படும். சைனஸ், ஆஸ்துமா, மூட்டுவலி உள்ளவர்களுக்கு இந்தச் சூழல் அதிக அவதியைக் கொடுக்கும் என்பதால் அவர்கள் மிகவும் எச்சரிக்கையாக இருக்க வேண்டும். பொதுவாக பிரச்னை உள்ளவர்கள் என்றில்லாமல் அனைவருமே மூன்றுவேளையும் சூடான உணவுகளை உட்கொள்ள வேண்டியது அவசியம்.

knee pain
knee pain
pixabay

காலை உணவின்போது இணை உணவாக தூதுவளை சட்னி, துவையல், இஞ்சித் துவையல் சேர்த்துக்கொள்ளலாம். மதிய உணவில் கொள்ளுத் துவையல், கொள்ளு ரசம் நல்லது. தக்காளி ரசத்துக்குப் பதில் மிளகு ரசம், கண்டதிப்பிலி ரசம் சேர்த்துக்கொள்ளலாம். மிளகு, வெள்ளைப்பூண்டு, கொள்ளு, சீரகம், திப்பிலி சேர்த்து காரக்குழம்பு செய்து சாப்பிடலாம். இவை அனைத்தையும் ஒரே நாளில் செய்யாமல் மாறி மாறிச் செய்து சாப்பிடுவது நல்லது. குளிர்ச்சியைக் குறைத்து சூட்டை அதிகரிக்கிறேன் என்ற பெயரில் அதிக சூட்டை ஏற்படுத்திவிடக் கூடாது.

மழைக்காலத்தில் நீர் அருந்துவது குறைந்துவிடும் என்பதால் நீர்க்காய்கறிகளைச் சேர்த்துக்கொள்ளலாம். ஆனால், ஜலதோஷம், சைனஸ் மற்றும் அலர்ஜி உள்ளவர்கள் அவற்றைத் தவிர்ப்பது நல்லது. அப்படியே சேர்த்துக்கொண்டாலும் மிளகு கொஞ்சம் அதிகமாகச் சேர்த்து சூடாகச் சாப்பிடலாம். பழங்கள் குளிர்ச்சியை ஏற்படுத்திவிடும் என்று பலர் மழைக்காலத்தில் பழம் சாப்பிட யோசிப்பார்கள். பழங்கள் நோய் எதிர்ப்பு சக்தியைக் கொடுக்கும் என்பதால் அவற்றுடன் மிளகுத்தூள் சேர்த்துச் சாப்பிடுவது நல்லது.

Fever
Fever
pixabay

குளிர்ச்சியான சூழல் நிலவுவதால் ஆடாதொடை மணப்பாகு நல்ல பலன் தரும். ஆடாதொடை இலைச்சாற்றை வெல்லப்பாகில் சேர்த்துக் காய்ச்சி சூடாக அருந்தலாம். கெட்டிப்பட்டுவிட்டால் அதை மிட்டாய்போலவும் சாப்பிடலாம்.

உண்ணும் உணவு எதுவாக இருந்தாலும் அவ்வப்போது தயார் செய்து சாப்பிடுவதே நல்லது. ஃப்ரிட்ஜில் வைத்துச் சாப்பிடுவது எப்போதுமே நல்லது இல்லை என்றாலும் மழைக்காலத்தில் கண்டிப்பாகச் சாப்பிடக் கூடாது. அதேபோல் இரவில் தயிர், கீரை போன்றவற்றைச் சேர்க்கக் கூடாது. மிளகு, சீரகம். கடலைப்பருப்பு, கொள்ளுப் பயறு சேர்த்து வறுத்துப் பொடியாக்கி அவ்வப்போது உணவில் சேர்த்துக்கொள்ளலாம்.

மழைக்காலத்தில் சளி, காய்ச்சல் வராமலிருக்க என்ன சாப்பிடலாம்? சித்த மருத்துவர் விளக்கம்
pixabay

மாலைவேளைகளில் வடை, போண்டா, பஜ்ஜி சாப்பிடுவதைத் தவிர்ப்பது நல்லது. குறிப்பாக எண்ணெய் பலகாரங்களைத் தொடாமலிருப்பது நல்லது. அப்படியே சாப்பிட விரும்பினாலும் கல்யாண முருங்கை வடை, கற்பூரவல்லி பஜ்ஜி செய்து சாப்பிடலாம்.

சுக்கு, மிளகு, தனியா, ஏலக்காயைப் பொடியாக்கி நீர் விட்டுக் கொதிக்க வைப்பதே சுக்கு வெந்நீர் அல்லது சுக்கு காபி. இதில் பனைவெல்லம் சேர்த்துச் சாப்பிடுவது நல்லது.

Vikaram kumar
Vikaram kumar

காய்கறிகளில் செய்த சூப்பில் மிளகுத்தூள் சேர்த்துச் சாப்பிடலாம். நாட்டுக்கோழி, நண்டு, ஆட்டுக்கால் சூப் செய்து சாப்பிடுவது நல்லது. இரவில் பூண்டுப்பால் அருந்துவது பலன் தரும். பாலில் தோல் உரித்த பூண்டுப்பற்களைச் சேர்த்து வேகவைக்க வேண்டும். ஓரளவு வெந்ததும் மஞ்சள் தூள், மிளகுத் தூள், பனங்கற்கண்டு சேர்த்துக் கடைந்து சாப்பிட்டால் சளித்தொந்தரவு, மூக்கடைப்பு நீங்கி இரவில் நிம்மதியான உறக்கம் வரும்'' என்றார்.

Election bannerElection banner
அடுத்த கட்டுரைக்கு