Published:Updated:

க்வாரன்டீனுக்குப் பிறகு வீட்டைச் சுத்திகரிப்பது எப்படி?

வரும்முன் காப்போம்!

பிரீமியம் ஸ்டோரி
அழையா விருந்தாளிகளைச் சமாளிப்பது எப்போதுமே சவாலான காரியம்தான். கொரோனாவையும் தற்போது அந்த லிஸ்ட்டில் சேர்த்துவிடலாம்.

எதிர்பாராத நேரத்தில் நம் பிரியத்துக்குரியவர்களின் வீடுகளுக்குள்ளும் ஏன் நமது வீட்டுக்குள்ளுமே நுழைந்துவிடுகிறது கொரோனா வைரஸ் (கோவிட்-19) என்ற நுண்ணுயிரி. கொரோனா வைரஸால் பாதிக்கப்பட்டவர்களில் தீவிர பாதிப்புள்ளவர்களுக்கு மருத்துவமனை சிகிச்சை அவசியம் என்பதால், அறிகுறிகளற்றவர்கள், லேசான மற்றும் மிதமான பாதிப்புள்ளவர்களை வீடுகளிலேயே க்வாரன்டீன் செய்யச் சொல்கின்றனர் மருத்துவர்கள். கோவிட்-19 தொற்றுநோயால் பாதிக்கப்பட்டவர்கள், கழிவறையுடன் கூடிய தனி அறை வசதி உள்ள வீட்டில் இருந்தால், ஹோம் க்வாரன்டீனுக்கு அனுமதிக்கப்படுகின்றனர்.

 அஷ்வின் கருப்பன்
அஷ்வின் கருப்பன்

ஒரு நோயாளி ஹோம் க்வாரன்டீனிலிருக்கும்போதும், அது நிறைவடைந்த பிறகும் அவர் தங்கியிருக்கும் அறையை, புழங்கிய பொருள்களையெல்லாம் என்ன செய்ய வேண்டும் என்ற சந்தேகம் நம்மில் பலருக்கும் இருக்கும். ''நோயாளி க்வாரன்டீன் காலத்தில் இருக்கும்போதும் அது நிறைவடைந்த பிறகும் வீட்டைச் சுத்திகரிப்பதற்கு ஒரே மாதிரியான வழிமுறைகளையே பின்பற்ற வேண்டும்'' என்று சந்தேகம் தீர்க்கிறார், சென்னையைச் சேர்ந்த தொற்றுநோயியல் மருத்துவர் அஷ்வின் கருப்பன்.

கழிவறை

நோயாளி ஒவ்வொரு முறை கழிவறையைப் பயன்படுத்தி முடித்தபிறகும் டாய்லெட் சீட், கைப்பிடி, ஹேண்ட் பைப் என அனைத்தையும் கிருமிநாசினி திரவம் கொண்டு சுத்தப்படுத்துவது நல்லது. முடியாதபட்சத்தில் ஒருநாளைக்கு இரண்டு முறையாவது கழிவறையைச் சுத்தம் செய்ய வேண்டும்.

க்வாரன்டீனுக்குப் பிறகு வீட்டைச் சுத்திகரிப்பது எப்படி?

காற்றோட்டமுள்ள தனியறை

நோயாளி க்வாரன்டீனி லிருக்கப் போகும் அறை கழிவறை வசதியுடன் கூடிய தனியறையாக இருக்க வேண்டும். அறை மற்றும் கழிவறையை அவரைத் தவிர வேறு யாரும் பயன்படுத்தக் கூடாது. அறையில் ஏ.சியின் பயன்பாட்டைத் தவிர்க்க வேண்டும். நல்ல காற்றோட்டமிருக்கும் அறையாக இருக்க வேண்டும். கூடியவரையில் அந்த அறையில் குறை வான பொருள்கள், ஃபர்னிச்சர்கள் இருக்குமாறு பார்த்துக்கொள்ள வேண்டும். நோயாளி இருக்கும் அறைக்குக் குடும்பத்தில் ஒருவர் மட்டுமே சென்றுவர வேண்டும். நோயாளிக்கான அனைத்து தேவைகளையும் அவர் ஒருவர்தான் பார்த்துக் கொள்ள வேண்டும்.

க்வாரன்டீனுக்குப் பிறகு வீட்டைச் சுத்திகரிப்பது எப்படி?

ஹைட்ரோகுளோரைடு கிருமிநாசினி

நோயாளியிருக்கும் அறையை ஒரு சதவிகிதம் ஹைட்ரோ குளோரைடு சேர்க்கப்பட்ட கிருமி நாசினி கொண்டு தினமும் சுத்தப்படுத்த வேண்டும். கட்டில் கால்கள், தலை வைக்கும் பகுதி, அறையிலுள்ள நாற்காலி, மேஜை உள்ளிட்ட அனைத்துப் பொருள்களையும் கிருமி நாசினி கொண்டு சுத்தப்படுத்த வேண்டும். அவர் அதிகம் பயன்படுத்தும் டி.வி ரிமோட், செல்போன் ஆகியவற்றைப் பஞ்சில் சானிட்டைசரைத் தோய்த்துத் துடைக்கலாம். சுவரைத் துடைக்க வேண்டிய அவசியமில்லை. நோயாளி அடிக்கடி பயன்படுத்திய பொருள் களைச் சுத்தம் செய்யும்போது அவற்றிலிருந்து மற்றவர்களுக்கு வைரஸ் பரவுவதற்கான வாய்ப்பு வெறும் ஐந்து சதவிகிதம்தான்.

க்வாரன்டீனுக்குப் பிறகு வீட்டைச் சுத்திகரிப்பது எப்படி?

மாஸ்க்

க்வாரன்டீனில் இருக்கும் நோயாளிகள் கட்டாயம் முகக் கவசம் அணிந்துகொள்ள வேண்டும். தூங்கும்போது மட்டும் அதைக் கழற்றி வைத்துவிடலாம். நோயாளியுடன் புழங்கும் நபருக்கும் முகக்கவசம் அவசியம். நோயாளியின் படுக்கை விரிப்புகளைப் படுக்கையிலிருந்து எடுக்கும்போது அதை கவனமாகக் கையாள வேண்டும். நோயாளியின் வியர்வை, எச்சில் போன்றவை அதில் படிந்திருக்கலாம் என்பதால் அறையைச் சுத்தப்படுத்தும்போது முகக்கவசம், கையுறை அணிந்து கொள்ள வேண்டும்.

க்வாரன்டீனுக்குப் பிறகு வீட்டைச் சுத்திகரிப்பது எப்படி?

க்வாரன்டீனுக்குப் பிறகும் சுத்தம்

நோயாளிக்கு க்வாரன்டீன் நிறைவடைந்த பிறகு வீடு முழுவதையும் கிருமி நாசினி கொண்டு சுத்தப்படுத்த வேண்டும். நோயாளி இருந்த தனியறை யிலிருக்கும் படுக்கை விரிப்பு, தலையணை உறை, மேசை விரிப்பு, ஜன்னல் திரைச்சீலை என அனைத்தையும் மாற்றிவிட வேண்டும். கழிவறையிலிருக்கும் வாளி, கப் போன்றவற்றையும் சோப் போட்டு கழுவி வெயிலில் காய வைத்துப் பின்னர் பயன்படுத்த வேண்டும்.

க்வாரன்டீனுக்குப் பிறகு நோயாளி பயன்படுத்திய பொருள்களை மீண்டும் பயன்படுத்தலாமா என்ற குழப்பம் அனைவருக்கும் வரலாம். கொரோனா வைரஸைப் பொறுத்தவரையில் உடலுக்கு வெளியில் எந்த இடத்திலும் 72 மணி நேரத்துக்குப் பிறகு வாழாது. வீட்டையும் நோயாளி பயன்படுத்திய தனியறையையும் நாள்தோறும் சுத்தம் செய்தாலே போதும் கிருமிகள் அழிந்துவிடும். க்வாரன்டீன் காலம் நிறைவடைந்த பிறகு நோயாளி பயன்படுத்திய பொருள்களை நன்கு சுத்தம் செய்த பின் மீண்டும் பயன்படுத்தலாம்.

க்வாரன்டீனுக்குப் பிறகு வீட்டைச் சுத்திகரிப்பது எப்படி?

பாத்திரங்கள்

நோயாளி சாப்பிடுவதற்காகப் பயன்படுத்தும் பாத்திரங்களைப் பாத்திரம் தேய்க்கும் சோப் அல்லது பவுடரால் தேய்த்துக் கழுவினால் போதுமானது. படுக்கை விரிப்பு, தலையணை உறைகளை இரண்டு நாள்களுக்கு ஒருமுறை மாற்றுவது நல்லது. நாள்தோறும் ஆடைகளை மாற்றி டிடர்ஜென்ட்டால் துவைத்து விடுவது நல்லது. நோயாளியால் முடியும் என்றால் அவரே தனக்கான வேலைகளைச் செய்துகொள்ளலாம்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு