பதில் சொல்கிறார் சென்னையைச் சேர்ந்த, சரும மருத்துவர் கிருத்திகா ரவீந்திரன்.

``பல பெண்களும் சந்திக்கிற பரவலான பிரச்னை இது. நடக்கும்போது இரண்டு தொடைகளும் ஒன்றோடு ஒன்று உரசி, அந்த இடத்திலுள்ள வியர்வை, ஈரம் எல்லாம் சேர்ந்து அந்தப் பகுதியிலுள்ள சருமம் எரிந்ததுபோலாகிவிடும். சிவந்துவிடும். தொட்டாலே எரியும். ஆற ஆற அந்தப் பகுதி கருத்துவிடும். உடல் பருமன் அதிகமுள்ளோருக்கு இந்தப் பிரச்னை அதிகம் ஏற்படும். நிறைய உடற்பயிற்சிகள் செய்வோர், தொடைப் பகுதியில் அதிக வியர்வை இருப்பவர்கள் போன்றோருக்கும் வரும்.

இரண்டு தொடைகளும் உரசாமலிருக்கும்படி இடையில் ஒரு தடையாக உடையை அணிவது ஒரு தீர்வு. அந்தப் பகுதியில் காற்றோட்டமில்லாததால் வியர்வை அதிகம் சுரப்பதைத் தடுக்கும்படி காட்டன் உடைகளை அணிவது அவசியம்.

நைலான் மாதிரியான உடைகளைத் தவிர்க்கவும். உடற்பயிற்சி செய்வோர், தொடைகள் உரசுவதையும் வியர்ப்பதையும் தவிர்க்க ஷார்ட்ஸ் அல்லது டைட்ஸ் அணிந்துகொள்ளலாம். உள்ளாடை சரியாக இல்லாவிட்டாலும் இந்த பிரச்னை வரலாம் என்பதால் `பாக்ஸர் ஷாட்ஸ்' போன்ற உள்ளாடையை மாற்றிப் பார்க்கலாம்.