இந்த பாதிப்பின் ஆரம்ப அறிகுறிகளில் கண்களில் நீர் வடிதல், கண்கள் களைத்துப்போன மாதிரி தெரிவது, முறைத்துப் பார்ப்பது போன்று தெரிவது, எழுத்துகள் இரண்டிரண்டாகத் தெரிவது, கண்களில் வலி, கண்கள் சிவந்துபோவது, பார்வை மங்கலாகத் தெரிவது, கண்களை முழுவதுமாக மூட இயலாதது போன்றவை உணரப்படலாம். பாதிப்பு தீவிரமாகும் நிலையில்தான் கண்கள் முன்னே தள்ளியது போன்ற தோற்றம் வரும்.

தைராய்டு சுரப்பியில் பாதிப்பு உள்ளவர்களுக்கு இந்தப் பிரச்னை வரலாம். ஆனால், தைராய்டு பாதித்த எல்லோருக்கும் இது வருவதில்லை.

மேற்குறிப்பிட்ட அறிகுறிகள் இருந்தால் தைராய்டு பரிசோதனை செய்து அதன் அளவுகளை உறுதிசெய்துகொள்ளலாம். அது அசாதாரணமாகத் தெரிந்தால், கண் மருத்துவரை அணுகி, முறையான கண் பரிசோதனை மேற்கொள்ள வேண்டும்.

பெரும்பாலான அறிகுறிகளுக்கு கண்களின் வறட்சியைப் போக்கும் லூப்ரிகன்டுகள், ஸ்டீராய்டுகள், ரேடியோதெரபி மற்றும் மருந்துகள் போன்றவற்றால் சிகிச்சையளிக்க முடியும்.

பாதிப்பு தீவிரமாகும் நிலையில் சிலருக்கு அறுவைசிகிச்சை தேவைப்படலாம். நோயைத் தடுப்பதற்கான ஒரே வழி, தைராய்டு ஹார்மோன் அளவைக் கட்டுக்குள் வைத்திருக்க வேண்டும் மற்றும் தைராய்டு, சர்க்கரைநோய் போன்றவை உள்ளவர்கள், குறிப்பிட்ட இடைவெளியில் கண் மருத்துவரை அணுகி பரிசோதனை மேற்கொள்ள வேண்டியதும் அவசியம்.

- பார்ப்போம்.

- ராஜலட்சுமி

.......................

``அடிக்கடி கைகளைக் கழுவுவது, தனிமனித இடைவெளியைப் பின்பற்றுவதைப் போலவே கோவிட் காலத்தில் கண்களுக்கும் பாதுகாப்பு தேவை.

கொரோனா காலத்தில் கான்டாக்ட் லென்ஸ் அணிவது பாதுகாப்பானதா என்று நிறைய பேர் கேட்கிறார்கள். கண்ணாடி அணிவதுதான் பாதுகாப்பானதா, லென்ஸைத் தவிர்க்க வேண்டுமா என்கிறார்கள். லென்ஸை அணிவதற்கு முன் கைகளை நன்கு கழுவ வேண்டும். அதேபோல லென்ஸை அகற்றுவதற்கு முன்பும் கைகளைக் கழுவ வேண்டும். கண்ணாடி, லென்ஸ் இரண்டுமே பாதுகாப்பானவைதான்.

நீங்கள் கண்ணாடி அணிகிறவர் என்றால் கூடியவரை அதைக் கழற்ற வேண்டாம். வாகனம் ஓட்டும்போதும், பயணத்தின்போதும் சன் கிளாஸ் அணியலாம். தொற்றுக்குள்ளானவர்களுடன் இருக்கும்போது பாதுகாப்புக் கண்ணாடிகளை அணிவதும் ஓகே."

......................

பார்வை தொடர்பான உங்கள் கேள்விகளை கமென்ட் பகுதியில் எங்களுக்கு அனுப்புங்கள். பதில் சொல்லக் காத்திருக்கிறார் டாக்டர் வசுமதி வேதாந்தம்.